Luku 10 - Ika

Isi Nke Iri Jizọsị E Zipụ Mmadụ Mmẹbụọ kwasị ọgụn-ẹtọ

¹ Ọhụn e mẹgụ, Di-nwọnni-ẹnyi nọ họrị ikẹnnyẹ mmẹbụọ kwasị ọgụn-ẹtọ ndị ọzọ. Ọ nọ zipụ wẹ ẹbụọ-ẹbụọ, nị wẹ burun'ẹ ụzọ jẹn obodo ile lẹ ebe ile o sikọ d'e jẹn.

² Ọ nọ sị wẹ, “Ihiẹn-ugbo wẹ jẹnkọ d'a ghọ e bukẹ, kanị ndị ọrụn ebuni ọda. Mẹ ni nwan ekpere rịọ onyẹ nwọn ugbo n'o zi ndị ọrụn d'a ghọn'a ihiẹn-ugbo ẹ.

³ Jẹnmẹ ni nwan! Lee ẹ, m zikọ ụnụ kẹ atụnrụn wẹ ziye imẹ igunrun ẹwọrọ.

⁴ Ewerilẹ ni egho; ebulẹ ni ẹkpa; ewerilẹ ni akpụkụ; akụsịlẹ ni ụzọ kele onyẹ ọwụlẹ.

⁵ “Ụlọ ọwụlẹ ụnụ banye, kele ni wẹ, sị, ‘Udọn ya rị ụlọnị.’

⁶ Omẹni onyẹ udọn rị ụlọ hụ, udọn ụnụ a nọyen'ẹ; kanị, omẹni onyẹ udọn arịa, udọn ụnụ e kinhẹnni ụnụ.

⁷ Nọdị nị ụlọ ohu ahụn nabanhannị ụnụ, e ri, a ra ihiẹn ọwụlẹ wẹ ye ụnụ — makẹni onyẹ ọrụn furu w'a kụ ụgwọ. Akwahunmẹlẹ ni.

⁸ “Obodo ọwụlẹ ụnụ banye, nị a nabanhan wẹ ụnụ, ri ni ihiẹn ọwụlẹ wẹ ye ụnụ;

⁹ zụọ nị ndị emu rị a kụ imẹ obodo hụ; sị nị ndị rịn'a, ‘Alị-eze Osolobuẹ e rugụọ ụnụ ẹhụ.’

¹⁰ Kanị obodo ọwụlẹ ụnụ banye nị anabanhannị wẹ ụnụ, shi ni ọgbara-ogbe, ụnụ a nọ ebẹhụ sị,

¹¹ ‘Kẹ ẹjan obodo ụnụ rị ẹnyi ụkụ, ẹnyi rị e tichanpụ a a tọnị ụnụ n'ọ shịagbu ụnụ ẹri. Ka marịnkwọ nị nị Alị-eze Osolobuẹ a rịgụọ nsue!’

¹² M rị a gwa ụnụ ezioku, obodo ahụn k'a takarị eje-alị wụ Sodọm afụnfụn Ụhụọhịn Okinkin-ikpe!

Mban Jizọsị Bannị Obodo Ndị Hụ Kwerilẹni

¹³ “Okẹn nsọngbu jẹnkọ d'a rịnị ndị obodo Korazini! Okẹn nsọngbu jẹnkọ d'a rịzịkwọnị ndị obodo Bẹtisaịda! Makẹni, omẹni imẹ alị Taya-lẹ-Sidọnụ kẹ wẹ nọ rụn ọrụn-atụmẹnya ndị wẹ rụn imẹ ụnụ, nkẹ o tekẹ ndị Taya-lẹ-Sidọnụ rogharịgụ, yiri ẹkwa-achọ, bụọ ntụn kpu enwẹn wẹ, nọdị akpakalị gi ghọsị n'e rogharịgụọ wẹ!

¹⁴ Ụnụ jẹnkọ d'a takarị ndị Taya-lẹ-Sidọnụ afụnfụn Ụhụọhịn Okinkin-ikpe.

¹⁵ “Nke ụnụ ndị obodo Kapanọm, ụnụ ro ni wẹ sikọ d'e bushi ụnụ elu-igwee? Mba! Wẹ jẹnkọ d'a tụ ụnụ ye alị-mmọn!

¹⁶ “Ọ nọ sị ndị nsọnmazụụn a, ‘Onyẹ gọn ụnụ ntịn, mmẹ k'ọ rị e gọn ntịn; onyẹ jụ ụnụ, mmẹ k'ọ jụ; onyẹ ọwụlẹ jụnị m rị a jụ onyẹ zihẹni m.’ ”

Ndị Jesu Zipụ A Lụaha

¹⁷ Omẹgụ, ikẹnnyẹ mmẹbụọ kwasị ọgụn-ẹtọ hụ nọ gi okẹn ịghọghọ lụaha. Wẹ nọ sị, “Di-nwọnni-ẹnyi, eje-mmọn rị ichẹn-ichẹn e humẹni ẹnyi isi hụn ẹnyi gihụ gi ẹfan ị gwa wẹ oku!”

¹⁸ Jesu nọ sị wẹ, “A hụnghọ m kẹ Ekwensụ gha elu-igwee dan ‘nwaịn!’ nọkẹ amụma beni.

¹⁹ Lee ẹ! E yeọlẹ m ụnụ ikẹn ịzọ agwọ lẹ akpị lẹ ikẹn ile Eṅẹnrẹn nwọn ụkụ ghafe, onwọnni ihiẹn o k'e mẹ ụnụ.

²⁰ K'osilẹrị, aghọghọlẹ ni nị eje-mmọn rị e humẹni ụnụ isi, ka ghọghọ nị n'e deyegụọ wẹ ẹfan ụnụ imẹ elu-igwee.”

Jesu A Ghọghọ

²¹ Ogẹn hụzịkwọ, Jesu nọ ghọghọ imẹ Mmọn-nsọ, sị, “Baba, Onyẹ nwọn elu-igwee lẹ ụwa! M rị a ja ị mma ni y'e zuemẹgụọnị ndị marịn ihiẹn lẹ ndị nwọn nghọta ihiẹn ndịnị, we wẹ ghọsị ụmụ-ndu. Ẹghẹẹ Baba, ẹnịna k'ị chọ n'ọ rị.

²² Nẹdi m e bugụọ ihiẹn ile che m ẹka. Onwọnni onyẹ marịn onyẹ Nwa-Chuku wụ wezụka Chuku-Nẹdi; onwọnzikwọnị onyẹ marịn Chuku-Nẹdi wezụka Nwa a lẹ onyẹ ọwụlẹ Nwa a chọ n'o mẹ ẹ marịn a.”

²³ Jizọsị e kugụ ihiẹnni, ọ nọ gbehutọ, bu ihun zinmẹ ndị nsọnmazụụn a, kagwa wẹ, sị, “Ẹnya rị a hụn ihiẹn ndịnị ụnụ rị a hụn e nwọnkẹ ngọzi!

²⁴ M rị a gwa ụnụ, ndị-amụma lẹ ndị-nze bu ọda a chọgụọ nị wẹ hụn ihiẹn ụnụ rị a hụn, ahụnnị w'a; a chọzịkwọ wẹ nị wẹ nụ ihiẹn ụnụ rị a nụ, anụnị w'a.”

Onyẹ Sameria Hụn Nwọn Ihiẹn-ọsụsụọ

²⁵ Ọka-iwu ohu bịa d'e shini Jesu ọnyan. Ọ sị Jesu, “Onyẹ-nkuzi, kị m'e mẹ nị m nwọnhẹn ndụn-itẹbitẹ?”

²⁶ Jesu nọ sị a, “Kị Iwu Mozizi ku? Nanị ị ghọta a?”

²⁷ Okẹnnyẹ hụ nọ za, “ ‘Gi obi i ile, umẹ-ndụn i ile, ikẹn i ile lẹ uche i ile nwọn ihiẹn-ọsụsụọ Di-nwọnni-ẹnyi wụ Chuku i’; lẹ ‘Nị ihiẹn ibe i a sụọ ị kẹ ihiẹn enwẹn i dọn a sụọ ị.’ ”

²⁸ Jesu nọ sị a, “Y'a zagụọ ọhụnma; mẹ ẹ nwan kẹni i rị ndụn.”

²⁹ Kanị Ọka-iwu hụ chọ n'o kuni enwẹn ẹ ọhụnma, ọ nọ sị Jesu, “Onyẹ wụ nwan ibe m?”

³⁰ Jesu nọ za, “Okẹnnyẹ ohu gha Jerusalẹm jẹnkọ Jẹriko. Ọ nọ danban ẹka ndị ohin. A narịn w'a ihiẹn ile o gi, gbu ẹ ili, ọ họdụ ẹkẹrẹ n'ọ nwụn, wẹ nọ la a tọ ụzọ.

³¹ Ọ nọ nwan mẹ ni onyẹ nchụn-ẹjan ohu ghakọ ụzọ hụ; kanị, ọ hụn okẹnnyẹ hụ, ọ nọ ghakpẹn ẹ.

³² Ẹrịra kẹ onyẹ Livaị a rụn ọrụn Ụlọ-nsọ hụn ghakọ ụzọ hụ dọnzi pụha ebahụn, ọ hụn okẹnnyẹ ahụn, ghakpẹn ẹ.

³³ Kanị, onyẹ Sameria jẹnkọ alị-ịhịan a pụha ebe okẹnnyẹ hụ rị, hụn a, omikẹn ẹ nọ mẹ ẹ.

³⁴ Ọ nọ nọzụnhan, hu udẹn lẹ manya ye ẹ ebe ile wẹ rụ a ẹhụ, kẹnmẹchanrịn a wẹ ile. Ya ọ nọ gi anyịnyan a buru okẹnnyẹ hụ, we ẹ shi ụlọ ndị-ijẹn, nọ ebẹhụ lepụ a ẹnya.

³⁵ Eki e fọn, ọ nọ we egho ọrụn akpọhịn ẹbụọ ye hụn nwọn ụlọ ndị-ijẹn hụ, sị a, ‘Dodo, lepụ a ẹnya; m kinhẹn e yepụ m'ị hụn ọwụlẹ k'a banzịn'a.’

³⁶ “Jesu nọ nwan sị ọka-iwu hụ ọ tanị iluni: Imẹ mmadụ ẹtọnị, onyẹ wụ ibe okẹnnyẹ hụ danye ẹka ndị ohin?”

³⁷ Ọ nọ za, “Onyẹ hụn mẹn'ẹ ẹfọma.” Ya kẹ Jesu nọ sị a, “D'e mẹ nwan ẹrịra.”

Jizọsị A Bịa Iwe Mata Lẹ Meri

³⁸ Ogẹn Jesu lẹ ndị nsọnmazụụn a gi jẹnkọ, wẹ nọ banye obodo ohu mẹ ẹkẹrẹ. Okpoho ohu ẹfan a wụ Mata nọ nabanhan a iwe ẹ:

³⁹ Mata nwọn nwẹnẹ w'a kpọ Meri. Mẹri nọ nọdị alị ebe ụkụ Di-nwọnni-ẹnyi rị, e gọn ntịn ihiẹn ọ rị e ku.

⁴⁰ Kanị, ozi jun mmụlọ anịnị Mata nọdị ụzọ ohu. Mata nọ bịa d'e kunrun Jesu, sị, “Di-nwọnni-ẹnyi, onwọnni ihiẹn i kpọ a nị nwẹnẹ m la ọrụn ile tọnị mmẹ sụọ? Gwa a nwan d'e yeni m ẹka.”

⁴¹ Kanị Di-nwọnni-ẹnyi nọ za a, “Mata, Mata! Ị rị e hue uhue, e sọngbu enwẹn i yeni ihiẹn bu ọda —

⁴² kanị ihiẹn ohu sụọ rị mkpa; Meri a họrịgụọ hụn ka mma; anapụkọ w'a ya.”