Lẹvitikọsụ 26 - Ika

Isi Nke Isin Kwasị Ọgụn Ngọzi Hụn E Sọn Ihumẹ-isi

¹ “Akpụrụlẹni ni mmọn mọbụ ihiẹn ọwụlẹ mọbụ tumẹni enwẹn ụnụ ọmụma-nsọ ndị hụ w'e fe; ebukwọlẹ ni ọmụma wẹ tụ che alị ụnụ kẹni ụnụ kpọman'a isi alị. Mmẹ wụ Osolobuẹ hụn wụ Chuku ụnụ.

² “Zu ni ikẹn Ụhụọhịn ndị hụ m sị ụnụ zụ ikẹn, ụnụ a gbaye ebe wẹ a nọ e fe m. Mmẹ wụ Osolobuẹ.

³ “Omẹni ụnụ e mẹ ihiẹn ndị m sị ụnụ mẹ, dọnrin ẹnya dọnmẹsọnmẹ iwu ndị m ye,

⁴ m k'e zihẹni ụnụ mirin, udu ẹ ru — alị e mẹ ihiẹn, osisi ụnụ kụn a mị mkpụrụ.

⁵ Ọ kẹrẹkọnị ụnụ ghọgụ ọka ụnụ, ogẹn vaịnị e ru; ọ kẹrẹkọnị ụnụ ghọgụ vaịnị, ogẹn ịkụnzị ihiẹn e ru; ụnụ k'e ri, ri, rijunchanrịn ẹfọ, bi alị ụnụ, onwọnni ihiẹn k'e mẹ ụnụ.

⁶ “M k'e ye ụnụ udọn imẹ alị hụ: ọnụ k'e dinẹ udọn lẹ ndọnkwa onwọnni onyẹ k'e rọn ụnụ egun; m k'e wepụchanrịn eje-anụ rị alị hụ; agha erukọ alị ụnụ.

⁷ Ụnụ k'a chụ ndị iṅẹnrẹn ụnụ ọsọ, gi ọpịa-agha gbu wẹ, a dantọsọnmẹ wẹ ihun ụnụ.

⁸ Madụ isẹn imẹ ụnụ k'a chụ madụ ọgụn-isẹn ọsọ, madụ ọgụn-isẹn k'a chụ madụ nnụ-uku iri (10,000), ụnụ k'e gi ọpịa-agha gbu ndị iṅẹnrẹn ụnụ, a dansọnmẹ wẹ ihun ụnụ.

⁹ “M k'e gi ẹnya rị mma lee ụnụ, mẹ ụnụ mụba, barahị; m k'e mẹzu nkwa m kwe imẹ nkwerigbama mmẹ lẹ ụnụ.

¹⁰ Ụnụ k'a gha e ri ihiẹn ugbo akanhụn d'e runi nke ọhụn a pụha; ụnụ k'e kpọnpụdẹ nke akan nị ụnụ hụn ebe ụnụ e kpọnye nke ọhụn.

¹¹ M k'e bu Ebe-obibi m che imẹ igunrun ụnụ; ize ụnụ ezekọ m.

¹² M k'a gha e jẹnhunmẹ imẹ igunrun ụnụ, a wụrụ m Chuku ụnụ, ụnụ a wụrụ ndị nke m.

¹³ Mmẹ wụ Osolobuẹ, Chuku ụnụ, hụn gha Ijiptu wepụha ụnụ makẹ ụnụ ghazị e wụ igbọn ndị Ijiptu; mmẹ tigipụ ẹgan wẹ kpọma ụnụ olu kẹni ụnụ hụn ụzọ gha imẹ ụya pụ.

Afụnfụn Hụn K'e Sọn Nnupụ-isi

¹⁴ “Kanị omẹni ụnụ egọnni m ntịn, mẹ ihiẹn ndịnị ile m sị ụnụ mẹ,

¹⁵ nị ụnụ a jụ iwu ndị hụ m ye ụnụ, jụ uhi m yisọnmẹ, jụ nị ụnụ e mẹkọ ihiẹn ndị hụ ile m sị ụnụ mẹ, gi ẹrịra tikpọ nkwerigbama m tumẹ ẹgbata mmẹ lẹ ụnụ,

¹⁶ lee ni ihiẹn m k'e mẹ ụnụ: m k'e zihẹni ụnụ ihiẹn-egun idẹnmizi, eje-emu hụn k'e sekpọ ụnụ lẹ ẹhụ-ọkụn hụn k'e mẹ ụnụ eleghazịlẹ ụzọ, gi ẹkẹrẹ-ẹkẹrẹ weri ndụn ụnụ. Ụnụ k'a kụn mkpụrụ la iwi, makẹni ndị iṅẹnrẹn ụnụ nwọn ri ẹ.

¹⁷ M k'e bu ẹnya zinmẹ ụnụ hụn ndị iṅẹnrẹn ụnụ e gi mẹri ụnụ; ndị rị e we iwe ụnụ k'a kị ụnụ; ụnụ k'a a gbadẹ ọsọ bụ onwọnni onyẹ chụkọnị ụnụ.

¹⁸ “Ihiẹn ndịnị ile mẹgụ ụnụ, nị ụnụ egọnkwọnị m ntịn, m k'e yecheni ụnụ afụnfụn mmagi-mmagi ụzọ ẹsa makẹ njọ ụnụ.

¹⁹ M k'e gbupụ ụnụ isi-ikẹn ụnụ hụ, mẹ igwere ụnụ rị okpuru ẹ ze kẹ igwe, mẹ alị hụn rị okpuru ụnụ ze kẹ igwe-bronzu.

²⁰ Ụnụ k'a rụngbu enwẹn ọnụ mmaka makẹni alị ụnụ emẹkọ ihiẹn ọwụlẹ, osisi ụnụ amịkọ mkpụrụ.

²¹ “Ụnụ tọzị oku m a pa, jụ nị ụnụ egọnkọ m ntịn, m k'e mẹ afụnfụn ụnụ jọwaye njọ ụzọ ẹsa cheni hụn ụnụ rị imẹ ẹ — kẹ njọ ụnụ han.

²² M k'e zi eje-anụ rị ọfịa ye imẹ igunrun ụnụ: wẹ k'e gbu ụmụ ụnụ, gbu anụ ụnụ, mẹ ụnụ belụa ọda-ọda nke wụ nị ọkpụzọ ndị rị alị ụnụ a gba okpokoro.

²³ “Ihiẹn ndịnị ile mẹgụ bụ ụnụ ekwekwọnị gọn m ntịn, bihutọ ẹka; nị ụnụ a tọ e feni m isi hụ ụnụ rị feni m,

²⁴ mmẹ lẹ enwẹn m k'e bunụmanị ụnụ, ye ụnụ afụnfụn njọ ụnụ mmagi-mmagi ụzọ ẹsa.

²⁵ M k'e wẹhẹni ụnụ agha, gi ẹ mẹgwarị ụnụ omẹgwarị ndị tikpọ nkwerigbama. Ụnụ gbaban imẹ obodo ụnụ, e zi m eje-emu e feni ye imẹ igunrun ụnụ, mẹ ụnụ danban ẹka ndị iṅẹnrẹn ụnụ.

²⁶ Ogẹn m'e gi gbukin ụzọ ụnụ gha e nwọnhẹn ihiẹn-oriri, ikpoho iri sikọ d'e gi ite ohu sụọ shi ihiẹn-oriri ụnụ ile k'e ri. Wẹ k'a ghadẹ e keye ịhịan ya ẹkẹrẹ-ẹkẹrẹ; ụnụ k'e ri, ẹfọ ejunkọ ụnụ.

²⁷ “Ọnwan mẹgụ, nị ụnụ egọnzikwọnị m ntịn, nị ụnụ a tọ e feni m isi hụ,

²⁸ m k'e gi olulu bunụmanị ụnụ; mmẹ lẹ enwẹn m k'e ye ụnụ afụnfụn njọ ụnụ mmagi-mmagi, ụzọ ẹsa.

²⁹ Ụnụ k'e ridẹ anụ ụmụ ụnụ ikẹnnyẹ lẹ ikpoho.

³⁰ M k'e tikpọ ụlọ-mmọn ndị ahụn ụnụ rụn, tikpọ ukpo ndị hụ ụnụ nọ a mụnị mmọn nsẹnsi, kpọn ozun ụnụ ye elu mmọn ndị hụ rịlẹni ndụn ụnụ e fe; ize ụnụ k'a gha e ze m.

³¹ M k'e tikpọchanrịn obodo ndị rị alị ụnụ ru alị, tikpọchanrịn ebe ụnụ nọ e fe m ofufe; ishin ọma ẹjan ndị hụ ụnụ a chụnyeni m asụọkọ m.

³² Ẹghẹẹ, mmẹ lẹ enwẹn m k'e tikpọ alị ụnụ la iwi, nke wụ nị ndị iṅẹnrẹn ụnụ hụn k'a bịa d'e biri ebẹhụ hụngụ k'ọ nọ, a jụsọhị wẹ.

³³ M k'e feyịya ụnụ ye alị rị ichẹn-ichẹn, a mịrịn m ọpịa-agha, chụ ụnụ. Alị ụnụ k'a la iwi, obodo rịsọnmẹ alị ụnụ k'a nọ mkpọkọ-mkpọkọ:

³⁴ alị ụnụ e zuru nwan ikẹn ẹ — ọrọgbọ ụnụ e gi rị alị ndị-iṅẹnrẹn ụnụ sikọ d'a kpụnjẹn ụnụ; alị ụnụ e zu ikẹn, zuru ikẹn ile run'ẹ.

³⁵ Ogẹn ahụn ile o k'e gi gba okpokoro, alị hụ k'e zu ikẹn ile o zulẹni ọrọgbọ hụ ụnụ bi imẹ ẹ.

³⁶ “O mẹ nke ndị k'a rị ndụn imẹ ụnụ, m k'e bu egun che wẹ ẹnya ọda-ọda imẹ alị ndị iṅẹnrẹn wẹ ahụn wẹ k'a rị, nke wụ nị wẹ nụ ụzụn mkp'ẹhụhụọ ufere bukọ, a gbama wẹ ọsọ. Wẹ k'a gba kẹ ndị gbakọnị ọpịa-agha, a gba, a dan, ọsụọn'a n'o nwọnni onyẹ chụkọnị wẹ.

³⁷ Wẹ k'a kpọgburusọnmẹ ibe wẹ nọ kẹ sị wẹ gbakọnị ọpịa-agha, ọsụọn'a onwọnni onyẹ rị a chụnị wẹ. Ya wụ, ụnụ asakọ ẹka che ndị iṅẹnrẹn ụnụ ọgụn.

³⁸ Ụnụ k'a nwụntọ alị ndị ọzọ rị ichẹn-ichẹn; alị ndị iṅẹnrẹn ụnụ k'e bu ụnụ ri.

³⁹ Ndị k'a họdụnị imẹ ụnụ k'a ta kẹ ofe imẹ alị ndị iṅẹnrẹn wẹ makẹ ufiri njọ wẹ lẹ njọ ndị nẹdi wẹ.

⁴⁰ “Kanị, omẹni e gi wẹ ọnụ wẹ ku njọ wẹ lẹ njọ ndị nẹdi wẹ, ku ẹ nị wẹ gbakitọ m azụụn, mẹ m ihiẹn,

⁴¹ ku ẹ nị ịya haịn m gi bunụmanị wẹ, d'e ru ebe m nọ we wẹ shi alị ndị iṅẹnrẹn wẹ; m hụn a nị obi wẹ ndị hụ kpọkinni a lụlụagụọ, lẹni a kụgụọ wẹ ụgwọ njọ wẹ,

⁴² m sikọ d'a nyanhan nkwerigbama mmẹ lẹ Jekọpụ lẹ nkwerigbama mmẹ lẹ Aziki lẹ nkwerigbama mmẹ lẹ Ebraham, a nyanhan m alị hụ.

⁴³ Makẹni, wẹ k'a gba alị hụ tọ, o gi ogẹn ahụn o gi gba okpokoro wẹ gilẹni nị a zuru ikẹn ile run'ẹ. Ẹghẹẹ, wẹ k'a kụ ụgwọ njọ wẹ makẹni wẹ jụ iwu m lẹ makẹni uhi m asụọnị wẹ.

⁴⁴ “K'osilẹrị, ogẹn hụ wẹ k'e gi rị alị ndị iṅẹnrẹn wẹ, ajụkọ m wẹ tọgbọ mọbụ ze ize wẹ hụn m'e gi gbupụchanrịn wẹ ile, gi ẹ tikpọ nkwerigbama mmẹ lẹ wẹ. Mmẹ wụ Osolobuẹ hụn wụ Chuku wẹ.

⁴⁵ Hụn nkẹ m'e gi gbupụchanrịn wẹ, m k'e gi ufiri wẹ nyanhan nkwerigbama mmẹ lẹ ndị nẹdi wẹ kanị hụn m gha alị Ijiptu wepụha idẹnya ndị alị rị ichẹn-ichẹn nị m hụn ụzọ wụrụ Chuku wẹ. Mmẹ wụ Osolobuẹ.”

⁴⁶ Iwu ndịnị lẹ uhi lẹ usọnrọn ichẹn-ichẹn ndịnị kẹ Osolobuẹ gha ẹka Mozizi tumẹ ẹgbata ya lẹ ndị Izrẹlụ, enu Ugu Saịnaị.