Joshụa 2 - Ika

Isi Nke Ẹbụọ Joshụa E Zi Wẹ D'e Gi Nzuzue Lele Alị Jẹriko

¹ Ya Joshụa nwa Nọnụ nọ gha Shitim wẹ rị gi nzuzue zipụ ikẹnnyẹ ẹbụọ, sị wẹ, “Jẹn ni d'e lele alị hụ, tụmadụ Jẹriko.” Ya wẹ nọ jẹnmẹ. E ru w'ẹ, wẹ nọ banye iwe ịgbaraja ohu ẹfan a wụ Rehabụ; wẹ nọ ranhịn ebahụn eki e we fọn.

² Eze Jẹriko nọ nụ: “Marịnkwọ n'o nwọn ndị Izrẹlụ bịa ebeni ẹnyasịnị d'e gi nzuzue lele alịnị.”

³ Ya eze Jẹriko nọ zi ozini jẹnni Rehabụ: “Wepụha ikẹnnyẹ ndị ahụn bịa d'e kunrunn'i, ndị ahụn bịa iwe i, makẹni wẹ bịa d'e gi nzuzue lelehunmẹ alịnị ile.”

⁴ Kanị, okpoho ịhịan e wegụọdẹ ikẹnnyẹ ẹbụọ hụ zuemẹ. Ya ọ nọ sị, “Ezioku-ezioku, a bịaghọ wẹ d'e kunrun m, kanị amarịn m nwan ebe wẹ gha bịa.

⁵ Ogẹn ọhị gi gbama hụn wẹ gi a kpọkin ọnụ-mgbọn obodo kẹ ikẹnnyẹ ndị ahụn pụ. Amarịn m ebe wẹ ghashi. Chụ nị wẹ ozigbo, nị ụnụ kunrunghọ wẹ.”

⁶ (Kanị okpoho ịhịan e wegụọ wẹ shi elu ụlọ, zuemẹ wẹ ye imẹ ikpọn ẹfịfịa-flasị ọ tanma elu ụlọ hụn wẹ gi a tụ oruru linẹ.)

⁷ Ya ikẹnnyẹ ndị ahụn eze zi nọ chụrụ wẹ jẹnmẹ, ghashi ụzọ hụn pụ ebe Iyi-Jọdanị nọlẹni mi. Hụn wẹ gihụ pụ, ndị a kpọkin ọnụ-mgbọn obodo nọ kpọkin ẹ.

⁸ Nị ndị ahụn bịa d'e lele alị ahụn d'a ranhịn, okpoho nwẹn nọ buru wẹ ebe wẹ rị elu ụlọ,

⁹ sị wẹ, “A marịnghọ m nị Osolobuẹ e wegụọ alịnị ye ụnụ lẹ ni egun ụnụ rị a tụ ẹnyi ọda-ọda, nke wụnị ndị ile bi alịnị e dẹnhingụọ makẹni egun ụnụ rị a tụ wẹ.

¹⁰ Makẹni, ẹnyi a nụgụọ kẹ Osolobuẹ dọn mẹ mirin Ohimin-Ufie tahịnị ụnụ ogẹn ụnụ gi gha alị Ijiptu pụla; ẹnyi a marịnzịghọ ihiẹn ụnụ mẹ Sihọnụ lẹ Ọgụ, ndị nze ẹbụọ kị ndị Amọ rị ẹbamịn ọwụwa-ẹnyanwụn Iyi-Jọdanị, kẹ ụnụ dọn gbuchanrịn wẹ.

¹¹ Ogẹn ẹnyi gi nụ a, obi nọ dẹnhin ẹnyi, ndụn ehulehu arịzị onyẹ ọwụlẹ imẹ ẹnyi makẹ ufiri ụnụ. Makẹni Osolobuẹ wụ Chuku ụnụ wụ Chuku kẹ imẹ elu-igwee hụn rị elu kẹ elu-ụwa hụn rị okpuru.

¹² “Kunni ni m nwan ẹfan Osolobuẹ nị ụnụ sikọ d'e mẹ ikpụlọ nẹdi m kẹ ndị nke ụnụ, ebe o mẹ ni e mẹgụọnị m ụnụ ọhụnma kẹ ndị m marịn. Gwanị m ihiẹn m'e gi marịn nkesi

¹³ nị ụnụ egbukọ nẹdi m lẹ nnẹ m, umunẹ m ikẹnnyẹ lẹ umunẹ m ikpoho lẹ ndị nke wẹ ile, lẹ ni ụnụ k'a zụọpụha ẹnyi ẹka ọnwụn.”

¹⁴ Ikẹnnyẹ ahụn nọ sị a, “Ẹnyi rị e gi ndụn ẹnyi e kwe i nkwa n'o nwọnni ihiẹn k'e mẹni ụnụ! Ka sị a mẹni y'e reni ẹnyi, ẹnyi sikọ d'e mẹ i kẹ onyẹ nke ẹnyi ogẹn Osolobuẹ k'e gi ye ẹnyi alịnị.”

¹⁵ Ya Rehabụ nọ gha windo gi ụdọ dọtu wẹ ye azụụn mgbọn hụ, makẹni wẹ rụn ụlọ a nyanma mgbọn obodo hụ.

¹⁶ Ọ gwagụọ wẹ sị, “Gbashi ni ibẹka hụ ugu rịsọnmẹ, amamgbe ndị chọkọ ụnụ a hụn ụnụ. Warị nị ebahụn akp'ọhịn ẹtọ nị wẹ lụahagụ ụnụ kebe lama.”

¹⁷ Wẹ nọ sị a, “Nkwanị ẹnyi kun ẹfan Osolobuẹ kwe i egbukọ ẹnyi

¹⁸ sokpan y'e kẹnmẹghọ ụdọ-ufieni ye windoni ị gha dọtu ẹnyi, lẹni y'e wẹhẹghọ nẹdi i lẹ nnẹ i lẹ umunẹ i ikẹnnyẹ lẹ ikpoho lẹ ikpụlọ nẹdi i ile iwe i ebeni ogẹn ẹnyi e gi bịa d'a lụsọn alịnị agha.

¹⁹ Onyẹ ọwụlẹ imẹ ụnụ hụn k'a gha iwe i pụ ogbe, ẹdeke ẹ rị a isi, ẹka ẹnyi arịa. Kanị wẹ mẹtụ onyẹ ọwụlẹ k'a rị imẹ ụlọnị ẹka, isi ẹnyi k'ọ rị.

²⁰ Kanị, i re ẹnyi, nkwa ẹnyi kwe i egbukọ ẹnyi.”

²¹ Ọ nọ sị, “E kwerighọ m ihiẹn ụnụ ku.” Omẹgụ, ọ nọ sị wẹ, “Ijẹn-ọma nị”; ya ọ nọ kẹnmẹ ụdọ-ufie ahụn ye windo hụ.

²² A pụgụ wẹ ebẹhụ, wẹ nọ shi ibẹka hụ ugu rịsọnmẹ, nọ akp'ọhịn ẹtọ ebẹhụ; ndị chọjẹnni wẹ a chọhunmẹgụ wẹ ụzọ ile, ahụnnị wẹ wẹ, wẹ nọ lụaha.

²³ Ya wẹ ẹbụbụọ nọ buli, gha ugu wẹ warị hidan, fetu Iyi-Jọdanị ebe ọ nọlẹni mi, bịazị d'e kunrun Joshụa nwa Nọnụ; ya wẹ nọ gwachanrịn a kẹ wẹ jẹn.

²⁴ Wẹ sị Joshụa, “Ezioku-ezioku, Osolobuẹ e bugụọ alị hụ ile che ẹnyi ẹka mẹri; ndị ile bi alị hụ e dẹnhingụọ makẹni egun ẹnyi a tụgbugụọ wẹ.”