Lẹvitikọsụ 18 - Ika

Isi Nke Mmẹsatọ Imẹ Mgba Furulẹni

¹ Osolobuẹ sị Mozizi,

² “Gwa ndị Izrẹlụ oku, sị wẹ: Mmẹ wụ Osolobuẹ hụn wụ Chuku ụnụ.

³ Emẹkwọlẹ ni kẹ w'e mẹ imẹ alị Ijiptu, hụn ụnụ te bi; emẹzikwọlẹ ni kẹ w'e mẹ imẹ alị Kenaanị hụn m wekọ ọnụ — elerilẹ ni wẹ.

⁴ Iwu ndị m ye ụnụ kẹ ụnụ k'e dọnmẹrịrị, a kpachanpụzịkwọ ẹnya e mẹ ihiẹn ndị m sị ụnụ mẹ. Mmẹ wụ Osolobuẹ.

⁵ E mẹ ni ihiẹn ndị m sị ụnụ mẹ, e dọnmẹ iwu m, makẹni onyẹ hụn dọnmẹni wẹ k'e gi wẹ rị ndụn. Mmẹ wụ Osolobuẹ.

⁶ “Ịhịan emẹkwọlẹ mgba nwẹnẹ ẹ. Mmẹ wụ Osolobuẹ:

⁷ “Emẹkwọlẹ mgba nnẹ i; i mẹ ẹ, y'a gbagụọ nẹdi i ọtọ; nnẹ i k'ọ wụ, emẹlẹ mgba a.

⁸ Emẹlẹ mgba nwunyẹ nẹdi i; i mẹ ẹ, y'a gbagụọ nẹdi i ọtọ.

⁹ Emẹlẹ mgba nwẹnẹ i okpoho: kẹ nwa nẹdi i kẹ nwa nnẹ i; kẹ hụn wẹ mụ yụ lẹ ịya ụlọ ohu kẹ hụn wẹ mụ ụzọ ọzọ.

¹⁰ Emẹlẹ mgba nwa-nwa ị: kẹ hụn nwa ị okẹnnyẹ mụ kẹ hụn nwa ị okpoho mụ; i mẹ ẹ, y'a gbagụọ enwẹn i ọtọ.

¹¹ Emẹlẹ mgba nwa nwunyẹ nẹdi i — hụn ọ mụyeni nẹdi i; nwẹnẹ i k'ọ wụ.

¹² Emẹlẹ mgba nwẹnẹ nẹdi i, nwẹnẹ nẹdi i kẹti-kẹti k'ọ wụ.

¹³ Emẹlẹ mgba nwẹnẹ nnẹ i, nwẹnẹ nnẹ i kẹti-kẹti k'ọ wụ.

¹⁴ Emẹkwọlẹ mgba nwunyẹ nwẹnẹ-nẹdi i; i mẹ ẹ, y'a gbagụọ nwẹnẹ-nẹdi i ọtọ; nwẹnẹ nẹdi i kẹ okpoho hụ wụ.

¹⁵ Emẹlẹ mgba nwunyẹ nwa ị; nwunyẹ nwa ị rọ; emẹlẹ mgba a.

¹⁶ Emẹlẹ mgba nwunyẹ nwẹnẹ i; i mẹ ẹ, y'a gbagụọ nwẹnẹ i ọtọ.

¹⁷ Emẹlẹ mgba okpoho lẹ nwa a; alụlẹ nwa-nwa a — kẹ hụn nwa a okẹnnyẹ mụ kẹ hụn nwa a okpoho mụ; wẹ wụ ndị ẹhụ okpoho hụ kẹti-kẹti. Ihiẹn jọgbu enwẹn ẹ rọ.

¹⁸ “Alụrụkwọlẹ nwẹnẹ nwunyẹ i nị wẹ nọ nwunyẹ-di, y'e mẹ mgba a ebe nwunyẹ i rị ndụn.

¹⁹ Emẹlẹ mgba okpoho ebe ọ rị a sọ ezi.

²⁰ Emẹlẹ mgba nwunyẹ ịhịan; i mẹ ẹ, y'e gigụọ okpoho hụ mẹrụ enwẹn i.

²¹ “Eyekwọlẹ wẹ nwa ị ọwụlẹ gi chụnyeni Molẹkị ẹjan; emẹrụlẹ ẹfan Chuku ụnụ. Mmẹ wụ Osolobuẹ.

²² “Okẹnnyẹ esọnkwọlẹ okẹnnyẹ ibe ẹ mẹ mgba nọkẹ okpoho; arụ k'ọ wụ.

²³ Emẹkwọlẹ mgba anụ gi ẹ mẹrụ enwẹn i. Okpoho ewekwọlẹ enwẹn ẹ ye anụ n'ọ gba a; arụ k'ọ wụ.

²⁴ “Egikwọlẹ ni hụn ọwụlẹ imẹ ihiẹn ndịnị ile mẹrụ enwẹn ụnụ, makẹni ẹrịra kẹ ndị alị ndị hụ m jẹnkọ nwan d'a chụpụnị ụnụ dọn mẹrụ enwẹn wẹ;

²⁵ kẹ alị lẹ enwẹn ẹ nọzịdẹ rụ, m nọ gi njọ a sọn ẹ, ọ nọ gbọpụ ndị bin'ẹ.

²⁶ Ka e mẹ ni ihiẹn ndị m sị ụnụ mẹ, ụnụ e dọnmẹsọnmẹ iwu ndị m ye ụnụ. Kẹ nwa-di-alị kẹ abịamabịa rị imẹ igunrun ụnụ emẹkwọlẹ hụn ọwụlẹ imẹ ihiẹn ndịnị m'a sọ,

²⁷ makẹni ihiẹn ndịnị ile kẹ ndị bu ụnụ ụzọ bi alị ụnụ shikọ mẹ, alị hụ nọ rụ.

²⁸ Ụnụ mẹrụ alị hụ, o k'a gbọpụzịkwọ ụnụ k'o dọn gbọpụ ndị bu ụnụ ụzọ bi ẹ.

²⁹ Onyẹ mẹ hụn ọwụlẹ imẹ ihiẹn ndịnị m'a sọ, wẹ k'e bepụ a imẹ igunrun ndị nke ẹ.

³⁰ Mẹ ni ihiẹn ndị m sị ọnụ mẹ; emẹlẹ ni omẹnalị ọwụlẹ imẹ ndịnị m'a sọ, hụn wẹ e mẹ nị ụnụ d'a bịa, egikwọlẹ ni wẹ mẹrụ enwẹn ọnụ. Mmẹ wụ Osolobuẹ hụn wụ Chuku ụnụ.”