Lẹvitikọsụ 12 - Ika

Isi Nke Mmẹbụọ Kẹ Onyẹ Mụ Nwa Dọn A Rịzị Ọchan

¹ Osolobuẹ sị Mozizi,

² “Sị ndị Izrẹlụ: Okpoho tụ imẹ, mụ nwa-okẹnnyẹ, o k'a rụ ọrọgbọ akp'ọhịn ẹsa, k'o dọn a rụ ọ gha a sọ ezi.

³ Nke akp'ọhịn ẹsatọ a kwa wẹ nwata-okẹnnyẹ hụ ugun,

⁴ okpoho ahụn a nọdịgụzị akp'ọhịn mmẹtọ kwasị ọgụn wẹ gi e dọn ẹ nsọ makẹ ihiẹn rị a gban'a yeni ọmụmụ nwa. O mẹtụkọ ihiẹn ọwụlẹ rị nsọ ẹka ogẹn ahụn, ọ bankọ ụlọ-ofufe d'e runi ogẹn ahụn wẹ gi rị e dọn ẹ nsọ e zu.

⁵ “Omẹni okpoho k'ọ mụ, o k'a rụ ọrọgbọ izuka ẹbụọ, k'o dọn a rụ ọ gha a sọ ezi, ọ nọdịgụzị akp'ọhịn isin kwasị ọgụn-ẹtọ wẹ gi e dọn ẹ nsọ makẹ ihiẹn gban'a yeni ọmụmụ nwa.

⁶ “Ogẹn wẹ gi e dọn okpoho mụ nwa-okẹnnyẹ mọbụ nwa okpoho nsọ zugụ, o sikọ d'e weri nwa atụnrụn ahụa ohu o k'e gi chụn ẹjan w'a dụn ọkụn lẹ nwa oluikuku mọbụ nduru o k'e gi chụn ẹjan-njọ, we ẹ jẹnni onyẹ nchụn-ẹjan ọnụ-mgbọn Ọdụ-ozuzu.

⁷ Onyẹ nchụn-ẹjan k'e gi wẹ chụnn'a ẹjan ihun Osolobuẹ, gi ẹ gbarị isi ẹ, ọ wụbehi onyẹ rụnị yeni ihiẹn gban'a. “Ịya wụ iwu rịnị okpoho mụ nwa-okẹnnyẹ mọbụ nwa okpoho.

⁸ “Omẹni mbụọ a e puni atụnrụn, o wẹhẹ nduri ẹbụọ mọbụ ụmụ oluikuku ẹbụọ: wẹ gi ohu chụn ẹjan w'a dụn ọkụn, e gi wẹ hụn ẹbọ chụn ẹjan-njọ. Ẹrịra kẹ onyẹ nchụn-ẹjan k'a dọn gbarị isi okpoho hụ, ọ rị ọchan.”