Lẹvitikọsụ 16 - Ika

Isi Nke Mmisin Kẹ Onyẹ-isi Nchụn-ẹjan Dọn A Banye Ebe Kachanrịn Nsọ

¹ Osolobuẹ gwa Mozizi oku ogẹn ahụn ụmụ Ẹrọnụ ẹbụọ wụ Nadabụ lẹ Abihu gi nwụnhụn yeni ọnọkunmẹ hụ wẹ nọkunmẹ Osolobuẹ.

² Osolobuẹ sị Mozizi, “Gwa Ẹrọnụ nwẹnẹ i ya atụkwọlẹ ẹhụ banhan Ebe Kachanrịn nsọ hụn rị azụụn Ẹkwa-mgbọnkin, ihun okun ẹkpẹti-nsọ, okun hụ wẹ nọ a gbarị isi: y'e mẹkwọl'a amamgbe ọ nwụnhụn, makẹni m rị imẹ orukpu hụ hụn a pụha elu okun hụ wẹ nọ a gbarị isi.

³ “Ẹnịna kẹ Ẹrọnụ k'a gha a banhan Ebẹhụ Kachanrịn-nsọ: o k'e weri agbanaị okẹn-efin o k'e gi chụn ẹjan-njọ lẹ ebulu o k'e gi chụn ẹjan w'a dụn ọkụn.

⁴ O k'e yiri ẹwuru ọrụn nchụn-ẹjan hụ rị nsọ hụn tueru alị wẹ gi ẹkwa linẹni mẹmẹ lẹ apa-linẹni; o gi nfifie linẹni hụ fiedọn ukun, kpuru okpu linẹni hụ isi. Ẹkwa ndị hụ rị nsọ; ya wụ, o k'e girịrị mirin wụgụ ẹhụ o kebe yiri wẹ.

⁵ “O sikọ d'a narịn ndị Izrẹlụ mkpịn ẹbụọ o k'e gi chụn ẹjan-njọ lẹ ebulu ohu o k'e gi chụn ẹjan w'a dụn ọkụn.

⁶ Ẹrọnụ k'e gi okẹn-efin hụ chụn ẹjan-njọ a, gi gbarị isi ya lẹ enwẹn ẹ lẹ ikpụnọ a;

⁷ ọ bịa d'e wẹhẹ ewu ẹbụọ hụ, we wẹ che ihun Osolobuẹ, ọnụmụzọ Ọdụ-ozuzu.

⁸ Imẹ ewu ẹbụọ hụ, o k'e gi utẹn-Osolobuẹ hanrịn hụn k'a wụ nke Osolobuẹ lẹ hụn k'e bu njọ-alị.

⁹ Ẹrọnụ k'e wẹhẹ ewu hụn o gi utẹn-Osolobuẹ hanpụhanị Osolobuẹ, gi ẹ chụn ẹjan-njọ.

¹⁰ Kanị o k'e weri hụn ahụn o gi utẹn-Osolobuẹ hanpụha n'o bu njọ-alị butọ ihun Osolobuẹ. O sikọ d'a chụ a shi imẹ atụ n'ọ wụrụ hụn bu njọ-alị, gi ẹ gbarị isi ndị alị.

¹¹ “Ẹrọnụ k'e wẹhẹ nwan okẹn-efin hụ o sikọ d'e gi chụn ẹjan-njọ ahụn wụ nke ẹ, gi ẹ gbarị isi ya lẹ enwẹn ẹ lẹ ikpụlọ a.

¹² O k'a gha elu ukpo-nsẹnsị rị ihun Osolobuẹ weri mkpu nsẹnsi ikeke ọkụn jun, o weri nsẹnsi e shin ọhụnma wẹ gweriẹn hụn jun ọb'ẹka ẹbụọ, o we wẹ ile ghafe Ẹkwa-mgbọnkin, shi imẹ Ebẹhụ Kachanrịn-nsọ.

¹³ O kpọn nsẹnsi hụ ye imẹ ọkụn hụ rị ihun Osolobuẹ; ẹnwụnrụn nsẹnsi hụ a lọkpumẹ okun hụ wẹ nọ a gbarị isi, okun Ẹkpẹti Ashịa-ẹri, makẹ ọ gha a nwụn.

¹⁴ O k'e weberi ẹdeke okẹn-efin hụ, gi mkpịnsịn-ẹka fe ẹ ye ihun okun hụ wẹ nọ a gbarị isi, ya wụ nkọ ọwụwa ẹnyanwụn; gizi mkpịnsịn-ẹka fe ẹ mgbe ẹsa ye elu okun hụ.

¹⁵ “O k'e gbu nwan ewu hụ o gi a chụn ẹjan-njọ ndị Izrẹlụ; o weri ẹdeke ẹ ghafe Ẹkwa-mgbọnkin hụ, shi imẹ Ebe Kachanrịn nsọ, mẹ ẹ k'ọ mẹ ẹdeke okẹn-efin hụ: o fe e ye elu okun hụ wẹ nọ a gbarị isi, o feyezi ẹ ihun ẹ.

¹⁶ Ẹnịna k'o k'a dọn gbarị Ebẹhụ Kachanrịn-nsọ yeni ihiẹn ile ndị Izrẹlụ gi rụ lẹ nnupụ-isi wẹ, ihiẹn ọwụlẹ hụn wụ njọ wẹ. O k'e mẹzini Ọdụ-ozuzu ihiẹn ohu ahụn, makẹni ọ rị imẹ igunrun wẹ lẹ ihiẹn ndị ahụn wẹ gi a rụ.

¹⁷ “Onwọnni onyẹ sikọ d'a rị imẹ Ọdụ-ozuzu hụ ile gha ogẹn Ẹrọnụ e gi banye Ebẹhụ Kachanrịn-nsọ d'a gbarị isi ịhịan ile d'e ru n'ọ pụha — ọ gbarịgụ isi ya lẹ enwẹn ẹ lẹ nke ikpụnọ a lẹ nke ndị Izrẹlụ ile.

¹⁸ “Ọ pụha nwan ezi ebe ukpo nchụn-ẹjan rị ihun Osolobuẹ, gbarịzịkwọ a: O weberi ẹdeke okẹn-efin hụ lẹ ẹdeke ewu hụ, o buchesọnmẹ ẹ mpịn rịsọnmẹ nkonko ukpo nchụn-ẹjan hụ.

¹⁹ O k'e gi mkpịnsịn-ẹka deri ẹdeke feyesọnmẹ elu ẹ mgbe ẹsa, gi dọn ẹ nsọ makẹ ihiẹn ile ndị Izrẹlụ gi rụ.

²⁰ “Ẹrọnụ gbarịgụ Ebẹhụ Kachanrịn-nsọ lẹ Ọdụ-ozuzu hụ ile lẹ ukpo nchụn-ẹjan, o wepụha nwan ewu hụ rị ndụn.

²¹ O bu ẹka a ẹbụbụọ kwasị ewu hụ rị ndụn isi, kuchanrịn eje-obibi lẹ nnupụ-isi ndị Izrẹlụ, njọ ile wẹ mẹ, bugụ wẹ che ewu hụ isi, o we ewu hụ ye onyẹ wẹ tumẹ k'e dupụn'a, o du ẹ shi imẹ atụ.

²² Ewu hụ k'e buru njọ wẹ ile shi ebe ịhịan bilẹni; onyẹ hụ dun'ẹ a hatu ẹ ye imẹ atụ ebẹhụ.

²³ “Ẹrọnụ sikọ nwan d'a kinhẹn Ọdụ-ozuzu d'a gbụpụ ẹkwa onyẹ-isi nchụn-ẹjan ndị hụ o yiri n'o d'a banye Ebẹhụ Kachanrịn-nsọ, ọ la wẹ tọ ebahụn.

²⁴ O gi mirin wụ ẹhụ, yiri ẹkwa nke ẹ. Ọ pụha d'a chụn ẹjan w'a dụn ọkụn, nke ẹ lẹ nke ndị alị, gi ẹjan ndị hụ gbarị isi ya lẹ ndị alị;

²⁵ ọ nọzị elu ukpo nchụn-ẹjan hụ dụn ụtọrọ anụ hụ o gi chụn ẹjan-njọ ọkụn.

²⁶ “Onyẹ ahụn dupụ ewu hụ shi imẹ atụ kẹni ọ wụrụ ewu bu njọ-alị k'a sụpụ ẹkwa a, gi mirin wụ ẹhụ, o kebe banhan ebe ịhịan ile bi.

²⁷ Wẹ k'a gha imẹ ebẹhụ ịhịan ile bi bupụ okẹn-efin lẹ ewu hụ wẹ webanhan ẹdeke wẹ imẹ Ebẹhụ Kachanrịn-nsọ gi gbarịsọnmẹ isi; wẹ k'a dụnpụ akpụkpọ wẹ ọkụn, kẹ ya kẹ uru wẹ lẹ ihiẹn ndị ọzọ rịn'a w'e ri.

²⁸ Onyẹ ahụn dụn wẹ ọkụn k'a sụpụ ẹkwa a, gi mirin wụ ẹhụ, o kebe banhan ebe ịhịan ile bi.

Ụhụọhịn Mgbarị-isi Izrẹlụ

²⁹ “Lee ni ihiẹn ụnụ k'a gha e mẹ jẹnrin ejẹn: nke akp'ọhịn iri imẹ ifọn nke ẹsa, ụnụ k'e bu ọnụ; ụnụ arụnkọ ọrụn ọwụlẹ — kẹ nwa-di-alị kẹ abịamabịa rị imẹ igunrun ọnụ,

³⁰ makẹni ụhụọhịn hụ kẹ wẹ k'a chụn ẹjan wẹ gi a gbarị isi ụnụ, gi mẹ ụnụ rị ọchan; e wepụ wẹ njọ ile ụnụ mẹ, ụnụ a rị ụchan ẹnya Osolobuẹ.

³¹ Ụhụọhịn izu-ikẹn ụnụ k'e gi a latọ ọrụn rọ; ụnụ k'e bu ọnụ; ihiẹn ụnụ k'e mẹsọnmẹ jẹnrin ejẹn rọ.

³² “Onyẹ hụn wụ onyẹ-isi nchụn-ẹjan, hụn wẹ hukpu udẹn-ntumẹ, hụn rikin ọnọdị nẹdi ẹ wụ onyẹ-isi nchụn-ẹjan, ya k'a gha a chụn ẹjannị wẹ gi a gbarị isi ịhịan ile lẹ Ọdụ-nsọ. O k'e yi ẹwuru-nsọ linẹni ndị hụ mẹ ẹ,

³³ chụn ẹjan gi gbarị Ebe Kachanrịn nsọ lẹ Ọdụ-ozuzu lẹ ukpo nchụn-ẹjan lẹ ndị nchụn-ẹjan lẹ ndị Izrẹlụ ile.

³⁴ Mẹsọnmẹ ni ihiẹnni jẹnrin ejẹn: mgbe ohu ahụa e gi w'ẹ gbarị isi ndị Izrẹlụ yeni njọ ile wẹ mẹ.” Mozizi nọ mẹ kẹ Osolobuẹ dọn gwa Mozizi.