Joshụa 22 - Ika

Isi Nke Ẹbụọ Kwasị Ọgụn Ndị Rubẹni, Gadị Lẹ Mgbube Manasẹ A Lakin Nfetu Jọdanị

¹ Ya Joshụa nọ kpọ ebọn ndị ahụn bu ụzọ nwọnhẹn alị ẹbamịn ọwụwa-ẹnyanwụn Iyi Jọdanị nị wẹ ile d'e fetu: ndị Rubẹni lẹ ndị Gadị lẹ mgbube ebọn Manasẹ,

² sị wẹ, “Ụnụ e mẹgụọ ihiẹn ile odibo Osolobuẹ wụ Mozizi sị ụnụ mẹ; ụnụ e humẹgụọzịnị m isi, mẹchanrịn ihiẹn ile m sị ụnụ mẹ.

³ Ụnụ alanị ndị Izrẹlụ ibe ụnụ tọ ọrọgbọnị ile, kama, ụnụ a rụnzugụọ ọrụn Osolobuẹ wụ Chuku ụnụ ye ụnụ rụn.

⁴ Hụnnị Osolobuẹ wụ Chuku ụnụ yegụ nwan umunẹ ụnụ ezumikẹn k'o dọn kwe wẹ nkwa, lakin ni nwan iwe ụnụ, imẹ alị ahụn odibo Osolobuẹ wụ Mozizi ye ụnụ nfetu Iyi Jọdanị.

⁵ Ka dọnrinkwọ nị ẹnya mẹsọnmẹ ihiẹn odibo Osolobuẹ wụ Mozizi gwa ụnụ lẹ iwu o ye ụnụ, nị ụnụ sikọ d'e nwọn ihiẹn-ọsụsụọ Osolobuẹ wụ Chuku ụnụ, a gha ụzọ a ile, e mẹ ihiẹn o ku, e kwọnkẹnmẹ ẹ, e gi obi ụnụ ile lẹ umẹ-ndụn ụnụ ile e fe ẹ.”

⁶ Ya Joshụa nọ gọzi wẹ, zi wẹ la, wẹ nọ lama iwe wẹ.

⁷ Mozizi ye mgbube Manasẹ alị ẹgbẹrẹ Bashanị ẹbamịn ọwụwa-ẹnyanwụn Iyi-Jọdanị, Joshụa e ye mgbube Manasẹ họdụnị alị ẹbamịn ọdịdan-ẹnyanwụn Iyi Jọdanị k'o dọn ye ndị Izrẹlụ ibe wẹ họdụnị. Ogẹn Joshụa gi jẹnkọ d'e zi wẹ la, ọ nọ mẹni wẹ ekpere,

⁸ sị, “Kpọnrin ni ihiẹn ndị ahụn ile lama: anụ bu ọda lẹ siliva lẹ goru lẹ igwe-bronzu lẹ igwe-mmaka lẹ ẹkwa buni, ụnụ lẹ umunẹ ụnụ e keri wẹ nị ịya kẹ ụnụ bulụa agha ụnụ jẹn d'a lụsọn ndị iṅẹnrẹn ụnụ.”

⁹ Ya ndị Rubẹni lẹ ndị Gadị lẹ mgbube Manasẹ ndị ẹbamịn ọwụwa-ẹnyanwụn Iyi-Jọdanị nọ la ndị Izrẹlụ ibe wẹ tọ imẹ Shilo rị Kenaanị, shi alị Gilẹdị, azụụn nke wẹ hụn ru wẹ ẹka kẹ Osolobuẹ dọn gwa Mozizi.

Ukpo Nchụn-ẹjan Gẹlilọtụ

¹⁰ Ogẹn ebọn ẹbụọ-lẹ-mkpikpi ahụn gi ru ẹgbẹrẹ Gẹlilọtụ nọkunmẹ Jọdanị nkọ Kenaanị, nị wẹ d'e fetu Iyi-Jọdanị, wẹ nọ tụn ukpo nchụn-ẹjan hi-ogbe ye ẹhụ Jọdanị ebẹhụ.

¹¹ Ogẹn ndị Izrẹlụ họdụnị gi nụ n'a tụngụọ wẹ ukpo nchụn-ẹjan ye okẹn wẹ lẹ alị Kenaanị, imẹ Gẹlilọtụ nọkunmẹ Iyi Jọdanị, azụụn nke ndị Izrẹlụ họdụnị,

¹² Izrẹlụ ile họdụnị nọ zu imẹ Shilo nị wẹ jẹn d'a lụsọn wẹ agha.

¹³ Izrẹlụ họdụnị nọ zijẹn onyẹ nchụn-ẹjan wụ Finẹhasị nwa Ẹliẹza ẹgbẹrẹ Gilẹdị d'e kunrun ndị Rubẹni lẹ Gadị lẹ mgbube ebọn Manasẹ wẹ lẹ wẹ wị.

¹⁴ Ịya lẹ ndị-isi iri kẹ wẹ zi, onyẹ-ohu ebọn-ohu; onyẹ-onyẹ wụsọnmẹ onyẹchẹn ikpụlọ imẹ Izrẹlụ.

¹⁵ E ru wẹ Gilẹdị, kunrun ndị Rubẹni, ndị Gadị lẹ mgbube Manasẹ, wẹ nọ sị wẹ,

¹⁶ “Ndị nke Osolobuẹ ile sị, ‘Kị wụ orireni ụnụ rị e re Osolobuẹ Izrẹlụ? Nanị ụnụ dọn nwan gbakitọ Osolobuẹ azụụn, rụnrụn ukpo nchụn-ẹjan gi nupụ isi okpuru Osolobuẹ?

¹⁷ Njọ hụn ẹnyi mẹ imẹ Pioru ehini ẹnyi? Ẹnyi eke ghagụdẹ imẹ njọ hụ ọnwụn gi gbumẹ ndị nke Osolobuẹ pụha —

¹⁸ ụnụ a gbakitọmazị nwan Osolobuẹ azụụn? Ụnụ nupụ nị Osolobuẹ isi tannị, o ru ekile o gi iwe sọn Izrẹlụ ile.

¹⁹ Omẹni alị ụnụ nwọnhẹn rụ arụ, nị ya haịn ụnụ gi tụn ihiẹnni, bịa nị alị Osolobuẹ, ebeni Ọdụ-Osolobuẹ rị, ụnụ e du ẹnyi keri alị. Ka enupụkwọlẹni ni Osolobuẹ isi mọbụ nupụnị ẹnyi isi tụnrụnmazị ukpo nchụn-ẹjan ọzọ karị ukpo nchụn-ẹjan Osolobuẹ wụ Chuku ẹnyi.

²⁰ Ogẹn hụ Ekanị nwa Zẹra gi latọ ihiẹn Osolobuẹ ku, weri ihiẹn wẹ gichanrịn kwanị Osolobuẹ, ẹlẹ ọnụma lẹ afụnfụn kẹ Osolobuẹ gi sọn Izrẹlụ ile? Ndị ọzọ e gizighọ ufiri njọ a nwụn.’ ”

²¹ Ya ndị Rubẹni lẹ ndị Gadị lẹ mgbube Manasẹ hụ nọ za ndị-isi hụ, sị,

²² “Osolobuẹ wụ Chuku hụn wụ Chuku nkesi; Osolobuẹ wụ Chuku hụn wụ Chuku nkesi!! Ọ marịnghọ! Ndị Izrẹlụ lẹ enwẹn wẹ wẹ marịnzịkwọ. Omẹni nnupụ-isi mọbụ nị ẹnyi gi ẹ pa oku Osolobuẹ haịn ẹnyi gi mẹ ihiẹnni, ya edọnmẹlẹ ẹnyi ndụn tannị.

²³ Omẹni ẹnyi tụn ukpo nchụn-ẹjan kẹni ẹnyi gi latọ Osolobuẹ, gi ẹ chụnma ẹjan w'a dụn ọkụn mọbụ ẹjan-ọka mọbụ ẹjan-ekele, Osolobuẹ lẹ enwẹn ẹ ya kwọndọn ẹnyi!

²⁴ Mba! Egun ihiẹn rị ihun kẹ ẹnyi gi mẹ ẹ — egun nị ụmụ ụnụ nwọn ikẹn sị ụmụ ẹnyi, ‘Kị ụnụ lẹ Osolobuẹ wụ Chuku Izrẹlụ gi,

²⁵ ụnụ ndị Rubẹni lẹ Gadị! Osolobuẹ e gigụọ Iyi Jọdanị họnrin okẹn ẹnyi lẹ ụnụ! Onwọnni ihiẹn biri ụnụ lẹ Osolobuẹ.’ Ogẹn ahụn, ụmụ ụnụ nwọn ikẹn gi ẹ mẹ ụmụ ẹnyi febehi Osolobuẹ.

²⁶ Ya ẹnyi nọ nwan sị, ‘Nị ẹnyi tụn nị nwan ukpo nchụn-ẹjan: ẹlẹkwọ hụn w'a chụnye ẹjan w'a dụn ọkụn mọbụ hụn w'a chụnye ẹjan ọzọ ọwụlẹ,

²⁷ kama, n'ọ wụrụ ọshẹri ẹgbata ẹnyi lẹ ụnụ lẹ ẹgbata agbọ ile lalanị, nị ẹnyi sikọ d'e fesọnmẹ Osolobuẹ ihun ẹ, a chụnyen'ẹ ẹjan w'a dụn ọkụn lẹ ẹjan ndị ọzọ lẹ ẹjan-ekele. Ihun, ọ nịkọzị ụmụ ụnụ sị ụmụ ẹnyi, “Onwọnni hụn biri ụnụ lẹ Osolobuẹ.” ’

²⁸ Ẹnyi nọ sị, ‘O ru ihun, n'a gwa wẹ ẹnyi mọbụ ụmụ ẹnyi oku ahụn, ẹnyi sị wẹ: Lee ukpo nchụn-ẹjannị, hụn ndị nẹdi ẹnyi wẹ kanị leri ukpo nchụn-ẹjan Osolobuẹ tụn. Atụnkwọnị w'a nị wẹ gi ẹ chụn ẹjan w'a dụn ọkụn mọbụ ẹjan ndị ọzọ, kanị, n'ọ wụrụ ọshẹri ẹgbata ẹnyi lẹ ụnụ.’

²⁹ W'a sọ! Onwọnni ogẹn ẹnyi e gi pa oku Osolobuẹ, gbakitọ a azụụn, rụnma ukpo w'a nọ chụn ẹjan w'a dụn ọkụn lẹ ẹjan-ọka lẹ ẹjan ndị ọzọ karị ukpo nchụn-ẹjan Osolobuẹ wụ Chuku ẹnyi hụn wuzo ihun Ọdụ-nsọ a.”

³⁰ Ogẹn onyẹ nchụn-ẹjan wụ Finẹhasị lẹ ndị-isi Izrẹlụ hụ gi nụ ihiẹn ndị Rubẹni lẹ ndị Gadị lẹ ndị Manasẹ ku, ẹfọ nọ jun wẹ.

³¹ Ya kẹ onyẹ nchụn-ẹjan wụ Finẹhasị nwa Ẹliẹza nọ sị ndị Rubẹni lẹ ndị Gadị lẹ ndị Manasẹ, “O wegụọ nwan ẹnyi ẹnya nị Osolobuẹ a lanị Izrẹlụ tọ, makẹni ụnụ emẹni eje-ihiẹnni gi re Osolobuẹ; ụnụ a zụọpụhagụọ nwan Izrẹlụ imẹ ọnụma Osolobuẹ te k'e gi sọn ẹnyi ile.”

³² Ya onyẹ nchụn-ẹjan wụ Finẹhasị nwa Ẹliẹza lẹ ndị-isi hụ nọ gha alị Gilẹdị wẹ jẹn d'a hụn ndị Rubẹni lẹ ndị Gadị lakin Kenaanị; wẹ nọ gwa ndị Izrẹlụ kẹ wẹ jẹn.

³³ Ozi wẹ nọ jun ndị Izrẹlụ ẹfọ, a ja wẹ Osolobuẹ mma; ekuzini wẹ oku ịlụsọn wẹ agha tikpọ alị hụ ndị Rubẹni lẹ ndị Gadị bi.

³⁴ Ndị Rubẹni lẹ ndị Gadị nọ ye ukpo nchụn-ẹjan hụ ẹfan, “nị ọshẹri k'ọ wụ ẹgbata ẹnyi nị Osolobuẹ kẹ ẹnyi e fe.”