Joshụa 18 - Ika

Isi Nke Mmẹsatọ A Nọ Wẹ Imẹ Ẹkụkwọ Kebe Alị Họdụnị

¹ Ya ndị Izrẹlụ ile nọ zu imẹ Shilo, nọ ebẹhụ tumẹ Ọdụ Osolobuẹ wụ Ọdụ-ozuzu. E bugụọ wẹ alị ile che okpuru wẹ;

² kanị, ebọn ẹsa imẹ Izrẹlụ eke nwọnhẹn alị.

³ Ya Joshụa nọ sị ndị Izrẹlụ, “Elee ogẹn kẹ ụnụ k'a nọru d'e werisọnmẹ alị hụn Osolobuẹ wụ Chuku ndị nẹdi ụnụ kanị ye ụnụ?

⁴ Wepụha nị ikẹnnyẹ ẹtọ-ẹtọ imẹ ebọn ọwụlẹ. M jẹnkọ d'e zipụ wẹ d'a ghahunmẹ alị họdụnị, detuchanrịn k'ọ nọ lẹ hụn sikọ d'e ru onyẹ-onyẹ ẹka. O mẹgụ e kinhẹn wẹ d'e kunrun m.

⁵ Ụzọ ẹsa kẹ ụnụ sikọ d'e kebe ẹ; Juda sikọ d'a nọsọnmẹ hụn rugụ wẹ ẹka nkọ ẹbamịn ẹka-ekpẹn ẹnyanwụn, ndị ikpụlọ Josẹfụ a nọsọnmẹ hụn rugụ wẹ ẹka nkọ ẹbamịn-ugu.

⁶ Ụnụ kebegụ alị họdụnị ụzọ ẹsa, detu, ụnụ e wẹhẹni m'ẹ ebeni; m sikọ d'a nọ ihun Osolobuẹ wụ Chuku ẹnyi nyan utẹn ẹ gi keni ụnụ ya.

⁷ Ndị Livaị esọnkọ ụnụ keri, makẹni ọrụn nchụn-ẹjan wẹ rị a rụn nị Osolobuẹ wụ ukuu wẹ; Gadị lẹ Rubẹni lẹ mgbube ebọn Manasẹ e nwọnringụọ alị wẹ nfetu Jọdanị, ẹbamịn ọwụwa-ẹnyanwụn Iyi Jọdanị, alị hụ odibo Osolobuẹ wụ Mozizi ye wẹ.”

⁸ Ogẹn ikẹnnyẹ ndị ahụn Joshụa zi gi pụkọ, Joshụa nọ sị wẹ, “Ghahunmẹchanrịn nị alị hụ ile, ụnụ e detu k'ọ nọ, ụnụ e kinhẹn d'e kunrun m, nị m nọ ihun Osolobuẹ imẹ Shilo ebeni nyan utẹn Osolobuẹ gi keni ụnụ ya.”

⁹ Ya ikẹnnyẹ ndị ahụn nọ ghahunmẹchanrịn alị hụ, kebe ya lẹ obodo ndị rịn'a ụzọ ẹsa, detuchanrịn kẹ wẹ nọ; wẹ nọ kinhẹn d'e kunrun Joshụa imẹ Shilo ebe ndị Izrẹlụ ziẹntọ.

¹⁰ Ya Joshụa nọ nọ Shilo nyannị wẹ utẹn Osolobuẹ idẹnya Osolobuẹ, keyesọnmẹ ndị Izrẹlụ alị ebọn, ebọn.

Alị Wẹ Keye Ebọn Bẹnjamini

¹¹ Ebọn Bẹnjamini lẹ ikpụlọ ndị rịn'a kẹ wẹ bu ụzọ keye alị ogẹnni. Alị wẹ keye wẹ rị ẹgbata nke Juda lẹ nke ụmụ Josẹfụ.

¹² Nkọ shi ẹbamịn-ugu, Iyi Jọdanị kẹ alị Bẹnjamini gha bidọn, pụha nkpọtu Jẹriko rị ẹbamịn-ugu; gha ebẹhụ shi alị-ugu ẹbamịn ọdịdan ẹnyanwụn, ghasọnmẹ ẹrịra d'a pụ alị ọkpọ-nkụn Bẹt-Avẹni.

¹³ Ọ nọ gbegi shi ẹbamịn ndịdan-mirin, ghasọnmẹ ẹrịra d'a pụha nkpọtu Luzu (Luzu wụ Bẹtẹlụ), shi Atarọtụ-Ada, elu ugu rị ẹbamịn ndịdan-mirin Bẹt-Họrọnụ Rị Ndịdan.

¹⁴ Ọ nọ ẹbamịn ọdịdan-ẹnyanwụn ugu ahụn rị ihun Bẹt-Họrọnụ Rị Ndịdan gbegi, dọn ihun ẹbamịn ndịdan-mirin, pụha Kiriatị-Baalụ (hụn wụ Kiriatị-Jiarim), obodo ndị ebọn Juda. Ebeni k'o ru nkọ shi ọdịdan-ẹnyanwụn.

¹⁵ Ẹbamịn ndịdan-mirin, alị ebọn Bẹnjamini gha mkpẹnrẹn Kiriatị-Jiarim bidọn, ghasọnmẹ d'a pụha isi-mirin Nẹf'tụa;

¹⁶ gha ebẹhụ kpọtu, shi ukun Ugu hụn bu ihun zinmẹ Ọdanmgbugbu Bẹn-Hinọm, hụn rị ẹbamịn-ugu Ọdanmgbugbu ndị Rẹfa; ọ nọ nwan ghasọnmẹ Ọdanmgbugbu Bẹn-Hinọm, ghakọ nkpọtu obodo ndị Jebusu (wụ Jerusalẹm) d'e ru Ẹn-Rogẹlụ.

¹⁷ Ọ nọ dọn ihun ẹbamịn-ugu, pụha Ẹn-Shẹmẹshi, gha ebẹhụ shi Gẹlilọtụ hụn bu ihun zinmẹ ebe wẹ gha e fetu ugu Adumim, ghasọnmẹ ẹrịra d'e ru Ọmụma Bohanị nwa Rubẹni,

¹⁸ ghapụha nkpọtu ugu bu ihun zinmẹ Araba, gha a ẹbamịn-ugu kpọtu, pụha nwan Araba.

¹⁹ Ọ nọ gha Araba pụha nkpọtu Bẹt-Họg'la ebe ọ nọ bu ihun zinmẹ ẹbamịn-ugu, pụha ebẹhụ ngugu-mirin rị Ohimin Nnu, ebẹhụ Iyi Jọdanị nọ kunrun Ohimin ahụn. Ebeni k'ọ gha ẹbamịn ndịdan-mirin.

²⁰ Iyi Jọdanị k'o ru ẹbamịn ọwụwa-ẹnyanwụn. Ebẹhụ kẹ alị wẹ keye ebọn Bẹnjamini lẹ ikpụlọ ndị rịn'a ghasọnmẹ azụụn ile.

²¹ Obodo ndịnị wụ nke ebọn Bẹnjamini lẹ ikpụlọ ndị rịn'a: Jẹriko, Bẹt-Họg'la lẹ Ẹmẹki-Kẹzizi;

²² Bẹt-Araba, Zẹmaraịm lẹ Bẹtẹlụ;

²³ Avim, Para lẹ Ọfra;

²⁴ Kẹfa-Amọni, Ọfni lẹ Gẹba — obodo mmẹbụọ lẹ ụmụ-alị wẹ;

²⁵ Gibiọnụ, Rama lẹ Biẹrọtụ;

²⁶ Mizpa, Kẹfira lẹ Moza;

²⁷ Rẹkẹm, Ẹpilu lẹ Tarala;

²⁸ Zẹla, Hẹlẹfụ, obodo ndị Jebusu (wụ Jerusalẹm), Gibia lẹ Kiriatị — obodo mmẹnọ lẹ ụmụ-alị wẹ. Ọnwan wụ ukuu ndị ebọn Bẹnjamini lẹ ikpụlọ ndị rịn'a.