Lẹvitikọsụ 6 - Ika

Isi Nke Isin

¹ Osolobuẹ sị Mozizi:

² “Omẹni ịhịan mẹ Osolobuẹ njọ ghahanị ịtụ ibe ẹ ntụ banyeni ihiẹn wẹ ye ẹ dọnmẹ mọbụ ihiẹn wẹ gi biye ụgwọ mọbụ gbama ibe mọbụ zunarịn ibe ẹ ihiẹn mọbụ mẹgbu ibe ẹ,

³ mọbụ hụn ihiẹn tuhuni sị ọ hụnn'a mọbụ kun ẹfan Osolobuẹ kanị ntụ k'ọ rị a tụ mọbụ mẹ njọ ndị ọzọ nọ ẹnịna hụn ịhịan e mẹ,

⁴ ikpe a magụọ a; o k'e wekinhẹnrịrị ihiẹn o zu mọbụ tụnarịn ịhịan mọbụ ihiẹn hụ wẹ ye ẹ dọnmẹ mọbụ ihiẹn hụn tuhuni ọ hụn,

⁵ mọbụ ihiẹn ọwụlẹ o kunni ẹfan Osolobuẹ kanị ntụ k'ọ rị a tụ. O k'a kụchanrịnrịrị ụgwọ a, wezi ụzọ ohu imẹ ụzọ isẹn chen'ẹ; o we wẹ ile ye onyẹ nwọnn'ẹ, makẹni ikpe a magụọ a.

⁶ “O sikọ d'e wẹhẹni Osolobuẹ atụnrụn ẹhụ a zu oke mọbụ ọnụ-egho ẹ, we ẹ ye onyẹ nchụn-ẹjan, makẹni ikpe ma a.

⁷ Onyẹ nchụn-ẹjan a nọ ihun Osolobuẹ gi ẹ chụnn'a ẹjan, o gi ẹ gbarị isi ẹ, a gbagharị w'a ihiẹn ọwụlẹ o mẹ ikpe gi ma a.”

Iwu Ẹjan Ichẹn-ichẹn Iwu Ẹjan W'a Dụn Ọkụn Rọ

⁸ Osolobuẹ nọ sị Mozizi,

⁹ “Ye Ẹrọnụ lẹ ụmụ a iwuni: Lee ni iwu ẹjan w'a dụn ọkụn: Ẹjan wẹ dụn ọkụn k'a rịrị elu ukpo nchụn-ẹjan eki e we fọn; ọkụn sikọ d'a rịsọnmẹ ukpo nchụn-ẹjan.

¹⁰ Ụtụntụn, onyẹ nchụn-ẹjan e yiri ẹwuru linẹni ẹ hụ tueru alị lẹ apa linẹ tueru ọgbọdọgbọ hụn o yiye alị-ukun, o kpọnpụ ntụn ahụn mẹ ụtọrọ-ụtọrọ rị elu ukpo nchụn-ẹjan, ntụn ẹjan wẹ dụn ọkụn, kpọn ẹ tọ ụsụọ ukpo nchụn-ẹjan ahụn.

¹¹ Ọ gbụpụ ẹkwa ndị hụ o yi, o yiri ndị ọzọ, bu ntụn hụ gha ebe ịhịan bi pụ, d'e kpọntọ ebe rị ọchan.

¹² Ọkụn sikọ d'a rịsọnmẹ ukpo nchụn-ẹjan; etinyụnkọ w'a. Ụtụntụn ọwụlẹ, onyẹ nchụn-ẹjan e we nkụn chen'ẹ, o dọnye ẹjan w'a dụn ọkụn elu ọkụn hụ, ọ nọ elu ẹ dụn ụtọrọ ẹjan ọrịrịmma ọkụn.

¹³ Ọkụn ya rịsọnmẹ elu ukpo nchụn-ẹjan, etinyụnkọ w'a.

Iwu Ẹjan-ọka

¹⁴ “Lee ni iwu oyiye-ọka: o ru, ụmụ Ẹrọnụ ikẹnnyẹ e wẹhẹ ọka ahụn wẹ gi chụn ẹjan ihun Osolobuẹ, ihun ukpo nchụn-ẹjan.

¹⁵ Onyẹ nchụn-ẹjan k'a gha ọka hụ wẹ gweriẹn lẹ ofigbọn-olivu sọnn'ẹ kpọnrin ọb'ẹka ohu, o wezi nsẹnsi ile wẹ buche elu ẹjan-ọka hụ chen'ẹ, o gi wẹ nọkin ẹnya oyiye hụ ile, nọ elu ukpo nchụn-ẹjan dụn wẹ ọkụn, o họnrin ẹnwụnrụn, wụrụ ishin a sụọ Osolobuẹ ụsụọ.

¹⁶ Ẹrọnụ lẹ ụmụ a e ri hụn họdụnị, kanị, wẹ k'a nọrịrị ebe rị nsọ ri ẹ; ebuchekọ w'a yisti. Ezi Ọdụ-ozuzu kẹ w'a nọ ri ẹ.

¹⁷ W'e gikwọlẹ yisti shi ẹ. E wegụọ m'a ye wẹ, ịya ru wẹ ẹka imẹ oyiye ndị wẹ gi ọkụn ye m. Ẹjan rị okẹn nsọ rọ, nọ kẹ ẹjan-njọ lẹ ẹjan onyẹ ikpe ma.

¹⁸ Okẹnnyẹ ọwụlẹ wụ onyẹ ebozo Ẹrọnụ nwọn ikẹn ri ẹ. O k'e rusọnmẹ wẹ ẹka agbọ ile lalanị imẹ oyiye ile wẹ gi ọkụn e ye Osolobuẹ. Ihiẹn ọwụlẹ mẹtụn'a k'e họnrin ihiẹn w'a sọ wẹ k'e gbu.”

Iwu Oyiye-ọka Wẹ Gi E Tumẹ Onyẹ nchụn-ẹjan

¹⁹ Osolobuẹ nọzị sị Mozizi,

²⁰ “Lee oyiye Ẹrọnụ lẹ ụmụ a sikọ d'e wẹhẹni Osolobuẹ ụhụọhịn wẹ k'e tumẹ wẹ: ọka wẹ gweriẹn hụn k'e ru mkpu kọstadị-nta ẹbụọ; ịya k'a wụ oyiye-ọka w'e yesọnmẹ ogẹn ile: ụtụntụn, o wẹhẹ nkirishi ẹ, ẹnyasị, o wẹhẹzi nkirishi ẹ.

²¹ Wẹ buche ẹ ofigbọn-olivu, gwọgụ a ọhụnma, gi ihiẹn mẹ pata ghe ẹ, a kpakesọnmẹ wẹ ẹ, wẹhẹ ẹ d'a chụn ẹjan hụ n'ọ wụrụ ishin hụn a sụọ Osolobuẹ.

²² Agbọ ọwụlẹ, nwa Ẹrọnụ hụn rị ọnọdị onyẹ isi nchụn-ẹjan wụ onyẹ sikọ d'a chụn ẹjannị. O sikọ d'a wụchanrịn nke Osolobuẹ ogẹn ile wẹ chụn a jẹnrin ejẹn, wẹ k'a dụnchanrịn a nwan ọkụn.

²³ Wẹ k'a dụnchanrịnrịrị oyiye-ọka ọwụlẹ onyẹ nchụn-ẹjan wẹhẹni Osolobuẹ ọkụn. Erikọ w'a.”

Iwu Ẹjan-njọ

²⁴ Osolobuẹ nọ sị Mozizi,

²⁵ “Sị Ẹrọnụ lẹ ụmụ a: Lee ni iwu ẹjan-njọ: ebe wẹ nọ e gbu anụ wẹ gi a chụn ẹjan w'a dụn ọkụn kẹ wẹ k'a nọzị e gbu anụ wẹ gi a chụn ẹjan-njọ; ẹjan rị okẹn nsọ k'ọ wụ.

²⁶ Onyẹ nchụn-ẹjan hụn chụnn'a k'e ri ẹ; ebe rị nsọ imẹ ezi Ọdụ-ozuzu kẹ w'a nọ ri ẹ.

²⁷ Ihiẹn ọwụlẹ hụarị anụ ẹjan-njọ k'e họnrin ihiẹn w'a sọ wẹ k'e gbu; ẹdeke ẹ ọwụlẹ gbakpu ẹwuru, ebe rị nsọ kẹ w'a nọ sụ a.

²⁸ Omẹni ite-ụrụa kẹ wẹ gi shi anụ a, wẹ k'e tikpọrịrị a; kanị omẹni ite igwe-bronzu kẹ wẹ gi shi ẹ, a kọchanpụchanrịn w'a, gi mirin ṅanchan a.

²⁹ Okẹnnyẹ ọwụlẹ rị ikpụlọ onyẹ nchụn-ẹjan nwọn ikẹn ri ẹ; ihiẹn rị okẹn nsọ k'ọ wụ.

³⁰ Kanị ẹrikọkwọ wẹ anụ ẹjan-njọ ọwụlẹ wẹ webanhan ẹdeke ẹ imẹ Ọdụ-nsọ kẹti-kẹti d'e gi ẹ gbarị isi imẹ Ebe rị nsọ; wẹ k'a dụnrịrị a ọkụn.