Lẹvitikọsụ 27 - Ika

Isi Nke Ẹsa Kwasị Ọgụn Ịgbarị Ihiẹn Osolobuẹ R'ị Ẹka

¹ Osolobuẹ sị Mozizi,

² “Gwa ndị Izrẹlụ, sị wẹ: Ịhịan kwe nkwa zeni n'o k'e gi ịhịan kwanị Osolobuẹ ghahanị igi egho roro ẹ,

³ ihiẹn w'e gi gbarị okẹnnyẹ rị gha ahụa ọgụn d'e ru ahụa ọgụn-ẹtọ wụ akpụrụ egho siliva iri kwasị ọgụnnaị — ihiẹn wẹ gi a ma siliva imẹ ụlọ-nsọ kẹ w'e gi ma a;

⁴ omẹni okpoho rọ, akpụrụ egho siliva iri kwasị ọgụn.

⁵ Omẹni onyẹ rị gha nwa ahụa isẹn d'e ru ahụa ọgụn rọ, ihiẹn w'e gi gbarị okẹnnyẹ wụ akpụrụ egho siliva ọgụn; okpoho, akpụrụ egho siliva iri.

⁶ Omẹni onyẹ rị gha ifọn ohu d'e ru ahụa isẹn rọ, ihiẹn w'e gi gbarị okẹnnyẹ wụ akpụrụ egho siliva isẹn, hụn w'e gi gbarị okpoho wụ akpụrụ egho siliva ẹtọ.

⁷ Omẹni onyẹ rị gha nwa ahụa ọgụn-ẹtọ shi elu rọ: ihiẹn w'e gi gbarị okẹnnyẹ wụ akpụrụ egho siliva mmisẹn, ihiẹn w'e gi gbarị hụn okpoho wụ akpụrụ egho siliva iri.

⁸ Omẹni onyẹ rị e kwe nkwa hụ e mẹkẹzi ogbẹnnyẹ, n'ọ sakọ ẹka kụ ọnụ-egho hụ w'a kụ, o sikọ d'e we onyẹ hụ o k'a gbarị jẹnni onyẹ nchụn-ẹjan, onyẹ nchụn-ẹjan e ku ọnụ-egho wẹ k'e gi gbarị a; ọnụ-egho o k'e ku k'a wụ hụn onyẹ kwe nkwa k'a saẹka kụ.

⁹ “Omẹni anụ hụn Osolobuẹ a narịn kẹ onyẹ hụ kwe nkwa a, anụ hụ ile e họnringụọ ihiẹn rị nsọ, ihiẹn lachanrịnnị Osolobuẹ.

¹⁰ Ọ sakọzị ẹka gbahutọ a, o gikọdẹ hụn rị mma gbarị hụn rịlẹni mma o te gi kwanị Osolobuẹ mọbụ gi hụn rịlẹni mma gbarị hụn rị mma; ọ gbahutọ a, kẹ hụn o gi kwanị Osolobuẹ kẹ hụn o te gi gbahutọ a a rịpụ nsọ, lachanrịnnị Osolobuẹ.

¹¹ Omẹni anụ o kwe nkwa a wụ anụ rịlẹni ọchan w'a sọ wẹ ghalẹni a chụnyeni Osolobuẹ rọ, wẹ k'e wẹhẹgụnị onyẹ nchụn-ẹjan ya,

¹² ịya nwọn ku kẹ ọ hụghọ mma ra ọ rịnị mma. Ihiẹn onyẹ nchụn-ẹjan sị nwan nị ya wụ ọnụ a wụ ọnụ a.

¹³ Omẹni onyẹ nwọnn'ẹ chọ n'ọ gbarị a, o k'a kụ ọnụ-egho hụ, wezi ụzọ ohu imẹ ụzọ isẹn chen'ẹ.

¹⁴ “Ịhịan gi ụlọ a kwanị Osolobuẹ n'ọ wụrụchanrịn nke Osolobuẹ, onyẹ nchụn-ẹjan k'e ku kẹ ọ hụ mma ra ọ rịnị mma. Ihiẹn ọwụlẹ onyẹ nchụn-ẹjan sị nị ya wụ ọnụ-egho ẹ, ya k'a wụ ọnụ egho ẹ.

¹⁵ Omẹni onyẹ nwọn ụlọ hụ k'a gbarị a, o kụ ọnụ-egho hụ, wezi ụzọ ohu imẹ ụzọ isẹn chen'ẹ, ụlọ ahụn a wụrụzị nke ẹ.

¹⁶ Omẹni ịhịan a nọ alị wụ ukun ẹ weri kwanị Osolobuẹ, ihiẹn-ugbo ya lẹ ya han kẹ w'e gi ye ọnụ a: ọka-bali k'e jun mkpu kọstadị uku mmisẹn kwasị ọgụnnaị k'a wụ akpụrụ egho siliva iri kwasị ọgụnnaị.

¹⁷ Omẹni Ahụa Iyekin-ihiẹn k'o gi we alị hụ kwanị Osolobuẹ, ọnụ hụ o ye ẹ k'o k'a wụ.

¹⁸ Kanị, omẹni Ahụa Iyekin-ihiẹn a gharịgụọ n'o d'e we alị hụ kwanị Osolobuẹ, onyẹ nchụn-ẹjan e gi ahụa ole họdụnị nị Ahụa Iyekin-ihiẹn lalanị ru ye ọnụ a, ogẹn hụ o belụa ọnụ-egho ẹ.

¹⁹ Omẹni onyẹ ye alị hụ chọ n'ọ gbarị a, o kụ ọnụ-egho ẹ, wezi ohu imẹ ụzọ isẹn chen'ẹ, alị hụ a wụrụzị nke ẹ.

²⁰ Omẹni ọ gbarịnị alị hụ mọbụ n'o regụọ a ye onyẹ ọzọ, onwọnzini ogẹn w'e gi nịzị a gbarị a.

²¹ Wẹ wekin alị hụ Ahụa Iyekin-ihiẹn, o họnrin ihiẹn rị nsọ, lanị Osolobuẹ, nọkẹ alị wẹ gi kwanị Osolobuẹ; o họnrin nke onyẹ nchụn-ẹjan hụ.

²² “Ịhịan gi alị o ṅọn eṅọn kwanị Osolobuẹ, alị hụn wụlẹni nke ikpụlọ wẹ,

²³ onyẹ nchụn-ẹjan sikọ d'e gi ahụa ole ọ họdụ nị Ahụa Iyekin-ihiẹn ru ye ọnụ a. Ụhụọhịn hụ daị kẹ onyẹ ahụn k'a kụ ụgwọ a, ọ rịpụ nsọ, wụrụ ihiẹn wẹ yechanrịn Osolobuẹ.

²⁴ Kanị o ru Ahụa Iyekin-ihiẹn, alị hụ e kinni onyẹ o ṅọnnarịn a, onyẹ hụn nwọnn'ẹ mbụ.

²⁵ “Akpụrụ siliva Ụlọ-nsọ kẹ wẹ k'e gi ma egho siliva ọwụlẹ wẹ k'e gi kụ ụgwọ ọwụlẹ: akpụrụ siliva ohu Ụlọ-nsọ lẹ akpụrụ siliva nta ọgụn k'a han.

²⁶ “Ịhịan egikwọlẹ nwa ibuzọ anụ kwanị Osolobuẹ, ebe omẹni nwa ibuzọ anụ a wụgụọlẹ nke Osolobuẹ, kẹ nke efin kẹ nke atụnrụn, wẹ ile wụ nke Osolobuẹ.

²⁷ Omẹni anụ rịlẹni ọchan w'a sọ rọ, o nwọn ikẹn gbarị a, kanị ọnụ egho wẹ gi a gbarị a k'o k'e gi gbarị a, o wezi ohu imẹ ụzọ isẹn chen'ẹ. Omẹni ọ gbarịn'a, e re w'ẹ ọnụ-egho hụ wẹ gi a gbarị a.

²⁸ “Kanị ịhịan gi ihiẹn kwanị Osolobuẹ ọkwụkwa wẹ gi e tikpọ ihiẹn, erekọ w'a mọbụ gbarị a, kẹ ịhịan kẹ anụ kẹ alị ebọn; ihiẹn ile wẹ gi kwanị Osolobuẹ a rịchanrịngụọ nsọ, lachanrịnnị Osolobuẹ.

²⁹ “Wẹ gi ịhịan kwanị Osolobuẹ ọkụkwanị wẹ gi e tikpọ; agbarịkọ w'a; wẹ k'e gburịrị a.

³⁰ “Ụzọ ohu imẹ ụzọ iri ihiẹn ile alị mẹ wụ nke Osolobuẹ, kẹ ọka gha alị pụha kẹ mkpụrụ-osisi, uwẹ ile wụ nke Osolobuẹ, wẹ rị nsọ, wụchanrịn nke Osolobuẹ.

³¹ Ịhịan gbarị ụzọ ohu imẹ ụzọ iri ihiẹn ọwụlẹ hụn o te k'e ye Osolobuẹ, o k'e werịrị ụzọ ohu imẹ ụzọ isẹn ọnụ-egho ẹ chen'ẹ.

³² Ohu imẹ iri imẹ efin ile lẹ atụnrụn ile ịhịan nwọn, anụ ọwụlẹ pụha ube iri ebe onyẹ ndu anụ nọ a gụn anụ a, k'a rịchanrịn nsọ, wụrụchanrịn nke Osolobuẹ.

³³ Y'a họmakwọlẹ hụn rị mma imẹ ndị rịlẹni mma mọbụ gbahutọ hụn ọwụlẹ. Ọ gbahutọ hụn ọwụlẹ, kẹ anụ hụ kẹ hụn wẹ gi gbahutọ a k'a wụrụ ihiẹn rịnị Osolobuẹ nsọ, lachanrịnnị Osolobuẹ; agbarịkọ w'a.”

³⁴ Iwu ndịnị kẹ Osolobuẹ ye Mozizi elu ugu Saịnaị n'o ye ndị Izrẹlụ.