Joshụa 9 - Ika

Isi Nke Itenẹi Ndị Gibiọnụ E Gi Ẹro Wanahịn

¹ Ndị nze ile rị ẹbamịn ọdịdan-ẹnyanwụn Iyi Jọdanị a nụgụọ ihiẹn ndịnị rị e mẹni: kẹ ndị rị ugu ndị rị alị hụ kẹ ndị rị ukun ugu azụụn shikọ Ohimin kẹ alị ile rịchanrịn mkpẹnrẹn Ohimin hụ — d'e rukwọrị Lẹbanọnụ — ya wụ ndị-nze Hẹti, Amọ, Kenaanị, Pẹrẹzi, Hivu lẹ Jebusu.

² Ya wẹ nọ kịgbama d'a lụsọn Joshụa lẹ ndị Izrẹlụ agha.

³ Kanị, nke ndị Gibiọnụ, ogẹn wẹ gi nụ ihiẹn Joshụa mẹ Jẹriko lẹ Aị,

⁴ wẹ nọ mẹ ẹro: ụfọdụ nọ buli lekẹ ndị wẹ hanjẹn alị teni, wẹ lẹ ihiẹn-oriri wẹ buche ẹkpa kagụ ẹgẹdi, dọyesọnmẹ elu jaki wẹ lẹ ihiẹn manya ndị kahịgụnị wẹ kwakin;

⁵ wẹ yihụ akpụkụ kahịgụnị wẹ kwakin lẹ ẹkwa akan; ihiẹn-oriri ile wẹ bu a kpọgụọ-nkụn, kunchanrịn mbu.

⁶ Ya wẹ nọ jẹn d'e kunrun Joshụa ebẹhụ ndị Izrẹlụ ziẹntọ imẹ Gil'galụ, sị ịya lẹ ikẹnnyẹ Izrẹlụ, “Ẹnyi gha alị teni bịa; ẹnyi bịa kẹni ẹnyi kịgbama.”

⁷ Kanị ndị Izrẹlụ nọ sị ndị ebọn Hivu hụ wụ ndị Gibiọnụ, “Ikẹnkwọ ebe ụnụ bi rị ẹnyi nsue; nanị ẹnyi e dọn nwan kwemẹ ụnụ nkwa ẹnyi e gi e mẹgbama?”

⁸ Kanị wẹ nọ sị Joshụa, “Ẹnyi bịa d'e we enwẹn ẹnyi che okpuru i.” Ya Joshụa nọ sị wẹ, “Onyẹ kẹ ụnụ wụ? Elebe kẹ ụnụ gha bịa?”

⁹ Wẹ nọ sị a, “Ẹnyi ndị idibo i gha alị tegbu enwẹn ẹ bịa ebeni makẹni ẹnyi a nụgụọ otiti Osolobuẹ wụ Chuku ụnụ, ihiẹn ile o mẹ imẹ alị Ijiptu

¹⁰ lẹ ihiẹn ile o mẹ ndị-nze ẹbụbụọ kị ndị Amọ hụn rị nfetu Iyi-Jọdanị, Sihọnụ wụ eze Hẹsh'bọnụ lẹ Ọgụ wụ eze Bashanị hụn nọ imẹ Ash'tarọtụ kị.

¹¹ Ya ndị-ichẹn ẹnyi lẹ ndị ile bi alị ẹnyi nọ sị ẹnyi, ‘Weri ni ihiẹn-oriri ụnụ k'e ri ụzọ-ijẹn; jẹn ni d'e kunrun wẹ, sị nị wẹ, “Ẹnyi wụ idibo ụnụ; nị ẹnyi lẹ ụnụ e mẹgbama.” ’

¹² Brẹdi ẹnyini te rị a nụ ọkụn kẹ ẹnyi buche wẹ imẹ ẹkpa ụhụọhịn ẹnyi buli d'e kunrun ụnụ. Lee nwan k'ọ kpọgụ nkụn, kunpụ mbu;

¹³ Ihiẹn akpụkpọ-anụ ndịnị ẹnyi gi gbaye manya te wụ nke ọhụn kẹ ẹnyi gbajun wẹ, kanị, lee nwan kẹ wẹ kahịchanrịn; ẹkwa ẹnyi lẹ akpụkụ ẹnyi a kahịgụọ yeni ụzọ ote.”

¹⁴ Ya ndị Izrẹlụ nọ lele ihiẹn-oriri wẹ, kanị ajụnị wẹ Osolobuẹ kị wẹ k'e mẹ.

¹⁵ Joshụa nọ na wẹ ẹka, kwe wẹ nkwa nị Izrẹlụ egbukọ wẹ; ndị-ndu Izrẹlụ nọ kunni wẹ ẹfan Osolobuẹ gi biye ẹ ẹka.

¹⁶ O mẹpụ akp'ọhịn ẹtọ wẹ kwetarị nkwa w'e gi e mẹgbama, ndị Izrẹlụ nọ marịn nị wẹ ile gba nọkunmẹ, nị wẹ rị nsue.

¹⁷ Ya Ndị Izrẹlụ nọ buli, nke akp'ọhịn ẹtọ, wẹ nọ ru obodo ndị rị alị Gibiọnụ: ndịnị wụsọnmẹ obodo wẹ: Gibiọnụ, Kẹfira, Biẹrọtụ lẹ Kiriatị-Jiarim.

¹⁸ Kanị ndị Izrẹlụ amayeni wẹ ọgụn, makẹni ndị-ndu Izrẹlụ e kungụọ Osolobuẹ wụ Chuku Izrẹlụ kwe wẹ nkwa. Ya ndị Izrẹlụ ile nọ dẹnnwịnwịnmanị ndị-ndu Izrẹlụ.

¹⁹ Kanị ndị-ndu ile nọ sị igunrun Izrẹlụ, “Ẹnyi e kungụọnị wẹ Osolobuẹ wụ Chuku Izrẹlụ, onwọnni ogẹn ẹnyi e gi mẹtụ wẹ ẹka.

²⁰ Lee ihiẹn ẹnyi sikọ d'e mẹ wẹ: Ẹnyi egbukọ wẹ, amamgbe Osolobuẹ e gi ọnụma mẹ ẹnyi ihiẹn makẹni ẹnyi emẹni ihiẹn ẹnyi kunni ẹfan a.”

²¹ Wẹ nọ sịzị, “Egbulẹ ni wẹ. Kama, wẹ k'a rị a kpanị Izrẹlụ ile nkụn, a kwọnị Izrẹlụ mirin.” Ya kẹ ndị-ndu Izrẹlụ gi dọnmẹ nkwa wẹ kwe wẹ.

²² Joshụa nọ kpọ ndị Gibiọnụ, sị wẹ, “Kị haịn ụnụ gi tụ ẹnyi ntụ, sị, ‘Ebe ẹnyi bi te ọda-ọda,’ bụ ụnụ bikụnma ẹnyi ebikụnma?

²³ Ụnụ a wụrụọlẹ nwan ndị wẹ bụ ọnụ: ụnụ k'a wụferi igbọn a wa nkụn a kwọ mirin Ụlọ Chuku m.”

²⁴ Wẹ nọ sị Joshụa, “Wẹ gwachanrịn ẹnyi ndị idibo i kẹ Osolobuẹ wụ Chuku ụnụ dọn gwa odibo ẹ wụ Mozizi we alị ile ye ụnụ; ya gbupụchanrịnnị ụnụ ndị ile bi imẹ ẹ. Ya okẹn egun nọ tụma ẹnyi nị ụnụ k'e gbu tan ẹnyi. Ya haịn ẹnyi gi mẹ ihiẹnni ẹnyi mẹ.

²⁵ Ẹnyi rị ị nwan ẹka. Mẹ ẹnyi ihiẹn ọwụlẹ rị ị mma, furuni.”

²⁶ Ẹrịra kẹ Joshụa gi zụọpụha wẹ ẹka ndị Izrẹlụ, wẹ nọlẹni gbu wẹ.

²⁷ Ụhụọhịn hu kẹ Joshụa mẹ ndị Gibiọnụ họnrin ndị sikọ d'a rị a wa nkụn lẹ ndị a kwọ mirin — a kwọnị ndị Izrẹlụ ile mirin, a kwọ hụn wẹ gi a rụn ọrụn ukpo nchụn-ẹjan Osolobuẹ, ebahụn Osolobuẹ jẹnkọ d'a họrị nị ndị Izrẹlụ a nọdị e fe ẹ. Ya kẹ ndị Gibiọnụ wụkwọ nwan d'e ru tannị.