Lẹvitikọsụ 23 - Ika

Isi Nke Ẹtọ Kwasị Ọgụn

¹ Osolobuẹ sị Mozizi,

² “Gwa ndị Izrẹlụ, sị wẹ: Lee ni mmẹmmẹ ndị Osolobuẹ tumẹ, hụn ụnụ e gi a kpọ iko rị nsọ.

Ezumikẹn Izuka-izuka

³ “Akp'ọhịn isin rị a hụn ụnụ e gi rụn ọrụn, kanị nke akp'ọhịn ẹsa rịn'a wụ Ụhụọhịn Ezumikẹn wẹ jẹnkọlẹni d'a rụn ọrụn, ụhụọhịn ụnụ k'e gi kpọ iko rị nsọ. Ụnụ arụnkọ ọrụn ọwụlẹ; ebe-lẹ-ebe ụnụ bi, Ezumikẹn wẹ gi e ye Osolobuẹ ọghọ rọ.

Mmẹmmẹ Ẹsa

⁴ “Ndịnị wẹ wụsọnmẹ mmẹmmẹ Osolobuẹ tumẹ, iko rị nsọ hụn ụnụ k'a gha a kpọsọnmẹ ogẹn wẹ ru:

Mmẹmmẹ Nghafe Lẹ Mmẹmmẹ Brẹdi Yisti Rịlẹni

⁵ “Ọhị gbama ẹkẹrẹ-ẹkẹrẹ nke akp'ọhịn mmẹnọ imẹ ifọn ibuzọ Mmẹmmẹ Nghafe Osolobuẹ e bidọn.

⁶ Nke akpọhịn mmisẹn imẹ ifọn hụ, Mmẹmmẹ Brẹdi Yisti rịlẹni hụn wẹ gi e ye Osolobuẹ ọghọ e bidọn; ọrọgbọ akpọhịn ẹsa kẹ ụnụ k'e ri brẹdi wẹ buchelẹni yisti.

⁷ O ru ụhụọhịn ibuzọ mmẹmmẹ hụ, ụnụ e zu iko rị nsọ; arụnlẹ ni ọrụn ụnụ gi e bi;

⁸ Yesọnmẹ ni Osolobuẹ oyiye wẹ gi ọkụn e ye ẹ ọrọgbọ akp'ọhịn ẹsa. Nke akpọhịn ẹsa Mmẹmmẹ hụ, ụnụ e zuzi iko rị nsọ; ụnụ arụnkọ ọrụn ụnụ gi e bi.”

Mmẹmmẹ Ihiẹn-ugbo Ibuzọ

⁹ Osolobuẹ sị Mozizi,

¹⁰ “Gwa ndị Izrẹlụ, sị: Ụnụ banye alị hụ m rị e ye ụnụ, nị ụnụ a ghọ ihiẹn-ugbo, ụnụ sikọ d'e wẹhẹni onyẹ nchụn-ẹjan ọka-witi ibuzọ ụnụ.

¹¹ O k'e finfin ọka hụ ihun Osolobuẹ kẹni Osolobuẹ narịn ụnụ ya. Onyẹ nchụn-ẹjan sikọ d'e finfin ẹ ụhụọhịn sọn Ụhụọhịn Ezumikẹn.

¹² Ụhụọhịn ụnụ finfin ọka hụ, ụnụ k'e gi atụnrụn ahụa ohu ẹhụ a zu oke chụnyeni Osolobuẹ ẹjan w'a dụn ọkụn,

¹³ cheni oyiye-ọka, ọka wẹ gweriẹn wẹ gi ofugbọn-olivu gwọ hụn k'e jun mkpu kọstadị-nta ẹnọ lẹ nkirishi — oyiye wẹ gi ọkụn ye Osolobuẹ, hụn ishin ẹ a sụọ ụsụọ; ụnụ sikọ d'e wẹhẹ ya lẹ oyiye ihiẹn-ọrịra sọnn'ẹ hụn wụ manya k'e jun mkpu kọstadị.

¹⁴ Erilẹ ni brẹdi-ọka ọwụlẹ mọbụ ọka wẹ ghe mọbụ ọka ọhụn ọwụlẹ d'e ru ụhụọhịn ụnụ wẹhẹni Chuku ụnụ oyiyeni. Ebe-lẹ-ebe ụnụ bi, mẹsọnmẹ ni omẹnalịnị agbọ ụnụ ile lalanị.

Mmẹmmẹ Izuka-nke-ẹsa (Ịghọ Ihiẹn-ugbo)

¹⁵ “Gha ụhụọhịn hụ sọn Ụhụọhịn Ezumikẹn, ụhụọhịn hụ ụnụ wẹhẹ ọka oyiye w'e finfin, jẹnmẹ, gụnpụ nị izuka ẹsa zu ezu.

¹⁶ Gụnru ni akp'ọhịn iri kwasị ọgụnnaị, hụn wụ ụhụọhịn jẹnkọ d'e sọn ụhụọhịn izu-ikẹn nke ẹsa hụ, ụnụ e ye Osolobuẹ oyiye ọka ọhụn.

¹⁷ Gha nị ebe-lẹ-ebe ụnụ bi wẹhẹ ogbe brẹdi ẹbụọ-ẹbụọ, oyiye w'e finfin, brẹdi wẹ gi ọka wẹ gweriẹn mẹmẹ, ọka jun mkpu kọstadị-nta ẹnọ lẹ mkpikpi wẹ buche yisti; wẹhẹn'ẹ d'e ye Osolobuẹ oyiye ihiẹn-ugbo ibuzọ.

¹⁸ We ni ebulu ẹsa rị ahụa ohu-ohu ẹhụ wẹ zu oke lẹ okoro efin ohu lẹ ebulu ẹbụọ cheni brẹdi hụ. Wẹ k'a wụrụ ẹjan wẹ gi ọkụn ye Osolobuẹ, wẹ lẹ oyiye-ọka lẹ oyiye ihiẹn-ọrịra sọnni wẹ: oyiye wẹ gi ọkụn ye, ishin hụn a sụọ Osolobuẹ ụsụọ.

¹⁹ Gi ni mkpịn ohu chụn ẹjan-njọ, ụnụ e gi ebulu ẹbụọ rị ahụa ohu-ohu chụn ẹjan-ekele.

²⁰ “Onyẹ nchụn-ẹjan k'e finfin ebulu ẹbụọ ndị hụ ihun Osolobuẹ n'ọ wụrụ ẹjan w'e finfin, uwẹ lẹ brẹdi hụ wẹ gi ọka ibuzọ mẹmẹ. Oyiye rị nsọ ẹnya Osolobuẹ kẹ wẹ wụ; onyẹ nchụn-ẹjan nwọn wẹ.

²¹ Ụhụọhịn ohu hụ, ụnụ k'a kpọzị iko rị nsọ. Arụnlẹ ni ọrụn ụnụ gi e bi. Ebe-lẹ-ebe ụnụ bi, mẹsọnmẹ ni omẹnalịnị agbọ ụnụ ile lalanị.

²² “Ụnụ gha a ghọ ihiẹn-ugbo ụnụ, aghọrulẹ ni okẹn ugbo ụnụ mọbụ ghọdọnzi ebe ụnụ ghọgụ. La nị wẹ tọnị ndị igbẹnnyẹ lẹ abịamabịa. Mmẹ wụ Osolobuẹ, Chuku ụnụ.”

Mmẹmmẹ Igbu-opi

²³ Osolobuẹ sị Mozizi,

²⁴ “Gwa ndị Izrẹlụ: Ụhụọhịn ibuzọ imẹ ifọn nke ẹsa jẹnkọ d'a wụrụnị ụnụ ụhụọhịn izu-ikẹn, wẹ k'e gbu opi ye ẹ; o k'a wụ ụhụọhịn izu-iko rị nsọ.

²⁵ Arụnlẹ ni ọrụn ọwụlẹ ụnụ gi e bi, ka ye ni oyiye wẹ gi ọkụn e ye Osolobuẹ.”

Ụhụọhịn Ịgbarị-isi

²⁶ Osolobuẹ sị Mozizi,

²⁷ “Nke akp'ọhịn iri imẹ ifọn nke ẹsanị, ụhụọhịn ahụn sụọ, wụ Ụhụọhịn wẹ gi a gbarị isi ịhịan ile. Zụ ni iko rị nsọ ụhụọhịn hụ, ụnụ e bu ọnụ, ụnụ e ye oyiye wẹ gi ọkụn e ye Osolobuẹ.

²⁸ Arụnlẹ ni ọrụn ụhụọhịn hụ, makẹni ụhụọhịn Ịgbarị-isi rọ, hụn wẹ gi e mẹni Osolobuẹ ihiẹn wẹ gi a gbarị isi ụnụ.

²⁹ Onyẹ ọwụlẹ bulẹni ọnụ ụhụọhịn hụ, e gbupụ w'a imẹ ndị nke ẹ;

³⁰ onyẹ rụn ọrụn ọwụlẹ ụhụọhịn hụ, m k'e gbupụ a imẹ ndị nke ẹ.

³¹ Arụnkwọlẹ ni ọrụn ọwụlẹ, kaka. Ụnụ sikọ d'e mẹferi omẹnalịnị agbọ ụnụ ile lalanị, ebe-lẹ-ebe ọnụ bi.

³² Ụhụọhịn ụnụ k'e zurịrị ikẹn rọ; ụnụ k'e burịrị ọnụ ụhụọhịn hụ. Gha ẹnyasị nke akp'ọhịn itenẹi imẹ ifọn hụ d'e ru ẹnyasị nke akp'ọhịn iri kẹ ụnụ e gi zu ikẹn hụ.”

Mmẹmmẹ Ibi-imẹ-ọdụ

³³ Osolobuẹ sị Mozizi,

³⁴ “Gwa ndị Izrẹlụ, sị: Nke akp'ọhịn mmisẹn imẹ ifọn nke ẹsa, Mmẹmmẹ Osolobuẹ hụn wẹ gi e bi imẹ Ọdụ k'e bidọn; wẹ k'e mẹ ẹ akp'ọhịn ẹsa.

³⁵ Wẹ sikọ d'e zu iko rị nsọ ụhụọhịn ibuzọ rịn'a; arụnlẹ ni ọrụn ọwụlẹ ụnụ gi e bi ụhụọhịn hụ.

³⁶ E ye ni oyiye wẹ gi ọkụn e ye Osolobuẹ ọrọgbọ akp'ọhịn ẹsa hụ; nke akp'ọhịn ẹsatọ rịn'a ụnụ e zu iko rị nsọ, yezi oyiye wẹ gi ọkụn e ye Osolobuẹ. Iko rị mkpa rọ. Arụnlẹ ni ọrụn ọwụlẹ ụnụ gi e bi.

³⁷ “Mmẹmmẹ ndị ahụn kẹ Osolobuẹ tumẹ, hụn ụnụ e gi a kpọ iko rị nsọ, e wẹhẹsọnmẹ oyiye ndị wẹ gi ọkụn e ye Osolobuẹ: kẹ ẹjan w'a dụn ọkụn kẹ oyiye-ọka kẹ ẹjan ichẹn-ichẹn kẹ ẹjan ihiẹn-ọrịra. Wẹhẹsọnmẹni hụn ọwụlẹ ụhụọhịn m kaye ụnụ k'e wẹhẹ ẹ.

³⁸ Ndịnị wẹ anapụkọkwọ ụnụ Ụhụọhịn izu-ikẹn ichẹn-ichẹn ndị-ọzọ Osolobuẹ tumẹ; oyiye ndịnị anapụkọ ụnụ oyiye ndị ọzọ ụnụ e ye lẹ oyiye ụnụ gi e mẹzu nkwa lẹ oyiye ile ghapụha ụnụ obi ụnụ e yesọnmẹ Osolobuẹ.

³⁹ “Gha nwan nke akpọhịn mmisẹn hụ imẹ ifọn nke ẹsa bidọn, hụn ụnụ gi ghọgụ ihiẹn-ugbo ọnụ, mẹni ni Osolobuẹ mmẹmmẹ Ibi-imẹ-ọdụ ọrọgbọ akp'ọhịn ẹsa: ụhụọhịn ibuzọ rịn'a wụ ụhụọhịn izu-ikẹn, nke ẹsatọ rịn'a wụzịkwọ ụhụọhịn izu-ikẹn.

⁴⁰ Ụhụọhịn ibuzọ hụ rịn'a, ụnụ a ghọrị mkpụrụ-osisi osisi ndị w'a gbaye, kpagirisọnmẹ iguru lẹ agalaba osisi ẹhụhụọ jun lẹ osisi ndị rị ẹhụ mkpẹnrẹn mirin, ụnụ e mẹmẹ mmẹmmẹ ụnụ gi a ghọghọ ihun Osolobuẹ hụn wụ Chuku ọnụ ọrọgbọ akp'ọhịn ẹsa.

⁴¹ “E mẹni ni Osolobuẹ mmẹmmẹni akp'ọhịn ẹsa ahụa ile. Mẹferi ni omẹnalịnị agbọ ụnụ ile lalanị; e mẹn'ẹ ifọn nke ẹsa.

⁴² Bi ni imẹ ọdụ akp'ọhịn ẹsa. Ụmụ di-alị Izrẹlụ ile k'e bi imẹ ọdụ,

⁴³ kẹni ụmụ ụnụ marịn nị m mẹ ndị Izrẹlụ bisọnmẹ imẹ ọdụ ogẹn m gi gha alị Ijiptu wepụha wẹ. Mmẹ wụ Osolobuẹ hụn wụ Chuku ụnụ.”

⁴⁴ Ya kẹ Mozizi nọ gwa ndị Izrẹlụ mmẹmmẹ ndị hụ Osolobuẹ tumẹ.