Joshụa 6 - Ika

Isi Nke Isin Ndị Izrẹlụ E Tikpọchanrịn Jẹriko

¹ Ogẹn ahụn, e giọlẹ wẹ ufiri ndị Izrẹlụ kpọkinchanrịn Jẹriko gangangan. Onwọnni onyẹ w'a nị a pụ, onwọnni onyẹ w'a nị a banhan.

² Osolobuẹ nọ sị Joshụa, “Lee ẹ, e bugụọ m Jẹriko che i ẹka mẹri, ya lẹ eze ẹ lẹ ndị-agha a.

³ Yụ lẹ ndị-agha Izrẹlụ ile, ghahunmẹ ni obodo hụ mgbe ohu. Mẹsọnmẹ n'ẹ ẹrịra akp'ọhịn isin.

⁴ Sị ndị nchụn-ẹjan ẹsa burusọnmẹ opi (ọdụ) mpịn-ebulu ohu-ohu, e buruni wẹ Ẹkpẹti-nsọ ụzọ. Nke akp'ọhịn ẹsa rịn'a, ụnụ a ghahunmẹ ẹ mgbe ẹsa, ndị nchụn-ẹjan ahụn hụ e gbu opi (ọdụ) ndị ahụn.

⁵ Ị nụ kẹ opi ndị ahụn hanbie, y'e mẹ ndị-agha ahụn ile yi okẹn oro; mgbọn obodo hụ jẹnkọ d'e ziẹntuchanrịn, ndị-agha ahụn a zụnban imẹ ẹ, onyẹ-onyẹ lẹ ebe ọ rị.”

⁶ Ya Joshụa nwa Nọnụ nọ kpọ ndị nchụn-ẹjan, sị wẹ, “Buru ni Ẹkpẹti-nkwerigbama Osolobuẹ, ụnụ sị ndị nchụn-ẹjan ẹsa burusọnmẹ opi (ọdụ) mpịn-ebulu, buruni Ẹkpẹti hụ ụzọ.”

⁷ Ọ sị ndị-agha hụ, “Nje ni! Ghahunmẹ ni obodo hụ ohi-ohi; ndị hụn kọnrin agha sikọ d'e buruni Ẹkpẹti Osolobuẹ ụzọ.”

⁸ Joshụa a gwagụ wẹ oku, ndị nchụn-ẹjan ẹsa bu opi ẹsa ihun Osolobuẹ nọ buru ụzọ, gbukọ opi wẹ; Ẹkpẹti-nkwerigbama Osolobuẹ e sọn wẹ;

⁹ ndị ahụn kọnrin agha buni ndị nchụn-ẹjan ahụn rị e gbu opi ụzọ; ndị e che ibe azụụn hụ e sọn Ẹkpẹti hụ. Ogẹnni ile, opi ndị ahụn hụ a hanpụ.

¹⁰ Kanị, Joshụa a sịgụọ wẹ: “Eyikwọlẹni oro; anịkwọlẹ ni wẹ nụdẹ olu ụnụ; ekukwọlẹ ni ihiẹn ọwụlẹ, d'e ru ụhụọhịn m gwa ụnụ yi oro, ụnụ kebe yi oro.”

¹¹ Joshụa nọ mẹ wẹ bu Ẹkpẹti-Osolobuẹ ghahunmẹ obodo hụ mgbe ohu; wẹ nọ kinzi azụụn shi ebẹhụ wẹ ziẹntọ d'a nọdị nị eki fọn.

¹² Joshụa e lihi ụzụtụntụn, ndị nchụn-ẹjan nọ buruzi Ẹkpẹti-Osolobuẹ;

¹³ ndị nchụn-ẹjan ẹsa hụ bu opi (ọdụ) ẹsa nọ shi ihun, buruni Ẹkpẹti-Osolobuẹ ụzọ, gbukọ opi wẹ; ndị ahụn kọnrin agha hụ wẹ ihun; ndị e che ibe azụụn hụ e sọn Ẹkpẹti-Osolobuẹ; opi ndị ahụn hụkwọ a hanpụ.

¹⁴ Hụnnị mẹ akp'ọhịn ẹbụọ, wẹ nọzị ghahunmẹ obodo hụ mgbe ohu, kinzi azụụn shi ebe wẹ ziẹntọ. Wẹ nọ mẹsọnmẹ ihiẹnni ọrọgbọ akp'ọhịn isin.

¹⁵ Nke akp'ọhịn ẹsa, wẹ nọ zọlihi, ghahunmẹ obodo hụ kẹ wẹ dọn e mẹ mbụ, kanị mgbe ẹsa kẹ wẹ ghahunmẹ ẹ ụhụọhịn hụ. Ụhụọhịn hụ sụọ kẹ wẹ ghahunmẹ obodo hụ mgbe ẹsa.

¹⁶ Hụn mẹ ẹ mgbe ẹsa, ogẹn ndị nchụn-ẹjan ahụn gi gbu opi (ọdụ) wẹ, Joshụa nọ sị ndị Izrẹlụ, “Yi ni oro!! Ni Osolobuẹ e yegụọ ụnụ obodoni mẹri!

¹⁷ Wẹ k'e gikwọ obodo Jẹriko lẹ ihiẹn ile rịn'a kwanị Osolobuẹ ghahanị itikpọchanrịnnị wẹ. Rehabụ ịgbaraja sụọ k'a họdụ, ya lẹ ndị ile ya lẹ wẹ rị iwe ẹ, makẹni o zuemẹ ndị ẹnyi zi d'e lele obodo hụ.

¹⁸ Ka kpachanpụkwọ nị ẹnya makẹ ihiẹn ndịnị wẹ wechanrịngụ kwanị Osolobuẹ gha a la ụnụ ẹnya, amamgbe ụnụ e weri hụn ọwụlẹ imẹ wẹ, ụnụ lẹ enwẹn ụnụ e họnrin ihiẹn wẹ jẹnkọ d'e tikpọchanrịn. Makẹni, ụnụ mẹ ẹ, ụnụ e mẹ igunrun Izrẹlụ ile họnrin ihiẹn wẹ sikọ d'e tikpọ, gi ẹ buhẹni wẹ nsọngbu.

¹⁹ Kẹ siliva lẹ goru ile kẹ ihiẹn igwe-bronzu lẹ igwe-mmaka ile k'a wụchanrịn ihiẹn rị nsọ wẹ sikọ d'a latọnị Osolobuẹ, wẹ k'e burịrị wẹ che ebe w'e dọnmẹ ihiẹn Osolobuẹ.”

²⁰ Mgbe opi ndị ahụn gi nwan hanzị, ndị Izrẹlụ nọ yi oro. Hụn opi ndị ahụn gihụ han, e yi wẹ okẹn oro, mgbọn hụ nọ ziẹntu; onyẹ ọwụlẹ imẹ ndị-agha hụ nọ zụnban imẹ obodo, onyẹ-onyẹ lẹ ebe ọ rị; ya wẹ nọ weri obodo hụ.

²¹ Ya wẹ nọ we obodo hụ kwanị Osolobuẹ, gi ọpịa-agha gbuchanrịn ihiẹn ile rị ndụn imẹ ẹ: kẹ ikẹnnyẹ kẹ ikpoho, kẹ ikoro kẹ ẹgẹdi, kẹ efin kẹ atụnrụn lẹ ewu kẹ jaki.

²² Ya Joshụa nọ sị ikẹnnyẹ ẹbụọ hụ jẹn d'e gi nzuzue lele kẹ alị hụ rị, “Banye ni nwan iwe ịgbaraja hụ d'e wepụha a, ya lẹ ndị nke ẹ ile; mẹ ni ihiẹn ụnụ gi ẹfan Osolobuẹ kwe ẹ nkwa.”

²³ Ya ikorọbịa hụ lele alị hụ nọ banye, wepụha Rehabụ lẹ nẹdi ẹ lẹ nnẹ ẹ lẹ umunẹ ẹ ikẹnnyẹ lẹ ndị nke ẹ ile. Wẹ nọ wepụhachanrịn ikpụlọ a ile, bugụ wẹ tọ ụzọ ohu, ẹhụ ebe ndị Izrẹlụ ziẹntọ.

²⁴ Wẹ nọ dụnchanrịn obodo hụ lẹ ihiẹn ile rị imẹ ẹ ọkụn; siliva lẹ goru lẹ ihiẹn wẹ gisọnmẹ igwe-bronzu lẹ igwe-mmaka mẹmẹ sụọ kẹ wẹ latọ, bu wẹ che ebe w'e dọnmẹ ihiẹn imẹ ụlọ Osolobuẹ.

²⁵ Kanị Joshụa egbuni ịgbaraja hụ wụ Rehabụ lẹ ikpụlọ nẹdi ẹ lẹ ndị nke ẹ ile, makẹni Rehabụ zuemẹ ndị Joshụa zi d'e gi nzuzue lele kẹ alị Jẹriko nọ. Rehabụ bikwọ nwan igunrun ndị Izrẹlụ d'e ru tannị.

²⁶ Ogẹn hụ, Joshụa nọ bụtọ ọnụnị, “Onyẹ rụndọnzi obodoni wụ Jẹriko, o họnrin onyẹ Osolobuẹ bụ ọnụ: o gbe iyetọ a, nwa okẹnnyẹ ẹ ibuzọ a nwụnhụn; o yekin ọnụ-mgbọn ẹ, okẹnnyẹ ikpanzụụn a a nwụnhụn.”

²⁷ Osolobuẹ nọyeni Joshụa, ẹfan a hụ a kpọ alị ile.