Lẹvitikọsụ 7 - Ika

Isi Nke Ẹsa Iwu Ẹjan Onyẹ Ikpe Ma

¹ “Lee iwu ẹjan onyẹ ikpe ma. Ẹjannị rị okẹn nsọ:

² Ebẹhụ wẹ nọ e gbu anụ wẹ k'e gi chụn ẹjan w'a dụn ọkụn kẹ w'a nọ e gbu anụ wẹ gi chụn ẹjan onyẹ ikpe ma, e fe wẹ ẹdeke ẹ kpu ukpo nchụn-ẹjan ụsụọ ile.

³ Wẹ k'a chụnyechanrịn ụtọrọ a ile: kẹ ụtọrọ rị a ọdụndụn kẹ ụtọrọ ile kpumẹ ihiẹn rị imẹ ẹ,

⁴ kẹ akụnrụn a ẹbụbụọ lẹ ụtọrọ nyanrịnnị wẹ ibẹka ukun ẹ lẹ ihiẹn hụ mẹ ụtọrọ-ụtọrọ kpumẹ imegi ẹ, hụn wẹ k'a dọpụha ya lẹ akụnrụn a.

⁵ Onyẹ nchụn-ẹjan k'a nọ elu ukpo nchụn-ẹjan dụn wẹ ọkụn nị wẹ họnrin ẹnwụnrụn, wụrụ oyiye wẹ gi ọkụn ye Osolobuẹ. Ẹjan onyẹ ikpe ma rọ.

⁶ Okẹnnyẹ ọwụlẹ rị ikpụlọ onyẹ nchụn-ẹjan nwọn ikẹn ri ẹ, kanị ebe rị nsọ kẹ w'a nọkwọ ri ẹ. Ẹjannị rị okẹn nsọ.

⁷ “Iwu ohuni kẹ w'e gi e sọn kẹ ẹjan-njọ kẹ ẹjan onyẹ ikpe ma: onyẹ nchụn-ẹjan hụn chụnn'a gi gbarị isi hụnyẹ nwọn anụ a họdụnị.

⁸ Onyẹ nchụn-ẹjan hụn chụnnị ịhịan ẹjan w'a dụn ọkụn nwọn ikẹn weri akpụkpọ a.

⁹ Oyiye-ọka ọwụlẹ wẹ shi kẹ w'e shi brẹdi mọbụ hụn wẹ gi ugbẹgbẹ mọbụ ihiẹn shịa pata ghe wụ nke onyẹ nchụn-ẹjan hụn chụnnị wẹ ẹjan hụ.

¹⁰ Ọka ọwụlẹ wẹ gi chụn ẹjan, kẹ hụn wẹ gi ofugbọn-olivu gwọ kẹ hụn wẹ gilẹni sikọ d'e ru ụmụ Ẹrọnụ ile ẹka ahanmahan.

Iwu Ẹjan-okele

¹¹ “Lee iwu ẹjan-ekele w'e ye Osolobuẹ:

¹² “Omẹni hụn o gi a kpanmịn Osolobuẹ rọ, ọ kpụnlanị anụ oyiye-nkpanmịn hụ, ọ kịhazị donọtụ wẹ gi ofugbọn-olivu gwọ wẹ buchelẹni yisti, biskiti wẹ gi ofugbọn-olivu tekwama wẹ buchelẹni yisti lẹ brẹdi wẹ gi ọka wẹ gweriẹn gwọgbama ya lẹ ofugbọn-olivu mẹmẹ.

¹³ O k'a kịhazị brẹdi wẹ buche yisti cheni ẹjan-ekele hụ ọ wela d'e gi kpanmịn Osolobuẹ.

¹⁴ O k'e wẹhẹrịrị brẹdi ichẹn-ichẹn, ohu-ohu, n'ọ wụrụ ihiẹn o gi kwadọn ọrụn Osolobuẹ. Ihiẹnni o gi kwadọn ọrụn Osolobuẹ wụ nke onyẹ nchụn-ẹjan hụn chụnn'a ẹjan hụ, hụn feye ẹdeke ẹjan-ekele hụ.

¹⁵ Wẹ sikọ d'e rirịrị anụ ẹjan-ekele hụ o gi kpanmịn Osolobuẹ ụhụọhịn hụ o ye ẹ; y'a nịkwọlẹ eki fọnkunrun hụn ọwụlẹ imẹ ẹ.

¹⁶ “Kanị, omẹni nkwa o kwe Osolobuẹ k'o k'e gi oyiye hụ mẹzu mọbụ nị oyiye ghapụha a hụ obi rọ, ụhụọhịn o ye oyiye hụ kẹ wẹ k'e ri ẹ, kanị wẹ nwọn ikẹn ri hụn ọwụlẹ bọ-ọra.

¹⁷ Anụ ọwụlẹ wẹ gi chụn ẹjan hụ nọruọlẹ nke akpọhịn ẹtọ wẹ k'a dụnrịrị a ọkụn.

¹⁸ Wẹ ri anụ ẹjan-ekele ọwụlẹ nọru nke akp'ọhịn ẹtọ rịn'a, Osolobuẹ anarịnkọ oyiye hụ, ya wụ nị onyẹ yen'ẹ eyeni, makẹni ọ rụgụọ; onyẹ ri hụn ọwụlẹ imẹ ẹ, o gi isi ẹ buru ẹ.

¹⁹ “Erikọ wẹ anụ ẹhụ a hụarị ihiẹn ọwụlẹ rụnị; wẹ k'a dụnrịrị a ọkụn. O mẹ nke anụ oyiye hụ, onyẹ ọwụlẹ rị ọchan nwọn ikẹn ri ẹ.

²⁰ Kanị onyẹ ọwụlẹ rụnị ri anụ ẹjan-ekele wẹ chụnyeni Osolobuẹ, wẹ bepụ hụnyẹ imẹ ndị nke wẹ.

²¹ Onyẹ ọwụlẹ ẹhụ a hụarị ihiẹn rụnị — hụn gha ẹhụ ịhịan pụha mọbụ anụ rụnị mọbụ ihiẹn ọwụlẹ rụnị w'a sọ mọbụ ri anụ ọwụlẹ wẹ gi ye Osolobuẹ oyiye ekele, wẹ k'e bepụrịrị onyẹ ahụn imẹ ndị nke ẹ.”

E Rilẹni Ụtọrọ Mọbụ Ẹdeke Anụ

²² Osolobuẹ sị Mozizi,

²³ “Sị ndị Izrẹlụ ‘Erilẹ ni ụtọrọ efin lẹ nke atụnrụn mọbụ nke ewu.

²⁴ Ụnụ nwọn ikẹn gi ụtọrọ anụ eje-anụ gbu mẹ ihiẹn ọzọ, ka erilẹ n'ẹ.

²⁵ Onyẹ ri ụtọrọ anụ ẹjan w'a dụn ọkụn, anụ oyiye wẹ gi ọkụn e ye Osolobuẹ, wẹ k'e bepụrịrị a imẹ ndị nke ẹ.

²⁶ Ebe ọwụlẹ ụnụ bi, erikwọlẹ ni ẹdeke nnụnụ ọwụlẹ mọbụ anụ ọwụlẹ.

²⁷ Onyẹ ri ẹdeke, wẹ k'e bepụrịrị hụnyẹ imẹ ndị nke ẹ.’ ”

Ihiẹn E Ru Ndị Nchụn Ẹjan

²⁸ Osolobuẹ sị Mozizi,

²⁹ “Sị ndị Izrẹlụ, ‘Onyẹ ọwụlẹ wẹhẹni Osolobuẹ ẹjan-ekele jẹnkọ d'a gha imẹ ẹ weri hụn o k'a chụnyeni Osolobuẹ.

³⁰ Ịya k'e gi ẹka a wẹhẹ hụn ahụn wẹ k'e gi ọkụn chụnyeni Osolobuẹ, hụn wụ ụtọrọ lẹ ẹran, o finfin ẹran hụ ghọsị Osolobuẹ n'ọ wụrụ ẹjan w'e finfin.

³¹ Onyẹ nchụn-ẹjan a nọ elu ukpo nchụn-ẹjan dụn ụtọrọ ahụn ọkụn, kanị ẹran ahụn wụ nke Ẹrọnụ lẹ ụmụ a,

³² ụnụ e we ọrụ ẹka-nni anụ ụnụ gi chụn ẹjan-ekele ye onyẹ nchụn-ẹjan n'ọ wụrụ ihiẹn ụnụ gi kwadọn ọrụn Osolobuẹ.

³³ Nwa Ẹrọnụ hụn chụnyeni Osolobuẹ ẹdeke lẹ ụtọrọ anụ ẹjan-ekele ịhịan wẹhẹ k'e weri ọrụ ẹka-nni anụ ahụn; hụn run'ẹ rọ.

³⁴ Imẹ anụ ndị Izrẹlụ gi chụn ẹjan-ekele, e werigụọ m ẹran a hụ w'e finfinghọsị m lẹ ọrụ a hụ wẹ gi a kwadọn ọrụn m, e wegụọ m wẹ ye Ẹrọnụ onyẹ nchụn-ẹjan lẹ ụmụ a, n'ọ wụrụ ihiẹn k'a gha e ru wẹ ẹka.’ ”

³⁵ Ịya kẹ w'e ye Ẹrọnụ lẹ ụmụ a imẹ ẹjan wẹ gi ọkụn e ye Osolobuẹ, gha ụhụọhịn ahụn wẹ wepụha wẹ d'a rụnmanị Osolobuẹ ọrụn jẹnmẹ.

³⁶ Ụhụọhịn hụ wẹ hukpu wẹ udẹn-nsọ tumẹ wẹ kẹ Osolobuẹ sị ndị Izrẹlụ yemẹ wẹ ya, n'ọ wụrụ ihiẹn k'a gha e ru wẹ ẹka agbọ wẹ ile.

³⁷ Iwu ndịnị kẹ wẹ gisọnmẹ e ye oyiye w'a dụn ọkụn, oyiye ọka, ẹjan-njọ, ẹjan onyẹ ikpe ma, oyiye-ntumẹ lẹ ẹjan-ekele.

³⁸ Osolobuẹ ye Mozizi iwu ndịnị enu Ugu Saịnaị ụhụọhịn ahụn ọ gwa ndị Izrẹlụ wẹhẹmẹni Osolobuẹ oyiye wẹ kẹ wẹ rị imẹ atụ Saịnaị.