Lẹvitikọsụ 17 - Ika

Isi Nke Mmẹsa Ebe Wẹ K'a Nọrịrị Chụn Ẹjan

¹ Osolobuẹ sị Mozizi,

² “Gwa Ẹrọnụ lẹ ụmụ a lẹ ndị Izrẹlụ ile, sị, ‘Ọnwan wụ ihiẹn Osolobuẹ ku:

³ Onyẹ Izrẹlụ ọwụlẹ nọ ebe ọwụlẹ imẹ obodo mọbụ ebe ịhịan bilẹni chụn ẹjan efin mọbụ atụnrụn mọbụ ewu,

⁴ hụn nkẹ o gi wẹhẹ ẹ ọnụ-mgbọn Ọdụ-ozuzu k'o furu d'e ye Osolobuẹ ya ihun Ọdụ-nsọ, wẹ sikọ d'e weri ẹ kẹ onyẹ gbu ọchụn; ọchụn k'o gbu, wẹ k'e bepụ a imẹ ndị nke ẹ.

⁵ O sikọ d'e mẹ ndị Izrẹlụ e wẹhẹni Osolobuẹ ẹjan wẹ rị nwan a chụnsọnmẹ ogbe, e wẹhẹni Osolobuẹ ya ọnụ-mgbọn Ọdụ-ozuzu, e ye onyẹ nchụn-ẹjan ebẹhụ, e gi wẹ ẹ a chụnyeni Osolobuẹ ẹjan-ekele.

⁶ Onyẹ nchụn-ẹjan e fe ẹdeke anụ hụ ye elu ukpo nchụn-ẹjan Osolobuẹ ọnụmụzọ Ọdụ-nsọ, dụn ụtọrọ a ọkụn n'ọ wụrụ ẹjan hụn ishin ẹ a sụọ Osolobuẹ ụsụọ.

⁷ Achụnyebehini wẹ eje-mmọn ẹjan wẹ ebe wẹ rị a rụa ewu ndị hụ wẹ rị nwan a rụa. Iwuni k'a rị jẹnrin ejẹn.’

⁸ “Sị wẹ: Onyẹ Izrẹlụ ọwụlẹ mọbụ abịamabịa ọwụlẹ bi imẹ igunrun wẹ, hụn chụn ẹjan w'a dụn ọkụn mọbụ ẹjan ọzọ,

⁹ mmanị o wẹhẹ ẹ ọnụ-mgbọn Ọdụ-ozuzu d'a chụnyeni Osolobuẹ, wẹ k'e bepụ onyẹ hụ imẹ ndị nke ẹ.

Sọ Ẹdeke, Eril'ẹ

¹⁰ “Onyẹ Izrẹlụ ọwụlẹ mọbụ abịamabịa bi imẹ igunrun wẹ ri ẹdeke ọwụlẹ, m k'e bu ẹnya zinmẹ ẹ, bepụ a imẹ ndị nke ẹ.

¹¹ Makẹni ndụn ihiẹn ọwụlẹ rị imẹ ẹdeke ẹ; e yegụọ m ụnụ ya nị ụnụ gi ẹ a chụn ẹjan ụnụ gi a gbarị isi elu-ukpo nchụn-ẹjan. Ẹdeke kẹ wẹ gi a gbarị isi ịhịan.

¹² Ịya haịn m gi a sị ndị Izrẹlụ, ‘E rikwọlẹ ni ẹdeke mọbụ nị abịamabịa rị imẹ igunrun ụnụ ri ẹdeke.’

¹³ “Onyẹ Izrẹlụ ọwụlẹ mọbụ abịamabịa ọwụlẹ bi igunrun wẹ gbu anụ mọbụ nnụnụ k'a nị ẹdeke ẹ gbapụchanrịn, o gi ẹjan kpumẹ ẹ,

¹⁴ makẹni ndụn ihiẹn ọwụlẹ rị imẹ ẹdeke ẹ. Ịya haịn m gi a sị ndị Izrẹlụ, ‘E rikwọlẹ ni ẹdeke ihiẹn ọwụlẹ, makẹni ndụn ihiẹn ọwụlẹ rị imẹ ẹdeke ẹ; onyẹ ri ẹ, wẹ k'e gbu ẹ.’

¹⁵ “Kẹ nwa-di-alị kẹ abịamabịa, onyẹ ri anụ ọwụlẹ nwụnhụn ihiẹn ẹ mọbụ anụ eje-anụ gbu k'a sụrịrị ẹkwa a, gi mirin wụ ẹhụ; o k'a rụ d'e ru ogẹn ẹnyasị o kebe rị ọchan.

¹⁶ Kanị omẹni ọ sụnị ẹkwa, ọ wụnị ẹhụ, onyẹ hụ k'e gi isi ẹ buru ẹ.”