Lẹvitikọsụ 13 - Ika

Isi Nke Mmẹtọ Kẹ W'e Mẹ Emu Akpụkpọ-ẹhụ

¹ Osolobuẹ sị Mozizi lẹ Ẹrọnụ,

² “Onyẹ ọwụlẹ nwọn ebe funni ẹhụ a mọbụ ẹkpụkpa mọbụ ebe nwunhutọnị — hụn nwọn ikẹn wụ eje-emu akpụkpọ-ẹhụ, wẹ k'e werịrị onyẹ hụ jẹnni onyẹ nchụn-ẹjan, ya wụ Ẹrọnụ mọbụ nwa a ohu.

³ Onyẹ nchụn-ẹjan ahụn sikọ d'e lele ebẹhụ channị akpụkpọ-ẹhụ a. Omẹni ẹṅẹnrẹn rị ebahụn a chanmagụọ ụchan, nị ihiẹn hụ mighafezịkwọ akpụkpọ-ẹhụ, ịya wụnị eje-emu akpụkpọ ẹhụ rọ. Onyẹ nchụn-ẹjan lelegụ a, o ku ẹ nị onyẹ hụ a rụgụọ.

⁴ “Kanị, omẹni ebẹhụ ọ rị a ẹhụ rị a chan ụchan eziẹ bụ o yini ihiẹn mighafe akpụkpọ-ẹhụ, nị ẹṅẹnrẹn rịn'a e ke chanma ụchan, onyẹ nchụn-ẹjan k'e bu onyẹ hụ ihiẹn ahụn rị ẹhụ che ụzọ ohu akp'ọhịn ẹsa.

⁵ Nke akpọhịn ẹsa, onyẹ nchụn-ẹjan e lele ẹ: ọ hụn a nị ebẹhụ nọkwọ k'ọ nọ lẹni ọ bachenini, o buzi ẹ che ụzọ ohu akp'ọhịn ẹsa ọzọ.

⁶ Nke akp'ọhịn ẹsa onyẹ nchụn-ẹjan e lelezi ẹ: omẹni ihiẹn hụ e nwunmẹgụọ ọhụnma lẹni ọ bachenini, onyẹ nchụn-ẹjan k'e ku ẹ nị onyẹ ahụn hụ ọchan; ẹkpụkpa mmaka rọ. Onyẹ ahụn k'a sụrịrị ẹkwa a. Ọ sụgụ a, ọ rị ọchan.

⁷ “Kanị, omẹni ẹkpụkpa hụ rị a ẹhụ bawaye abawaye ogẹn o gi wegụ enwẹn ẹ ghọsị onyẹ nchụn-ẹjan, ogẹn ahụn onyẹ nchụn-ẹjan gi kugụ n'ọ hụghọ ọchan, o k'a bịazịrịrị d'e we enwẹn ẹ ghọsị onyẹ nchụn-ẹjan.

⁸ Onyẹ nchụn-ẹjan sikọ d'e lelezi ẹ: omẹni ẹkpụkpa hụ a bawayegụọ, o k'e ku ẹ nị onyẹ hụ rụ arụ; eje-emu akpụkpọ-ẹhụ rọ.

⁹ “O mẹ nwan nị ịhịan nwọn nsọngbu akpụkpọ ẹhụ, wẹ k'e wẹhẹrịrị a d'a hụn onyẹ nchụn-ẹjan.

¹⁰ Onyẹ nchụn-ẹjan k'e lele ẹ: omẹni o nwọnghọ ebe funni nwunhutọnị akpụkpọ ẹhụ a, hụn mẹ ẹṅẹnrẹn rị ebẹhụ chanma ụchan, nị ebahụn funni chanzịkwọ achan,

¹¹ eje-emu akpụkpọ-ẹhụ jọgbu enwẹn ẹ rọ, onyẹ nchụn-ẹjan sikọ d'e ku ẹ n'ọ rụ arụ. Ẹlẹzi hụn w'e gi bu ẹ che ụzọ ohu lelemẹzi ẹ, ọ rụgụọlẹ.

¹² “Omẹni emu hụ buru ẹhụ a ile gha isi d'e ru alị, hụn onyẹ nchụn-ẹjan k'a saẹka legha,

¹³ onyẹ nchụn-ẹjan k'e lele ẹ: omẹni emu ahụn a ghagbarịgụọ a ẹhụ ile, o k'e ku ẹ nị onyẹ hụ rị ọchan. Ebe o mẹ ni wẹ ile e nwunmẹgụọ ọhụnma, ya wụnị ọ hụghọ ọchan.

¹⁴ Kanị ogẹn ọwụlẹ ẹhụ onyẹ hụ gi chan, onyẹ hụ a rụ.

¹⁵ Onyẹ nchụn-ẹjan hụn ebẹhụ channị, o ku ẹ nị onyẹ hụ a rụgụọ. Ẹhụ hụ channị rụ arụ; onyẹ hụ bu eje-emu akpụkpọ-ẹhụ.

¹⁶ “Ebẹhụ channị hutọ, nwunmẹ ọhụnma, onyẹ hụ k'e jẹnburu onyẹ nchụn-ẹjan.

¹⁷ Onyẹ nchụn-ẹjan sikọ d'e lele ẹ: omẹni ebe ile te channị e nwunmẹgụọ ọhụnma; onyẹ nchụn-ẹjan sikọ d'e ku ẹ nị onyẹ hụ emu rị a kụ hụ ọchan, hụnyẹ a rị ọchan.

Ẹsusue

¹⁸ “Ihiẹn-ofifi fi ịhịan ẹhụ lagụ,

¹⁹ nị ebẹhụ o te fi ẹ e fun, chan mọbụ gbumẹ runmẹ-runmẹ, o k'e werịrị enwẹn ẹ d'a ghọsị onyẹ nchụn-ẹjan.

²⁰ Onyẹ nchụn-ẹjan k'e lele ẹ: ọ hụn a nị o mighafe akpụkpọ-ẹhụ, nị ẹṅẹnrẹn rịn'a a chanmagụọ ụchan, onyẹ nchụn-ẹjan k'e ku ẹ nị onyẹ hụ a rụgụọ; eje-emu akpụkpọ-ẹhụ jọgbu enwẹn ẹ a pụhagụọ ebẹhụ ihiẹn-ofifi hụ te rị.

²¹ Kanị, omẹni onyẹ nchụn-ẹjan e lelegụọ a, nị ẹṅẹnrẹn ọchan arịa, n'o mighafeni akpụkpọ-ẹhụ lẹni ebẹhụ te channị e nwunmẹgụọ ọhụnma, onyẹ nchụn-ẹjan sikọ d'e bu ẹ che ụzọ ohu akp'ọhịn ẹsa.

²² Ọ bawaye ẹ akpụkpọ-ẹhụ, onyẹ nchụn-ẹjan k'e ku ẹ nị onyẹ ahụn a rụgụọ; eje-emu akpụkpọ-ẹhụ rọ.

²³ Kanị omẹni ya wụ ihiẹn nọkwọ k'ọ nọ, ọ banị, ya wụ nị apa ihiẹn ofifi hụ k'ọ wụhụ, onyẹ nchụn-ẹjan k'e ku ẹ nị onyẹ hụ hụghọ ọchan.

²⁴ “Omẹni ọkụn hụn ịhịan akpụkpọ-ẹhụ, nị ebẹhụ o rẹn ẹ e gbumẹ runmẹ-runmẹ mọbụ chanma,

²⁵ onyẹ nchụn-ẹjan sikọ d'e lele ebẹhụ: omẹni ẹṅẹnrẹn rịn'a e hutọgụọ chanma ụchan, n'o mighafe akpụkpọ-ẹhụ, eje-emu akpụkpọ-ẹhụ wụ ihiẹn hụ gha ebe ọkụn rẹn ẹ pụha. Onyẹ nchụn-ẹjan k'e ku ẹ nị onyẹ hụ a rụgụọ; eje-emu akpụkpọ-ẹhụ jọgbu enwẹn ẹ rọ.

²⁶ Kanị onyẹ nchụn-ẹjan lele ẹ, nị ẹṅẹnrẹn ọchan arị ebẹhụ, n'o mighafeni akpụkpọ ẹhụ lẹni o nwunmẹgụọ ọhụnma, ya wụ nị onyẹ nchụn-ẹjan k'e bu ẹ che ụzọ ohu ọrọgbọ akp'ọhịn ẹsa.

²⁷ Nke akp'ọhịn ẹsa onyẹ nchụn-ẹjan e lele ẹ: omẹni ọ hụ a bawaye, onyẹ nchụn-ẹjan jẹnkọ d'e ku ẹ nị onyẹ ahụn a rụgụọ; eje-emu akpụkpọ-ẹhụ rọ.

²⁸ Kanị omẹni ebẹhụ ehutọnị, ọ bawayeni, nị ọ hụzịkwọ e nwun ọhụnma, ịya wụ nị ọkụn ahụn hụnn'a haịn ebẹhụ gi fun. Onyẹ nchụn-ẹjan jẹnkọ d'e ku ẹ nị onyẹ hụ rị ọchan; apa ọkụn ahụn k'ọ wụhụ.

²⁹ “Omẹni o nwọn ebe channị isi mọbụ agban okẹnnyẹ mọbụ okpoho,

³⁰ onyẹ nchụn-ẹjan sikọ d'e lele ẹ: omẹni o mighafe akpụkpọ-ẹhụ, nị ntutu mọbụ ẹtu rịn'a rị e nwun anwụn-anwụn, mẹ wiri-wiri, onyẹ nchụn-ẹjan k'e ku ẹ nị onyẹ ahụn a rụgụọ; emu-ụkọ rọ, eje-emu kẹ onyẹ ahụn bu isi mọbụ agban.

³¹ “Kanị onyẹ nchụn-ẹjan lele ebẹhụ channị, hụn a nị o mighafeni akpụkpọ-ẹhụ, onwọnzikwọnị ntutu ogi rịn'a, onyẹ nchụn-ẹjan hụ k'e bu onyẹ ahụn che ụzọ ohu akp'ọhịn ẹsa.

³² Nke akp'ọhịn ẹsa, onyẹ nchụn-ẹjan hụ e lele ebẹhụ: omẹni ọ bawayeni, nị ntutu mọbụ ẹtu rị e nwun anwụn-anwụn arịa lẹni o mighafeni akpụkpọ-ẹhụ,

³³ onyẹ ahụn k'a kpụnrịrị ntutu ẹ mọbụ kọpụ ẹtu ẹ, latọ ebe nsọngbu hụ rị. Onyẹ nchụn-ẹjan e bugụzị a che ụzọ ohu akp'ọhịn ẹsa ọzọ.

³⁴ Nke akpọhịn ẹsa onyẹ nchụn-ẹjan e lele ebẹhụ, omẹni ọ bawayeni, o mighafeni akpụkpọ-ẹhụ, onyẹ nchụn-ẹjan hụ sikọ d'e ku ẹ nị onyẹ ahụn hụghọ ọchan. Onyẹ ahụn k'a sụrịrị ẹkwa a. Ọ sụgụ a, ọ rị ọchan.

³⁵ “Kanị, ọ bawaye akpụkpọ-ẹhụ ahụn, ebe onyẹ nchụn-ẹjan kugụ n'ọ hụghọ ọchan,

³⁶ onyẹ nchụn-ẹjan sikọ d'e lele ẹ: omẹni ọ bawaye abawaye, ẹlẹzi hụn onyẹ nchụn-ẹjan e gi chọmazị ntutu mọbụ ẹtu rị e nwun anwụn-anwụn; onyẹ hụ a rụgụọ.

³⁷ Omẹzikwọnị, ẹnya onyẹ nchụn-ẹjan, nị ọ nọkwọ k'ọ nọ, nị ntutu ogi e rupụhagụọ ebẹhụ, ya wụ nị emu-ụkọ hụ a lagụọ, hụnyẹ hụghọ nwan ọchan; onyẹ nchụn-ẹjan sikọ d'e ku ẹ n'ọ hụghọ ọchan.

³⁸ “Omẹni ẹkpụkpa channị pụha okẹnnyẹ mọbụ okpoho akpụkpọ-ẹhụ,

³⁹ onyẹ nchụn-ẹjan sikọ d'e lele wẹ: omẹni ẹkpụkpa hụ achankanị, onwọnni ihiẹn ẹkpụkpa hụ k'e mẹ onyẹ hụ, makẹni ẹkpụkpa pụhahụ akpụkpọ-ẹhụ rọ; onyẹ ahụn rị ọchan.

⁴⁰ “Ntutu ịhịan wiripụ, han a gbe akpan, onyẹ hụ hụghọ ọchan.

⁴¹ Omẹni ntutu rị a ibe ihun wiripụ, han a gbe akpan ogbogbo ihun, ọ hụghọ ọchan.

⁴² Kanị omẹni o nwọnghọ ebe rị e gbu runmẹ-runmẹ ebẹhụ isi ẹ gbe akpan mọbụ ogbogbo ihun, eje-emu jọgbu enwẹn ẹ a pụhagụọ a isi mọbụ ogbogbo ihun.

⁴³ Onyẹ nchụn-ẹjan k'e lele ẹ: omẹni ebẹhụ fun isi ẹ mọbụ ogbogbo ihun ẹ rị e gbu runmẹ-runmẹ nọkẹ eje-emu akpụkpọ-ẹhụ,

⁴⁴ ya wụ nị onyẹ hụ bu emu; ọ rụ arụ. Onyẹ nchụn-ẹjan sikọ d'e ku ẹ n'ọ rụgụọ makẹ ebẹhụ channị isi ẹ.

⁴⁵ “Onyẹ bu eje-emu akpụkpọ-ẹhụ k'e yirirịrị nkanka ẹkwa, na isi ẹ tọ ya-ya-ya, kpumẹ ihun — gha imi lụa alị, e yi ‘Onyẹ rụnị rọ! Onyẹ rụnị rọ!’

⁴⁶ Mmanị emu ahụn la ala, onyẹ hụ rụkwọ arụ. Ịya sụọ k'e biri; o bikọ ebe ịhịan ile bi.

Ẹka W'e Gi Sọn Ihiẹn Kun Mbu

⁴⁷ “Omẹni ẹwuru kun mbu, ẹwuru oruru-mmaka mọbụ ẹwuru linẹni,

⁴⁸ mọbụ ihiẹn ọzọ ọwụlẹ wẹ gi linẹni mọbụ oruru-mmaka kpa mọbụ tụ mọbụ akpụkpọ ọwụlẹ mọbụ ihiẹn ọwụlẹ wẹ gi akpụkpọ mẹmẹ,

⁴⁹ omẹni ẹkwa hụ mọbụ akpụkpọ hụ mọbụ ihiẹn hụ wẹ kpa mọbụ tụ mọbụ ihiẹn ọwụlẹ wẹ gi akpụkpọ mẹmẹ kun mbu rị e nwun ẹhụhụọ-oyiyi ẹhụhụọ-oyiyi mọbụ ẹdeke-ẹdeke, ya wụnị eje-mbu rọ; wẹ k'a ghọsịrịrị onyẹ nchụn-ẹjan ya.

⁵⁰ “Onyẹ nchụn-ẹjan sikọ d'e lele ihiẹn hụ kun mbu, bu ẹ che ụsụọ akp'ọhịn ẹsa.

⁵¹ Nke akpọhịn ẹsa o lele ẹ, omẹni mbu ahụn a bawayegụọ elu ẹkwa hụ mọbụ ihiẹn hụ wẹ kpa mọbụ tụ mọbụ akpụkpọ mọbụ ihiẹn ọwụlẹ wẹ gi akpụkpọ mẹmẹ, ya wụ nị eje-mbu jọgbu enwẹn ẹ rọ; ihiẹn hụ ọ ban a rụgụọ.

⁵² Onyẹ nchụn-ẹjan k'a dụnrịrị ihiẹn hụ ọkụn — ẹkwa mọbụ ihiẹn hụ wẹ gi oruru-mmaka mọbụ linẹni kpa mọbụ tụ mọbụ ihiẹn hụ wẹ gi akpụkpọ mẹmẹ — makẹni eje-mbu jọgbu enwẹn ẹ rọ; wẹ k'a dụnrịrị ihiẹn hụ ọ ban ọkụn.

⁵³ “Kanị, omẹni ogẹn onyẹ nchụn-ẹjan gi lele ẹ nị mbu ahụn abawayeni ẹkwa hụ mọbụ ihiẹn hụ wẹ kpa mọbụ tụ mọbụ hụn wẹ gi akpụkpọ mẹmẹ,

⁵⁴ o sikọ d'a sị wẹ chan mọbụ sụ ihiẹn hụ kun mbu; o buzi ẹ che ụzọ ohu akp'ọhịn ẹsa.

⁵⁵ Wẹ sụgụ nwan mọbụ changụ ihiẹn hụ kun mbu, onyẹ nchụn-ẹjan sikọ d'e lele ẹ: omẹni mbu hụ rịkwọ k'ọ rị mbụ, ọsụọn'a ọ bawayeni, ya wụ ọ rụgụọ. Dụn a ọkụn, ọ sụọn'a azụụn ohu sụọ kun mbu hụ.

⁵⁶ Kanị, omẹni ogẹn onyẹ nchụn-ẹjan gi lelezi ẹ hụnnị wẹ sụgụ a mọbụ changụ a, nị mbu ahụn a pụgụọ, o k'a dọkapụ ebe hụn kun mbu ẹkwa hụ mọbụ ihiẹn hụ wẹ gi akpụkpọ mẹmẹ mọbụ ihiẹn hụ wẹ kpa mọbụ tụ.

⁵⁷ O mẹzikwọ nị mbu hụ a pụhazị ẹkwa hụ mọbụ ihiẹn hụ wẹ kpa mọbụ tụ mọbụ ihiẹn hụ wẹ gi akpụkpọ mẹmẹ, ya wụnị ọ rị a bawaye, wẹ k'a dụnpụ ihiẹn ọwụlẹ kun ụdị mbuni ọkụn.

⁵⁸ Wẹ sụgụ ẹkwa hụ mọbụ ihiẹn hụ wẹ kpa mọbụ tụ mọbụ ihiẹn hụ wẹ gi akpụkpọ mẹmẹ, nị mbu hụ a pụgụ; wẹ sikọ d'a sụdọnzi ẹ, ọ rị ọchan.”

⁵⁹ Ịya wụ iwu wẹ gi e sọn ihiẹn kun mbu omẹni ẹkwa oruru-mmaka mọbụ nke linẹni mọbụ ihiẹn wẹ kpa mọbụ tụ mọbụ ihiẹn ọwụlẹ wẹ gi akpụkpọ mẹmẹ rọ; iwu ndịnị kẹ wẹ gi e ku nị wẹ rị ọchan mọbụ nị a rụgụọ wẹ.