Joshụa 3 - Ika

Isi Nke Ẹtọ Ndị Izrẹlụ E Fetu Iyi-Jọdanị

¹ Eki e fọn ụzụtụntụn, Joshụa lẹ ndị Izrẹlụ ile nọ buli, gha Shitim pụ, shi mkpẹnrẹn Iyi-Jọdanị, wẹ nọ ziẹntọgụ ebẹhụ, wẹ kebe fetu.

² O zu akp'ọhịn ẹtọ, ndị-isi Izrẹlụ nọ ghagbarị ebahụn wẹ ziẹntọ,

³ gwakọ wẹ ihiẹn ndịnị: “Ụnụ hụn Ẹkpẹti-nkwerigbama Osolobuẹ wụ Chuku ụnụ kẹ ndị nchụn-ẹjan wụ ndị ebọn Livaị, bu ẹ, gha nị ebe ụnụ rị buli, sọnmẹ ẹ.

⁴ Wẹ k'a ghọsị ụnụ ụzọ, ebe omẹni ụnụ aghatuni ụzọnị mbụ. Ka anọkunmẹlẹ ni Ẹkpẹti-nkwerigbama: ẹgbata ụnụ lẹ ịya k'a rị ihiẹn nọ kẹ amụkụ iri kwasị ọgụn-mmẹtọ kwasị nnụ.”

⁵ Ya Joshụa nọ sị ndị Izrẹlụ, “Dọn ni enwẹn ụnụ nsọ, makẹni ekile, Osolobuẹ k'e mẹ okẹn-ihiẹn a tụ ẹnya imẹ igunrun ụnụ.”

⁶ Joshụa nọzị sị ndị nchụn-ẹjan, “Buru ni Ẹkpẹti-nkwerigbama, ụnụ e buruni ndị Izrẹlụ ile ụzọ.” Ya wẹ nọ buli, buruni ndị Izrẹlụ ile ụzọ.

⁷ Osolobuẹ nọ sị Joshụa, “Tannị kẹ m k'e bushimẹ i elu idẹnya ndị Izrẹlụ ile, kẹni wẹ marịn nị m nọyen'i kẹ m dọn nọyeni Mozizi.

⁸ Sị ndị nchụn-ẹjan bu Ẹkpẹti-nkwerigbama, ‘Ụnụ ru mkpẹnrẹn mirin Jọdanị, jẹn ni d'e wuzo imẹ mirin.’ ”

⁹ Ya Joshụa nọzị sị ndị Izrẹlụ, “Bịa nị d'e gọn ntịn ihiẹn Osolobuẹ wụ Chuku ụnụ kụ:

¹⁰ Ọnwan kẹ ụnụ e gi marịn nị Osolobuẹ rị ndụn rị imẹ igunrun ụnụ, marịn n'o k'a chụpụrịrịnị ụnụ ndị Kenaanị lẹ ndị Hẹti lẹ ndị Hivu lẹ ndị Pẹrẹzi lẹ ndị Gẹgashị lẹ ndị Amọ lẹ ndị Jebusu.

¹¹ Lee n'ẹ: Ẹkpẹti-nkwerigbama Onyẹ nwọn ụwa ile jẹnkọ nwan d'e buruni ụnụ ụzọ banye Iyi-Jọdanị.

¹² Họtọ nị nwan ikẹnnyẹ mmẹbụọ imẹ ebọn ile rị Izrẹlụ, onyẹ ohu-ohu imẹ ebọn.

¹³ Hụn ndị nchụn-ẹjan bu Ẹkpẹti Osolobuẹ, Onyẹ nwọn ụwa ile gihụ zọ ụkụ ye imẹ Iyi-Jọdanị, mirin ẹ hulanị jẹnkọ d'a kụsị, mawuru.”

¹⁴ Ogẹn wẹ gi gha ebe wẹ ziẹntọ buli nị wẹ fetu Iyi-Jọdanị, ndị nchụn-ẹjan bu Ẹkpẹti-nkwerigbama n'ọ buruni wẹ ụzọ.

¹⁵ Ozigbo ndị nchụn-ẹjan bu Ẹkpẹti Osolobuẹ ru Iyi-Jọdanị; ụkụ wẹ mẹtụhụ mirin hụ hụn jun pụ ọnụ k'o dọn e jun ogẹn ahụn wẹ gi a ghọ ihiẹn-ugbo,

¹⁶ mirin hulanị nọ kụsị ebe te ọhụnma-ọhụnma, turu, e jẹn elu ebẹhụ ọ kụsị imẹ obodo Adam hụn nọkunmẹ Zarẹtanị; onwọnzini mirin rị e hushi Ohimin Araba, hụn wụ Ohimin-Nnu. Ya ndị Izrẹlụ nọ gha ebẹhụ bu ihun zinmẹ Jẹriko fetu.

¹⁷ Ndị nchụn-ẹjan bu Ẹkpẹti-nkwerigbama Osolobuẹ wuzo akpakalị kọrọnị imẹ etintinnaị Iyi-Jọdanị, d'e ru ni Izrẹlụ ile a gha akpakalị hụ kọrọnị gi ghafechanrịn Iyi-Jọdanị.