Joshụa 4 - Ika

Isi Nke Ẹnọ E Tumẹ Wẹ Ihiẹn-nnyanhan Imẹ Alị Gil'galụ

¹ Ogẹn ndị alị Izrẹlụ ile gi fetuchanrịngụ Iyi-Jọdanị, Osolobuẹ nọ sị Joshụa,

² “Gha imẹ wẹ họrị ikẹnnyẹ mmẹbụọ — ebọn-ohu onyẹ-ohu, ebọn-ohu onyẹ-ohu;

³ sị wẹ gha etintinnaị Iyi-Jọdanị, ebẹhụ ndị nchụn-ẹjan wuzo daị, buru ọmụma mmẹbụọ, ụnụ e bughafe wẹ, bu wẹ tọ ebe ụnụ jẹnkọ d'a nọdị imẹ uhinhinni.”

⁴ Ya Joshụa nọ kpọkikomẹ ikẹnnyẹ mmẹbụọ ahụn ọ họtọ imẹ ndị Izrẹlụ, ebọn-ohu onyẹ-ohu, ebọn-ohu onyẹ-ohu.

⁵ Ọ nọ sị wẹ, “Shi ni ihun Ẹkpẹti Osolobuẹ wụ Chuku ụnụ, ebẹhụ ọ rị etintinnaị Iyi-Jọdanị; onyẹ-onyẹ y'a bu ọmụma ohu-ohu che isi-uvun kẹ ebọn rị Izrẹlụ han ọda,

⁶ kẹni ụnụ gi ọmụma ndị ahụn a nyanhan ihiẹnni mẹni. Ihun, ụmụ ụnụ jụ ụnụ, ‘Kị ọmụma ndịnị wụ?’

⁷ Ụnụ sị wẹ nị mirin Jọdanị hubehi kẹ Ẹkpẹti-nkwerigbama Osolobuẹ banhan. Ogẹn o gi fetukọ Iyi-Jọdanị, mirin Jọdanị nọ kụsị. Ọmụma ndịnị k'a wụrụnị ndị Izrẹlụ ihiẹn-nnyanhan jẹnrin ejẹn.”

⁸ Ya ndị Izrẹlụ nọ mẹhụ kẹ Joshụa dọn gwa wẹ, gha etintinnaị Iyi-Jọdanị weri ọmụma mmẹbụọ, ole ahụn ebọn Izrẹlụ rị, nọkẹ kẹ Osolobuẹ dọn gwa Joshụa; wẹ nọ bu wẹ shi ebe wẹ ziẹntọ, ziẹn wẹ tọ ebẹhụ.

⁹ Joshụa e tumẹzighọ ọmụma mmẹbụọ etintinnaị Iyi-Jọdanị ebẹhụ ndị nchụn-ẹjan bu Ẹkpẹti-nkwerigbama te wuzo. Ọmụma ndị ahụn hụkwọ nwan ebẹhụ d'e ru tannị.

¹⁰ Ndị nchụn-ẹjan hụn bu Ẹkpẹti hụ turu etintinnaị Jọdanị d'e ru ni ndị Izrẹlụ e mẹchanrịn ihiẹn ile Osolobuẹ gwa Joshụa, nọkẹ kẹ Mozizi dọn gwa Joshụa ya. Ndị Izrẹlụ hụhụ ahụhụ fetu;

¹¹ wẹ ile e fetugụhụ, Ẹkpẹti Osolobuẹ lẹ ndị nchụn-ẹjan nọ pụha azụụn hụn ẹbọ hụ idẹnya ndị Izrẹlụ ile.

¹² Ndị ebọn Rubẹni lẹ ebọn Gadị lẹ mgbube ebọn Manasẹ, ndị ahụn nwọnhẹngụ alị, bu ihiẹn-ọgụn wẹ, buruni ndị Izrẹlụ ile ụzọ ogẹn wẹ gi fetu — nọkẹ kẹ Mozizi dọn gwa wẹ mbụ;

¹³ ihiẹn nọ kẹ madụ nnụ ọgụn-isẹn (40,000) bu ihiẹn-ọgụn nọ ihun Osolobuẹ fetu, shi alị-aradan Jẹriko d'a lụ agha.

¹⁴ Ụhụọhịn hụ, Osolobuẹ nọ ye Joshụa ọghọ idẹnya ndị Izrẹlụ ile, wẹ nọ gbaye ẹ o we nwụn, nọkẹ kẹ wẹ dọn gbaye Mozizi.

¹⁵ Osolobuẹ nọ sị Joshụa,

¹⁶ “Sị nwan ndị nchụn-ẹjan bu Ẹkpẹti Ashịa-ẹri gha imẹ Iyi-Jọdanị pụha.”

¹⁷ Ya Joshụa nọ nwan sị ndị nchụn-ẹjan, “Gha nị imẹ Iyi-Jọdanị pụha.”

¹⁸ Ya ndị nchụn-ẹjan nọ gha imẹ iyi ahụn pụha, wẹ lẹ Ẹkpẹti-nkwerigbama Osolobuẹ wẹ bu. Hụn ụkụ wẹ gihụ hụatụ alị mmaka, mirin Jọdanị nọ kinhẹn ọnọdị a, pụzị ọnụ k'ọ rị mbụ.

¹⁹ Nke akp'ọhịn iri imẹ ifọn ibuzọ kẹ ndị Izrẹlụ gi fetu Iyi-Jọdanị, ziẹntọ Gil'galụ hụn rị ebe obodo Jẹriko ru ẹbamịn ọwụwa-ẹnyanwụn.

²⁰ Joshụa nọ tumẹ ọmụma mmẹbụọ hụ wẹ gha Iyi-Jọdanị buru ye imẹ obodo Gil'galụ,

²¹ sị ndị Izrẹlụ, “Ihun, ụmụ ụnụ jụ ndị nẹdi wẹ, sị, ‘Kị ọmụma ndịnị wụ?’

²² Sị nị wẹ, ‘Iyi-Jọdanị hubehi, ndị Izrẹlụ nọ gha alị kọrọnị fetu ẹ.’

²³ Makẹni Osolobuẹ wụ Chuku ụnụ mẹ alị kọrọhịnị ụnụ imẹ mirin Jọdanị d'e ru ni ụnụ e fetuchanrịn. Osolobuẹ wụ Chuku ụnụ mẹ iyi-Jọdanị ihiẹn o mẹ Ohimin-Ufie, hụn o mẹzi mirin ẹ kọrọhịnị ẹnyi d'e ru ni ẹnyi e fetuchanrịn a.

²⁴ O mẹ ẹ kẹni ndị ile rị ụwa hụn ụzọ marịn nị Osolobuẹ nwọn ikẹn ọda-ọda, lẹzi nị ụnụ tụ egun Osolobuẹ wụ Chuku ụnụ jẹnrin ejẹn.”