Luku 12 - Ika

Isi Nke Mmẹbụọ Gbakwọnị Nị Ihunnaị Ọsọ!

¹ Kẹ ịhịan dọn rị e ruhẹ ọda-ọda, a zọgbudẹ ibe wẹ, Jizọsị nọ bu ụzọ sị ndị nsọnmazụụn a, “Kpachanpụ nị ẹnya makẹ yisti ndị Itu-Farisi — hụn wụ ihunnaị wẹ.

² Onwọnni ihiẹn kpumẹni hụn jẹnkọlẹni d'e kpupụ; onwọnni ihiẹn zuerini hụn jẹnkọlẹni d'a wa.

³ Ya wụ, ihiẹn ọwụlẹ ụnụ ku imẹ ishi, wẹ jẹnkọ d'a nụ a ifọnrin-ifọn; ihiẹn ọwụlẹ ụnụ gụnma ụzọ ka-ụka ku imẹ mmughẹ, wẹ sikọ d'e gi ẹ yi oro elu ụlọ.

Onyẹ Wẹ K'a Tụ Egun Ẹ

⁴ “Ndị ọwụ m, m rị a gwa ụnụ, atụlẹ ni egun ndị e gbu ẹhụ sụọ kanị asa wẹ ẹka mẹkarị ọhụn.

⁵ Kama, nị m ghọsị ụnụ onyẹ ụnụ sikọ d'a tụ egun ẹ: tụ nị egun Onyẹ hụn e gbugụ ẹhụ, ọ sazịkwọ ẹka tụ ịhịan ye ọkụn-mmọn. Ẹghẹẹ, ịya kẹ ụnụ k'a tụ egun ẹ!

⁶ Ẹlẹ ‘ịkọbọ’ ẹbụọ sụọ kẹ w'e re achụ isẹn? Kanị, Osolobuẹ ara zọdẹ akpohu imẹ nnụnụ ndịnị.

⁷ Osolobuẹ a gụngụọdẹ ntutu rị ụnụ isi. Atụlẹ ni nwan egun: ụnụ ka achụ mkpa a rị ẹnya Osolobuẹ — kẹ wẹ buhanlẹ ọda!

Ikweri N'ị Wụ Nke Kraịstị Lẹ Ịghọrị Nị Y'ẹlẹ Nke Ẹ

⁸ “M rị a gwapụ ụnụ ezioku, onyẹ ọwụlẹ nọ idẹnya ịhịan kweri n'ọ wụ nke m, mmẹ wụ Nwa nke Ịhịan jẹnkọ d'a nọ idẹnya ndị mmọn-ozi Osolobuẹ kwerizikwọ nị onyẹ hụ wụ nke m.

⁹ Kanị, onyẹ nọ idẹnya ịhịan ghọrị nị ẹlẹ nke m, mmẹ wụ Nwa nke Ịhịan jẹnkọ d'a nọ idẹnya ndị mmọn-ozi Osolobuẹ kuzikwọ a nị hụnyẹ ẹlẹ nke m.

¹⁰ Nị wẹ gbagharịghọ onyẹ kuja oku mmẹ wụ Nwa nke Ịhịan, kanị agbagharịkọ wẹ onyẹ kuja oku Mmọn-nsọ.

¹¹ Wẹ wejẹn ụnụ ọgwa ụlọ-ofufe mọbụ ọgwa ndị-ọkịkị mọbụ ndị-nze, ehuekwọlẹ ni uhue ihiẹn ụnụ k'e gi kinrin ọnụ ụnụ mọbụ ihiẹn ụnụ k'e ku.

¹² Makẹni, ogẹn ru, Mmọn-nsọ jẹnkọ d'a gwa ụnụ ihiẹn furu ụnụ k'e ku.”

Ilu Jesu Gi Ọdanfịn Nzuzu Ta

¹³ Okẹnnyẹ ohu rị imẹ igunrun hụ nọ sị Jizọsị, “Onyẹ-nkuzi, dodo gwa nwẹnẹ m n'o keye m ukuu nẹdi ẹnyi latọnị ẹnyi.”

¹⁴ Jizọsị nọ sị a, “Di-ẹnyi, onyẹ tumẹ m d'a hannị ụnụ ẹbụọ eṅẹn mọbụ keni ụnụ ihiẹn?”

¹⁵ Ya ọ nọzị sị igunrun hụ, “Kpachanpụkwọ nị ẹnya; gbanị nị ẹnya-uku ile ọsọ; makẹni, ẹlẹ ihiẹn bu ọda ịhịan nwọn wụ ndụn a.”

¹⁶ Ya kẹ Jizọsị nọ tanị wẹ iluni: “Ugbo ọdanfịn ohu mẹn'ẹ ihiẹn ọda-ọda.

¹⁷ Ọ sị enwẹn ẹ, ‘Enwọn m ebe m'e butọ ihiẹn ugbo m. Kị m'e mẹ nwan?’

¹⁸ Ọ sị enwẹn ẹ, ‘Lee ihiẹn m sikọ d'e mẹ: m k'a tọtuchanrịn ọban m ile, a rụn m ndị ka wẹ e sue; ebẹhụ kẹ m jẹnkọ d'e dọnmẹ ọka m lẹ ihiẹn m ndị ọzọ.

¹⁹ Ogẹn hụ, m k'a sị enwẹn m, “Enwẹn m, y'e nwọngụọ ihiẹn ọda-ọda, o k'e zu i ahụa ole-lẹ-ole lalanị! Eyezilẹ enwẹn i nsọngbu! Ri! Ra! Rimẹ ụwa!” ’

²⁰ Kanị Osolobuẹ nọ sị a, ‘Onyẹ nzuzu! Uhinhinni kẹ wẹ jẹnkọ d'a napụ ị ndụn ị! Onyẹ jẹnkọ nwan d'e nwọnrin ihiẹn ndịnị ile i rụntọ?’ ”

²¹ Igi mẹkin iluni, Jizọsị nọ sị, “Ẹnịna k'o k'a rịnị ndị hụ a kpatọnị enwẹn wẹ akụ-lẹ-ụba kanị ẹlẹ wẹ ọdanfịn imẹ ihiẹn Osolobuẹ.”

Ehuelẹ Uhue, Gi Osolobuẹ Dọn Ẹnya

²² Ya Jesu nọ sị ndị nsọnmazụụn a, “Ya kẹ m gi rị a gwa ụnụ ehuelẹ uhue ihiẹn ụnụ jẹnkọ d'e ri gi rị ndụn mọbụ ihiẹn ụnụ jẹnkọ d'e yi.

²³ Ndụn ka ihiẹn-oriri; ẹhụ ka ẹkwa.

²⁴ Lekpọ nị nnụnụ: w'a ra kụn ihiẹn, w'ara ghọtọ; enwọn wẹ ebe w'e kpọntọ ihiẹn — kẹ mmughẹ kẹ ọban, kanị Osolobuẹ hụ e ye wẹ ihiẹn-oriri! Bụ ụnụ ka mkpa a rị ọda-ọda karị nnụnụ!

²⁵ Imẹ ụnụ ile, onyẹ k'a saẹka gi uhue ọ rị e hue tọcheni mgbahunmẹ ọkụrọkụ ohu?

²⁶ Omẹni y'a sakọ ẹka mẹ ihiẹn mẹ ẹkẹrẹ ẹnịna, k'ị rị nwan e sọngbuni enwẹn i yeni ihiẹn ndị ọzọ?

²⁷ “Lekpọ ni kẹ obobo rị ọfịa dọn e sue: w'a ra lụkpọ mọbụ kpa ẹkwa — kanị, m rị a gwa ụnụ ezioku, kẹ Solomọnụ e nwọnhanlẹ ikpẹn, onwọnni ekikẹn o kẹn mahan mma kẹ hụn ọwụlẹ imẹ obobo ndịnị.

²⁸ Omẹni ẹnịna kẹ Osolobuẹ e kọn ẹfịfịa ekikẹn, ẹfịfịa w'a hụn ebeni tannị, eki fọn a tụ w'a ye ọkụn, o kọnkọ ụnụ hụn ka mma? Heuu, ndị okukwe nta!

²⁹ “Ya wụ, emẹzilẹ ni oku ihiẹn ụnụ jẹnkọ d'e ri lẹ ihiẹn ụnụ jẹnkọ d'a ra; egizilẹ n'ẹ sọngbu enwẹn ụnụ.

³⁰ Makẹni, ihiẹn ndịnị kẹ ndị ile rị elu-ụwa a chụsọnmẹ, kanị Nẹdi ụnụ a marịnghọ nị wẹ rị ụnụ mkpa.

³¹ Kama, chụmagụ ni Alị-eze ẹ, o sikọ d'e yezikwọ ụnụ ihiẹn ndịnị wẹ.

Kpatọ Akụ-lẹ-ụba Elu-igwee

³² “Ụmụ-atụnrụn m, atụlẹ ni egun, makẹni ọ sụọghọ Nẹdi ụnụ n'o ye ụnụ Alị-eze.

³³ Repụ nị ihiẹn ụnụ nwọn, we egho ẹ ye ndị igbẹnnyẹ, ya kẹ ụnụ e gi kwarị ẹkpa ghalẹni a kahị, nwọnferi akụ-lẹ-ụba imẹ elu-igwee. Ohin asakọ ẹka ru ebahụn; ẹkịka asakọ ẹka ri ihiẹn rị ebẹhụ.

³⁴ Makẹni, ebe ụnụ butọ ihiẹn ụnụ kẹ obi ụnụ jẹnkọ d'a rịzịkwọ.

Kwademẹ Ni, Nị Di-nwọnni-ẹnyi Lala

³⁵ “Kwademẹ ni ọrụn; ụnụ a mụye ukpẹ ụnụ;

³⁶ nọ nị kẹ ndị rị e che di-nwọnni wẹ n'ọ gha oriri agbamẹkụkwọ lụa, kẹni ọ lụahahụ dụ ẹka, ụnụ a gụnpụn'a ụzọ ozigbo.

³⁷ O jẹnkọ d'a rịnị idibo ndị ahụn mma omẹni di-nwọnni wẹ lụakunrun wẹ ebe wẹ mụ ẹnya, e che ẹ. M rị a gwa ụnụ ezioku, o k'a sị wẹ ri ra, ọ kwademẹ gi ẹka a e buye wẹ y'a.

³⁸ Ọ sụọn'a imẹ abalị mọbụ igirigi ụtụntụn k'o gi lụa, ọ hụn wẹ ẹrịra, o k'a rịnị wẹ mma!

³⁹ Marịnkwọ nị nị omẹni onyẹ nwọn ụlọ te marịn ogẹn onyẹ ohin e gi bịa, o ke nị a gbukpọ iwe ẹ banhan.

⁴⁰ Kwademẹzikwọ nị nwan, makẹni Nwa nke Ịhịan sikọ d'a bịa ogẹn ụnụ tụlẹni ẹnya a.”

Odibo Furu Wẹ Gi E Dọn Ẹnya Lẹ Hụn Furulẹni

⁴¹ Pita nọ sị, “Di-nwọnni-ẹnyi, ẹnyi sụọ k'ị rị a tụnị iluni ra ịhịan ile?”

⁴² Di-nwọnni-ẹnyi nọ za, “Onyẹ wụ onyẹ nlepụ-ẹnya ahụn furu wẹ gi e dọn ẹnya, marịn ihiẹn, hụn di-nwọnn'ẹ bu idibo rị iwe ẹ che ẹka, n'ọ hụn ụzọ e ye wẹ ihiẹn-oriri furu onyẹ-onyẹ ogẹn o furu?

⁴³ O k'a rịn'a mma omẹni di-nwọnn'ẹ lụakunrun ẹ ebe ọ rị e mẹ ihiẹn ahụn ọ sị a mẹ!

⁴⁴ Ezioku kẹ m rị a gwa ụnụ, di-nwọnn'ẹ jẹnkọ d'e we ihiẹn ile o nwọn che ẹ ẹka lepụ ẹnya.

⁴⁵ “Kanị, omẹni odibo hụ a sị enwẹn ẹ, ‘Di-nwọnni m e biekẹ d'a lụa’, o gbumẹ idibo ibe ẹ ili — ikẹnnyẹ lẹ ikpoho ndị ahụn wẹ buche ẹ ẹka, e ri, a ra, a ra manya a tụ,

⁴⁶ di-nwọnn'ẹ jẹnkọ d'a lụakunrun odibo hụ ụhụọhịn ọ tụlẹni ẹnya a, ogẹn ọ marịnlẹni. O k'e mẹshi ẹ ikẹn, we ẹ che ebe ndị kwerilẹni rị.

⁴⁷ “Odibo hụn marịn ihiẹn di-nwọnn'ẹ chọ bụ ọ kwademẹni mọbụ o mẹn'ẹ, wẹ sikọ d'a fịan a mkpịnsịn ọda-ọda.

⁴⁸ Kanị, odibo marịnlẹni ihiẹn di-nwọnn'ẹ chọ mẹ ihiẹn w'e gi fịan a mkpịnsịn, a fịan w'a hụn bulẹni ọda. “Ihiẹn bu ọda kẹ w'a tụ ẹnya a ẹka onyẹ wẹ ye ihiẹn bu ọda; kanị, hụn ka ọda kẹ w'a tụ ẹnya a ẹka onyẹ wẹ buche ihiẹn ka ọda ẹka.

Jesu E Kebe Ịhịan

⁴⁹ “M bịa d'a mụ ọkụn ye ụwa. K'ọ rị m, ọ dụnmagụọdẹ!

⁵⁰ Kanị wẹ jẹnkọ d'e gi afụnfụn mẹgụ m mirin-Chuku; ẹhụ efukọ m d'e ru ni e mẹgụ m ya wụ mirin-Chuku.

⁵¹ Ụnụ rị e ro ni m bịa d'e wẹhẹ udọn elu ụwa? Mba, ezioku kẹ m rị a gwa ụnụ, ẹlẹ udọn kanị nkebe!

⁵² Gha ogẹnni jẹnmẹ, mmadụ isẹn rị ụlọ sikọ d'e gi ufiri m kebe: ẹtọ hụ azụụnnị, ẹbụọ hụ azụụnnị, wẹ hụ a lụsọn ibe wẹ;

⁵³ nẹdi hụ a lụsọn nwa a okẹnnyẹ, okẹnnyẹ hụ a lụsọn nẹdi ẹ; nnẹ hụ a lụsọn nwa a okpoho, okpoho hụ a lụsọn nnẹ ẹ; nnẹ-di hụ a lụsọn nwunyẹ-nwa a, nwunyẹ hụ a lụsọn nnẹ-di ẹ.”

Ịghọta Ihiẹn Rị E Mẹni

⁵⁴ Jizọsị nọ sịzịkwọ ndị hụ, “Ụnụ hụn kẹ mirin rị e ru ibẹka ndịdan ẹnyanwụn, ụnụ e sị nị mirin jẹnkọ d'e zue; o mẹgụkwọ, o zue.

⁵⁵ Ụnụ hụnzị a nị ufere gha ẹbamịn ndịdan-mirin fehẹ, ụnụ e sị nị uwowo jẹnkọ d'a rị; o mẹgụkwọ, ọ rị.

⁵⁶ Ndị ihunnaị! Ụnụ ma kẹ w'e lee alị lẹ igwere e ku kẹ ụhụọhịn jẹnkọ d'a rị; kị haịnzị ụnụ gilẹni a saẹka e lee ihiẹn rị e mẹ ogẹnni e ku ihiẹn ọ ghọsị?

Ịyụ Lẹ Onyẹ Ikpe I Dọnkwọ Ẹgwa

⁵⁷ “Kị haịn ụnụ gilẹni a marịn ihiẹn rị mma?

⁵⁸ Lịlịma nị ịyụ lẹ onyẹ ikpe i dọn, ụnụ gini d'e ru ọgwa, amamgbe ọ dọkpụn ị ye ọka-ikpe, ọka-ikpe e we i ye onyẹ ẹwuru-ogi, ọ tụ i ye imẹ ụlọ-ngan.

⁵⁹ M rị a gwa ị ezioku, i k'a tọ ebahụn d'e ru nị y'a hanchanrịn ihiẹn ile wẹ be i d'e rudẹ ịkọbọ ka ntịn.”