Lẹvitikọsụ 8 - Ika

Isi Nke Ẹsatọ E Tumẹ Wẹ Ẹrọnụ Lẹ Ụmụ A

¹ Osolobuẹ sị Mozizi,

² “Wẹhẹ Ẹrọnụ lẹ ụmụ a ikẹnnyẹ, wẹ lẹ ẹwuru wẹ lẹ ihiẹn ndị hụ m gwa ị: udẹn-nsọ, okẹn-efin wẹ sikọ d'e gi chụn ẹjan-njọ, ebulu ẹbụọ lẹ ụkpalị brẹdi ndị wẹ buchelẹni yisti,

³ y'a kpọkikomẹ ndị Izrẹlụ ile ọnụ-mgbọn Ọdụ-ozuzu.”

⁴ Mozizi nọ mẹ kẹ Osolobuẹ dọn gwa a, ndị Izrẹlụ nọ zụ ọnụ-mgbọn Ọdụ-ozuzu.

⁵ Mozizi nọ sị wẹ, “Ọnwan wụ ihiẹn Osolobuẹ sị ẹnyi mẹ”

⁶ Ya Mozizi nọ kpọpụha Ẹrọnụ lẹ ụmụ a ihun, gi mirin chanchan wẹ.

⁷ Ọ nọ yimẹ Ẹrọnụ ẹwuru ọrụn nchụn-ẹjan ahụn tueru alị, gi nfifie hụ fiemẹ ẹ ukun; o yimẹ ẹ ẹwuru hụ tueghafe mkpụkụ ya lẹ ẹfọdụ a wị, yimẹ ẹ ẹfọdụ elu ẹ. Ọ nọ gi nfifie ẹfọdụ hụ wẹ kpa ọhụnma fiemẹzi ẹ ukun, o kẹnrẹn.

⁸ Ọ nọ we ẹkpa elu-obi kụnma a obi kẹ Osolobuẹ dọn gwa a, bu Urim lẹ Tumim wẹ gi a jụ Osolobuẹ uche ẹ che imẹ ẹkpa elu-obi hụ.

⁹ Ya ọ nọ bu okpu hụ che Ẹrọnụ isi, we ibe goru hụ wụ okpu-eze nsọ kẹnmẹye ihun okpu hụ. Ẹrịra kẹ Osolobuẹ gwa Mozizi ya mẹ wẹ.

¹⁰ Mozizi nọ weri udẹn-nsọ ahụn, fekpusọnmẹ Ọdụ-nsọ lẹ ihiẹn ile rị imẹ ẹ, gi ẹrịra dọn wẹ nsọ.

¹¹ O fezi ẹ ye elu ukpo wẹ n'a chụn ẹjan mgbe ẹsa, gi ẹrịra fekpusọnmẹ ukpo nchụn-ẹjan lẹ ihiẹn ile sọnn'ẹ; o fekpu afẹrẹ-mirin wẹ gi a chanchan ẹhụ, fekpu ụkụ a, gi ẹ dọn wẹ nsọ.

¹² Ọ nọ hubeye Ẹrọnụ udẹn-nsọ ahụn isi, gi ẹ dọn ẹ nsọ.

¹³ Ya ọ nọ wepụha ụmụ Ẹrọnụ ikẹnnyẹ, yimẹsọnmẹ wẹ ẹwuru ọrụn nchụn-ẹjan ndị hụ tueghafe mkpụkụ, gi nfifie fiesọnmẹ wẹ ukun, fụmasọnmẹ wẹ okpu-isi ndịnẹi. Ẹrịra kẹ Osolobuẹ gwa Mozizi ya mẹ wẹ.

¹⁴ Ya ọ nọ wepụha okẹn-efin wẹ k'e gi chụn ẹjan-njọ, Ẹrọnụ lẹ ụmụ a nọ kị ẹka kwasị efin ahụn isi.

¹⁵ Mozizi nọ gbu efin ahụn, weberi ẹdeke ẹ, gi mkpịnsịn-ẹka deri ẹ, teyesọnmẹ mpịn rịsọnmẹ nkonko ukpo nchụn-ẹjan ahụn, gi ẹ mẹ n'ọ rị ọchan. Ọ nọ hu ẹdeke họdụnị ye ukun ukpo wẹ n'a chụn ẹjan. Ya k'o gi dọn ẹ nsọ, makẹ ihiẹn ọwụlẹ e sehẹ iwe Osolobuẹ gha a rị a.

¹⁶ Mozizi nọzị weri ụtọrọ ile rịsọnmẹ ihiẹn rị okẹn-efin hụ ẹfọ, ihiẹn hụ mẹ ụtọrọ-ụtọrọ kpumẹ imegi ẹ lẹ akụnrụn a ẹbụbụọ lẹ ụtọrọ wẹ, nọ elu ukpo nchụn-ẹjan ahụn dụn wẹ ọkụn.

¹⁷ Kanị o buru efin ahụn lẹ akpụkpọ a lẹ uru ẹ lẹ ihiẹn ile rịn'a gha ebe ịhịan bi pụ d'a dụn ọkụn. Ẹrịra kẹ Osolobuẹ gwa Mozizi y'e mẹ ẹ.

¹⁸ Ya Mozizi nọzị wepụha ebulu wẹ jẹnkọ d'e gi chụn ẹjan w'a dụn ọkụn, Ẹrọnụ lẹ ụmụ a nọ kị ẹka kwasị ebulu ahụn isi.

¹⁹ Mozizi nọ gbu ebulu ahụn, fe ẹdeke ẹ kpu ukpo nchụn-ẹjan hụ ụsụọ ile.

²⁰ Ọ nọ ja ebulu ahụn kịrị-kịrị, dụn isi ẹ lẹ ẹhụ a ndị hụ ọ jakịka lẹ ụtọrọ a ọkụn.

²¹ Ọ nọ gi mirin chanchan ihiẹn ndị rị imẹ ẹ lẹ ụkụ a, nọ elu ukpo nchụn-ẹjan hụ dụnpụ ebulu ahụn ile ọkụn, o họnrin ẹnwụnrụn, ẹjan wẹ dụn ọkụn hụn e shin ọhụnma, ẹjan wẹ gi ọkụn chụnyeni Osolobuẹ. Ẹrịra kẹ Osolobuẹ gwa Mozizi ya mẹ ẹ.

²² Mozizi nọ wepụha ebulu hụn ẹbọ, ebulu ntumẹ; Ẹrọnụ lẹ ụmụ a nọ kị ẹka kwasị ebulu ahụn isi.

²³ Mozizi nọ gbu ebulu hụ, deri ẹdeke ẹ, deye ibe alị ntịn ẹka-nni Ẹrọnụ, eze-ẹka ẹka-nni ẹ lẹ eze-ụkụ ẹka-nni.

²⁴ Ọ nọzị wepụha ụmụ Ẹrọnụ ikẹnnyẹ ihun, deyesọnmẹzi wẹ ẹdeke ibe alị ntịn ẹka-nni, eze-ẹka ẹka-nni lẹ eze-ụkụ ẹka-nni wẹ. Ya ọ nọ fe ẹdeke họdụnị kpu ukpo nchụn-ẹjan ahụn ụsụọ ile.

²⁵ Ọ nọ weri ụtọrọ ebulu hụ, kẹ hụn rị a ukun ọdụndụn kẹ ndị ile rịsọnmẹ elu ihiẹn rị a ẹfọ, ihiẹn ahụn mẹ ụtọrọ-ụtọrọ kpumẹ imegi ẹ, akụnrụn a ẹbụbụọ lẹ ụtọrọ rị elu wẹ lẹ ọrụ ẹka-nni ẹ.

²⁶ Ọ nọ gha imẹ ụkpalị hụ brẹdi ichẹn-ichẹn wẹ buchelẹni yisti rị, ụkpalị hụ wẹ butọ ihun Osolobuẹ, weri donọtụ wẹ gi ofugbọn-olivu gwọ lẹ biskiti. Ọ nọ bu ndịnị wẹ che elu ụtọrọ ndị hụ lẹ ọrụ ẹka-nni ẹ.

²⁷ Ọ nọ bu ihiẹn ndịnị ile che Ẹrọnụ lẹ ụmụ a ẹka, finfin wẹ ghọsị Osolobuẹ, n'ọ wụrụ ẹjan w'e finfin.

²⁸ Mozizi nọ narịn wẹ ya, nọ elu ukpo wẹ n'a dụn ẹjan ọkụn dụn wẹ ọkụn, gi wẹ họnrin ẹnwụnrụn, n'ọ wụrụ ẹjan-ntumẹ, ishin hụn a sụọ ụsụọ, ẹjan wẹ gi ọkụn ye Osolobuẹ.

²⁹ O werizi ẹran a, hụn ru ẹ ẹka imẹ anụ ẹjan-ntumẹ hụ, o finfin ẹ ghọsị Osolobuẹ n'ọ wụrụ ẹjan w'e finfin. Ẹrịra kẹ Osolobuẹ gwa Mozizi mẹ ẹ.

³⁰ Mozizi nọ weriberi udẹn-nsọ lẹ ẹdeke rị elu ukpo nchụn-ẹjan ahụn, fe wẹ kpu Ẹrọnụ lẹ ẹwuru ndị hụ o yi, fekpuzi ụmụ a lẹ ẹwuru wẹ. Ẹrịra kẹ o gi dọn Ẹrọnụ lẹ ẹwuru ẹ lẹ ụmụ a lẹ ẹwuru wẹ nsọ.

³¹ Mozizi nọ sịzị Ẹrọnụ lẹ ụmụ a, “Nọ nị ọnụmụzọ Ọdụ-nsọ rị Ọdụ-ozuzu shi anụ a, ụnụ a nọ ebẹhụ ri ya lẹ brẹdi ahụn wẹ gha imẹ ụkpalị oyiye-ntumẹ wepụha — nọkẹ kẹ m dọn ku ẹ, sị, ‘Ẹrọnụ lẹ ụmụ a nwọn ri ẹ.’

³² Ụnụ rigụ, ụnụ a dụnpụ anụ lẹ brẹdi họdụnị ọkụn.

³³ Aghalẹ ni ẹhụ ọnụmụzọ Ọdụ-ozuzu pụ ọrọgbọ akp'ọhịn ẹsa, d'e ru ụhụọhịn wẹ tumẹgụ ụnụ, makẹni akpọhịn ẹsa kẹ w'e gi tumẹ ụnụ.

³⁴ Ihiẹn ẹnyi mẹ tannị wụ ihiẹn Osolobuẹ sị ẹnyi mẹ gi gbarị isi ụnụ.

³⁵ Ụnụ k'a nọdịrịrị ọnụmụzọ Ọdụ-nsọ ahụn rị Ọdụ-ozuzu efinaị lẹ uhinhin akpọhịn ẹsa, mẹ ihiẹn Osolobuẹ chọ, makẹ ụnụ gha a nwụn, makẹni ya wụ ihiẹn Osolobuẹ sị m mẹ.”

³⁶ Ya Ẹrọnụ lẹ ụmụ a nọ mẹchanrịn ihiẹn ile Osolobuẹ sị Mozizi gwa wẹ mẹ.