Lẹvitikọsụ 24 - Ika

Isi Nke Ẹnọ Kwasị Ọgụn Ofungbọn-olivu Wẹ Gi A Mụ Ukpẹ Lẹ Brẹdi W'e Butọnị Osolobuẹ

¹ Osolobuẹ sị Mozizi,

² “Sị ndị Izrẹlụ wẹhẹ ofugbọn-olivu wẹ sụ asụ nwọnlẹni ihiẹn ọzọ rịn'a, ni wẹ gi ẹ a mụ ukpẹ hụ rị Ọdụ-nsọ, nị ukpẹ hụn ụzọ e nwun ogẹn ile

³ ihun Ẹkwa hụ wẹ gi tankin Ẹkpẹti Ashịa-ẹri hụn rị imẹ Ọdụ-ozuzu. Ẹrọnụ sikọ d'e mẹmẹ wẹ nị wẹ hụn ụzọ e nwun gha ẹnyasị d'e ru ụtụntụn. Wẹ k'e mẹferi ihiẹnni agbọ ile lalanị.

⁴ Obu-ukpẹ hụ wẹ gi ezigbo goru wẹ buchelẹni ihiẹn ọzọ mẹmẹ hụn rị ihun Osolobuẹ kẹ wẹ sikọ d'a gha e dọnsọnmẹ wẹ, a mụye ọkụn jẹnrin ejẹn.

⁵ “Weri ọka wẹ gweriẹn, gi mẹmẹ ogbe brẹdi mmẹbụọ; gi ọka wẹ gweriẹn hụn k'e jun mkpu kọstadị ẹnọ lẹ nkirishi mẹmẹsọnmẹ ogbe ohu-ohu.

⁶ Dọnmẹ wẹ ogele ẹbụọ: isin ogele ohu, isin ogele ohu, ye elu teburu hụ wẹ gi ezigbo goru wẹ buchelẹni ihiẹn ọzọ mẹmẹ rị ihun Osolobuẹ.

⁷ Bu nsẹnsi wẹ buchelẹni ihiẹn ọzọ che ogele brẹdi ẹbụọ hụ n'ọ hụn ụzọ wụrụ ihiẹn wẹ gi a nọkin ẹnya brẹdi hụ, ọ wụrụ ihiẹn wẹ ye Osolobuẹ.

⁸ Wẹ k'a gha e butọnị Osolobuẹ brẹdini Ụhụọhịn izu-ikẹn ọwụlẹ, n'ọ wụrụ ihiẹn ndị Izrẹlụ e ye ẹ; ẹrịra kẹ wẹ k'e mẹsọnmẹ ẹ.

⁹ Ẹrọnụ lẹ ụmụ a nwọn ẹ; ebe rị nsọ kẹ wẹ k'a nọ e ri ẹ makẹni ihiẹn rịkẹnmẹkẹ nsọ hụn runi wẹ imẹ oyiye ndị w'e ye Osolobuẹ k'ọ wụ.”

Onyẹ Kpọ Osolobuẹ Iyi

¹⁰ O nwọn okẹnnyẹ ohu nnẹ ẹ wụ onyẹ Izrẹlụ, nẹdi ẹ onyẹ Ijiptu; ụhụọhịn ohu, ebe ya lẹ ndị Izrẹlụ rị, ọgụn nọ suni ya lẹ okẹnnyẹ onyẹ Izrẹlụ ebẹhụ wẹ ile ziẹntọ.

¹¹ Hụn nnẹ ẹ wụ onyẹ Izrẹlụ nọ kpọlịa Ẹfan hụ rị nsọ, kpọ iyi. Wẹ nọ wẹhẹni Mozizi ya. (Ẹfan nnẹ ẹ wụ Shẹlomiti nwa Dibiri onyẹ ebọn Danị.)

¹² Ya wẹ nọ kwọndọngụ a, kẹni wẹ nụgụ ọnụ Osolobuẹ.

¹³ Osolobuẹ nọ sị Mozizi;

¹⁴ “Weri ni onyẹ hụ kpọlịa Ẹfan m gha ebẹhụ ụnụ ziẹntọ pụ. Ndị ile nụ k'o ku oku hụ wẹ kị ẹka kwasị a isi, ịhịan ile e gi ọmụma magbu ẹ.

¹⁵ Sị ndị Izrẹlụ: Onyẹ kpọ Chuku ẹ iyi, o gi isi ẹ buru ẹ;

¹⁶ onyẹ kuja oku ẹfan Osolobuẹ, wẹ k'e gburịrị a; ịhịan ile sikọ d'e gi ọmụma magbu ẹ, kẹ abịamabịa rọ kẹ nwa-di-alị rọ; o kuja oku Ẹfan hụ rị nsọ, wẹ k'e gburịrị a.

¹⁷ “Onyẹ gbu ịhịan, wẹ k'e gburịrị a.

¹⁸ Onyẹ gbu anụ ịhịan k'a kụrịrị ụgwọ a: wẹ k'e girịrị ihiẹn rị ndụn kụ ụgwọ ihiẹn rị ndụn wẹ gbu.

¹⁹ Onyẹ rụ ibe ẹ ẹhụ, wẹ k'e mẹgwarịrịrị a ihiẹn o mẹ ẹ ibe ẹ:

²⁰ onyẹ kpagi ịhịan ọkpụkpụ, a kpagi w'a ọkpụkpụ; onyẹ tikpọ ịhịan ẹnya, e tikpọ w'a ẹnya; onyẹ tikwọn ịhịan eze, e tikwọn w'a eze; ẹhụ ịhịan rụ ibe ẹ kẹ wẹ k'a rụ a.

²¹ Onyẹ gbu anụ ịhịan k'a kụ ụgwọ a, kanị onyẹ gbu ịhịan, wẹ k'e gburịrị ya lẹ enwẹn ẹ.

²² Iwu ohu hụ rịnị kẹ abịamabịa kẹ nwa-di-alị. Mmẹ wụ Osolobuẹ, Chuku ụnụ.”

²³ Mozizi nọ gwa ndị Izrẹlụ, wẹ nọ weri onyẹ hụ kuja oku ẹfan Osolobuẹ, gha ebẹhụ wẹ ziẹntọ pụ, gi ọmụma magbu ẹ. Ndị Izrẹlụ mẹ kẹ Osolobuẹ dọn gwa Mozizi.