Lẹvitikọsụ 20 - Ika

Isi Nke Ọgụn Afụnfụn Hụn Sọn Njọ

¹ Osolobuẹ sị Mozizi,

² “Gwa ndị Izrẹlụ oku, sị wẹ: Onyẹ Izrẹlụ mọbụ abịamabịa ọwụlẹ bi alị Izrẹlụ we nwa a ye mmọn ahụn wụ Molẹkị, wẹ k'e gburịrị a. Ndị alị k'e gi ọmụma magbu ẹ.

³ M k'e mẹshi onyẹ hụ ikẹn, e bepụ m'a imẹ ndị nke ẹ; makẹni ebe ọ nọ gi nwa a chụnyeni Molẹkị ẹjan, o mẹrụgụọ ebe wẹ nọ e fe m, budan ẹfan nsọ m.

⁴ Omẹni ndị alị a gba okẹnnyẹ ahụn we nwa a ye Molẹkị nkịtịn, e gbuni w'ẹ,

⁵ m k'e mẹshi onyẹ hụ lẹ ikpụlọ a ikẹn, m k'e bepụ kẹ ịya kẹ ndị ile ẹka wẹ rị ọgbasọn hụ ọ gbasọn mmọn Molẹkị nọkẹ ịgbaraja.

⁶ “M k'e mẹshi onyẹ k'a chọjẹn ndị a gba ẹfa lẹ ndị a gwọ ọgụn ikẹn, o gi gbasọnmẹ wẹ nọkẹ ịgbaraja — m k'e bepụ a imẹ ndị nke ẹ.

⁷ “E dọnmẹ ni enwẹn ụnụ ichẹn, a rị nị nsọ; makẹni mmẹ wụ Osolobuẹ, Chuku ụnụ.

⁸ E mẹ ni ihiẹn m sị ụnụ mẹ, e gi ni wẹ e bi. Mmẹ wụ Osolobuẹ hụn e mẹ ụnụ a rị nsọ.

⁹ Onyẹ kpọ nẹdi ẹ mọbụ nnẹ ẹ iyi, wẹ k'e gburịrị a. Ọ kpọgụọ nẹdi ẹ mọbụ nnẹ ẹ iyi, ẹdeke ẹ rị a isi.

¹⁰ “Onyẹ mẹ mgba nwunyẹ ibe ẹ, wẹ k'e gburịrị kẹ hụn okẹnnyẹ mẹ mgba nwunyẹ ịhịan kẹ hụn okpoho zọ ụkụ ye ọfịa.

¹¹ Onyẹ mẹ mgba nwunyẹ nẹdi ẹ, ọ gbagụọ nẹdi ẹ ọtọ. Wẹ k'e gburịrị kẹ hụn okẹnnyẹ kẹ hụn okpoho; ẹdeke wẹ k'a rị wẹ isi.

¹² “Onyẹ mẹ mgba nwunyẹ nwa a, wẹ k'e gburịrị wẹ ẹbụọ, kẹ ịya kẹ nwunyẹ nwa a hụ. Ihiẹn hụ wẹ mẹ wụ arụ; ẹdeke wẹ k'a rị wẹ isi.

¹³ Okẹnnyẹ lẹ okẹnnyẹ ranhịn kẹ okẹnnyẹ lẹ okpoho dọn a ranhịn, wẹ ẹbụọ e mẹgụọ ihiẹn m'a sọ. Wẹ k'e gburịrị wẹ; ẹdeke wẹ k'a rị wẹ isi.

¹⁴ Okẹnnyẹ mẹ mgba okpoho lẹ nnẹ ẹ, ihiẹn jọgbu enwẹn rọ. Wẹ k'a dụnrịrị kẹ ịya kẹ uwẹ ẹbụọ ọkụn, makẹ eje-obibi gha e weri ọnọdị imẹ igunrun ụnụ.

¹⁵ Onyẹ mẹ mgba anụ, wẹ k'e gburịrị a, gbuzikwọ anụ ahụn.

¹⁶ Okpoho we enwẹn ẹ ye anụ n'o mẹ mgba a, gbu ni kẹ okpoho kẹ anụ. Wẹ k'e gburịrị wẹ; ẹdeke wẹ rị wẹ isi.

¹⁷ “Okẹnnyẹ lụrụ nwẹnẹ ẹ, kẹ nwa nẹdi ẹ rọ kẹ nwa nnẹ ẹ rọ, hụn okẹnnyẹ a hụngụọ ọtọ hụn okpoho, hụn okpoho a hụngụọ ọtọ hụn okẹnnyẹ; ihiẹn ifẹnrẹn rọ. Wẹ k'a nọ idẹnya ndị nke wẹ chụpụ wẹ. Okẹnnyẹ hụ a gbagụọ nwẹnẹ-ẹ-okpoho ọtọ, o k'e gi isi ẹ buru ẹ.

¹⁸ “Okẹnnyẹ sọn nwunyẹ ẹ ranhịn ebe ọ rị a sọ ezi, o kpugụọ ebẹhụ ẹdeke hụ a gha a gbapụha oghe, hụn okpoho e kpugụọzị a tọ oghe. Wẹ k'e bepụrịrị wẹ ẹbụbụọ imẹ ndị nke wẹ.

¹⁹ “Emẹlẹ mgba nwẹnẹ nnẹ i mọbụ nwẹnẹ nẹdi i, makẹni ọhụn wụ ịgba onyẹ ẹhụ ị kẹnkẹnkẹn ọtọ; ụnụ ẹbụọ k'e gi isi ụnụ buru ẹ.

²⁰ “Okẹnnyẹ mẹ mgba nwunyẹ nwẹnẹ-nnẹ ẹ mọbụ nwunyẹ nwẹnẹ-nẹdi ẹ, o gbagụọ nwẹnẹ-nnẹ ẹ mọbụ nwẹnẹ-nẹdi ẹ hụ ọtọ. Wẹ ẹbụọ k'e gi isi wẹ buru ẹ; amụkọ wẹ nwa e we wẹ nwụnhụn.

²¹ “Okẹnnyẹ narịn nwẹnẹ ẹ nwunyẹ, arụ rọ; ọ gbagụọ nwẹnẹ ẹ ọtọ. Amụkọ wẹ nwa.

²² E mẹ ni ihiẹn ile m ku, e dọnmẹ iwu m ile, e gi wẹ e bi makẹ alị hụ m wekọ ụnụ gha a gbọpụ ọnụ kẹ ịhịan dọn a gbọpụ ihiẹn.

²³ Esọnkwọlẹ ni omẹnalị alị ndị hụ m jẹnkọ d'a chụpụnị ụnụ. E mẹghọ wẹ ihiẹn ndịnị ile haịn m gi jụ wẹ.

²⁴ Kanị a gwagụọ m ụnụ nwẹn, sị, ‘Alị wẹ k'e họnrin nke ụnụ; m k'e we ẹ ye ụnụ weri, alị mirin-ẹran lẹ mirin ẹnwụn jun, e hu kẹ mirin.’ Mmẹ wụ Osolobuẹ, Chuku ụnụ, hụn họpụha ụnụ imẹ alị ndị ọzọ ile, kẹni ụnụ rị ichẹn.

²⁵ “Ụnụ k'a ghọsịrịrị nwan nị ihiẹn rị ichẹn rị imẹ anụ rị ụchan lẹ hụn rụnị lẹ imẹ nnụnụ rị ụchan lẹ hụn rụnị. Egikwọlẹni anụ ọwụlẹ mọbụ nnụnụ ọwụlẹ mọbụ ihiẹn ọwụlẹ a rịhunmẹ alị mẹrụ enwẹn ụnụ, ihiẹn ndị ahụn m họpụ nị uwẹ kẹ ụnụ k'a gha a sọ.

²⁶ Ọnụ k'a rịnị m nsọ, makẹni mmẹ hụn wụ Osolobuẹ, m rị nsọ, m họpụhazịkwọ ụnụ imẹ alị ndị ọzọ ile nị ụnụ wụrụ nke m.

²⁷ “Wẹ k'e gburịrị okẹnnyẹ mọbụ okpoho ọwụlẹ rị imẹ igunrun ụnụ hụn a gba ẹfa mọbụ a ma ozun mọbụ onyẹ a gwọ ọgụn; ụnụ k'e girịrị ọmụma magbu wẹ. Ẹdeke wẹ k'a rị wẹ isi.”