Lẹvitikọsụ 21 - Ika

Isi Nke Ohu kwasị Ọgụn Obibi Ndị Nchụn Ẹjan

¹ Osolobuẹ sị Mozizi, “Gwa ndị nchụn-ẹjan, ụmụ-ikẹnnyẹ Ẹrọnụ, sị: Onyẹ nchụn-ẹjan ahụarịkọdẹ ozun onyẹ nke wẹ makẹ ọ gha e mẹrụ enwẹn ẹ —

² sụkpan onyẹ ẹhụ a kẹnkẹnkẹn, rịkẹ nnẹ ẹ mọbụ nẹdi ẹ, nwa a okẹnnyẹ mọbụ nwa a okpoho mọbụ nwẹnẹ ẹ okẹnnyẹ

³ mọbụ nwẹnẹ ẹ okpoho rịchanrịn a ẹka makẹni o nwọn di; nị ọ saghọ ẹka gi ozun ẹ mẹrụ enwẹn ẹ.

⁴ Ẹhụ a ahụatụkọdẹ ozun ndị ịgọ a, makẹni o mẹ ẹ, o mẹrụ enwẹn ẹ.

⁵ “Ndị nchụn-ẹjan akpụnpụkọ ntutu wẹ mọbụ gbubelụa ẹtu wẹ mọbụ gi ihiẹn be ẹhụ wẹ.

⁶ Wẹ k'a rịnị Osolobuẹ nsọ; wẹ ebudankwọlẹ ẹfan Osolobuẹ. Ebe o mẹ ni uwẹ a chụnyeni Osolobuẹ ẹjan ndị hụ wẹ gi ọkụn e ye ẹ, ihiẹn-oriri Osolobuẹ wẹ, wẹ k'a rị nsọ.

⁷ “Alụkọ wẹ ikpoho wụ ịgbaraja mẹrụ enwẹn ẹ mọbụ ikpoho kpechan di wẹ: emẹkọ w'a makẹni wẹ wụ ndị nchụn-ẹjan rịnị Osolobuẹ nsọ.

⁸ Weri ni wẹ kẹ ndị rị nsọ, makẹni uwẹ nwọn e bu ihiẹn-oriri Chuku ụnụ e ye ẹ. Weri ni wẹ kẹ ndị rị nsọ, makẹni Mmẹ hụn wụ Osolobuẹ, m rị nsọ — mmẹ hụn mẹ ụnụ a rị nsọ.

⁹ “Okpoho onyẹ nchụn-ẹjan mụ họnrin ịgbaraja, o mẹrụgụọ enwẹn ẹ; o gbegụọ ifẹnrẹn kpu nẹdi ẹ ihun; wẹ k'a dụnrịrị a ọkụn.

¹⁰ “Onyẹ-isi nchụn-ẹjan hụ wụ onyẹchẹn imẹ umunẹ ẹ ndị nchụn-ẹjan, hụn wẹ hukpu udẹn-nsọ isi tumẹ, hụn wẹ tumẹ n'o k'a gha e yi ẹkwa onyẹ-isi nchụn-ẹjan, alatọkọ isi ẹ ya-ya-ya mọbụ dọka ẹkwa a.

¹¹ Ọ banyekọ ebe ozun rị. Y'e mẹrụkwọlẹ enwẹn ẹ ghahanị ibanyen'ẹ, ọsụọn'a nị ozun nẹdi ẹ mọbụ nnẹ ẹ rọ,

¹² mọbụ gha ebe wẹ a nọ e fe Chuku ẹ pụ mọbụ mẹrụ a; o mẹkọ a makẹni e gigụọ wẹ udẹn-nsọ Osolobuẹ tumẹ ẹ. Mmẹ wụ Osolobuẹ.

¹³ Okpoho marịnlẹni okẹnnyẹ k'o k'a lụ.

¹⁴ Ọ lụkọ okpoho di ẹ nwụn mọbụ onyẹ kpechan di ẹ mọbụ okpoho gigụ ịgba-ịgbaraja mẹrụ enwẹn ẹ, kama okpoho okẹnnyẹ kelẹni wa ụkụ hụn rị imẹ ndị nke ẹ k'o k'a lụrịrị,

¹⁵ amamgbe o mẹ ụmụ a wụrụ ndị rụnị imẹ ndị nke ẹ. Mmẹ wụ Osolobuẹ hụn e mẹ ẹ a rị nsọ.”

Onyẹ Nchụn-ẹjan Ẹhụ A Zulẹni Oke

¹⁶ Osolobuẹ sị Mozizi,

¹⁷ “Sị Ẹrọnụ: Agbọ ụnụ ile lalanị, onwọnni nwa ị ọwụlẹ ẹhụ zulẹni oke k'a nọzụhan d'e buye Chuku ẹ ihiẹn-oriri, ẹjan wẹ wẹhẹni Chuku ẹ.

¹⁸ Kaka! Onwọnni onyẹ ẹhụ zulẹni oke k'a nọzụnhannị: onwọnni onyẹ ẹnya kpu ishi mọbụ onyẹ a sụnjẹnni mọbụ onyẹ ẹhụ a nwọn k'ọ nọ;

¹⁹ onwọnni onyẹ ụkụ mọbụ ẹka kpagi

²⁰ mọbụ onyẹ mkpukpuke mọbụ akakpọ mọbụ onyẹ ẹnya wịrị mọbụ onyẹ ẹtẹ ẹ rị e ru ẹbụn mọbụ a mụ mirin mọbụ onyẹ mkpụrụ rị a ẹhụ okẹnnyẹ tikpọ.

²¹ Onwọnni nwa Ẹrọnụ onyẹ nchụn-ẹjan ẹhụ a zulẹni oke hụn k'a nọzụnhan d'e weye Osolobuẹ oyiye ndị hụ wẹ gi ọkụn e ye ẹ. Ẹhụ a ezuni oke, ya bịakwọlẹ d'e buye Chuku ẹ ihiẹn-oriri.

²² N'o righọ ihiẹn-oriri Chuku nọkẹ ibe ẹ — kẹ ndị rịkẹnmẹkẹ nsọ kẹ ndị ọzọ rị nsọ —

²³ kanị, ebe ẹhụ a zulẹni oke, ọ nọkunmẹkọ Ẹkwa-mgbọnkin hụ rị Ọdụ-nsọ Osolobuẹ mọbụ nọkunmẹ ukpo nchụn-ẹjan, gi ẹ mẹrụ ebe wẹ a nọ e fe m. Mmẹ wụ Osolobuẹ hụn e mẹ wẹ a rị nsọ.”

²⁴ Ya Mozizi nọ gwa Ẹrọnụ lẹ ụmụ a lẹ ndị Izrẹlụ ile okuni.