Lẹvitikọsụ 9 - Ika

Isi Nke Itenẹi E Femẹ Wẹ Ofufe Imẹ Ọdụ-nsọ

¹ Ụhụọhịn o zu akp'ọhịn ẹsatọ, Mozizi nọ kpọzu Ẹrọnụ lẹ ụmụ a lẹ ndị-chẹn Izrẹlụ.

² Ọ nọ sị Ẹrọnụ, “Wẹhẹ okoro okẹn-efin i jẹnkọ d'e gi chụn ẹjan makẹ njọ ị lẹ atụnrụn i k'e gi chụn ẹjan w'a dụn ọkụn. O sikọ d'a wụrịrị efin lẹ atụnrụn ẹhụ wẹ zu oke; y'e wepụha wẹ ihun Osolobuẹ,

³ y'a sị ndị Izrẹlụ, ‘Wẹhẹ ni mkpịn d'a chụn ẹjan njọ, ụnụ e wẹhẹzi nwa efin lẹ nwa atụnrụn d'a chụn ẹjan w'a dụn ọkụn. Kẹ nwa-efin kẹ nwa-atụnrụn k'a wụ anụ ahụa ohu-ohu ẹhụ zu oke;

⁴ ụnụ e wẹhẹzi efin lẹ ebulu ụnụ e gi chụn ẹjan-ekele; ụnụ a bịa ihun Osolobuẹ d'a chụnyen'ẹ ya, ya lẹ oyiye-ọka wẹ gi ofugbọn-olivu gwọ, makẹni Osolobuẹ pụla ihun ụnụ tannị.’ ”

⁵ Wẹ nọ buhẹ ihiẹn ndị hụ Mozizi gwa wẹ ihun Ọdụ-ozuzu, wẹ ndị Izrẹlụ ile nọ nọzụnhan d'e wuzo ihun Osolobuẹ.

⁶ Mozizi nọ sị wẹ, “Ọnwan wụ ihiẹn Osolobuẹ sị ụnụ mẹ, kẹni Osolobuẹ gi ọghọ a bịa d'e kunrun ụnụ.”

⁷ Mozizi nọ sị Ẹrọnụ, “Bịa ukpo nchụn-ẹjan d'a chụn ẹjan-njọ ị lẹ ẹjan w'a dụn ọkụn, n'i gbarị isi yụ lẹ ndị Izrẹlụ; chụnnị wẹ ẹjan hụn wẹ wẹhẹ n'i gbarị isi wẹ, nọkẹ kẹ Osolobuẹ dọn ku.”

⁸ Ya Ẹrọnụ nọ bịa ukpo nchụn-ẹjan, gbu nwa-efin ahụn gi chụnnị enwẹn ẹ ẹjan-njọ.

⁹ Ụmụ a nọ buhẹn'ẹ ẹdeke anụ hụ, ọ nọ gi mkpịnsịn-ẹka deri ẹ, deyesọnmẹ mpịn rị ukpo nchụn-ẹjan; hu ẹdeke họdụnị ye ukun ukpo nchụn-ẹjan.

¹⁰ Ọ nọ nọ elu ukpo nchụn-ẹjan dụn ụtọrọ anụ ẹjan-njọ hụ ọkụn, ya lẹ akụnrụn a ẹbụbụọ lẹ ihiẹn hụ mẹ ụtọrọ-ụtọrọ kpumẹ imegi ẹ, nọkẹ kẹ Osolobuẹ dọn gwa Mozizi —

¹¹ ọ nọ bu uru ẹ lẹ akpụkpọ a gha ebe ịhịan bi pụ, nọ ebẹhụ ịhịan bilẹni dụn wẹ ọkụn.

¹² Ọ nọ gbu anụ ẹjan w'a dụn ọkụn. Ụmụ a e buye ẹ ẹdeke ẹ, ọ nọ fe ẹ kpu ukpo nchụn-ẹjan ahụn ụsụọ ile.

¹³ Wẹ nọ kịye ẹ ọkpụrụkpụ anụ ẹjan w'a dụn ọkụn ohu-ohu, kẹ isi ẹ kẹ wẹ ile, ọ nọ dụn wẹ ọkụn elu ukpo nchụn-ẹjan ahụn.

¹⁴ Ọ chanchan ihiẹn ndị rị ẹfọ anụ hụ, chanchan ụkụ a; o buzi wẹ nwẹn dụn ọkụn elu ukpo nchụn-ẹjan nọkẹ ndịnẹi.

¹⁵ Ya ọ nọ wẹhẹ hụn wẹ k'e gi chụnnị ndị alị ẹjan: o weri ewu wẹ gi chụn ẹjan-njọ wẹ, gbu ẹ, gi chụn ẹjan-njọ k'o dọn mẹ nke ibuzọ.

¹⁶ Ọ nọ wẹhẹ ẹjan w'a dụn ọkụn, mẹ ẹ kẹ Osolobuẹ dọn ku.

¹⁷ O wẹhẹ oyiye-ọka ndị hụ, bụọrị hụn jun ọb'ẹka, nọ elu ukpo nchụn-ẹjan dụn a ọkụn cheni ẹjan w'a dụn ọkụn nke ụtụntụn hụ.

¹⁸ Ya ọ nọ gbu efin ahụn lẹ ebulu hụ, gi chụnnị wẹ ẹjan-ekele; ụmụ a e buye ẹ ẹdeke ẹ, ọ nọ fe ẹ kpu ukpo nchụn-ẹjan hụ ụsụọ ile.

¹⁹ Kanị, ụtọrọ efin ahụn lẹ nke ebulu ahụn, kẹ hụn rị wẹ ukun ọdụndụn kẹ hụn kpumẹ ihiẹn rị wẹ ẹfọ kẹ akụnrụn wẹ lẹ ihiẹn ndị hụ mẹsọnmẹ ụtọrọ-ụtọrọ kpumẹ imegi wẹ,

²⁰ o kpọn wẹ ile kwasị ẹran wẹ, Ẹrọnụ nọ nọ elu ukpo nchụn-ẹjan hụ dụn ụtọrọ ndị ahụn ọkụn, e họnrin wẹ ẹnwụnrụn.

²¹ Ẹrọnụ nọ finfin ẹran ndị hụ lẹ ọrụ ẹka-nni hụ ghọsị Osolobuẹ n'ọ wụrụ ẹjan wẹ finfin, ẹrịra Mozizi ku ẹ.

²² Ya Ẹrọnụ nọ kịshi ẹka elu ihun ndị Izrẹlụ, gọzi wẹ, k'ọ chụngụ ẹjan-njọ lẹ ẹjan w'a dụn ọkụn lẹ ẹjan-ekele, ya ọ nọ gha ukpo nchụn-ẹjan hidan.

²³ Mozizi lẹ Ẹrọnụ nọ banye Ọdụ-ozuzu. Kẹ wẹ pụha, wẹ nọ gọzi ndị Izrẹlụ; orukpu ghọsị ọghọ Osolobuẹ nọ nwọnpụha, wẹ ile nọ hụn a.

²⁴ Ọkụn nọ gha ebe Osolobuẹ rị bịa d'e ripụ ẹjan hụ w'a dụn ọkụn lẹ ụtọrọ ndị hụ rị elu ukpo nchụn-ẹjan. Ogẹn wẹ gi hụn ihiẹnni, wẹ ile nọ yi oro, kụ isi alị.