Lẹvitikọsụ 19 - Ika

Isi Nke Mmitenẹi Iwu Rịsọnmẹ Ichẹn-ichẹn

¹ Osolobuẹ sị Mozizi,

² “Gwa ndị Izrẹlụ ile oku, sị wẹ: Rị nị nsọ makẹni mmẹ Osolobuẹ hụn wụ Chuku ụnụ, m rị nsọ.

³ “Onyẹ-onyẹ imẹ ụnụ k'a gbayerịrị nnẹ ẹ lẹ nẹdi ẹ. Ụnụ k'e girịrị ụhụọhịn Ezumikẹn ndị hụ m kayesọnmẹ zu ikẹn. Mmẹ wụ Osolobuẹ hụn wụ Chuku ụnụ.

⁴ Egbehutọkwọlẹ ni femẹ mmọn mọbụ gi igwe kpụrụ mmọn. Mmẹ wụ Osolobuẹ hụn wụ Chuku ụnụ.

⁵ “Ụnụ chụnyeni Osolobuẹ ẹjan-ekele, chụnn'a hụn o k'e gi narịn ụnụ ya.

⁶ Ụnụ k'e ri ẹ ụhụọhịn wẹ chụn a mọbụ nke akp'ọhịn ẹbụọ rịn'a; hụn ọwụlẹ nọru nke akp'ọhịn ẹtọ, wẹ k'a dụnpụrịrị a ọkụn.

⁷ Wẹ ri hụn ọwụlẹ imẹ ẹ nke akpọhịn ẹtọ, ẹjan hụ wẹ chụ a rụ; Osolobuẹ a jụ ẹjan hụ.

⁸ Onyẹ ọwụlẹ rin'ẹ k'e gi isi ẹ buru, makẹni o mẹrụgụọ ihiẹn rị nsọ ẹnya Osolobuẹ: wẹ k'e bepụ onyẹ hụ imẹ ndị nke ẹ.

⁹ “Ụnụ gha a ghọ ihiẹn-ugbo ọnụ, aghọrulẹ ni okẹn mọbụ ghọmazị ebe ụnụ ghọgụ.

¹⁰ Aghọgụlẹ ni vaịnị ụnụ ghọdọnzi mọbụ tụtụ ogbe grepu dannị. La nị wẹ tọnị ndị igbẹnnyẹ lẹ abịamabịa. Mmẹ wụ Osolobuẹ, Chuku ụnụ.

¹¹ “Ezunlẹ ni ohin. “Atụlẹ ni ntụ. “Edufielẹ ni ibe ụnụ.

¹² “Ekunlẹni ẹfan m tụ ntụ, gi ẹ budan ẹfan mmẹ wụ Chuku ụnụ. Mmẹ wụ Osolobuẹ.

¹³ Emẹgbulẹ ibe i mọbụ zun ẹ ohin. Anịlẹ egho onyẹ i we ọrụn nọ ị ẹka nị eki fọn.

¹⁴ Akpọlẹ odin iyi mọbụ bu ihiẹn tọnị ẹnya-ishi kpọgburu, ka tụ egun Chuku i. Mmẹ wụ Osolobuẹ.

¹⁵ “Ebulẹ ikpe ma onyẹ ikpe malẹni; egbeyelẹni ogbẹnnyẹ mọbụ kuyeni okẹn-ịhịan, ka hannị ibe i eṅẹn ọhụnma.

¹⁶ Awụlẹ onyẹ a talọ ịhịan imẹ igunrun ụnụ. “Agbalẹ nkịtịn ebe ọnwụn n'a kpọ ibe i ihun. Mmẹ wụ Osolobuẹ.

¹⁷ “Ebulẹ iwe nwẹnẹ i obi; ka gwapụkwọ nwẹnẹ i eje-ihiẹn o mẹ amamgbe ẹka ị a ban njọ a.

¹⁸ “Emẹgwarịlẹ onyẹ nke ụnụ mọbụ bu iwe ẹ obi, ka ihiẹn ibe i ya a sụọ ị kẹ ihiẹn enwẹn i dọn a sụọ ị. Mmẹ wụ Osolobuẹ.

¹⁹ “E mẹ ni ihiẹn m sị ụnụ mẹ. “Ewelẹ ni anụ ọzọ ye ụdị ọzọ gba. “Akụngbamalẹ ni ụdị mkpụrụ ẹbụọ imẹ ugbo ụnụ. “Eyilẹ ni ẹkwa wẹ gi ihiẹn ẹbụọ rị ichẹn-ichẹn kpa.

Onyẹ Mẹ Mgba Igbọn Wẹ Badọngụ

²⁰ “Okẹnnyẹ jẹn d'e mẹ mgba igbọn-okpoho hụn okẹnnyẹ ọzọ badọngụ, igbọn wẹ kelẹni gbapụha imẹ igbọn mọbụ kelẹni weri enwẹn ẹ, igbọn hụ sikọ nwan d'e weri enwẹn ẹ. Afụnfụn kẹ wẹ k'e ye wẹ ẹbụbụọ, egbukọ wẹ wẹ, makẹni hụn okpoho eke weri enwẹn ẹ.

²¹ Okẹnnyẹ hụ k'e wẹhẹrịrị ebulu o k'e gi chụn ẹjan onyẹ-ikpe-ma ọnụ-mgbọn Ọdụ-ozuzu d'a chụnyeni Osolobuẹ ẹjan onyẹ-ikpe-ma.

²² Ebulu ahụn okẹnnyẹ hụ gi chụn ẹjan onyẹ-ikpe-ma kẹ onyẹ nchụn-ẹjan e gi gbarị isi okẹnnyẹ hụ ihun Osolobuẹ yeni njọ hụn o mẹ, Osolobuẹ a gbagharị a njọ a.

²³ “Ụnụ ru alị hụ, nị ụnụ a kụn ụdị osisi ọwụlẹ a mị mkpụrụ, werigụ nị mkpụrụ a kẹ ihiẹn wẹ kelẹni kwa ugun, ụnụ a sọ a ọrọgbọ ahụa ẹtọ; erilẹ n'ẹ.

²⁴ O ru ahụa nke ẹnọ, mkpụrụ a ile ya wụrụ ihiẹn rị nsọ wẹ butọnị Osolobuẹ, oyiye wẹ gi a ja Osolobuẹ mma.

²⁵ Kanị o ru ahụa nke isẹn, ụnụ k'a s'ẹka ri mkpụrụ-osisi hụ. Ụnụ mẹ ihiẹnni m sị ụnụ mẹ, ihiẹn akụnkụn ụnụ a mịkẹnmẹ. Mmẹ wụ Osolobuẹ hụn wụ Chuku ụnụ.

²⁶ “Erilẹ ni anụ gbalẹni ẹdeke. “Agbalẹ ni ẹfa; agwọlẹni ọgụn.

²⁷ “Akọhunmẹlẹ ni isi mọbụ gbubelụa ẹtu ụnụ.

²⁸ “Egilẹ ni ufiri onyẹ nwụnnị gi ihiẹn be enwẹn ụnụ; egbulẹ ni ahịma ye enwẹn ụnụ ẹhụ. Mmẹ wụ Osolobuẹ.

²⁹ “Ebudanlẹ nwa ị okpoho bu ẹ dọnmẹ ịgbaraja, amamgbe alị ile a wụrụ ịgbaraja-ịgbaraja, njọ e jun ẹ.

³⁰ “E gi ni ụhụọhịn Ezumikẹn ndị hụ m kayesọnmẹ e zu ikẹn, ụnụ a gbaye Ọdụ-nsọ m. Mmẹ wụ Osolobuẹ.

³¹ Eburukwọlẹ ni ndị a gba ẹfa, a ma ozun mọbụ chọburu ndị a gwọ ọgụn, gi ẹ mẹrụ enwẹn ọnụ. Mmẹ wụ Osolobuẹ, Chuku ụnụ.

³² “E lihi ni ndị ẹgẹdi ọtọ, e lee ndị ẹgẹdi ẹnya ihun makẹ egun Chuku i. Mmẹ wụ Osolobuẹ.

³³ Abịamabịa biri alị ụnụ, emẹjakwọlẹ n'a.

³⁴ I k'e mẹrịrị abịamabịa yụ lẹ ya bi kẹ onyẹ nke ụnụ. Ihiẹn ẹ ya sụọ ị kẹ ihiẹn enwẹn i dọn a sụọ ị, makẹni ụnụ nwẹn nkẹ te wụ abịamabịa imẹ alị Ijiptu. Mmẹ wụ Osolobuẹ, Chuku ụnụ.

³⁵ “Emẹgbulẹ ịhịan, mahụ ihiẹn k'o suehan, k'ọ nyịnhan lẹ k'ọ han.

³⁶ Gi ni ezigbo skelu lẹ mkpu lẹ ọgọ ma ihiẹn. Mmẹ wụ Osolobuẹ, Chuku ụnụ, hụn gha Ijiptu wepụha ụnụ.

³⁷ E mẹ ni ihiẹn ile m sị ụnụ mẹ, e dọnmẹ iwu ile m ye ụnụ, e gi ni wẹ e bi. Mmẹ wụ Osolobuẹ.”