Juwẹlụ 3 - Ika

Isi Nke Ẹtọ Osolobuẹ K'e Mẹshi Alị Ndị-ọzọ Ikẹn

¹ “Osolobuẹ sị: Ogẹn ahụn, m mẹgụ n'ọ rịzị nị Juda lẹ Jerusalẹm mma,

² m k'e wegbama alị ile, e wẹhẹ m wẹ Ọdanmgbugbu Jehoshẹfatị, nọ ebahụn hangbu wẹ eṅẹn yeni ihiẹn ile wẹ mẹ ndị nke m, hụn wụ ukuu m: e kpọnyịyagụọ wẹ Izrẹlụ ye alị ndị-ọzọ, keri alị m;

³ a tụgụọ wẹ mkpọ keri ndị nke m, gi ụmụẹka ikẹnnyẹ wẹ kụ ụgwọ ịgbaraja, gi ịgbagba wẹ ṅọnrin manya ra.

Ọdanmgbugbu Okinkin-ikpe

⁴ “Elee hụn biri mmẹ lẹ ụnụ, alị Taya-lẹ-Sidọnụ lẹ alị ile rị ẹgbẹrẹ alị Filistia? Mmẹgwarị kẹ ụnụ rịdẹ a chọ nị ụnụ mẹgwarị m ra? Omẹni mmẹgwarị rọ, m k'e hu ihiẹn ụnụ rị e mẹ kpu ụnụ isi; m k'e mẹ ẹ, mẹ ẹ ozigbo-ozigbo!

⁵ “Ụnụ e werigụọ siliva m lẹ goru m, kwarịsọnmẹ ihiẹn bu ọda rị mkpa m butọ, bushi ụlọ-mmọn lẹ ọgwa ụnụ rị ichẹn-ichẹn.

⁶ Ụnụ e regụọ ndị alị Juda lẹ ndị bi Jerusalẹm ye ndị Griki — kẹni ụnụ wepụ wẹ alị wẹ, we wẹ shi ebe teni.

⁷ Kanị, m jẹnkọ nwan d'a kpọli wẹ, mẹ wẹ gha ebe ile ụnụ rejẹn wẹ pụ; m k'e mẹ ụnụ nwẹn gi isi buru ihiẹn ụnụ mẹ.

⁸ M k'e re ụmụ ụnụ ikẹnnyẹ lẹ ikpoho ye ndị Juda, ndị Juda e re wẹ ye ndị alị Sabia tegbu enwẹn ẹ. Mmẹ wụ Osolobuẹ e kuọl'a.

⁹ Manị nị alị ndị ọzọ ile ọkwanị: Kwademẹ ni agha! Kpọli ni ndị agha ụnụ! Ndị agha ile wẹ gbakikomẹ, pụha d'a lụ agha!

¹⁰ Gi ni ọpịa-ọka ụnụ kpụrụ ọpịa-agha; gi ni ẹbeke ụnụ gi e befọn vaịnị kpụrụ obo. Onyẹ zelẹni ya sị enwẹn ẹ, ‘E zeghọ m!’

¹¹ Ndị alị ile rị ebe ile, pụha nị ozigbo! Gbakikomẹ ni imẹ Ọdanmgbugbu Hụ!! “Osolobuẹ, kịpụha nwan ndị-agha ị d'a lụsọn wẹ agha!

¹² Alị ile wẹ kọnrin; wẹ shi Ọdanmgbugbu Jehoshẹfatị makẹni, ebẹhụ kẹ m k'a nọ kin alị ile rị ebe ile ikpe.

¹³ Fe ọpịa ye betu wẹ nọkẹ ọka kagụnị, n'o rugụọ! D'a sụ wẹ kẹ ẹkụ jun odo, d'e ru nị ofigbọn e huru — makẹni njọ wẹ a karị ẹka!”

¹⁴ Lee igunrun-igunrun jun Ọdanmgbugbu okinkin-ikpe e che, makẹni o rumẹgụọ ụhụọhịn Osolobuẹ k'e mẹ ịhịan ihiẹn imẹ Ọdanmgbugbu okinkin-ikpe —

¹⁵ ifọn lẹ ẹnyanwụn k'a gba ishi; kokisẹ e tikọzị.

Osolobuẹ K'e Mẹgwarịnị Ndị Nke Ẹ

¹⁶ Olu Osolobuẹ k'a gha Ugu Zayọnụ hanpụha kẹ olu ẹwọrọ rị e dẹnni; olu ẹ k'a gha Jerusalẹm hanpụha kẹ akpara (akpabọ). Elu-igwee lẹ ụwa k'e mẹhunmẹ. Kanị Osolobuẹ lẹ enwẹn ẹ k'e che ndị nke ẹ nche, ebe ndị Izrẹlụ a gbaban.

¹⁷ Ogẹn hụ, ụnụ a marịn nị mmẹ, Osolobuẹ hụn wụ Chuku ụnụ, bi Ugu Zayọnụ, ugu nsọ m. Jerusalẹm k'a wụ obodo rị nsọ, abịamabịa emẹrikọzị a.

¹⁸ O ru ogẹn ahụn, ugu ndịnị k'e ye manya vaịnị ọda-ọda; elu-òke ndịnị e ye mirin-ẹran efin ọda-ọda mirin k'e jun iyi ile rị alị Juda; Isi-mirin k'a rị Ụlọ Osolobuẹ hụn mirin ẹ k'a gha e hupụha, a gba Ọdanmgbugbu Shitim mirin.

¹⁹ “Ijiptu k'a gba okpokoro, Ẹdọm a gba okpokoro nọkẹ atụ makẹni wẹ maye ndị alị Juda ọgụn, nọ alị Juda gbu ndị nwọnlẹni ihiẹn wẹ mẹ wẹ.

²⁰ Kanị ịhịan k'e biferi imẹ Juda; ịhịan k'e bi imẹ Jerusalẹm jẹnrin ejẹn.

²¹ M k'a gbagharị wẹ ogbugbu wẹ gbu hụn m kelẹni gbagharị wẹ; makẹni imẹ Zayọnụ kẹ mmẹ wụ Osolobuẹ bi!”