Joshụa 7 - Ika

Isi Nke Ẹsa Njọ Ekanị Mẹ A Rụ Izrẹlụ Ile

¹ Kanị ndị Izrẹlụ gi ẹka-ẹbụọ sọn ihiẹn ndị ahụn wẹ gi kwanị Osolobuẹ wẹ sị wẹ ewelẹ; Ekanị nwa Kami nwa Zimri nwa Zẹra, onyẹ ebọn Juda, gha imẹ ihiẹn ndị ahụn wẹ gi kwanị Osolobuẹ weri, Osolobuẹ nọ gi olulu mẹ ndị Izrẹlụ ihiẹn.

² Joshụa gha Jẹriko zijẹn ikẹnnyẹ obodo Aị hụn rị elu-òke ẹhụ Bẹt-Avẹni, ẹbamịn ọwụwa-ẹnyanwụn Bẹtẹlụ, sị wẹ, “Jẹn ni d'e gi nzuzue lele kẹ obodo Aị nọ,” ya wẹ nọ jẹn d'e lelehunmẹ obodo Aị.

³ A lụaha wẹ, wẹ nọ sị Joshụa, “Ẹlẹ hụn ndị-agha ile e gi jẹn d'a lụsọn Aị ọgụn; zihụ ihiẹn nọ kẹ mmadụ nnụ-uku ẹbụọ mọbụ ẹtọ. Anịlẹ ndị-agha ile ta afụnfụn jẹnmẹ, makẹni ndị Aị ebuni ọda.”

⁴ Ya ihiẹn nọ kẹ mmadụ nnụ-uku ẹtọ nọ jẹnmẹ, ndị Aị nọ chụ wẹ ọsọ,

⁵ gbu ihiẹn nọ kẹ mmadụ ẹnọ arịa ọgụnnaị. Ọnụ-mgbọn obodo hụ kẹ wẹ ghakwọrị chụrụ ndị Izrẹlụ d'e ru Shẹbarim, ebẹhụ ọdanmgbugbu rịsọnmẹ, e gbu wẹ a tọ nkpọtu-oke ndị rịn'a. Ya akpobi nọ dẹnhin ndị Izrẹlụ rịkẹ mirin, ogẹn wẹ gi hụn ihiẹn mẹni.

⁶ Ya Joshụa nọ tika ẹkwa a, fiẹnrin alị, bu ihun kpumẹ alị ihun Ẹkpẹti Osolobuẹ d'e ru ogẹn ẹnyasị, kẹ ịya kẹ ndị-isi Izrẹlụ, kpọn uzunzun ye enwẹn wẹ isi.

⁷ Joshụa nọ sị, “Euu, Di-nwọnni ẹnyi wụ Osolobuẹ, k'i weni ndịnị fetu Iyi-Jọdanị, bịa ebeni d'e we ẹnyi ye ndị Amọ gbu? Euu, k'o furu ẹnyi nị azụụn Iyi-Jọdanị hụn ẹbọ ahụn jun ẹnyi ẹfọ!!

⁸ Euu Osolobuẹ, kẹ m k'e ku nwan, hụnnị ndị Izrẹlụ gbamagụnị ndị-iṅẹnrẹn wẹ ọsọ?!

⁹ Ndị Kenaanị lẹ ndị ọzọ bi alịnị jẹnkọ d'a nụ a, ke ẹnyi ye, gbupụ ẹnyi, zapụ ẹfan ẹnyi elu ụwa. K'i k'e mẹzi nwan ẹfan ị lẹ ọghọ a?”

¹⁰ Osolobuẹ nọ sị Joshụa, “Lihi ọtọ! K'i bu ihun kpumẹ alị e mẹ?

¹¹ Izrẹlụ e mẹgụọ njọ; e tikpọlẹ wẹ Iwu m gi kwọngbama mmẹ lẹ wẹ. E buchegụọ wẹ ẹka ihiẹn ndị ahụn wẹ gi kwanị m weri; e zunọlẹ wẹ ohin; a tụọlẹ wẹ ntụ; e bugụọ wẹ ihiẹn ndị ahụn che imẹ ihiẹn wẹ.

¹² Izrẹlụ asakọ nwan ẹka che ndị-iṅẹnrẹn wẹ ọgụn; wẹ rị a gbanị ndị-iṅẹnrẹn ọsọ makẹni wẹ lẹ enwẹn wẹ e họnringụọ ihiẹn wẹ k'e tikpọ. Anọyekọzịnị m ụnụ sokpan ụnụ tikpọ ihiẹn ọwụlẹ wụ ihiẹn wẹ k'e tikpọ hụn rị imẹ igunrun ụnụ.

¹³ “Jẹnmẹ nwan, d'e dọn wẹ nsọ kẹ iwu m dọn ku. Sị wẹ: Dọn ni enwẹn ụnụ nsọ gi kwademẹni ekile; makẹni Osolobuẹ wụ Chuku Izrẹlụ sị: ‘Ndị Izrẹlụ, ihiẹn wẹ gichanrịn kwanị Osolobuẹ rị imẹ igunrun ụnụ: ụnụ asakọ nwan ẹka che ndị-iṅẹnrẹn ụnụ ọgụn d'e runi ụnụ e wepụ ihiẹn ndị ahụn.’

¹⁴ “O ru nwan ụzụtụntụn ụnụ k'a pụhama ebọn, ebọn. Ebọn Osolobuẹ nwụndọn, ikpụlọ ndị rịn'a a pụhama ohu-ohu; ikpụlọ Osolobuẹ nwụndọn, ezi-lẹ-ụlọ ndị rịn'a a pụhama ohu-ohu; ezi-lẹ-ụlọ Osolobuẹ nwụndọn ndị rịn'a a pụhama ohu-ohu.

¹⁵ Onyẹ ọ nwụndọn gi ihiẹn wẹ gi kwachanrịnnị Osolobuẹ, wẹ k'e girịrị ọkụn dụngbu ẹ: kẹ ịya kẹ ihiẹn ile o nwọn, makẹni o tikpọgụọ Iwu rị ẹgbata Osolobuẹ lẹ Izrẹlụ; o mẹgụọ ihiẹn-ifẹnrẹn imẹ Izrẹlụ.”

¹⁶ Eki e fọn ụzụtụntụn, ya Joshụa nọ mẹ ndị Izrẹlụ pụha ebọn-ebọn, Osolobuẹ nọ nwụndọn ebọn Juda;

¹⁷ ebọn Juda nọ pụhama ebozo, ebozo, Osolobuẹ nọ nwụndọn ebozo Zẹra. Ọ nọ mẹ ebozo Zẹra pụhama ikpụlọ, ikpụlọ, Osolobuẹ nọ nwụndọn ikpụlọ Zimri;

¹⁸ Joshụa nọ mẹ ndị ikpụlọ Zimri pụhama ohu-ohu, Osolobuẹ nọ nwụndọn Ekanị nwa Kami nwa Zimri nwa Zẹra, onyẹ ebọn Juda.

¹⁹ Ya Joshụa nọ sị Ekanị, “Nwa m, ku ezioku gi ye Osolobuẹ wụ Chuku Izrẹlụ ọghọ. Gwa m nwan ihiẹn i mẹ; ezuemẹlẹni m'ẹ.”

²⁰ Ekanị nọ sị Joshụa, “Ezioku rọ; e mẹgụọ m Osolobuẹ wụ Chuku Izrẹlụ njọ. Lee ihiẹn m mẹ:

²¹ ogẹn m gi hụn ẹkwa alị Babilọnụ ma mma imẹ ihiẹn ndị ahụn ẹnyi gbukwarị, ya lẹ akpụrụ siliva ọgụn-iri lẹ ogbe goru hanzị kẹ akpụrụ iri kwasị ọgụnnaị, wẹ nọ chanban m ẹnya, m nọ weri wẹ. Wẹ rị nwan imẹ alị imẹ ọdụ m ebe m zuemẹ wẹ, siliva ahụn rịchanrịn okpuru.”

²² Ya Joshụa nọ zi wẹ, wẹ nọ gbajẹn imẹ ọdụ ahụn. E ru wẹ ẹ, e lee ihiẹn ndị ahụn ebe o zuemẹ wẹ imẹ ọdụ, siliva ahụn hụ okpuru!

²³ Wẹ nọ wepụha wẹ imẹ ọdụ ahụn, we wẹ jẹnni Joshụa lẹ ndị Izrẹlụ ile, kpọn wẹ tọ ihun Osolobuẹ.

²⁴ Ya Joshụa lẹ ndị Izrẹlụ ile nọ weri Ekanị nwa Zẹra lẹ siliva hụ lẹ ẹkwa hụ lẹ ogbe goru hụ lẹ ụmụ a ikẹnnyẹ lẹ ụmụ a ikpoho lẹ efin ẹ lẹ Jaki ẹ lẹ atụnrụn a lẹ ọdụ o bi lẹ ihiẹn ile o nwọn, we wẹ shi Ọdanmgbugbu Ekọ.

²⁵ Ya Joshụa nọ sị a, “K'i buhẹnini ẹnyi nsọngbuni? Osolobuẹ jẹnkọ d'e wẹhẹn'i nsọngbu tannị.” Ndị Izrẹlụ ile nọ magbu ẹ; a magbugụzị wẹ ndị nke ẹ họdụnị, wẹ nọ kpọ wẹ ọkụn.

²⁶ Ya wẹ nọ kpọn ikpọn ọmụma hi-ogbe kwasị Ekanị. Ikpọn ọmụma hụ rịkwọ nwan ebẹhụ d'e ru tannị. Ya kẹ olulu Osolobuẹ nọ rọ. Ihiẹn w'a kpọ nwan ebẹhụ d'e ru tannị wụ Ọdanmgbugbu Ekọ hụn wụ Ọdanmgbugbu Nsọngbu.