Luku 1 - Ika

Isi Nke Ohu Ihiẹn Haịn Wẹ Gi De Ẹkụkwọnị

¹ Ebe o mẹni ndị bu ọda a lịlịmagụọ depụha ihiẹn ndị hụn mẹ imẹ igunrun ẹnyi,

² dechanrịn a kẹ ndị ibuzọ ahụn o mẹye ẹnya hụn Osolobuẹ gi zi ozi ẹ dọn gwa ẹnyi,

³ Gọvanọ wụ Tiofilọsụ, e rogụọ m'a n'ọ hụghọ mma nị mmẹ nwẹn nkẹ den'i y'ẹ uri-uri, makẹni e lebanchanrịngụọ m ihiẹn ndịnị ile ẹnya gha isi ẹ lala,

⁴ kẹni ọ hụn ụzọ we i ẹnya nị ihiẹn wẹ kuzi i wụ ezioku.

Mmọn-ozi E Ku Oku Ọmụmụ Jọnụ Hụn E Mẹ Mirin-Chuku

⁵ Ogẹn Hẹrọdụ gi wụ eze Judia, o nwọn onyẹ nchụn-ẹjan ohu w'a kpọ Zẹkaraya. Imẹ ndị nchụn-ẹjan, itu Abija k'ọ rị. Ẹlizabẹti nwunyẹ ẹ wụzịkwọ onyẹ ebọn Ẹrọnụ.

⁶ Wẹ ẹbụbụọ wụ ndị ezi-omumẹ ẹnya Osolobuẹ; w'e dọnmẹchanrịn iwu lẹ ọdịnalị Di-nwọnni-ẹnyi, onwọnni hụn w'e gi kọrịanị wẹ —

⁷ kanị amụnị wẹ nwa, makẹni Ẹlizabẹti wụ agan, bụ wẹ ẹbụbụọ a kagụọ ẹgẹdi.

⁸ Ụhụọhịn ohu, Zẹkaraya rị imẹ Ụlọ-nsọ a rụn ọrụn nchụn-ẹjan ogẹn ndị itu ẹ gi rị ọrụn.

⁹ Kẹ wẹ dọn a rụn ọrụn nchụn-ẹjan, ịya kẹ mkpọ hanrịn hụn sikọ d'a banye Ebẹhụ Rị Nsọ imẹ Ụlọ-NSỌ Di-nwọnni-ẹnyi d'a mụyen'ẹ nsẹnsi.

¹⁰ Ndị hụ ile bịa d'e fe ofufe rị ihun-ezi e mẹ ekpere ogẹnni wẹ gi a mụ nsẹnsi.

¹¹ Ya kẹ mmọn-ozi Di-nwọnni-ẹnyi nọ nwọnpụha ibe ẹka-nni ukpo w'a nọ a mụ nsẹnsi.

¹² Zẹkaraya a hụn a, ẹhụ nọ mama a nni ọda-ọda yeni egun.

¹³ Mmọn-ozi hụ nọ sị a, “Zẹkaraya, atụlẹ egun! Osolobuẹ a nụgụọ ekpere i: Ẹlizabẹti nwunyẹ i jẹnkọ d'a mụn'ị okẹnnyẹ! I k'a kpọ a Jọnụ.

¹⁴ Ụnụ jẹnkọ d'a ghọghọ, ẹfọ a sụọ ụnụ ụsụọ; ọmụmụ a k'e mẹ ndị bu ọda ghọghọ,

¹⁵ makẹni o k'a wụ okẹn ịhịan ẹnya Di-nwọnni-ẹnyi. Ọ rakọ manya ọwụlẹ mọbụ manya zeni. Wẹ gini d'a mụ a, Mmọn-nsọ k'e jun ẹ ghakwọrị imẹ ẹfọ nnẹ ẹ.

¹⁶ O k'e mẹ ndị Izrẹlụ bu ọda gbehutọ d'e kunrun Di-nwọnni-ẹnyi wụ Chuku wẹ.

¹⁷ O k'e buruni Di-nwọnni-ẹnyi ụzọ, gi agụngụn lẹ ikẹn onyẹ-amụma wụ Ẹlaịja mẹ ndị nẹdi bu obi wẹ che ebe ụmụ wẹ rị, mẹ ndị nnupụ-isi rogharị d'e bimẹ obibi ndị marịn ihiẹn, obibi ndị ezi-omumẹ. O k'e gi ẹ kwademẹ ịhịan makẹ ọbịbịa Di-nwọnni-ẹnyi.”

¹⁸ Zẹkaraya nọ sị mmọn-ozi hụ, “Nanị m'e dọn marịn n'o k'e mẹ? A kagụọ m ẹgẹdi, nwunyẹ m nkẹ a kagụọzị ẹgẹdi.”

¹⁹ Mmọn-ozi hụ nọ shịarị a, “Mmẹ wụ Gebrẹlụ hụn e wuzo ihun Osolobuẹ. Ịya zi m d'a gwa ị oku, zi i oziọmanị.

²⁰ Gọn ntịn: ị jẹnkọ nwan d'e họnrin odin. Y'a sakọzị ẹka ku oku d'e ru ụhụọhịn ihiẹn m ku e gi bụn, makẹni y'e gini oku m dọn, oku hụn k'e mẹzurịrị ogẹn ẹ ru.”

²¹ Ogẹn ihiẹnni gi rị e mẹ, ndị bịa ofufe hụ e che Zẹkaraya, a sị, “K'o biehanzịnị ẹnịna imẹ Ebẹhụ Rị Nsọ?”

²² Ogẹn o gi nwan pụha, ọ sanị ẹka gwa wẹ oku, wẹ nọ marịn n'ọ hụnọlẹ ọhụn imẹ Ebẹhụ Rị Nsọ, makẹni ọ tọ e gi ẹka a gwa wẹ oku, ọ sazịnị ẹka ku oku.

²³ Ogẹn ọrụn a a gụ, ọ nọ lashi iwe ẹ.

²⁴ Omẹgụ, Ẹlizabẹti nwunyẹ ẹ nọ tụrụ imẹ. Ẹlizabẹti e zuemẹ ẹ ọrọgbọ ifọn isẹn.

²⁵ Kanị ọ hụ a sị enwẹn ẹ, “Di-nwọnni-ẹnyi e mẹkẹkwọnị m ebe ọ nọ gi ẹnya rị mma lee m, wepụ ụya ile m rị e ri imẹ igunrun ndị nke ẹnyi!”

Mmọn-ozi A Gwa Meri N'o K'a Mụ Jizọsị

²⁶ Ogẹn ẹfọ-imẹ Ẹlizabẹti gi rị ifọn isin, Osolobuẹ nọ zi mmọn-ozi ahụn wụ Gebrẹlụ jẹn obodo w'a kpọ Nazarẹtị hụn rị Galili.

²⁷ O zi ẹ d'e kunrun nwagbọọ ohu kelẹni marịn okẹnnyẹ hụn ya lẹ onyẹ ebọn Defidi w'a kpọ Josẹfụ jẹnkọ d'a lụ. Ẹfan nwagbọọ hụ wụ Meri.

²⁸ Mmọn-ozi hụ nọ bịa d'e kunrun Meri, sị a, “Darụ! Onyẹ Chuku gọzi! Chuku nọyeni i anọyeni.”

²⁹ Ihiẹn mmọn-ozi hụ ku anịzịnị obi ru Meri alị kaka; ọ hụ a jụ enwẹn ẹ kẹ elee ụdị ekele wụ ọnwan!

³⁰ Mmọn-ozi hụ nọ sị a, “Meri, atụlẹ egun. Chuku e mẹgụọn'ị ọhụnma.

³¹ I k'a tụ imẹ, mụ okẹnnyẹ; ị k'a kpọ a Jizọsị (Jesu).

³² O k'a wụ okẹn ịhịan; wẹ jẹnkọ d'a kpọ a Nwa Onyẹ Hụ Kachanrịnnị. Di-nwọnni-ẹnyi wụ Chuku jẹnkọ d'e ye ẹ ukpo nẹdi ẹ kanị wụ Defidi;

³³ o k'a kị ikpụlọ Jekọpụ jẹnrin ejẹn; alị-eze ẹ agụkọ!”

³⁴ Meri nọ sị mmọn-ozi hụ, “Nanị k'o dọn mẹ bụ m'e ke marịn okẹnnyẹ?”

³⁵ Mmọn-ozi hụ nọ sị a, “Mmọn-nsọ jẹnkọ d'e hidankwasị ị; ikẹn Onyẹ Hụ Kachanrịnnị jẹnkọ d'e kpumẹ i. Ya wụ, nwa ị jẹnkọ d'a mụ k'a rị nsọ, wẹ k'a kpọ a Nwa Osolobuẹ.

³⁶ Lee ẹ, Ẹlizabẹti nwẹnẹ i a tụrụgụọ imẹ ebe ọ kagụ ẹgẹdi! Ẹfọ-imẹ rị a nwan ifọn isin — onyẹ nwẹn wẹ te sị n'ọ wụ agan!

³⁷ Ya wụ nị, onwọnni ihiẹn Osolobuẹ ghalẹni a saẹka e mẹ!”

³⁸ Ya Meri nọ sị, “Elee m; odibo Di-nwọnni-ẹnyi kẹ m wụ, ya rịnị m k'i dọn ku!” Ya mmọn-ozi hụ nọ la a tọ, pụ.

Meri E Jẹn D'a Hụn Ẹlizabẹti

³⁹ Omẹgụ, ya Meri nọ kwademẹ ozigbo-ozigbo jẹnmẹ obodo ohu hụn rị elu òke alị Juda.

⁴⁰ O ru ebẹhụ, ọ nọ banye iwe Zẹkaraya. O kele nwunyẹ ẹ wụ Ẹlizabẹti.

⁴¹ Ogẹn Ẹlizabẹti gi nụ okele Meri, nwa rị a ẹfọ nọ tụshi elu. Mmọn-nsọ nọ jun Ẹlizabẹti.

⁴² Ya Ẹlizabẹti nọ yi, “Ịyụ kẹ Osolobuẹ kachanrịn a gọzi imẹ ikpoho ile; nwa ị sikọ d'a mụ wụzị onyẹ wẹ gọzi agọzi!

⁴³ Okẹn ngọzi kẹ m nwọn ebe nnẹ Di-nwọnni m nọ bịa d'a hụn m!

⁴⁴ Makẹni, hụn m gihụ nụ k'i kele, nwa rị m ẹfọ nọ gi ịghọghọ tụshi elu!

⁴⁵ Ngọzi ya rịnị okpoho ahụn kweri ni oku Di-nwọnni-ẹnyi gwa a jẹnkọ d'a bụn!”

Ẹbụ Meri Gi Ja Osolobuẹ mma

⁴⁶ Meri nọ sị, “Obi m rị a ja Di-nwọnni-ẹnyi mma;

⁴⁷ mmọn m rị a ghọghọ makẹ Onyẹ-nzụọpụha m wụ Osolobuẹ,

⁴⁸ makẹni o gigụọ ẹnya rị mma lee m, mmẹ hụn wụ odibo ẹ mmakalaka! Gha nwan kikẹnni jẹnmẹ, agbọ ile sikọ d'a gha a kpọ m onyẹ wẹ gọzi agọzi,

⁴⁹ makẹni Onyẹ Hụ wụ Dikẹn e mẹọlẹni m okẹn ihiẹn; ẹfan a rị nsọ!

⁵⁰ O mẹsọnmẹni ndị hụn e humẹn'ẹ isi omikẹn gha agbọ d'e ru agbọ.

⁵¹ Ọ tịnpụgụọ ẹka a, kpa ikẹn, kpọnyịya ndị mpache lẹ ihiẹn wẹ rị e ro.

⁵² O wetugụọ ndị-ọkịkị ukpo wẹ, bushi ndị nwọnlẹni ihiẹn wẹ wụ elu.

⁵³ O gigụọ ihiẹn rị mma yejun onyẹ ẹgụn rị a gụn ẹfọ, gba ọdanfịn ẹka chụpụ a.

⁵⁴ O yegụọnị odibo ẹ wụ Izrẹlụ ẹka; ọ nyanhangụọ mẹ omikẹn

⁵⁵ k'o dọn kwe ndị nẹdi ẹnyi kanị nkwa, k'o dọn kwe Ebraham lẹ ebọn ẹ ile nkwa jẹnrin ejẹn!”

⁵⁶ Ya Meri nọ sọn Ẹlizabẹti nọdị ihiẹn nọkẹ ọrọgbọ ifọn ẹtọ, ọ nọ lakin.

A Mụ Wẹ Jọnụ Hụn E Mẹ Mirin-Chuku

⁵⁷ Ọmụmụ e ru Ẹlizabẹti, ọ nọ mụ okẹnnyẹ.

⁵⁸ Ndị bikunmẹn'ẹ lẹ ndị nke wẹ a nụ nị Di-nwọnni-ẹnyi e mẹgụọn'a ọhụnma, wẹ nọ sọn ẹ ghọghọ.

⁵⁹ Nke akpọhịn ẹsatọ, wẹ nọ bịa d'a kwa nwata hụ ugun. Wẹ te k'a gụn a ẹfan nẹdi ẹ wụ Zẹkaraya,

⁶⁰ kanị nnẹ ẹ nọ sị, “Mba! Wẹ jẹnkọ d'a kpọ a Jọnụ.”

⁶¹ Wẹ nọ sị a, “Onwọnni onyẹ nke ụnụ a za ẹfan hụ!”

⁶² Wẹ nọ gi ẹka jụ Zẹkaraya nẹdi ẹ ẹfan wẹ k'a kpọ a.

⁶³ Ọ nọ sị wẹ y'ẹ ihiẹn n'o de ẹ; ọ nọ de, “Ẹfan a wụ Jọnụ.” Ọ nọ tụ wẹ ile ẹnya!

⁶⁴ Ya kẹ ọnụ Zẹkaraya nọ shịapụ idẹnmuzi, ire ẹ a tọpụ, ọ nọ kumẹ oku, jama Osolobuẹ mma.

⁶⁵ Egun nọ tụma ndị ile bikunmẹni wẹ; ihiẹn ndịnị nọ kpọgbarị ẹgbẹrẹ elu òke Judia ile.

⁶⁶ Onyẹ ọwụlẹ nụn'a hụ a sị enwẹn ẹ, “Kị nwatanị jẹnkọ d'a wụ?” Wẹ rị a jụ ihiẹnni makẹni ẹka Di-nwọnni-ẹnyi rị imẹ ndụn a.

Amụma Zẹkaraya Bu

⁶⁷ Mmọn-nsọ nọ jun nẹdi ẹ wụ Zẹkaraya, ọ nọ bu amụmanị:

⁶⁸ “Ịja-mma ya rịnị Di-nwọnni-ẹnyi, Chuku Izrẹlụ! Makẹni ọ bịaọlẹ d'e yeni ndị nke ẹ ẹka; ọ bịaọlẹ d'a gbapụha wẹ.

⁶⁹ O wepụhagụọnị ẹnyi Mpịn k'a zụọpụha ẹnyi, onyẹ ikpụlọ odibo ẹ wụ Defidi.

⁷⁰ O mẹgụ a k'o dọn ku ẹ ẹdẹi, ghahanị ndị-amụma nsọ a,

⁷¹ n'o jẹnkọ d'a zụọpụha ẹnyi ẹka ndị iṅẹnrẹn ẹnyi ile lẹ ndị iwe ẹnyi rị e we;

⁷² n'o sikọ d'e mẹni ndị nẹdi ẹnyi kanị omikẹn nyanhan nkwerigbama nsọ a —

⁷³ nyanhan ẹfan a, hụn o kunni nẹdi ẹnyi kanị wụ Ebraham ogẹn o gi kwe ẹ nkwa —

⁷⁴ n'o sikọ d'a gbapụha ẹnyi ẹka ndị iṅẹnrẹn ẹnyi, ẹnyi a tụbehi egun wẹ, fe ẹ;

⁷⁵ ẹnyi e gi ịrị-nsọ lẹ ezi-omumẹ e fe ẹ, ẹnyi e we nwụn.

⁷⁶ “Nwatanị, wẹ jẹnkọ d'a kpọ ị onyẹ-amụma nke Onyẹ Hụ Kachanrịnnị; i sikọ d'e buruni Di-nwọnni-ẹnyi ụzọ, kẹni i hụn ụzọ kwan'a ụzọ a;

⁷⁷ i jẹnkọ d'e mẹ ndị nke ẹ marịn kẹ w'e dọn nwọnhẹn nzụọpụha ghahanị inwọnhẹn mgbagharị njọ.

⁷⁸ Ihiẹnni jẹnkọ d'e mẹ makẹ ẹfọma lẹ omikẹn Osolobuẹ ẹnyi, hụn anwụn elu-igwee e gi bịa d'a wanị ẹnyi,

⁷⁹ o nwunmẹni ndị rị imẹ ishi ọnwụn rị a kpọ ihun; o mẹ ụkụ ẹnyi gha ụzọ udọn ihiẹn nọ a rị mma.”

⁸⁰ Nwata hụ wụ Jọnụ e sue, ze imẹ mmọn; ọ nọ biri imẹ atụ d'e ru ụhụọhịn hụ ọ pụha d'a rụnma ọrụn a idẹnya ndị Izrẹlụ ile.