Lẹvitikọsụ 10 - Ika

Isi Nke Iri Kẹ Nadabụ Lẹ Abihu Dọn Nwụnhụn

¹ Ụmụ Ẹrọnụ ikẹnnyẹ ẹbụọ wụ Nadabụ lẹ Abihu werisọnmẹ mkpu wẹ gi a mụ nsẹnsi, bu ọkụn che ẹ, kpọn nsẹnsi che ẹ; ya wẹ nọ mụyeni Osolobuẹ ọkụn ọ gwalẹni wẹ mụye.

² Ya ọkụn nọ gha ebe Osolobuẹ rị pụha d'a dụngbu wẹ, wẹ nọ nwụntọ ihun Osolobuẹ.

³ Mozizi nọ sị Ẹrọnụ, “Ọnwan wụ ihiẹn ahụn Osolobuẹ ku ogẹn o gi sị; ‘M k'e gi ndị a nọkunmẹni m ghọsị nị m rị nsọ; m k'a hụn a nị ịhịan ile e ye m ọghọ m.’ ” Ẹrọnụ ekuni oku.

⁴ Mozizi nọ kpọ Mishẹlụ lẹ Ẹl'zafanị, ụmụ Uziẹlụ nwẹnẹ nẹdi Ẹrọnụ, sị wẹ, “Bịa nị ebeni; bupụ nị umunẹ ụnụ ebeni ịhịan ile ziẹntọ lẹ ihun Ọdụ-ozuzu ebeni.”

⁵ Ya wẹ nọ buru wẹ, wẹ lẹ ẹwuru ọrụn nchụn-ẹjan wẹ tueghafe mkpụkụ wẹ yi, gha ebẹhụ ndị Izrẹlụ ziẹntọ bupụ wẹ kẹ Mozizi dọn ku.

⁶ Mozizi nọ sị Ẹrọnụ lẹ ụmụ Ẹrọnụ wụ Ẹliẹza lẹ Itama, “Ahapụkwọlẹ ni isi ụnụ ya-ya-ya nị ụnụ rị a kwan ndị hụ Osolobuẹ gi ọkụn dụngbu mọbụ dọka ẹkwa ụnụ, amamgbe ụnụ a nwụnhụn, ize ndị Izrẹlụ ile a ban Osolobuẹ. Kanị, umunẹ ụnụ, ikpụnọ Izrẹlụ ile, nwọn ikẹn kwan ndị hụ Osolobuẹ gi ọkụn dụngbu.

⁷ Aghakwọlẹ ni ọnụmụzọ Ọdụ-ozuzu pụ, makẹni ụnụ mẹ ẹ, ụnụ a nwụnhụn, makẹni udẹn Osolobuẹ rị ụnụ isi.” Ya wẹ nọ mẹ kẹ Mozizi dọn ku.

⁸ Osolobuẹ nọ sị Ẹrọnụ,

⁹ “Ogẹn ọwụlẹ ịyụ lẹ ụmụ ị jẹnkọ d'a banye imẹ Ọdụ-ozuzu, arakwọlẹ ni manya mọbụ ihiẹn ọwụlẹ wẹ bama abama, amamgbe ụnụ a nwụn. Ọnwan wụ iwu ụnụ k'e dọnmẹferi agbọ ile lalanị.

¹⁰ Ụnụ k'a gharịrị a ghọsị nị ihiẹn rị ichẹn rị ẹgbata ihiẹn rị nsọ lẹ ihiẹn mmakalaka, ẹgbata ihiẹn rụnị lẹ ihiẹn rị ọchan

¹¹ Ụnụ k'a kuzirịrị ndị Izrẹlụ iwu ile Osolobuẹ gha ọnụ Mozizi ye wẹ.”

¹² Mozizi nọ sị Ẹrọnụ lẹ ụmụ a ikẹnnyẹ họdụnị wụ Ẹliẹza lẹ Itama, “Weri ni hụn họdụnị imẹ ẹjan-ọka hụ wẹ gi ọkụn ye Osolobuẹ d'e ri; makẹni ọ rịkẹnmẹkẹ nsọ, nọ nị ụsụọ ukpo nchụn-ẹjan shi ẹ; ebuchelẹ n'ẹ yisti.

¹³ Nọ nị ebe rị nsọ ri e, makẹni ịya wụ ihiẹn ru yụ lẹ ụmụ ị ikẹnnyẹ imẹ ẹjan wẹ gi ọkụn chụnyeni Osolobuẹ, makẹni ẹrịra kẹ Osolobuẹ gwa m.

¹⁴ Kanị ịyụ lẹ ezi-lẹ-ụlọ ị nwọn ikẹn ri ẹran ahụn wẹ finfin lẹ ọrụ anụ ahụn wẹ gi a kwadọn ọrụn Osolobuẹ. Nọ nị ebe rị ọchan ri wẹ. Osolobuẹ e wegụọ wẹ ye ịyụ lẹ ụmụ ị ikẹnnyẹ lẹ ikpoho n'ọ wụrụ hụn ru ụnụ ẹka imẹ ẹjan-ekele ndị Izrẹlụ.

¹⁵ Wẹ k'e weri ọrụ a wẹ gi a kwadọn ọrụn Osolobuẹ imẹ ẹjan wẹ gi ọkụn ye lẹ ẹran a hụ wẹ finfin lẹ ụtọrọ a, finfin ihun Osolobuẹ, n'ọ wụrụ ẹjan wẹ finfin, ọ wụrụ nke yụ lẹ ụmụ ị; hụn e ru ụnụ ẹka rọ jẹnrin ejẹn, kẹ Osolobuẹ dọn ku.”

¹⁶ Ogẹn Mozizi gi jụ ukwere ewu wẹ gi chụn ẹjan-njọ, hụn a nị a dụnpụgụọ w'a ọkụn, ọ nọ sọn Ẹliẹza lẹ Itama ụmụ ikẹnnyẹ Ẹrọnụ hụ họdụnị, kpemẹ, sị,

¹⁷ “Kị haịn ụnụ gilẹni ri anụ ẹjan-njọ hụ wẹ sị ụnụ e ri imẹ Ọdụ-ozuzu. Ọ rịkẹnmẹkẹ nsọ; Osolobuẹ ye ụnụ ya n'ọ wụrụ ihiẹn ụnụ gi e wepụnị ndị Izrẹlụ ikpe-ọmụma, a gbarị isi wẹ ebe Osolobuẹ rị.

¹⁸ Ebe o mẹni ẹjan wẹ webanlẹni ẹdeke ẹ imẹ Ebe Kachanrịn Nsọ rọ, nkẹ ụnụ e ri ewu hụ wẹ sị ụnụ e ri imẹ Ọdụ-ozuzu — kẹ m dọn gwa ụnụ.”

¹⁹ Ẹrọnụ nọ sị Mozizi, “A chụn wẹ ẹjan-njọ lẹ ẹjan wẹ a dụn ọkụn hụn wẹ chụn tannị, ihiẹn nọ ẹnịna e mẹ m. Nkẹ ọ sụọ Osolobuẹ m ri anụ ẹjan-njọ tannị?”

²⁰ Ogẹn Mozizi gi nụ ọnwan, ẹfọ nọ jun ẹ.