Lẹvitikọsụ 11 - Ika

Isi Nke Mmanaị Ihiẹn-oriri Rụnị Lẹ Hụn Rị Ọchan Anụ A Kpa Alị

¹ Osolobuẹ sị Mozizi lẹ Ẹrọnụ,

² “Sị nị ndị Izrẹlụ: Imẹ anụmanụ ile a kpa alị, ụnụ nwọn ikẹn ri ndịnị:

³ Ụnụ nwọn ikẹn ri anụ ọwụlẹ akpụkụ a wabechanrịn, hụn e rizi ọnụ.

⁴ “O nwọn ndị e ri ọnụ kanị akpụkụ wẹ awabechanrịnnị, o nwọnzikwọ ndị ụkụ-alị wẹ wabechanrịn kanị w'a ri ọnụ: erilẹ ni anyịnyan-mkpukpuke wụ kamẹlụ, ọsụọn'a n'o ri ọnụ eri, akpụkụ a awabeni: ya wụrụnị ụnụ ihiẹn rụnị.

⁵ Erilẹ ni ẹlẹtu-ọmụma: ọsụọn'a n'o ri ọnụ eri, ụkụ-alị a awabeni; ya wụrụnị ụnụ ihiẹn rụnị.

⁶ Ọsụọn'a nị oke-ebo e ri ọnụ eri, akpụkụ a awabeni: ya wụrụ nị ụnụ ihiẹn rụnị.

⁷ Nke ezin, ọsụọn'a nị ụkụ-alị a wabechanrịn awabe, ara ri ọnụ; ya wụrụnị ụnụ ihiẹn rụnị.

⁸ Erikwọlẹ ni anụ wẹ mọbụ mẹtụ ozun wẹ ẹka. Wẹ wụrụnị ụnụ ihiẹn rụnị.

Anụ Rị Imẹ Mirin

⁹ “Imẹ anụ ile rị imẹ mirin, ụnụ nwọn ikẹn ri ndịnị: ndị ile ẹzuzu azụn gi e gu mirin lẹ okpukpu rị ẹhụ, kẹ ndị rị imẹ ohimin kẹ ndị rịsọnmẹ iyi.

¹⁰ Ka a sọ nị anụ ile rị imẹ ohimin lẹ iyi hụn nwọnlẹni ẹzuzu azụn gi e gu mirin lẹ okpukpu, ọ sụọn'a azụụn ndị e dọn ọtụtụ imẹ mirin mọbụ anụ ndị ọzọ rị imẹ mirin rọ.

¹¹ Ebe o mẹni anụ ụnụ jẹnkọ d'a sọ kẹ wẹ wụ, erikwọlẹ ni anụ wẹ; a sọ nị ozun wẹ.

¹² Sọ nị ihiẹn ọwụlẹ bi imẹ mirin hụn nwọnlẹni kẹ ẹzuzu azụn gi e gu mirin kẹ okpukpu.

Nnụnụ

¹³ “Nnụnụ ndịnị kẹ ụnụ jẹnkọ d'a gha a sọ, erikwọlẹ ni wẹ, makẹni ihiẹn w'a sọ kẹ wẹ wụ: ugọn, udele, udele-ogi,

¹⁴ egbe-ufie, ụdị egbe-ogi ọwụlẹ,

¹⁵ ụdị uroko ile,

¹⁶ ozuzu pu-mpịn, ozuzu e wo okẹn owuwo, gọlụ-ohimin, ụdị egbe ọwụlẹ,

¹⁷ ozuzu nta, ọdọgụnma e feni, ozuzu uku,

¹⁸ ozuzu ọchan, ozuzu atụ, egbe e gbu azụn,

¹⁹ stọkụ ọnụ-ngugu, stọkụ-hẹrọnụ, hupo ugbele-isi ẹ sueshi azụụn lẹ ụsụ.

²⁰ “Sọ nị otutu ile e feni hụn gizi ụkụ ẹnọ e jẹn —

²¹ kanị, o nwọnghọ otutu nwọn ugbele gi ụkụ ẹnọ e jẹn ụnụ k'a saẹka ri: ndị hụn ụkụ wẹ nwọnsọnmẹ okẹn wẹ gi a tụhunmẹ alị.

²² Imẹ wẹ, ụnụ nwọn ikẹn rị ụdị igurube ọwụlẹ, kpamkpam-katididi, ẹbụzụn lẹ kpamkpam-mmaka.

²³ Ka sọ nị ihiẹn ndị ọzọ ile nwọn nku mọbụ ugbele hụn nwọnzi ụkụ ẹnọ.

²⁴ “Lezi ni ndịnị — ụnụ mẹ wẹ, ụnụ e mẹrụ enwẹn ụnụ: onyẹ mẹtụ ozun wẹ ẹka k'a rụ d'e ru ogẹn ẹnyasị;

²⁵ onyẹ bu ozun hụn ọwụlẹ imẹ wẹ k'a sụrịrị ẹkwa a; o k'a rụzịkwọ d'e ru ogẹn ẹnyasị.

²⁶ “Anụ ọwụlẹ ọb'ụkụ a wabe bụ ọ wabechanrịnnị mọbụ hụn ghalẹni e ri ọnụ ya wụrụnị ụnụ ihiẹn rụnị; onyẹ ọwụlẹ ẹhụ a mẹtụ ozun hụn ọwụlẹ imẹ wẹ a rụgụọ.

²⁷ Imẹ anụ ile gichanrịn ụkụ ẹnọ e jẹn, ndị hụn ọb'ụkụ wẹ nọ kẹ nke ologbo wẹ wụrụnị ụnụ ihiẹn rụnị; onyẹ hụn mẹtụ ozun wẹ ẹka k'a rụ d'e ru ogẹn ẹnyasị.

²⁸ Onyẹ bu ozun wẹ k'a sụrịrị ẹkwa a; o k'a rụzịkwọ d'e ru ogẹn ẹnyasị. Wẹ wụrụnị ụnụ ihiẹn rụnị.

²⁹ “Imẹ anụ ile a kpa alị, ndịnị k'a wụrụnị ụnụ ihiẹn rụnị: ẹlẹtu-wizulu, ọgwọ, ụdị ngwẹnrẹn-uku ọwụlẹ,

³⁰ ochụlọ, uro, ngwẹnrẹn mmaka, oyibuu, ogumagada.

³¹ Imẹ anụ ile ẹfọ wẹ ru alị, uwẹ k'a wụrụnị ụnụ ndị rụnị. Onyẹ ọwụlẹ ẹhụ a mẹtụ wẹ ebe wẹ nwụnhụngụ k'a rụ d'e ru ogẹn ẹnyasị.

³² Wẹ nwụnhụngụ, ihiẹn ọwụlẹ wẹ dankwasị a rụgụọ, kẹ osisi kẹ wẹ gi mẹmẹ ihiẹn hụ kẹ ẹkwa kẹ akpụkpọ-anụ kẹ ẹkwa wẹ gi a kwan ịhịan. Ihiẹn ọwụlẹ ọ wụ, bu n'ẹ che imẹ mirin; o k'a rụ d'e ru ogẹn ẹnyasị o kebe rị ọchan.

³³ Omẹni hụn ọwụlẹ imẹ wẹ danban imẹ ite-ụrụa ihiẹn rị imẹ ite ahụn a rụgụọ; ụnụ k'e tikpọrịrị ite hụ.

³⁴ Mirin gha imẹ ite ahụn pụha banọlẹ ihiẹn ọwụlẹ w'e ri, ihiẹn-oriri hụ a rụgụọ; o mẹtụ ihiẹn ọwụlẹ w'a ra hụn rị imẹ ihiẹn, ihiẹn hụ wẹ a ra a rụọlẹ.

³⁵ Ihiẹn ọwụlẹ ozun wẹ dankwasị a rụọlẹ; omẹni ẹnya-mgba mọbụ ẹnya-ọkụn ọzọ rọ, wẹ k'e tikpọrịrị a. Wẹ rụ a rụ; wẹ wụrụnị ụnụ ihiẹn rụnị.

³⁶ Kanị, omẹni isi-mirin mọbụ ọmị rọ, ọ hụkwọ ọchan, kanị ihiẹn ọzọ ọwụlẹ hụarị ozun wẹ a rụgụọ.

³⁷ “Ozun dankwasị ihiẹn ọwụlẹ wẹ sikọ d'a kụn, ihiẹn hụ arụnị.

³⁸ Kanị, ozun dankwasị ihiẹn hụ wẹ k'a kụn ebe wẹ mẹyegụ a mirin, ya wụrụnị ụnụ ihiẹn rụnị.

³⁹ “Omẹni anụ m sị ụnụ e ri a nwụnhụn, onyẹ ọwụlẹ ẹhụ a mẹtụ ozun ẹ k'a rụ d'e ru ogẹn ẹnyasị.

⁴⁰ “Onyẹ ọwụlẹ ri anụ hụ nwụnhụnnị k'a sụrịrị ẹkwa a; o k'a rụ d'e ru ogẹn ẹnyasị.

⁴¹ “Anụ ọwụlẹ a rịhunmẹ alị wụ ihiẹn w'a sọ; w'e rilẹ ẹ.

⁴² Erikwọlẹ ni ihiẹn ọwụlẹ e gi ẹfọ a kpụn alị mọbụ hụn gi ụkụ ẹnọ lẹ ẹfọ e jẹn mọbụ hụn gi ụkụ bu ọda e jẹn; anụ w'a sọ rọ.

⁴³ Egikwọlẹ ni hụn ọwụlẹ imẹ anụ ndịnị mẹrụ enwẹn ụnụ. Egilẹ ni wẹ mẹrụ enwẹn ụnụ; anịlẹ ni wẹ gi wẹ mẹrụ ụnụ.

⁴⁴ Mmẹ wụ Osolobuẹ hụn wụ Chuku ụnụ; dọnmẹ ni nwan enwẹn ụnụ ichẹn, a rị nị nsọ, makẹni m rị nsọ. Egikwọlẹ ni ihiẹn ọwụlẹ a rịhunmẹ alị mẹrụ enwẹn ụnụ.

⁴⁵ Mmẹ wụ Osolobuẹ hụn gha alị Ijiptu wepụha ụnụ kẹni m hụn ụzọ wụrụ Chuku ụnụ e fe; rịnị nwan nsọ makẹni m rị nsọ.

⁴⁶ “Ọnwan wụ iwu rị anụ lẹ nnụnụ lẹ ihiẹn ile a kpa imẹ mirin lẹ ihiẹn ile a rịhunmẹ alị.

⁴⁷ Ụnụ k'a ghọsịrịrị nị ihiẹn rị ichẹn rị ẹgbata ihiẹn rụnị lẹ hụn rị ọchan, ẹgbata anụ m sị ụnụ e ri lẹ hụn m sị ụnụ erilẹ.”