Lẹvitikọsụ 14 - Ika

Isi Nke Mmẹnọ Kẹ Onyẹ Dịnhịn Emu-efeni Dọn A Rịzị Ọchan

¹ Osolobuẹ sị Mozizi,

² “Lee ihiẹn onyẹ dịnhịn eje-emu akpụkpọ-ẹhụ e feni sikọ d'e mẹ ụhụọhịn wẹ k'e ku ẹ n'ọ rụzịnị, ụhụọhịn w'e gi wẹ ẹ jẹnni onyẹ nchụn-ẹjan.

³ Onyẹ nchụn-ẹjan k'a gha ebe ịhịan ile bi pụha d'e lele ẹ: omẹni onyẹ hụ a dịnhịngụọ eje-emu akpụkpọ-ẹhụ hụ kụn'a,

⁴ onyẹ nchụn-ẹjan k'a sị wẹ wẹhẹ nnụnụ ẹbụọ rị ndụn, rị ọchan lẹ osisi sida lẹ oruru-ododo lẹ ẹrurushin hisopu ọ kpagiri, nị wẹ gi mẹzi onyẹ hụ rị ọchan;

⁵ onyẹ nchụn-ẹjan a sị wẹ gbu nnụnụ ohu ye elu mirin rị mma wẹ mẹye imẹ ite-ụrụa;

⁶ ọ bịa nwan d'e weri nnụnụ hụn rị ndụn, su ịya lẹ osisi sida lẹ oruru-ododo lẹ ẹrurushin hisopu hụ ye imẹ ẹdeke nnụnụ hụn wẹ gbuye imẹ mirin ahụn rị mma;

⁷ o fe ẹ mgbe ẹsa kpu onyẹ hụ wẹ rị e mẹ n'ọ rịzị ọchan yeni eje-emu akpụkpọ-ẹhụ hụn kụn'a, ku ẹ n'ọ rịgụọ ọchan. O mẹgụọ a, ọ hapụ nnụnụ ahụn rị ndụn ye, n'o fepụ.

⁸ “Onyẹ hụ wẹ rị e mẹ n'ọ rịzị ọchan sikọ d'a sụ ẹkwa a, kọchanpụ ẹṅẹnrẹn ile rị a ẹhụ, gi mirin wụchanpụ ẹhụ; ogẹn ahụn k'o gi rị ọchan. Wẹ mẹgụ hụnnị, o nwọn ikẹn banhan ebe ịhịan ile bi, kanị ọ banyekọ iwe ẹ d'e ru akp'ọhịn ẹsa.

⁹ “Nke akp'ọhịn ẹsa, o k'a kọpụrịrị ẹṅẹnrẹn ile rị a ẹhụ; o k'a kọpụrịrị ntutu ẹ, ẹtu ẹ, ipupu-ẹnya a lẹ ẹṅẹnrẹn ndị ọzọ ile rị a ẹhụ. O k'a sụkwọ ẹkwa a, gi mirin wụ ẹhụ, ogẹn hụ, ọ rị ọchan.

¹⁰ “Nke akp'ọhịn ẹsatọ, o k'e wẹhẹrịrị ebulu ẹbụọ lẹ onyẹnyẹ-atụnrụn ohu rị ahụa ohu ẹhụ wẹ zu oke; o we ọka wẹ gweriẹn wẹ gi ofugbọn-olivu gwọ hụn k'e jun mkpu kọstadị nta ẹsa lẹ hụn ruchanrịnlẹni mkpikpi hụn o k'e gi ye oyiye-ọka, lẹ ofugbọn-olivu ruchanrịnlẹni mkpikpi mkpu kọstadị nta.

¹¹ Onyẹ nchụn-ẹjan hụn jẹnkọ d'e ku ẹ nị onyẹ ahụn a rịgụọ ọchan k'e wẹhẹ onyẹ hụ lẹ ẹjan a ihun Osolobuẹ, ọnụmụzọ Ọdụ-ozuzu.

¹² “Onyẹ nchụn-ẹjan k'e weri ebulu ohu gi chụn ẹjan onyẹ ikpe ma, cheni ofigbọn-olivu hụ ruchanrịnlẹni mkpikpi mkpu kọstadị nta; o finfin wẹ ghọsị Osolobuẹ n'ọ wụrụ ẹjan w'e finfin.

¹³ O k'a nọ ebẹhụ rị nsọ w'a nọ e gbu anụ wẹ gi a chụn ẹjan-njọ lẹ ẹjan w'a dụn ọkụn gbu ebulu hụ. Ẹjannị onyẹ ikpe ma chụ k'a wụrụ nke onyẹ nchụn-ẹjan kẹ ẹjan-njọ dọn a wụ nke ẹ. Ẹjannị rị okẹn nsọ.

¹⁴ Onyẹ nchụn-ẹjan hụ sikọ d'e weriberi ẹdeke anụ hụ wẹ gi chụn ẹjan onyẹ ikpe ma, deye ibe alị ntịn ẹka-nni onyẹ hụ wẹ rị e mẹ n'ọ rịzị ọchan, deyezi ẹ eze-ẹka ẹka-nni ẹ lẹ eze mkpịnsịn-ụkụ ẹka-nni ẹ.

¹⁵ Ogẹn ahụn, onyẹ nchụn-ẹjan e huberi ofugbọn-olivu hụ ye ọb'ẹka ẹka-ekpẹn,

¹⁶ de mkpịnsịn ẹka e sọn eze-ẹka nni ye imẹ ofigbọn-olivu hụ rị a ọb'ẹka, gi mkpịnsịn-ẹka hụ fe ẹ mgbe ẹsa ihun Osolobuẹ.

¹⁷ O de ofigbọn-olivu hụn họdụ a ọb'ẹka ye onyẹ hụ wẹ rị e mẹ n'ọ rịzị ọchan ibe alị ntịn ẹka-nni, eze-ẹka ẹka-nni lẹ eze-uku ẹka-nni. O k'e de ẹ elu ẹdeke hụ o deyesọnmẹ wẹ, ẹdeke ẹjan onyẹ ikpe ma.

¹⁸ O bu ofugbọn-olivu họdụ a ẹka che onyẹ hụ ọ rị e mẹ n'ọ rịzị ọchan isi, gi gbarị isi onyẹ hụ ihun Osolobuẹ.

¹⁹ “Onyẹ nchụn-ẹjan hụ a bịa d'a chụn ẹjan-njọ hụ, gbarị isi onyẹ hụ wẹ rị e mẹ n'ọ rịzị ọchan yeni ihiẹn hụ mẹrụn'a. O mẹgụ ọhụn, o gbu anụ ẹjan w'a dụn ọkụn,

²⁰ nọ elu ukpo nchụn-ẹjan chụnye ịya lẹ oyiye ọka hụ, gi gbarị isi onyẹ hụ; onyẹ hụ a rị nwan ọchan.

Omẹni Ogbẹnnyẹ Rọ

²¹ “Kanị, omẹni ogbẹnnyẹ rọ, nị ẹka a eruni ihiẹn ndịnị, o k'e wẹhẹ ebulu ohu o k'e gi chụn ẹjan onyẹ ikpe ma, nị wẹ finfin ẹ, o gi ẹ gbarị isi ẹ, cheni ọka wẹ gweriẹn hankẹ mkpu kọstadị nta ẹbụọ, hụn wẹ gi ofugbọn-olivu gwọ o k'e gi ye oyiye-ọka lẹ ofugbọn-olivu rulẹni mkpu kọstadị nta ahanmahan,

²² lẹ nduru ẹbụọ mọbụ ụmụ oluikuku ẹbụọ, hụn ọwụlẹ ẹka a k'e ru: ohu wụ nke ẹjan-njọ, ohu wụ nke ẹjan w'a dụn ọkụn.

²³ “Nke akpọhịn ẹsatọ, o k'e wẹhẹrịrị nị onyẹ nchụn-ẹjan ihiẹn ndị hụ ọnụ-mgbọn Ọdụ-ozuzu, ihun Osolobuẹ, n'o gi ẹ mẹn'ẹ ihiẹn o gi rịzị ọchan.

²⁴ Onyẹ nchụn-ẹjan k'e weri ebulu hụ onyẹ hụ wẹhẹ n'o gi chụn ẹjan-njọ cheni ofugbọn-olivu hụ mẹ ẹkẹrẹ, finfin wẹ ghọsị Osolobuẹ n'ọ wụrụ ẹjan w'e finfin.

²⁵ O k'e gbu ebulu ẹjan onyẹ ikpe ma, weriberi ẹdeke ẹ deye ibe alị ntịn ẹka-nni onyẹ hụ wẹ rị e mẹ n'ọ rịzị ọchan, deyezi ẹ eze mkpịnsịn-ẹka ẹka-nni ẹ lẹ eze mkpịnsịn-ụkụ ẹka-nni ẹ.

²⁶ O huberi ofugbọn-olivu hụ ye ubẹka ẹka-ekpẹn,

²⁷ de mkpịnsịn ẹka e sọn eze-ẹka nni ye imẹ ofugbọn-olivu hụ rị a ọb'ẹka, gi mkpịnsịn-ẹka hụ fe ẹ mgbe ẹsa ihun Osolobuẹ.

²⁸ O weriberi ofugbọn-olivu hụ rị a ọb'ẹka che onyẹ hụ wẹ rị e mẹ n'ọ rịzị ọchan ebahụn ile o deyesọnmẹ ẹ ẹdeke ẹjan onyẹ ikpe ma: kẹ ibe alị ntịn ẹka-nni kẹ eze mkpịnsịn ẹka-nni kẹ eze-uku ẹka-nni.

²⁹ O bu ofugbọn-olivu họdụ a ẹka che onyẹ hụ wẹ rị e mẹ n'ọ rịzị ọchan isi, gbarị isi onyẹ hụ ihun Osolobuẹ.

³⁰ Ọ bịa d'a chụnye nduru ndị hụ mọbụ onuikuku ndị hụ, hụn ọwụlẹ ẹka ru onyẹ hụ:

³¹ ohu wụ nke ẹjan-njọ, hụn ẹbọ wụ nke ẹjan w'a dụn ọkụn cheni oyiye-ọka. Ẹrịra kẹ onyẹ nchụn-ẹjan hụ k'a dọn nọ ihun Osolobuẹ gbarị isi onyẹ hụ wẹ rị e mẹ n'ọ rịzị ọchan.”

³² Ọnwan wụ iwu rịnị onyẹ dịnhịn emu akpụkpọ-ẹhụ efeni hụn ẹka rulẹni ihiẹn o k'e gi chụn ẹjan o gi a wụbehi onyẹ rụnị.

Ụlọ Kun Mbu

³³ Osolobuẹ sị Mozizi lẹ Ẹrọnụ,

³⁴ “Ogẹn ụnụ e gi banye alị Kenaanị, alị hụ m rị e ye ụnụ, nị e bu m mbu che ụlọ ịhịan imẹ alị hụ,

³⁵ onyẹ nwọn ụnọ hụ k'e jẹnrịrị d'a gwa onyẹ nchụn-ẹjan, sị, ‘M hụn ihiẹn nọ kẹ mbu ụlọ m.’

³⁶ Onyẹ nchụn-ẹjan hụ k'a gwa wẹ kwapụchanrịn ihiẹn rị ụlọ hụ o kebe banye ẹ d'e lele mbu hụ, amamgbe ọ wụrụ nị ihiẹn ile rị ụlọ hụ a rụgụọ. Wẹ kwapụgụ a, onyẹ nchụn-ẹjan ahụn a banye d'e lele ụlọ hụ.

³⁷ O jẹnkọ d'e lele mbu hụ rị ẹhụ-ẹjan ụlọ hụ: omẹni ọ hụ e nwun ẹhụhụọ-oyiyi ẹhụhụọ-oyiyi mọbụ ododo-ododo lẹni o miban ẹhụ-ẹjan hụ,

³⁸ onyẹ nchụn-ẹjan hụ k'a gha ọnụmụzọ hụ pụha, kpọkin ụlọ hụ ọrọgbọ akp'ọhịn ẹsa.

³⁹ Nke akpọhịn ẹsa onyẹ nchụn-ẹjan hụ e kinhẹn d'e lelezi ụlọ hụ. Omẹni mbu hụ a bawayegụọ ẹhụ-ẹjan ụlọ hụ,

⁴⁰ o sikọ d'a gwa wẹ tọpụhasọnmẹ blọkụ ndị hụ kun mbu, gha imẹ obodo bupụ wẹ d'a maye ebe ịhịan rịlẹni.

⁴¹ Ọ bịa d'e mẹ wẹ kọchanpụchanrịn ụsụọ-ẹjan ile rị imẹ ụlọ ahụn, kpọnrinchanrịn ihiẹn ndị hụ wẹ kọchanpụha gha imẹ obodo pụ d'e kpọnye ebe rịlẹni ọchan.

⁴² E weri wẹ blọkụ ichẹn nọkinsọnmẹ ẹnya ndị hụ wẹ wepụ, tedọnzi ụlọ hụ.

⁴³ “Omẹni mbu hụ a pụhazị ebe wẹ wepụgụ blọkụ ndị hụ, kọchanpụgụ ụlọ hụ tedọnzi,

⁴⁴ onyẹ nchụn-ẹjan e jẹn d'e lelezi ẹ: omẹni mbu hụ a bamazị ụlọ hụ, ya wụ eje-mbu rọ; ụlọ hụ a rụgụọ.

⁴⁵ Wẹ k'a tọtuchanrịn ụlọ hụ — kẹ blọkụ kẹ osisi kẹ ihiẹn wẹ gi te ẹ, gha imẹ obodo bupụ wẹ d'e kpọnye ebe rịlẹni ọchan.

⁴⁶ “Onyẹ banye imẹ ụlọ hụ ebe wẹ kpọkingụ a a rụgụọ d'e ru ogẹn ẹnyasị.

⁴⁷ Onyẹ ọwụlẹ hụn ranhịn imẹ ụnọ hụ mọbụ ri ihiẹn-oriri imẹ ẹ k'a sụrịrị ẹkwa a.

⁴⁸ “Kanị omẹni ogẹn onyẹ nchụn-ẹjan gi bịa d'e lele ẹ, nị mbu hụ awayeni kẹ wẹ tedọnzigụ ụnọ hụ, o sikọ d'e ku ẹ nị ụlọ hụ rị ọchan, makẹni mbu hụ a gụgụọ.

⁴⁹ “I gi ku ẹ nị ụlọ hụ rịzị ọchan: o sikọ d'e weri nnụnụ ẹbụọ lẹ osisi sida lẹ oruru-ododo lẹ ẹrurushin hisopu;

⁵⁰ o gbu nnụnụ ohu ye elu mirin rị mma wẹ mẹye imẹ ite-ụrụa.

⁵¹ O bịa d'e weri osisi sida lẹ ẹrurushin hisopu hụ lẹ oruru-ododo lẹ nnụnụ hụn ẹbọ hụ rị ndụn, gi wẹ suru ẹdeke nnụnụ hụ o gbu gbaye mirin hụ rị mma, o we ẹ fe mgbe ẹsa ye ụnọ hụ.

⁵² Ẹrịra k'o k'a dọn gi ẹdeke nnụnụ hụ lẹ mirin hụ rị mma lẹ nnụnụ hụ rị ndụn lẹ osisi sida hụ lẹ ẹrurushin hisopu hụ lẹ oruru-ododo mẹ ụlọ hụ rịzị ọchan.

⁵³ O mẹgụ, ọ gha imẹ obodo hụ pụ d'a hatu nnụnụ hụn ẹbọ hụ rị ndụn ye, ẹnịna k'o k'e gi gbarịnị wẹ ụlọ hụ, ụlọ hụ e gi ẹ rị ọchan.”

⁵⁴ Iwu ndịnị wẹ kẹ w'e gi e sọn emu akpụkpọ-ẹhụ e feni: ebe rị a kọ ịhịan ụkọ isi mọbụ agban lẹ

⁵⁵ ẹkwa mọbụ ụnọ kun mbu lẹ

⁵⁶ ihiẹn-ofifi lẹ ẹkpụkpa mọbụ ebe channị.

⁵⁷ Iwuni kẹ wẹ gizi e ku nị ịhịan rụ arụ ra ọ rụnị. Ịya wụ iwu w'e gi e sọn emu akpụkpọ-ẹhụ lẹ ihiẹn kun mbu.