Juwẹlụ 1 - Ika

Isi Nke Ohu

¹ Hụnnị wụ ozi Osolobuẹ zi Juwẹlụ nwa Pẹtuẹlụ.

Kwanma Nị, Ihiẹn Ewiwichanrịngụọ

² Gọn ni ntịn, ụnụ ndị-isi; ndị ile rị alị Juda, gọn ni ntịn: Ihiẹn nọ ẹnịna e mẹtughọ ogẹn ụnụ mọbụ ogẹn ndị nẹdi ụnụ?

³ Gwa nị ụmụ ụnụ ihiẹnni, wẹ nwẹn a gwa ụmụ wẹ, ụmụ wẹ a gwazị ndị sọnni we —

⁴ ihiẹn igurube mẹ alị ẹnyi: hụn a janị e rigụ, hụn a kpụnị e ri ihiẹn wẹ rihọdụ; ọhụn e rigụ, hụn a tụnnị e ri ihiẹn wẹ rihọdụ; ọhụn e rigụ, hụn ghalẹni e rihọdụ e ripụ ihiẹn wẹ rihọdụ!

⁵ Tẹnhin ni, ndị manya; tẹnhin ni kwanma ẹkwan! Gomẹ ni, ụnụ ile rị a ra a tụ! Kwanma makẹni manya vaịnị ọhụn arịzịa, makẹni a napụgụọ wẹ ụnụ vaịnị lẹ manya a.

⁶ Alị ohu a mayegụọ alị m agha alị hụn a kpa ikẹn, ndị agha wẹ bu ọda kẹ igurube! Eze rị wẹ ọnụ nọ kẹ nke ẹwọrọ, ọ nọchanrịn kẹ hụn ẹwọrọ gi e gbu e ri!

⁷ E wiwigụọ wẹ osisi vaịnị m ile; a jachanrịngụọ wẹ osisi figi m; e hepụchanrịngụọ wẹ wẹ agbụgba tụye alị, agala wẹ hụ a chan ụchan.

⁸ Kwanma nị lekẹ ogbori yi achọ hụn rị a kwan di-ụtụntụn a.

⁹ Ọka lẹ manya wẹ e gi chụn ẹjan imẹ Ụlọ-nsọ Osolobuẹ arịzịa; ndị nchụn-ẹjan a rụn ọrụn Osolobuẹ hụ a kwan.

¹⁰ Ihiẹn wẹ kụn ugbo a lagụọ iwi, akpak'alị a kpọpụ nkụn; ọka ile e lagụọ iwi; manya hụ a kọ akọwaye; ofugbọn-olivu a kọgbu enwẹn ẹ!

¹¹ Ya fụma ụnụ, ndị ugbo! Ndị ugbo vaịnị, gomẹ ni! ịhịan ile kwanma nị, nị ọka-witi lẹ ọka-bali e wiwigụọ! Ihiẹn wẹ k'a ghọ imẹ ugbo e wiwigụọ!

¹² Vaịnị hụ e shinwụn, figi hụzịkwọ e shinwụn; pomegraneti lẹ nkụ lẹ apụlụ hụzị e shinwụn; osisi ile rị ugbo a kpọpụgụọ nkụn! Ya wụ nị ịghọghọ ịhịan a gụgụọ!

¹³ Ndị nchụn-ẹjan, yiri ni ẹkwa-achọ kwanma: ụnụ ile ndị ọrụn ukpo nchụn-ẹjan Osolobuẹ! D'e yiri ni ẹkwa-achọ chu ụran; ụnụ ndị a rụnnị Chuku m ọrụn! N'o nwọnzini ọka lẹ manya rịnị wẹ e gi chụn ẹjan imẹ Ụlọ-nsọ Chuku ụnụ.

¹⁴ Sị nị ịhịan ile bu ọnụ; zu ni ọgwa rị nsọ! Kpọgbama nị ndị-isi lẹ ịhịan ile bi alị; wẹ zu Ụlọ-nsọ Osolobuẹ wụ Chuku ụnụ d'a kwanghọsị Osolobuẹ.

¹⁵ Ụhụọhịn ahụn k'a jọgbu enwẹn ẹ! Ụhụọhịn Osolobuẹ ahụn a rịgụọ nsue! Okẹn ntikpọ gha ẹka Onyẹ hụ nwọn ikẹn ile bịa k'o k'e buhẹ!

¹⁶ Ihiẹn-ugbo ẹnyi te k'e ri a lagụọnị iwi idẹnya ẹnyi? Anwịrịn lẹ ịghọghọ a kụsịgụọnị imẹ Ụlọ Chuku ẹnyi?

¹⁷ Mkpụrụ wẹ kụn ugbo a kpọpụ nkụn, makẹni alị a kpọpụgụọ nkụn! Onwọnzini ihiẹn rị ọban, ebe w'e dọnmẹ ọka a lagụọ iwi makẹni ọka e mẹni.

¹⁸ Euu, anụ ile hụzị a sụn udẹn! Igunrun efin hụ ụzọ ile a wahunmẹ, makẹni ẹfịfịa hụn w'e ri arịa; atụnrụn lẹ ewu hụzịdẹ a hụnjun ẹnya.

¹⁹ Osolobuẹ, yụ kẹ m rịkwọ a kpọku, ni ọkụn a dụnpụgụọ irurue anụ te k'e ri, dụnpụzị osisi ile rị ọfịa.

²⁰ Anụ rị ọfịa hụzịdẹ a kwanghọsị ị, makẹni mirin ndị w'a ra a tachanrịngụọ, lẹni ọkụn a dụnpụgụọ ẹfịfịa ile rị ọfịa.