Lẹvitikọsụ 25 - Ika

Isi Nke Isẹn Kwasị Ọgụn Ahụa Wẹ Gilẹni A Rụn Ugbo

¹ Osolobuẹ nọ Ugu Saịnaị sị Mozizi,

² “Gwa ndị Izrẹlụ, sị wẹ: Ụnụ banye alị hụ m rị e ye ụnụ, alị hụ lẹ enwẹn ẹ sikọ d'e nwọnzikwọ ogẹn o gi zu ikẹn wẹ gi e ye Osolobuẹ ọghọ.

³ Kụn nị ihiẹn-ugbo ụnụ ahụa isin, e befọn alị vaịnị ụnụ, a ghọrị vaịnị rịn'a.

⁴ Kanị hụn mẹ ẹ ahụa ẹsa, alị hụ k'e zu ikẹn, izu-ikẹn hụn wẹ gi e ye Osolobuẹ ọghọ. Arụnlẹ ni ugbo, ebefọnlẹ ni vaịnị ụnụ.

⁵ Aghọlẹ ni ihiẹn-ugbo dan-ẹdịdan mọbụ vaịnị ndị hụ ụnụ befọnlẹni. Ahụa hụ kẹ alị hụ gi e zu ikẹn.

⁶ Alị hụ rị e zu ikẹn jẹnkọ d'e ye ụnụ ihiẹn-oriri, kẹ ụnụ lẹ enwẹn ụnụ kẹ idibo ụnụ ikẹnnyẹ lẹ ikpoho kẹ ndị ụnụ we ọrụn kẹ abịamabịa bi imẹ igunrun ụnụ,

⁷ kẹ anụ ụnụ kẹ anụ-ọfịa rị alị ụnụ. Ụnụ nwọn ikẹn ri ihiẹn ọwụlẹ alị mẹ.

Ahụa Iyekin Ịhịan Ihiẹn Ẹ

⁸ “Ụnụ gụnru ahụa ẹsa-ẹsa alị gi e zu ikẹn ụzọ ẹsa, ya wụ ahụa itenẹi kwasị ọgụnnaị,

⁹ ụnụ a nọ hụn mẹ ẹ akp'ọhịn iri imẹ ifọn nke ẹsa gbu opi ghagbarị alị ụnụ: Ụhụọhịn Ịgbarị-isi rọ. Gbu ni opi ghagbarị alị ụnụ.

¹⁰ E dọnmẹ ni ahụa nke iri kwasị ọgụnnaị nsọ; hịgbarị nị alị ụnụ ile, sị ndị ile bin'ẹ wẹ werisọnmẹ enwẹn wẹ. O k'a wụnị ụnụ ahụa mmẹmmẹ hụn onyẹ ọwụlẹ imẹ ụnụ k'e gi nwọnkin alị ebọn ẹ, onyẹ ọwụlẹ imẹ ụnụ wẹ gba igbọn a lakin ikpụlọ a.

¹¹ Ahụa nke iri kwasị ọgụnnaịnị k'a wụnị ụnụ Ahụa Iyekin-ihiẹn; akụnlẹ ni ihiẹn, aghọlẹ ni ihiẹn dan ẹdịdan mọbụ vaịnị ndị hụ ụnụ befọnlẹni,

¹² makẹni ahụa mmẹmmẹ rọ; o k'a wụnị ụnụ ogẹn rị nsọ; ihiẹn alị gi ẹka mẹ sụọ kẹ ụnụ k'e ri.

¹³ “Imẹ ahụa mmẹmmẹni, onyẹ-onyẹ k'e nwọnkin alị a.

¹⁴ “Ụnụ gha e reye mọbụ e ṅọnnarịn onyẹ alị ụnụ alị, egikwọlẹ n'a mẹgbu ibe ụnụ:

¹⁵ hụn rị e ṅọnni sikọ d'e gi ahụa ole ghagụnị kete ahụa Iyekin-ihiẹn ṅọn, hụn rị e reni e gi ahụa ole wẹ jẹnkọ d'a rụn a o kebe ruzi ahụa Iyekin-ihiẹn re.

¹⁶ Omẹni ahụa họdụnị bu ọda, y'a kụ hụn kanị; omẹni o buni ọda, ọnụ-egho ẹ e belụa; makẹni, mgbe ole ị k'a rụn a k'ọ rị e reye i.

¹⁷ Emẹgbulẹ ni ibe ụnụ, ka tụ nị egun Chuku ụnụ. Mmẹ wụ Osolobuẹ, Chuku ụnụ.

¹⁸ “E mẹ ni ihiẹn ndị m sị ụnụ mẹ, ụnụ e dọnrin ẹnya dọnmẹsọnmẹ iwu m, ogẹn ahụn, ụnụ e bi alị hụ, onwọnni ihiẹn k'e mẹ ụnụ,

¹⁹ alị e mẹni ụnụ ihiẹn ọhụnma-ọhụnma, ụnụ e ri, rijun ẹfọ, bi alị hụ, onwọnni ihiẹn k'e mẹ ụnụ.

²⁰ Ikẹnkwọ ụnụ a sị, ‘Kị ẹnyi k'e ri ahụa nke ẹsa hụ omẹni ẹnyi akụnnị, ẹnyi aghọnị?’

²¹ M sikọ d'e zihẹni ụnụ okẹn ngọzi imẹ ahụa nke isin hụn alị ụnụ k'e gi mẹ ihiẹn k'e bu ụnụ ọrọgbọ ahụa ẹtọ.

²² Ebe ụnụ rị a kụn ihiẹn-ugbo nke ahụa ẹsatọ rịn'a, ụnụ k'a gha e rikwọ hụn ụnụ rụn mbụ, hụn ụnụ rụn nke ahụa isin, risọnmẹdẹ ẹ d'e ru ni ihiẹn-ugbo a pụha nke ahụa itenẹi rịn'a.

Ịgbarị Ihiẹn Wẹ Re

²³ “Erelẹ ni alị rechanrịn, makẹni mmẹ nwọn alị hụ: abịamabịa lẹ ndị wẹ yehụ alị biri kẹ ụnụ wụhụ.

²⁴ Ebe-lẹ-ebe ị nọ ṅọn alị imẹ alị hụ, hụn a nị oghere onyẹ nwọn ẹ mbụ e gi gbarị a rị arị.

²⁵ “Onyẹ alị ụnụ dan ogbẹnnyẹ, re alị a, onyẹ ẹhụ a kẹnkẹnkẹn k'a bịa d'a gbarị alị hụ nwẹnẹ ẹ re.

²⁶ Kanị, omẹni onyẹ hụ re alị enwọn onyẹ k'a gbarịn'a ya, nị ịya lẹ enwẹn ẹ a pali, nwọnhẹn ihiẹn k'e zu ẹ gbarị a,

²⁷ ya gụn ahụa ole ghafeni kete o rel'ẹ n'ọ marịn ọnụ egho ẹ, o wekinni onyẹ o reye ẹ egho. Ahụa ole họdụnị n'o ru Ahụa Iyekin-ihiẹn k'o k'e gi marịn egho ole o k'e wekin. O yekingụ a egho họdụnị, o weri alị hụ o reye ẹ.

²⁸ Kanị omẹni ihiẹn o k'e gi kụkin ụgwọ arịa, ihiẹn hụ o re k'a rị ẹka onyẹ ṅọnn'ẹ d'e ru Ahụa Iyekin-ihiẹn. Wẹ k'e wekinn'ẹ ya Ahụa Iyekin-ihiẹn, o werizi alị a.

²⁹ “Ịhịan re ụlọ rị imẹ obodo wẹ tụnhunmẹ mgbọn, ọrọgbọ ahụa ohu k'o nwọn o gi gbarị a. Ọrọgbọ hụ ile, o nwọn ikẹn gbarị a.

³⁰ Omẹni ọ gbarịn'a d'e runi ahụa ohu hụ a gharị, ụlọ ahụn rị imẹ obodo hụ wẹ tụnhunmẹ mgbọn a wụferi nke onyẹ ṅọnn'ẹ lẹ ụmụ a. O ru Ahụa Iyekin-Ihiẹn, o yekinkọ onyẹ reyen'ẹ ya.

³¹ Kanị, nke ụlọ ndị rịsọnmẹ ụmụ-alị ndị wẹ tụnhunmẹlẹni mgbọn, w'e weri wẹ kẹ alị ugbo; wẹ k'a s'ẹka gbarị wẹ; wẹ k'e yekin wẹ ya Ahụa Iyekin-Ihiẹn.

³² “Kanị, nke ndị Livaị rị ichẹn: wẹ nwọn ikẹn gbarị ụlọ wẹ ndị rịsọnmẹ obodo ndị hụ wẹ keyesọnmẹ uwẹ ndị Livaị.

³³ Ya wụ nị ndị Livaị nwọn ikẹn gbarị ihiẹn wẹ — ụlọ ọwụlẹ wẹ re imẹ obodo hụn wụ nke wẹ; onyẹ ṅọnn'ẹ k'e wekin ẹ Ahụa Iyekin-ihiẹn, makẹni ụlọ ndị hụ rịsọnmẹ obodo ndị Livaị sụọ kẹ ndị Livaị nwọn imẹ igunrun ndị Izrẹlụ.

³⁴ Kanị, erekọ wẹ ọfịa obodo wẹ ndị hụ anụ wẹ nọ a kpa nni, nke wẹ k'ọ wụ jẹnrin-ejẹn.

³⁵ “Omẹni onyẹ Izrẹlụ ibe ụnụ dan ogbẹnnyẹ, nị ọ hụnzịnị ihiẹn o gi bi, yen'ẹ ẹka rịkẹ abịamabịa mọbụ onyẹ bịahụ alị ụnụ d'a nọdị, nị a du i biri.

³⁶ Anakwọlẹ a ọmụnịnwa ọwụlẹ, ka tụ egun Chuku i, kẹni onyẹ Izrẹlụ ibe i hụ du i biri.

³⁷ Ezinyekwọlẹ a egho narịn a ọmụnịnwa mọbụ reye ẹ ihiẹn-oriri ọnụ-egho y'e gi e nwọn erere.

³⁸ Mmẹ wụ Osolobuẹ hụn wụ Chuku ụnụ, hụn gha alị Ijiptu wepụha ụnụ, kẹni m ye ọnụ alị Kenaanị lẹni m wụrụ Chuku ụnụ.

Ogbẹnnyẹ We Enwẹn Ẹ Ye I

³⁹ “Onyẹ alị ụnụ nwọn ikẹn dan ogbẹnnyẹ imẹ igunrun ụnụ, re enwẹn ẹ ye i; emẹlẹ ẹ kẹ igbọn.

⁴⁰ Kama, mẹ ẹ kẹ onyẹ i we ọrụn mọbụ otumunyẹ bịa d'e sọn i biri; ya rụnn'ị ọrụn d'e ru Ahụa Iyekin-ihiẹn.

⁴¹ O ru ogẹn hụ, kẹ ya kẹ ụmụ a sikọ d'a la, ọ laburu ebọn ẹ, nwọnrinzi alị ndị nẹdi ẹ kanị.

⁴² Makẹni ndị Izrẹlụ wụ idibo m, hụn m gha alị Ijiptu wepụha, agbakọ wẹ wẹ igbọn.

⁴³ Akịgbukwọl'a, ka tụ egun Chuku i.

⁴⁴ “Igbọn ụnụ ikẹnnyẹ lẹ ikpoho sikọ d'a wụrịrị ndị alị ndị ọzọ nọhunmẹni ụnụ; ụnụ nwọn ikẹn nọ imẹ wẹ ṅọnrin igbọn ikẹnnyẹ lẹ ikpoho.

⁴⁵ Nị ụnụ sazịghọ ẹka ṅọnrin abịamabịa ndị bi imẹ igunrun ụnụ lẹ ndị ebọn wẹ wẹ mụ alị ụnụ, a wụrụ wẹ nke ụnụ.

⁴⁶ Ọnụ nwọnzi ikẹn we wẹ ye ụmụ ụnụ nwọnrin, nwọnrinchanrịn. Kanị, akịlẹ ni ndị Izrẹlụ ibe ụnụ nkịgbu.

⁴⁷ “Omẹni abịamabịa bi imẹ igunrun ụnụ hi ọdanfịn, nị onyẹ alị ụnụ dan ogbẹnnyẹ e re enwẹn ẹ ye abịamabịa hụ rị imẹ igunrun ụnụ mọbụ onyẹ ebọn abịamabịa hụ,

⁴⁸ kẹ hụn ahụn o regụ enwẹn ẹ, ọ napụnị wẹ agbarịl'a; onyẹ nke wẹ nwọn ikẹn gbarị a;

⁴⁹ nwẹnẹ-nẹdi ẹ okẹnnyẹ mọbụ nwẹnẹ-nnẹ ẹ okẹnnyẹ mọbụ nwa nwẹnẹ-nẹdi ẹ mọbụ nwa nwẹnẹ-nnẹ ẹ mọbụ onyẹ ọwụlẹ ịya lẹ ịya wụ ẹdeke ohu imẹ ebọn ẹ nwọn ikẹn gbarị a. Ihiẹn rịman'a mma, ya nwẹn nwọnzikwọ ikẹn gbarị enwẹn ẹ.

⁵⁰ Ịya lẹ onyẹ ṅọnn'ẹ k'a gụn ahụa ole rịnị gha ahụa o re enwẹn ẹ ye ẹ d'e ru Ahụa Iyekin-ihiẹn. Ọnụ egho wẹ k'e gi we ịhịan ọrụn ahụa ndị hụ ile kẹ w'e gi gbakọ egho o sikọ d'e gi gbarị enwẹn ẹ.

⁵¹ Omẹni ahụa họdụnị e bughọ ọda, o gi ẹ marịn egho o k'a kụkin imẹ hụn wẹ gi ṅọn ẹ, gi gbarị enwẹn ẹ.

⁵² Omẹni ahụa họdụ nị Ahụa Iyekin-ihiẹn ru ebuni ọda, o gizi ẹ marịn egho o k'a kụkin gi gbarị enwẹn ẹ.

⁵³ Ẹka wẹ gi e sọn onyẹ wẹ we ọrụn kẹ w'e gi sọn ẹ ahụa-ahụa; anịkwọlẹni onyẹ nwọnn'ẹ kị a nkịgbu.

⁵⁴ “Ọsụọn'a egini wẹ ndịnị ile gbarị a, o ruọlẹ Ahụa Iyekin-ihiẹn, a hatu wẹ kẹ ịya kẹ ụmụ a,

⁵⁵ makẹni idibo m kẹ ndị Izrẹlụ wụ. Wẹ wụ idibo m hụn m gha alị Ijiptu wepụha. Mmẹ wụ Osolobuẹ, Chuku ụnụ.