Juwẹlụ 2 - Ika

Isi Nke Ẹbụọ Ụhụọhịn Osolobuẹ K'a Ghọsị Iwe Rị A Obi

¹ Gbu ni opi elu ugu Zayọnụ! Nọ nị elu Ugu nsọ m hị ndị alị! Ndị ile bi alị Juda wẹ mẹhunmẹ makẹni ụhụọhịn Osolobuẹ e d'e ru.

² Ọhịhị k'a gba ụhụọhịn ahụn, eki e fọnpụkọ; okẹn mirin k'e ru, igwere e gitọ ụhụọhịn ahụn Igunrun ndị-agha bugbu enwẹn ẹ ọda k'a pụha elu ugu ndịnị, ụdị hụn rịtulẹni; ụdị hụn jẹnkọlẹni d'a rịzị.

³ Ihun wẹ, ọkụn hụ e bu e ri, azụụn wẹ, ọkụn hụzị e nwun. Nị wẹ d'a bịa, alị mẹ wokowoko nọkẹ ugbo ahụn rị alị Idẹni, wẹ ghafegụ, o họnrin atụ, ugbo wẹ yi ọkụn; onwọnni akpụ ihiẹn ohu w'a latọ.

⁴ Wẹ lẹ ẹshin e yikẹ; wẹ zụnla kẹ ndị-agha nyinla ẹshin-agha.

⁵ Wẹ zụnla kẹ ụgbọ-ẹshin agha, fetula ugu ndịnị; a han kpata-kpata kẹ ẹfịfịa-ọkpọnkụn ọkụn rị a dụn, wẹ nọ kẹ okẹn igunrun agha jẹnkọ d'a lụma agha.

⁶ Alị ọwụlẹ wẹ ru, egun a tụgbu ndị rịn'a, ndụn a gụ wẹ.

⁷ Wẹ zụnla kẹ ndị odogun agha; e fe mgbọn kẹ ndị-agha wẹ zụn azụn. Wẹ rịsọnmẹ ogele wẹ, w'a ra gha ote wẹ pụ;

⁸ ẹhụ wẹ ara sụntụ nke ibe wẹ, ozigbo-ozigbo kẹ w'e jẹn. Wẹ hụ a sụntu ihiẹn ile te k'e gbọnkin ụzọ, bụ w'a ra gha ogele wẹ pụ.

⁹ A zụnhan wẹ, e fe wẹ mgbọn obodo; a ghasọnmẹ wẹ windo e nyinban imẹ ụlọ rịkẹ ndị ohin.

¹⁰ Wẹ pụha, alị e mẹhunmẹ, igwere e mẹhunmẹ; ẹnyanwụn lẹ ifọn a gba-ishi, kokisẹ e tibehi.

¹¹ Osolobuẹ rị wẹ ihun e gi akpara e ye olu, hụn o gi dukọ ndị-agha a! Ndị-agha ọ kịla ẹlẹ hụn w'a gụn! Igwerigwe hụn e mẹchanrịn ihiẹn ọwụlẹ o ku! Ụhụọhịn Osolobuẹ k'a wụ okẹn ụhụọhịn, o k'a rị egun! Onyẹ k'a saẹka wuzo?

Dọwa Nị Obi Ụnụ, Ẹlẹ Ẹwuru Ụnụ

¹² Kanị Osolobuẹ sị, “Echẹn kẹ oghere rịkwọ nwan! Gichanrịn nị nwan obi ụnụ ile kinhẹn ya lẹ ibu-ọnụ lẹ ẹkwan lẹ ihulụa-isi;

¹³ dọwa nị obi ụnụ, ẹlẹ ẹwuru ụnụ. Kinhẹn ni ebe Osolobuẹ wụ Chuku ụnụ rị; onyẹ ẹfọma lẹ omikẹn k'ọ wụ; ara bukẹnrin olulu; o nwọn ihiẹn-ọsụsụọ ọda-ọda; ọ latọ afụnfụn o te k'e ye ịhịan alatọ.”

¹⁴ Onyẹ ma? Ikẹnkwọ o rohutọ, mẹ omikẹn, gọzidẹ ụnụ — ụnụ a hụn ọka lẹ manya ụnụ e gi ye Osolobuẹ wụ Chuku ụnụ oyiye.

¹⁵ Gbu ni opi imẹ obodo Zayọnụ; kpọye ni ibu-ọnụ rị nsọ; zu ni ọgwa rị nsọ!

¹⁶ Kpọkikomẹ ni ndị alị; dọn ni ndị alị nsọ. Kpọkikomẹ ni ndị ẹgẹdi, ụnụ a kpọkikomẹ ni ụmụẹka kẹ ndị wẹ pa ẹka rị a ra ẹran; Okẹnnyẹ rị a gba ẹkụkwọ ya pụhazịdẹ, nwata ịgbagba rị a gba ẹkụkwọ ya pụhazịkwọ.

¹⁷ Ndị nchụn-ẹjan, ndị ọrụn Osolobuẹ, wẹ kwanma ẹkwan ẹgbata ukpo nchụn-ẹjan lẹ ẹtu-ụlọ Ụnọ-NSỌ! Wẹ sị Osolobuẹ, “Osolobuẹ dodo, mẹ omikẹn ndị nke i! Emẹkwọlẹ ndị nke i wụrụ ihiẹn ẹmụ, ihiẹn ndị alị ọzọ e legberi! Amamgbe alị ndị ọzọ a jụma, ‘Elebe kẹ Chuku wẹ rị?’ ”

Osolobuẹ A Za Wẹ Ekpere

¹⁸ Ẹnya jẹnkọ d'a fụ Osolobuẹ makẹ alị a, o gi ẹ mẹni ndị nke ẹ omikẹn.

¹⁹ Ọ za wẹ, sị, “M zila nị ụnụ ọka lẹ manya lẹ ofigbọn-olivu hụn k'e jun ụnụ ẹfọ; emẹkọzị m ụnụ wụrụ ihiẹn alị ndị ọzọ e legberi.

²⁰ M k'e chụpụ nị ụnụ ndị-agha ahụn gha ẹbamịn-ugu bịa; m k'a chụ wẹ shi atụ, alị ọkpọ-nkụn nwọnlẹni onyẹ bin'ẹ. M k'a chụ ndị rị ihun shi ohimin rị ẹbamịn ọwụwa-ẹnyanwụn, a chụ m ndị rị azụụn shi ohimin rị ẹbamịn ọdịdan-ẹnyanwụn. Ozun wẹ k'e shinja, o k'a ghadẹ imẹ mirin e shinpụha. “Eziẹ, Osolobuẹ e mẹọlẹ okẹn ihiẹn!

²¹ “Euu alị, atụlẹ egun; ka ghọghọma, e nwọn anwịnrịn — makẹni Osolobuẹ e mẹọlẹ okẹn ihiẹn!

²² Anụ rị ọfịa, atụkwọlẹ ni egun makẹni ẹfịfịa-oyiyi ụnụ e ri e suemẹzi! Osisi a mịmagụọzị mkpụrụ kẹ osisi figi kẹ vaịnị a mịmagụọzị mkpụrụ ọda-ọda!

²³ Ẹfọ ya sụọma ụnụ ụsụọ, ndị Zayọnụ; ghọghọma nị makẹ Osolobuẹ wụ Chuku ụnụ, makẹni o yegụọ ụnụ mirin-ahụa gi tụnị ụnụ ụya; o mẹgụọ mirin zue ni ụnụ ọda-ọda, kẹ mirin-ahụa kẹ mirin ikpanzụụn kẹ o dọn e mẹ mbu.

²⁴ Ọka k'e jun ebe ụnụ n'a kụkpọ ọka; manya lẹ ofugbọn-olivu k'e jun ebe ụnụ nọ a pịnpụha wẹ!

²⁵ M k'a kụkin ụnụ ahụa ole hụ igurube ri ihiẹn ụnụ kẹ igurube hụn a kpụnị kẹ hụn a tụnị kẹ hụn ghalẹni e rihọdụ ihiẹn kẹ hụn a janị.

²⁶ Ụnụ k'a hụn ihiẹn-oriri ri ọhụnma-ọhụnma, ẹfọ e jun ụnụ, ụnụ a ja ẹfan Osolobuẹ wụ Chuku ụnụ mma, onyẹ hụn rụn nị ụnụ okẹn ọrụn atụmẹnya. Onwọnzini ogẹn ụya e gi ri ndị nke m.

²⁷ Ogẹn ahụn kẹ ụnụ e gi marịn nị m rị imẹ Izrẹlụ lẹni mmẹ Osolobuẹ sụọ wụ Chuku ụnụ — onyẹ ọzọ arịa. Onwọnzini ogẹn ụya e gi ri ndị nke m.

Osolobuẹ K'e Hu Mmọn-nsọ kpu Ịhịan Ile

²⁸ “Ọnwan mẹgụ, m k'e hu Mmọn m kpu ịhịan ile: ụmụ ụnụ ikẹnnyẹ lẹ ikpoho k'e bu amụma; ikẹnnyẹ-ọba ụnụ k'a rọ nrọ; ikoro ụnụ k'a hụn ọhụn.

²⁹ Ogẹn hụ, m k'e hudẹ Mmọn-nsọ m kpu idibo m — kẹ ikẹnnyẹ lẹ ikpoho.

³⁰ “M k'a ghọsị ahụnlele ihun igwere lẹ elu-ụwa, kẹ ẹdeke kẹ ọkụn kẹ ẹnwụnrụn rị a lọnị;

³¹ ẹnyanwụn k'a gba ishi; ifọn k'e nwunmẹ ẹdeke-ẹdeke, o kebe ru okẹn ụhụọhịn Osolobuẹ ahụn rị egun.

³² Onyẹ ọwụlẹ hụn k'a kpọku ẹfan Osolobuẹ k'a wanahịn makẹni Osolobuẹ e kuọl'a n'o k'e nwọnrịrị ndị k'a wanahịnnị — imẹ ndị rị ugu Zayọnụ lẹ ndị rị Jerusalẹm; ndị hụ k'a wanahịnnị k'a wụ ndị m họrị.