Joshụa 20 - Ika

Isi Nke Ọgụn Obodo Onyẹ Ọ rụnahịn Gbu Ịhịan A Gbashi

¹ Ya Osolobuẹ nọ sị Joshụa,

² Sị ndị Izrẹlụ họpụhasọnmẹ obodo-mgbaban kẹ m dọn gwa ụnụ ghahanị Mozizi,

³ kẹni onyẹ ọ rụnahịn gbu ịhịan hụn ụzọ gbashi ebẹhụ, wanahịn onyẹ k'e gbugwarịnị ebọn onyẹ o gbu.

⁴ Ọ gbashi hụn ọwụlẹ imẹ obodo mgbaban ndịnị wẹ, o sikọ d'e wuzo ebe wẹ n'e zu ọgwa ọnụ-mgbọn obodo hụ, kọwagụnị ndị-ichẹn obodo hụ k'o jẹn, e webanhan w'a imẹ obodo wẹ, ye ẹ ebe o k'e bi, o sọn wẹ biri.

⁵ Onyẹ hụn k'e gbugwarịnị chọha a, enukọ wẹ hụn ọ rị a ma ikpe yen'ẹ, makẹni hụnyẹ akpachanpụnị ẹnya gbu hụn o gbu, o gini iwe gbu ẹ.

⁶ Hụnyẹ sikọ d'e biri obodo hụ d'e ru mgbe wẹ kin ẹ ikpe imẹ ọgwa lẹ ogẹn onyẹ-isi nchụn-ẹjan rị ogẹn ahụn nwụnhụngụ, o kebe lakin iwe ẹ imẹ obodo hụ ọ gha gbapụha.

⁷ Ya ndị Izrẹlụ nọ wepụha obodo ndịnị: Kẹdẹshi rị Galili imẹ alị-ugu Naf'tali; Shẹkẹm rị alị-ugu Ifrem; Kiriatị-Aba (hụn wụ Hibrọnụ) hụn rị alị-ugu Juda.

⁸ Obodo ndị wẹ wepụha nfetu Iyi-Jọdanị ẹbamịn ọwụwa-ẹnyanwụn Jẹriko wụ ndịnị: Bẹza hụn rị alị-aradan elu-ugu imẹ alị ọkpọ-nkụn rị alị ebọn Rubẹni; Ramọtụ hụn rị imẹ Gilẹdị imẹ alị ebọn Gadị; Golanị hụn rị imẹ Bashanị imẹ alị ebọn Manasẹ.

⁹ Onyẹ Izrẹlụ ọwụlẹ mọbụ abịamabịa ọwụlẹ bi imẹ igunrun wẹ ọ rụnahịn gbu ịhịan nwọn ikẹn gbashi hụn ọwụlẹ imẹ obodo ndị ahụn wẹ wepụha, amamgbe onyẹ k'e gbugwarịnị ebọn onyẹ o gbu a hụn ụzọ gbu ẹ bụ wẹ eke kin ikpe ẹ ọgwa.