Joshụa 24 - Ika

Isi Nke Ẹnọ Kwasị Ọgụn A Nọ Wẹ Shẹkẹm Kwezi Nkwa Idọnmẹ Iwu Osolobuẹ

¹ Ya Joshụa nọ kpọkikomẹ ebọn Izrẹlụ ile ye imẹ obodo Shẹkẹm. Ọ kpọ ndị-ichẹn lẹ ndị-isi lẹ ndị a han eṅẹn lẹ ndị gisọnmẹ ọkwa imẹ Izrẹlụ, wẹ nọ pụha ihun Osolobuẹ.

² Joshụa nọ sị ndị ahụn ile, “Lee ni ihiẹn Osolobuẹ wụ Chuku Izrẹlụ ku: Mbụ mbụ, ndị nẹdi ụnụ kanị bi nfetu Iyi Yufretisi, fe mmọn-lẹ-Iyi — kẹ Tẹra nẹdi Ebraham lẹ Nahọ.

³ Kanị m nọ gha nfetu Iyi Yufretisi wepụha nẹdi ụnụ wụ Ebraham, duru ẹ ghahunmẹchanrịn alị Kenaanị ile, ye ẹ ụmụ bu ọda. E ye m'ẹ Aziki;

⁴ ye Aziki Jekọpụ lẹ Isọ. M nọ we alị-ugu Sẹẹ ye Isọ, kanị Jekọpụ lẹ ụmụ a nọ jẹnmẹ Ijiptu.

⁵ “M nọ zi Mozizi lẹ Ẹrọnụ ebẹhụ, gi ihiẹn m mẹ imẹ Ijiptu mẹshi ndị Ijiptu ikẹn; o mẹgụ, m nọ wepụha ụnụ.

⁶ “Ogẹn m gi gha imẹ alị Ijiptu wepụha ndị nẹdi ụnụ kanị, ụnụ e ru Ohimin Ufie, ndị Ijiptu nọ gi ụgbọ-ẹshin lẹ ndị gi ẹshin a lụ agha chụru wẹ Ohimin ahụn.

⁷ Kanị, wẹ nọ kwanghọsị Osolobuẹ n'o yeni wẹ ẹka, ọ nọ bu ishi che ẹgbata ụnụ lẹ ndị Ijiptu; mẹ ohimin rukpumẹ wẹ, wẹ nọ ragbu enwẹn wẹ. Ụnụ e gighọ ẹnya ụnụ hụn ihiẹn m mẹ ndị Ijiptu. Ọhụn e mẹgụ, ụnụ nọ bibie imẹ atụ.

⁸ “Ya m nọ wẹhẹ ụnụ alị ndị Amọ ndị bi ẹbamịn ọwụwa-ẹnyanwụn Iyi Jọdanị. Wẹ nọ lụsọn ụnụ agha, kanị m nọ we wẹ ye ụnụ mẹri. E gbupụnị m ụnụ wẹ, ụnụ nọ weri alị wẹ.

⁹ Ogẹn Balakị nwa Zipọ hụn wụ eze Mụabụ gi kwademẹ nọ lụsọn Izrẹlụ agha, o zi wẹ kpọ Balaam nwa Bioru n'ọ bụ ụnụ ọnụ.

¹⁰ Kanị, egọnni m Balaam ntịn; ọ nọ nwan mẹ ni ngọzi ngọzi k'ọ gọzi ụnụ; m nọ gbapụha ụnụ ẹka a.

¹¹ “Ụnụ nọ nwan fetu Iyi Jọdanị, pụha Jẹriko. Ndị Jẹriko nọ lụsọn ụnụ agha, ẹrịra kẹ ndị Amọ lẹ ndị Pẹrẹzi lẹ ndị Kenaanị lẹ ndị Hẹti lẹ ndị Gẹgashị lẹ ndị Hivu lẹ ndị Jebusu dọnzi lụsọn ụnụ agha, kanị, m nọ we wẹ ye ụnụ mẹri.

¹² M nọ zi egun n'o buruni ụnụ ụzọ nọkẹ ebu d'a chụpụgụnị ụnụ wẹ — kẹ ndị-nze Amọ ẹbụọ hụ. Ẹlẹ ọpịa-agha ụnụ mọbụ ụta kẹ ụnụ gi mẹ ẹ.

¹³ M nọ ye ụnụ ugbo ụnụ rụnlẹni, ye ụnụ obodo ndị ụnụ tụnlẹni; ụnụ bi nwan imẹ wẹ, e ri vaịnị lẹ olivu ụnụ kụnlẹni.

¹⁴ “Joshụa nọzị sị: Gbaye ni nwan Osolobuẹ, ụnụ e gichanrịn obi ụnụ fe ẹ. Tuhuni mmọn-lẹ-iyi ndị nẹdi ụnụ kanị fe nfetu Iyi Yufretisi lẹ imẹ Ijiptu, ụnụ e fe Osolobuẹ.

¹⁵ Kanị, omẹni ife Osolobuẹ a sụọnị ụnụ, hanrịn nị nwan tannị onyẹ ụnụ sikọ d'e fe: kẹ mmọn-lẹ-iyi ndị nẹdi ụnụ kanị fe nfetu Iyi Yufretisi kẹ ụnụ k'e fe ra mmọn-lẹ-iyi ndị Amọ hụn ụnụ bi alị wẹ. Kanị, nke mmẹ lẹ ezi-lẹ-ụlọ m, Osolobuẹ kẹ ẹnyi k'e fe.”

¹⁶ Ya ndị Izrẹlụ nọ sị, “W'a sọ! Ẹnyi alatọkọ Osolobuẹ d'e femẹ mmọn-lẹ-Iyi!

¹⁷ Osolobuẹ wụ Chuku ẹnyi gha alị Ijiptu, alị ahụn ẹnyi nọ wụ igbọn, wepụha ẹnyi lẹ ndị nẹdi ẹnyi; ịya nọ idẹnya ẹnyi rụn ihiẹn ndị ahụn a tụ ẹnya ọda-ọda o gi ghọsịsọnmẹ ikẹn ẹ; ịya chemẹ ẹnyi ijẹn ahụn ile ẹnyi jẹn lẹ ẹka ndị rị alị ile ẹnyi ghasọnmẹ;

¹⁸ Osolobuẹ chụpụzịnị ẹnyi ndị alị ndị ahụn ile, kẹ ndị Amọ bi imẹ alịnị kẹ wẹ ile. Ẹnyi nwẹn k'e fezikwọ Osolobuẹ, makẹni ịya wụ Chuku ẹnyi.”

¹⁹ Kanị Joshụa nọ sị wẹ, “Ụnụ asakọ ẹka fe Osolobuẹ, n'ọ wụkwọ Chuku rị nsọ; Chuku ẹnya a fụ ụfụ k'ọ wụ; ọ gbagharịkọkwọ ụnụ nnupụ-isi lẹ njọ.

²⁰ Ụnụ lakwọ a tọ femẹ mmọn ndị alị ọzọ, o sikọ d'e gbehutọ ẹka, buhẹni ụnụ ntikpọ, gbupụ ụnụ, ọ sụọn'a n'o te gi ẹka rị mma sọn ụnụ.”

²¹ Kanị wẹ nọzị sị Joshụa, “Mba! Osolobuẹ kẹ ẹnyi jẹnkọ d'e fe!”

²² Ya Joshụa nọ sị wẹ, “Ụnụ wụ nwan ọshẹri jẹnkọ d'a shịagbu enwẹn ụnụ ẹri, nị ụnụ hanrịn nị ụnụ k'e fe Osolobuẹ.” Wẹ nọ sị, “Ẹnyi wụ ọshẹri.”

²³ Ya kẹ Joshụa nọ sị, “Ma nị nwan mmọn-lẹ-iyi ndị alị ọzọ hụn rị igunrun ụnụ tuhu, ụnụ e bu obi ụnụ tọnị Osolobuẹ wụ Chuku Izrẹlụ.”

²⁴ Wẹ nọ sị Joshụa, “Osolobuẹ wụ Chuku ẹnyi kẹ ẹnyi k'e fe; ịya kẹ ẹnyi k'e humẹni isi.”

²⁵ Joshụa nọ mẹ wẹ kwezi Osolobuẹ nkwa ụhụọhịn ahụn, nọ Shẹkẹm ebẹhụ yisọnmẹni wẹ uhi lẹ iwu.

²⁶ Joshụa nọ de ihiẹn ndịnị ye imẹ Ẹkụkwọ Iwu Osolobuẹ. Ọ nọ weri ọmụma hi-ogbe, bu ẹ tumẹ okpuru osisi okuu hụ rị ẹhụ Ọdụ-nsọ Osolobuẹ.

²⁷ Joshụa nọ sị wẹ ile, “Lee n'ẹ, ọmụmanị k'a shịagbu ẹnyi ẹri. Ọ nụgụọ oku ile Osolobuẹ gwa ẹnyi; ya k'a shịagbu ụnụ ẹri, amamgbe ụnụ e gi ntụ sọn Osolobuẹ ụnụ.”

²⁸ Ya Joshụa nọ gbashịa wẹ, onyẹ-onyẹ nọ lashi ebe wẹ keye ẹ.

Ọnwụn Joshụa

²⁹ Ihiẹn ndịnị e mẹgụ, odibo Osolobuẹ wụ Joshụa nwa Nọnụ nọ nwụnhụn ebe ọ rị nwa ahụa iri kwasị ọgụn-isẹn.

³⁰ Wẹ nọ li ẹ ye imẹ alị wẹ keye ẹ, hụn wụ ukuu ẹ, imẹ Timnatị-Sẹra rị alị-ugu Ifrem, ẹbamịn-ugu Ugu-Gaashị.

³¹ Ndị Izrẹlụ fechanrịn Osolobuẹ ọrọgbọ ahụn ile Joshụa lẹ ndị-isi Joshụa latọ gi rị ndụn — ndị gi ẹnya hụn ihiẹn ile Osolobuẹ mẹni Izrẹlụ.

E Li Wẹ Ọkpụkpụ Josẹfụ

³² Ọkpụkpụ Josẹfụ hụn ndị Izrẹlụ gha Ijiptu bulụa, imẹ alị hụ rị Shẹkẹm hụn Jekọpụ gi akpụrụ siliva ọgụn isẹn ṅọnnarịn ụmụ Hamọ nẹdi Shẹkẹm kẹ wẹ liye wẹ, wẹ nọ wụrụ ukuu ụmụ Josẹfụ.

Ọnwụn Onyẹ nchụn-ẹjan Wụ Ẹliẹza Nwa Ẹrọnụ

³³ Ẹliẹza nwa Ẹrọnụ a nwụnhụn, wẹ nọ li ẹ ye Gibia, ebe wẹ keye nwa a wụ Finẹhasị, imẹ alị-ugu Ifrem.