Judu 1 - Ika

¹ Mmẹ wụ Judu de ẹkụkwọ-ozini. M wụ igbọn Jesu Kristi. M wụzịkwọ nwẹnẹ Jemisi. M rị e dejẹnni ndị ahụn Osolobuẹ họrị, ndị ahụn rị Chuku-Nẹdi obi, ndị ahụn Jesu Kristi dọnmẹ:

² omikẹn, udọn lẹ ihiẹn-ọsụsụọ ya rịnị ụnụ mmagi-mmagi.

Lụnị Nị Ụzọ-Jesu Ọgụn

³ Ezi umunẹ m, o te dụka m nị m deni ụnụ oku nzụọpụha hụn ẹnyi ile nwọn, kanị a hụn m'a n'ọ rịka mkpa nị m deni ụnụ hụnnị gi sị ụnụ shikẹnmẹ ọnwụn chedọn Ụzọ-okukwe ahụn Osolobuẹ bugụ che ẹka ndị nsọ, ndị nke ẹ.

Ndị Nkuzi-ntụ A Banhangụọ

⁴ Makẹni, o nwọnghọ ndị ghalẹni a tụ egun Osolobuẹ hụn gi nzuzue banhan imẹ igunrun ẹnyi, ụdị ịhịan Ẹkụkwọ-nsọ kutọgụ afụnfụn rị e cheni wẹ; ndị gi ẹfọmanị Osolobuẹ mẹ e họnrin oghere wẹ gi e bi eje-obibi, a jụdẹ Jizọsị Kraịstị hụn ịya sụọ wụ Onyẹ nwọn ihiẹn ile lẹ Di-nwọnni-ẹnyi.

Osolobuẹ A Marịnghọ K'o Dọn E Ye Ndị Njọ Afụnfụn

⁵ M chọ nị m nyanhan nị ụnụ ihiẹn ụnụ marịn, nị Di-nwọnni-ẹnyi ahụn gha alị Ijiptu zụọpụha ndị Izrẹlụ gizi ẹka a tikpọ ndị rị imẹ wẹ hụn kwerilẹni;

⁶ nị ndị mmọn-ozi hụ te rị nsọ hụn nọdịlẹni ebe wẹ sị wẹ nọdị, la ọnọdị wẹ tọ, rị nwan ẹgbụn itẹbitẹ imẹ eje-ishi, e che okinkin-ikpe hụn jẹnkọ d'a rị okẹn Ụhụọhịn ahụn.

⁷ Ẹrịra kẹ ndị Sodọm lẹ Gomora lẹ obodo ndị nọkunmẹni wẹ mẹzi, bu enwẹn wẹ che ughẹrẹ lẹ ihiẹn-ụrụ, ya wẹ nọ narịn afụnfụn ọkụn-itẹbitẹ. Wẹ nọ wụrụ ihiẹn wẹ gi a gba ịhịan mkpịnsịn-ẹka ẹnya.

Enwẹn Wẹ Kẹ W'e E Lee, E Legberi Ọkịkị

⁸ Ẹrịra kẹ ndị nkuzi-ụghanị dọn nwan a hụnsọnmẹ ọhụn e mẹ wẹ e mẹ ihiẹn ẹhụ wẹ gi a rụ, e legberi ọkịkị, e kuja oku eje-mmọn.

⁹ Kanị, Maịkẹlụ hụn wụ onyẹ-isi ndị mmọn-ozi emẹdẹni ẹnịna ogẹn o gi sọn Ekwensụ zụọ ozun Mozizi: egun Osolobuẹ anịn'a kuja oku Ekwensụ, kama ọ sịhụ Ekwensụ, “Di-nwọnni-ẹnyi a jụgbọ ị!”

¹⁰ Kanị ndịnị e kuja oku ihiẹn ọwụlẹ wẹ ghọtalẹni; wẹ rị e mẹ kẹ anụmanụ, a ghọta ihiẹn k'ọ rị wẹ, e gi ẹ a la iwi.

A Rịzịọlẹ Wẹ Eje-ọnọdị

¹¹ O k'a jọnị wẹ njọ! E sọnmẹgụọ wẹ ụzọ Keni hụn gbu ọchụn; e gigụọ wẹ ufiri egho mẹmẹ kẹ Balaam; e nupụgụọ wẹ isi kẹ Kora a la ntikpọ kẹ ịya.

¹² Ntụpọ kẹ ndịnị wụ ebe ụnụ rị e ri Oriri ihiẹn-ọsụsụọ ụnụ; ifẹnrẹn ara mẹdẹ wẹ isọn ụnụ e ri! Ndị-ndu rị e lepụ enwẹn wẹ sụọ ẹnya kẹ wẹ wụ; orukpu ufere bukọ ghalẹni e zue mirin kẹ wẹ wụ; osisi ghalẹni a mị mkpụrụ ogẹn wẹ, osisi wẹ huepụ nwụnhụnchanrịngụnị!

¹³ Wẹ nọhụ kẹ mirin ohimin rị e mẹhunmẹni, ihiẹn ifẹnrẹn wẹ hụ a gbọshi elu kẹ ụfọfọ; wẹ wụ kokisẹ ụzọ ohu ghalẹni e ru, ndị Osolobuẹ kwademẹni ishi ka ishi a gba hụn k'a rị jẹnrin ejẹn!

Ikpe-ọmụma Hụn Rị E Cheni Wẹ

¹⁴ Ẹnọkụ, hụn rị agbọ nke ẹsa, wẹ gha ẹka Adam gụnma, e bugụọ amụma tọnị wẹ: ọ sị, “Lee ẹ, Di-nwọnni-ẹnyi lala, ya lẹ ndị nsọ a nnụ ole-lẹ-ole.

¹⁵ Ọ lala d'e kin ịhịan ile ikpe, d'a ma wẹ ile ikpe — ikpe eje-ihiẹn ile wẹ gi eje-agụngụn wẹ mẹ lẹ eje-oku ile jọgbu enwẹn ẹ, hụn ndị-njọ ghalẹni a gbaye Osolobuẹ gi kuja oku ẹ!”

Eje-Agụngụn Wẹ

¹⁶ Ogẹn ile kẹ ndịnị gi e dẹnnwịnnwịn, a kọrịanị ịhịan, e mẹ ihiẹn gụnnị wẹ; w'e kukarị enwẹn wẹ, e gi ọnụ-ọma a tụnarịn ịhịan ihiẹn wẹ.

Mkpịnsịn-ẹka Lẹ Ndụnmọdụn

¹⁷ Kanị ụnụ nwẹn, ndị nke m, nyanhan nị oku ndị-ozi pụ-ichẹn Di-nwọnni-ẹnyi wụ Jizọs Kraịstị tumẹ gwatọ ụnụ:

¹⁸ Wẹ gwa ụnụ nị “Ndị-nlelịa k'a pụha ogẹn ikpanzụụn, ndị e mẹ ihiẹn rị a gụnnị wẹ.”

¹⁹ Uwẹ wụ ndịnị rị e buhẹ nkebe, ndịnị ihiẹn-ụwa rị ẹnya, nwọnlẹni Mmọn-nsọ.

²⁰ Nke ụnụ ezi umunẹ m, e sue ni imẹ Okukwe ahụn rịchanrịn nsọ ụnụ rị e sọn; e mẹ ni ekpere kẹ Mmọn-nsọ dọn chọ.

²¹ E dọnmẹ ni enwẹn ụnụ hụn ihiẹn ụnụ e gi a sụọ Osolobuẹ, kẹ ụnụ dọn rị e che omikẹn Di-nwọnni-ẹnyi wụ Jizọs Kraịstị, hụn k'e wẹhẹni ụnụ ndụn itẹbitẹ.

²² E mẹ ni ni ndị obi-ẹbụọ omikẹn;

²³ a zụọpụha nị ndị ọzọ ghahanị ịdọkpụnpụha wẹ imẹ ọkụn. Nke ndị ọzọ, a manị piripiri e mẹni wẹ omikẹn, e zedẹ ni ize ẹwuru wẹ ẹhụ wẹ mẹrụgụ.

Ekpere Ịja-mma

²⁴ Ọjịja-mma ya rịnị Osolobuẹ, onyẹ hụn k'a s'ẹka mẹ ụnụ adanlẹ, mẹ ụnụ wụrụ ndị nwọnlẹni ntụpọ, ụnụ e gi ịghọghọ turu ihun ya lẹ Ọghọ a,

²⁵ Onyẹ ahụn ịya sụọ wụ Chuku, Onyẹ nzụọpụha ẹnyi, ọjịja-mma ya rịn'a ghahanị Jizọs Kraịstị Di-nwọnni-ẹnyi — ọjịja-mma lẹ ikpẹn lẹ ikẹn lẹ ọkịkị ya rịn'a: k'ọ rịn'a nị ogẹn d'e bidọn, ya rịn'a kikẹnni, rịn'a jẹnrin ejẹn! Isẹẹ.