Joshụa 8 - Ika

Isi Nke Ẹsatọ Izrẹlụ E Mẹri Nwan Alị Aị

¹ Ya Osolobuẹ nọ sị Joshụa, “Atụlẹ egun; anịlẹ ndụn gụ ị. Weri ndị-agha Izrẹlụ ile jẹnmẹ d'a maye obodo Aị ọgụn, n'e wegụọ m eze Aị lẹ ndị nke ẹ lẹ obodo ẹ lẹ alị ye i mẹri.

² I sikọ d'e mẹ Aị lẹ eze ẹ ihiẹn i mẹ Jẹriko lẹ eze ẹ: kanị ụnụ nwọn ikẹn kwarị ihiẹn ndị Aị lẹ ihiẹn-uriri wẹ. Zi ni ndị-agha d'a warị ọfịa azụụn obodo hụ, cheri.”

³ Ya Joshụa lẹ ndị-agha ile nọ buli d'a lụsọn Aị ọgụn. Joshụa nọ họrị odogun-agha nnụ-uku iri kwasị ọgụn (30,000), gi imẹ abalị zipụ wẹ.

⁴ Ọ sị wẹ: “Gọn ni ntịn ọhụnma-ọhụnma: Ụnụ sikọ d'a warị ọfịa azụụn obodo hụ, gha ebẹhụ maye wẹ idẹnmizi. Anọtekwọlẹ ni. Sepụhachanrịn nị ọpịa ụnụ, kwọndọn.

⁵ Mmẹ lẹ ndị ile mmẹ lẹ wẹ wị sikọ d'a gha ihun obodo hụ maye wẹ; wẹ pụha d'e sọn ẹnyi lụ kẹ wẹ dọn mẹ mbụ, ẹnyi a gbamanị wẹ ọsọ;

⁶ Wẹ k'a chụma ẹnyi, ẹnyi e gi ẹ rẹrẹpụhagụ wẹ imẹ obodo hụ; makẹni wẹ jẹnkọ d'a sị, ‘A gbamazịnị wẹ ẹnyi ọsọ kẹ wẹ dọn gba mbụ.’

⁷ Ogẹn hụ, ụnụ a gha ebe ụnụ warị imẹ ọfịa pụha d'e weri obodo hụ. Osolobuẹ wụ Chuku ụnụ k'e bu ẹ che ụnụ ẹka.

⁸ Obodo ahụn banhụ ụnụ ẹka, ụnụ e yi ẹ ọkụn. Mẹ ni ihiẹn Osolobuẹ sị ẹnyi mẹ; mẹkwọ n'a — nị mmẹ zi ụnụ!!”

⁹ Ya kẹ Joshụa nọ nwan zipụ wẹ. Wẹ nọ shi ebe wẹ jẹnkọ d'a warị, ebe wẹ k'a gha maye ndị Aị idẹnmizi, wẹ nọ warị ebẹhụ, ẹgbata Bẹtẹlụ lẹ Aị, ẹbamịn ọdịdan-ẹnyanwụn Aị; kanị Joshụa nkẹ sọn ndị họdụnị dịnọ imẹ uhinhin hụ.

¹⁰ Ụzụtụntụn biribiri, Joshụa nọ lihi, wepụha ndị-agha ya lẹ wẹ jẹnkọ d'a wị, kwademẹ wẹ, ịya lẹ ndị-ndu Izrẹlụ nọ duru wẹ shi Aị.

¹¹ Ya lẹ ndị agha hụ ile ya lẹ wẹ wị nọ dọn ihun obodo hụ, pụha ihun ẹ hụn rị ẹbamịn-ugu. Wẹ nọ nọ ọdanmgbugbu ye ẹgbata wẹ lẹ Aị.

¹² Ọ nọ weri ihiẹn nọ kẹ mmadụ nnụ-uku isẹn (5,000), bu wẹ zuemẹ ẹgbata Bẹtẹlụ lẹ Aị, ẹbamịn ọdịdan-ẹnyanwụn Aị.

¹³ Ya wụ, e bugụọ wẹ ndị agha ile che ọnọdị: ndị ka ọda hụ ibe ihun obodo hụ, ẹbamịn-ugu; ndị warịnị hụ azụụn a, ẹbamịn ọdịdan-ẹnyanwụn, e che. Imẹ uhinhin hụ, Joshụa wẹ nọ shi imẹ ọdanmgbugbu hụ rị ẹgbata wẹ lẹ Aị.

¹⁴ Ogẹn eze Aị gi hụn wẹ, ịya lẹ ndị-agha obodo ẹ ile nọ zọlihi shi ebe nwẹn, ihun ọdanmgbugbu Araba d'a lụsọn Izrẹlụ agha, kanị ọ marịn nị ụfọdụ ndị Izrẹlụ warị ọfịa azụụn obodo ẹ e che ni wẹ maye wẹ.

¹⁵ Joshụa lẹ ndị Izrẹlụ ile nọ nị ndị Aị chụkin wẹ azụụn, wẹ hụ a gbashi ibe atụ.

¹⁶ Ndị Aị nkẹ nọdẹ kpọpụha ndị ile rị obodo wẹ d'a chụ wẹ. Ndị Izrẹlụ nọ gi ẹrịra rẹrẹ wẹ pụ imẹ obodo.

¹⁷ Akpụ okẹnnyẹ ohu ahọdụnị imẹ obodo Aị mọbụ Bẹtẹlụ, wẹ ile pụhachanrịn d'a chụ ndị Izrẹlụ; a la wẹ ọnụ-mgbọn obodo hụ tọ oghe, chụrụ ndị Izrẹlụ.

¹⁸ Ya Osolobuẹ nọ sị Joshụa, “Bu obo rị ị ẹka zinmẹ Aị nị m k'e ye i obodo hụ.” Joshụa nọ bu obo ẹ zinmẹ Aị.

¹⁹ Hụn o gihụ mẹ ihiẹnni, ndị agha warị imẹ ọfịa nọ gha ebe wẹ rị zụnlihi ozigbo, zụnpụha. Wẹ nọ banye imẹ obodo hụ, weri ẹ, yi ẹ ọkụn ozigbo-ozigbo!!

²⁰ Ogẹn ikẹnnyẹ Aị gi lee ẹnya azụụn, wẹ nọ hụn ẹnwụnrụn rị a lọshi elu yeni ọkụn rị a dụn obodo hụ. Ebe w'a gbashi arịzịa, makẹni ndị Izrẹlụ hụ te gbashikọ atụ e gbehutọgụọ nwan, maye wẹ nwẹn te chụkọnị wẹ —

²¹ makẹni Joshụa lẹ ndị agha Izrẹlụ ile hụn nị ndị agha warị ọfịa e werigụọ obodo hụ, hụnzị ẹnwụnrụn ọkụn rị a gha imẹ obodo hụ a lọshi elu, wẹ nọ gbehutọ maye ikẹnnyẹ Aị rị a chụnị wẹ.

²² Ndị ahụn te warị ọfịa nọzị gha imẹ obodo hụ wẹ yigụ ọkụn pụha, gha azụụn hụ maye ndị Aị, nkewụnị ndị Izrẹlụ e ke ndị Aị ye etintin. Ndị Izrẹlụ nọ gbukwama wẹ ile, onwọnni onyẹ wẹ gbuhọdụ, onwọnni onyẹ s'ẹka gbapụnị.

²³ Kanị a nwụndọn wẹ eze Aị, we ya lẹ ndụn jẹnni Joshụa.

²⁴ Ogẹn ndị agha Izrẹlụ gi gbuchanrịngụ ndị Aị imẹ atụ wẹ chụjẹn wẹ, ogẹn wẹ gi gigụ ọpịa-agha gbukwama wẹ, ndị agha hụ ile nọ kin azụụn shi imẹ Aị, gbukwamazị ndị rị imẹ ẹ.

²⁵ Madụ nnụ-uku mmẹbụọ (12,000) kẹ wẹ gbu ụhụọhịn hụ, ndị Aị ile, kẹ ikẹnnyẹ kẹ ikpoho,

²⁶ makẹni Joshụa esekinni ẹka ahụn o gi kwọndọn obo hụ o bu zinmẹ Aị d'e ru nị ndị ile bi Aị a gụchanrịn.

²⁷ Anụ wẹ lẹ ihiẹn wẹ sụọ kẹ ndị Izrẹlụ kwarị, makẹni ẹrịra kẹ Osolobuẹ gwa Joshụa.

²⁸ Ẹrịra kẹ Joshụa dọn kpọ Aị ọkụn, mẹ ẹ wụferi mkpọkọ-mkpọkọ ebahụn gbakwọ nwan okpokoro d'e ru tannị.

²⁹ Joshụa nọ hogbu eze Aị, la a tọ elu-osisi d'e ru ogẹn ẹnyasị. Anwụn a rọ, ọ nọ sị wẹ d'e butu ozun ẹ elu osisi hụ, tụ a ye alị ebe wẹ gha a banye ọnụ-mgbọn obodo hụ. Wẹ nọ kpọn ikpọn ọmụma kwasị a. Ikpọn ọmụma hụ hụkwọ a nwan d'e ru tannị.

Joshụa Sị Izrẹlụ Biyezi Ẹka Iwu Osolobuẹ

³⁰ Ya Joshụa nọ rụn ukpo nchụn-ẹjan yeni Osolobuẹ wụ Chuku Izrẹlụ elu ugu Ẹbalụ,

³¹ kẹ odibo Osolobuẹ wụ Mozizi dọn gwa ndị Izrẹlụ. Ọ rụn a kẹ wẹ dọn de ẹ imẹ Ẹkụkwọ Iwu Mozizi sị “ọmụma wẹ belẹni, hụn ihiẹn-igwe ọwụlẹ we gi a rụn ọrụn hụatụlẹni.” Wẹ nọ nọ elu ẹ chụnyeni Osolobuẹ ẹjan w'a dụn ọkụn lẹ ẹjan-ekele rị ichẹn-ichẹn.

³² Idẹnya ndị Izrẹlụ ebẹhụ, Joshụa nọ leri Iwu Mozizi, deyesọnmẹ elu ọmụma ndị ahụn.

³³ Ndị Izrẹlụ ile, kẹ abịamabịa kẹ nwa-di-alị, lẹ ndị isi wẹ lẹ ndị gi ọkwa lẹ ndị e dọnzini wẹ oku wuzosọnmẹ azụụnnị lẹ azụụnnị, bu ihun zinmẹ ndị nchụn-ẹjan, ndị Livaị, hụn bu Ẹkpẹti-nkwerigbama Osolobuẹ. Ndị rị azụụnnị turu ihun Ugu Gẹrizim, ndị rị azụụn hụn ẹbọ turu ihun Ugu Ẹbalụ: wẹ turu kẹ odibo Osolobuẹ wụ Mozizi dọn gwa wẹ mbụ, ogẹn o gi gwa wẹ nị wẹ jẹnkọ d'a gọzi ndị Izrẹlụ wẹ ru ebeni.

³⁴ O mẹgụ, Joshụa nọ gụnpụhanị wẹ ihiẹn ile rị imẹ iwu, kẹ ngọzi kẹ ọnụ-ẹsọn, nọkẹ kẹ wẹ dọn de ẹ imẹ Ẹhụhụọ Iwu.

³⁵ Onwọnni akpụ oku ohu Mozizi ku imẹ Iwu Joshụa gụnlẹnini igunrun Izrẹlụ ile, kẹ ikpoho kẹ ụmụ-ẹka kẹ abịamabịa ndị bi imẹ igunrun wẹ.