Lẹvitikọsụ 4 - Ika

Isi Nke Ẹnọ Ẹjan-Njọ

¹ Osolobuẹ gwa Mozizi oku, sị,

² “Sị ndị Izrẹlụ: Ọ rụnahịn ịhịan mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, lee ihiẹn o jẹnkọ d'e mẹ:

Omẹni Onyẹ-isi Nchụn-ẹjan Mẹ Njọ

³ “Omẹni onyẹ-isi nchụn-ẹjan mẹ njọ, o buhẹgụọnị ịhịan ile ikpe-ọmụma. O k'e wẹhẹrịrịnị Osolobuẹ okoro okẹn-efin ẹhụ a zu oke gi chụn ẹjan makẹ njọ hụ o mẹ.

⁴ O k'e wẹhẹ okẹn-efin ahụn ihun Osolobuẹ ọnụ-mgbọn Ọdụ-ozuzu, bu ẹka kwasị a isi, gbu ẹ ihun Osolobuẹ.

⁵ “Onyẹ-isi nchụn-ẹjan hụ mẹ njọ k'e weberi ẹdeke okẹn-efin ahụn we ẹ shi imẹ Ọdụ-ozuzu.

⁶ Ọ rụ mkpịnsịn-ẹka ye imẹ ẹdeke hụ o gi banhan, o fe ẹ ye ihun Osolobuẹ mgbe ẹsa, ihun Ẹkwa Mgbọnbepụ rị Ọdụ-Nsọ.

⁷ Ọ bịa d'e weberizi ẹdeke hụ, de ẹ deye mpịn rịsọnmẹ nkonko ukpo nsẹnsi e shin ọhụnma hụn rị ihun Osolobuẹ, imẹ Ọdụ-ozuzu; o hu ẹdeke okẹn-efin hụ họdụnị ye ukun ukpo hụ wẹ n'a dụn ẹjan ọkụn hụn rị ọnụmụzọ Ọdụ-ozuzu.

⁸ “O sikọ d'e wepụhachanrịn ụtọrọ okẹn-efin ẹjan-njọ hụ ile: kẹ ụtọrọ ile kpumẹ ihiẹn rị imẹ ẹ lẹ hụn nyanrịnnị wẹ,

⁹ akụnrụn a ẹbụbụọ lẹ ụtọrọ nyanrịnnị wẹ ibẹka ukun ẹ lẹ ihiẹn kpumẹ imegi, hụn o k'e wepụha ya lẹ akụnrụn a

¹⁰ kẹ wẹ dọn e wepụha ụtọrọ efin ẹjan-ekele. Onyẹ nchụn-ẹjan k'a nọ ukpo wẹ n'a dụn ẹjan ọkụn dụn a ọkụn mẹ ẹ họnrin ẹnwụnrụn.

¹¹ Kanị, nke akpụkpọ okẹn-efin ahụn lẹ uru ẹ lẹ isi ẹ lẹ ụkụ a lẹ ihiẹn ndị rị imẹ ẹ lẹ ihiẹn ile w'e ri e ri rị imẹ ẹ,

¹² anụ okẹn-efin ahụn ile họdụnị, onyẹ nchụn-ẹjan k'a gharịrị ebe ịhịan bi bupụ a, shi ebe rị ọchan kẹ iwu dọn ku hụn w'e kpọnye ntụn d'a dụn a ọkụn.

Omẹni Izrẹlụ Ile Mẹ Njọ

¹³ “Omẹni ndị Izrẹlụ ile kẹ ọ rụnahịn mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, ikpe a magụọ wẹ — ọsụọn'a nị amarịn wẹ.

¹⁴ Hụn wẹ gihụ marịn nị wẹ mẹ njọ, wẹ k'e buhẹrịrị agbanaị okẹn-efin wẹ sikọ d'e gi chụn ẹjan-njọ; wẹ k'e buhẹ ẹ ọnụmụzọ Ọdụ-ozuzu.

¹⁵ Ndị-ichẹn alị k'e bu ẹka kwasị efin hụ isi ihun Osolobuẹ, e gbu wẹ ẹ.

¹⁶ Onyẹ-isi nchụn-ẹjan e weberi ẹdeke okẹn-efin hụ banye imẹ Ọdụ-ozuzu.

¹⁷ Ọ rụ mkpịnsịn-ẹka ye imẹ ẹdeke hụ, o fe ẹ ye ihun Osolobuẹ, mgbe ẹsa, ihun Ẹkwa-mgbọnkin.

¹⁸ O weberizi ẹdeke hụ deye mpịn ndị rị nkonko ukpo nsẹnsi hụ rị ihun Osolobuẹ imẹ Ọdụ-ozuzu; o hu ẹdeke họdụnị ye ukun ukpo wẹ n'a dụn ẹjan ọkụn hụn rị ọnụmụzọ Ọdụ-ozuzu.

¹⁹ O k'e wepụhachanrịn ụtọrọ a, nọ elu ukpo nchụn-ẹjan hụ dụn a ọkụn n'o họnrin ẹnwụnrụn,

²⁰ o mẹ okẹn efinni k'o dọn mẹ okẹn-efin ẹjan-njọ. Ẹnịna kẹ onyẹ nchụn-ẹjan k'a dọn gbarị isi wẹ, Osolobuẹ a gbagharị wẹ;

²¹ Onyẹ-isi nchụn-ẹjan a gha ebe ịhịan bi bupụ okẹn-efin hụ, dụn a ọkụn kẹ w'a dụn okẹn-efin onyẹ-isi nchụn mẹ njọ. Ọnwan wụ ẹjan-njọ w'a chụnnị alị.

Omẹni Onyẹ-ndu Mẹ Njọ

²² “Omẹni onyẹ-ndu k'ọ rụnahịn mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, ikpe a magụọ a.

²³ Hụn o gihụ marịn n'o mẹgụọ njọ, o k'e wẹhẹrịrị mkpịn ẹhụ a zu oke d'e ye.

²⁴ O k'e bu ẹka kwasị mkpịn ahụn isi, nọ ihun Osolobuẹ, ebẹhụ wẹ n'e gbu anụ ẹjan w'a dụn ọkụn, gbu ẹ. Ẹjan-njọ rọ.

²⁵ Onyẹ nchụn-ẹjan e gi mkpịnsịn-ẹka deri ẹdeke ẹjan-njọ hụ, deye mpịn rịsọnmẹ nkonko ukpo hụ wẹ n'a dụn ẹjan ọkụn, hu hụn họdụnị ye ukun ukpo hụ.

²⁶ O k'a nọ ukpo hụ dụn ụtọrọ ẹjan ahụn ile ọkụn n'o họnrin ẹnwụnrụn k'o dọn mẹ ụtọrọ ẹjan-ekele. Ẹnịna kẹ onyẹ nchụn-ẹjan k'a dọn gbarị isi onyẹ hụ, Osolobuẹ a gbagharị onyẹ hụ.

Omẹni Onyẹ-mmaka Rọ

²⁷ “Omẹni onyẹ-mmaka k'ọ rụnahịn mẹ njọ ghahanị imẹ ihiẹn ọwụlẹ Osolobuẹ sị wẹ emẹlẹ, ikpe a magụọ a.

²⁸ Hụn o gihụ marịn n'o mẹgụọ njọ, o k'e wẹhẹrịrị onyẹnnyẹ-ewu ẹhụ a zu oke o jẹnkọ d'e gi chụn ẹjan njọ o mẹ.

²⁹ O k'e bu ẹka kwasị anụ ẹjan njọ hụ isi, nọ ebẹhụ wẹ nọ a chụn ẹjan w'a dụn ọkụn gbu ẹ.

³⁰ Onyẹ nchụn-ẹjan e gi mkpịnsịn-ẹka deri ẹdeke ẹjan-njọ hụ deye mpịn rịsọnmẹ nkonko ukpo hụ wẹ n'a dụn ẹjan ọkụn, hu hụn họdụnị ye ukun ukpo hụ,

³¹ wepụha ụtọrọ a ile, kẹ wẹ dọn e wepụha ụtọrọ anụ wẹ gi ye oyiye ekele; onyẹ nchụn-ẹjan a nọ ukpo hụ wẹ n'a chụn ẹjan dụn a ọkụn n'o họnrin ẹnwụnrụn, ọ wụrụ ishin ọma hụn a sụọ Osolobuẹ ụsụọ. Ẹnịna kẹ onyẹ nchụn-ẹjan k'a dọn gbarị isi onyẹ hụ, Osolobuẹ a gbagharị a njọ.

³² “Omẹni atụnrụn k'o wela d'a chụn ẹjan-njọ a, ya wẹhẹ onyẹnnyẹ ẹhụ a zu oke.

³³ O k'e bu ẹka kwasị a, nọ ebe wẹ nọ e gbu anụ ẹjan w'a dụn ọkụn gbu ẹ, gi chụn ẹjan-njọ.

³⁴ Onyẹ nchụn-ẹjan e gi mkpịnsịn-ẹka deri ẹdeke ẹjan-njọ hụ, deyesọnmẹ mpịn rịsọnmẹ nkonko ukpo hụ wẹ nọ a dụn ẹjan ọkụn, hu hụn họdụnị ye ukun ukpo hụ.

³⁵ O k'e wepụha ụtọrọ a ile kẹ wẹ dọn e wepụha ụtọrọ anụ wẹ gi ye oyiye ekele, onyẹ nchụn-ẹjan a nọ ukpo hụ wẹ nọ a chụn ẹjan, elu ẹjan ndị hụ wẹ gi ọkụn chụnyeni Osolobuẹ, dụn a ọkụn n'o họnrin ẹnwụnrụn. Ẹnịna kẹ onyẹ nchụn-ẹjan k'a dọn gbarị isi onyẹ hụ, Osolobuẹ a gbagharị a njọ.