Joshụa 17 - Ika

Isi Nke Mmẹsa Alị Wẹ Keye Azụụn Hụn ẹbọ Rị Ebọn Manasẹ

¹ Ọnwan kẹ wẹ keye ebọn Manasẹ, makẹni ịya wụ nwa-ibuzọ Josẹfụ. Ụmụ Makiri nwa-ibuzọ Manasẹ wụkwasị ndị wẹ keye ẹ. Makiri wụ nẹdi Gilẹdị. E keyegụọ wẹ ụfọdụ ụmụ a ẹgbẹrẹ Gilẹdị lẹ Bashanị makẹni wẹ wụ ezigbo ndị-agha.

² Hụnnị wụ nwan hụn wẹ keye ebọn Manasẹ họdụnị, hụn wụ ụmụ Abiẹza, Hẹlẹki, Asriẹlụ, Shẹkẹm, Hẹfa lẹ Shẹmida, ikẹnnyẹ ebọn Manasẹ nwa Josẹfụ; wẹ keye wẹ ya ikp'ụlọ-ikp'ụlọ.

³ Zẹlofẹhadị nwa Hẹfa nwa Gilẹdị nwa Makiri nwa Manasẹ amụnị okẹnnyẹ; ikpoho sụọ k'ọ mụ; ẹfan wẹ wụ Mala, Nụa, Họg'la, Mil'ka lẹ Tẹza.

⁴ Wẹ jẹn d'e kunrun onyẹ nchụn-ẹjan wụ Ẹliẹza lẹ Joshụa nwa Nọnụ lẹ ndị-isi, sị, “Osolobuẹ gwa Mozizi keye ẹnyi ukuu imẹ hụn ru ikẹnnyẹ ebọn ẹnyi.” Ya kẹ Joshụa nọ keye wẹ alị k'o dọn keye umunẹ nẹdi wẹ ikẹnnyẹ, kẹ Osolobuẹ dọn ku.

⁵ Ya alị wẹ ye Manasẹ nọ nwan mẹ ụzọ iri, wezụka ẹgbẹrẹ Gilẹdị lẹ Bashanị, hụn rị nfetu Iyi-Jọdanị,

⁶ makẹni wẹ ye ikpoho Manasẹ ndị ahụn alị kẹ wẹ dọn ye ikẹnnyẹ wẹ. Alị Gilẹdị kẹ wẹ ye ndị Manasẹ họdụnị.

⁷ Alị Manasẹ gha Asha d'e ru Mik'mẹtatị hụn rị ẹbamịn ọwụwa-ẹnyanwụn Shẹkẹm. Alị hụ ruzi ebe ndị bi Ẹni-Tapụa rị ẹbamịn ẹka-ekpẹn ẹnyanwụn.

⁸ (Alị Tapụa wụ nke Manasẹ, kanị obodo Tapụa lẹ enwẹn ẹ hụn rị ebe Manasẹ ru wụ nke ebọn Ifrem.)

⁹ Alị Manasẹ ghasọnmẹ ẹbamịn ndịdan-mirin hụ, pụha Ọdanmgbugbu Iyi udu-mirin Kana. Ifrem nwọnsọnmẹzi obodo imẹ alị Manasẹ, kanị Ọdanmgbugbu Kana ahụn kẹ alị Ifrem ru. Nke Manasẹ rị ẹbamịn-ugu Ọdanmgbugbu hụ, ghasọnmẹ ebahụn d'a pụha Ohimin Uku Mẹditerenia.

¹⁰ Ya wụ, alị Ifrem rị Manasẹ ẹbamịn ndịdan-mirin; Ohimin rị a ẹbamịn ọdịdan-ẹnyanwụn; Asha rị a ẹbamịn-ugu; Isaka rị a ẹbamịn ọwụwa-ẹnyanwụn.

¹¹ Manasẹ nwọnzi ndịnị rị imẹ alị Isaka lẹ Asha: Bẹt-Shanị lẹ Ibliam lẹ ndị bi Dọ, Ẹndọ, Taanakị lẹ Mẹgido, uwẹ ile lẹ ụmụ-alị wẹ. Dọ hụn mẹ wẹ ẹtọ wụzị Nafọtụ.

¹² Kanị ndị Manasẹ asanị ẹka weri obodo ndị ahụn, makẹni ndị Kenaanị bu isi-ikẹn nọdị ẹgbẹrẹ hụ.

¹³ K'osilẹrị, mgbe ndị Izrẹlụ gi kẹnrẹn, wẹ nọ gi ndị Kenaanị họnrin igbọn a rụnnị wẹ ọrụn, kanị achụpụchanrịnnị wẹ wẹ.

Ebọn Josẹfụ Sị Alị Wẹ Keye Wẹ Ehini

¹⁴ Ụmụ Josẹfụ wụ ebọn Ifrem lẹ ebọn Manasẹ sị Joshụa, “Kị haịn i gi ye ẹnyi alịnị sụọ — bụ ẹnyi e bukẹmẹkẹ ọda makẹni Osolobuẹ a gọzigụọ ẹnyi ọda-ọda?”

¹⁵ Joshụa nọ sị wẹ, “Omẹni ụnụ e bukẹ ọda, nị alị-ugu Ifrem a ehini ụnụ, shi ni nwan ẹgboko, d'a sụnrụn alị imẹ alị hụ ndị Pẹrẹzi lẹ ndị adụn-aran Rẹfa bi.”

¹⁶ Ụmụ Josẹfụ nọ sị, “Alịnị lẹ ugu ẹ ndịnị ehini ẹnyi. Kanị ndị Kenaanị ile bi alị-aradan nwọn ụgbọ-ẹshin igwe wẹ gi a lụ agha, kẹ ndị bi Bẹt-Shanị lẹ ụmụ-alị Bẹt-Shanị kẹ ndị bi Ọdanmgbugbu Jezriẹlụ.”

¹⁷ Kanị Joshụa nọzị sị ikpụlọ Josẹfụ wụ ndị Ifrem lẹ ndị Manasẹ, “Ezioku-ezioku, ụnụ bu ọda, nwọn ndụn ọda-ọda, ụnụ ẹlẹ ndị w'e ye alị ohu sụọ;

¹⁸ werizi ni alị-ugunị. Ọ sụọn'a nị o mẹ ẹgboko-ẹgboko, sụnchanpụ n'a werichanrịn, d'e ru ebe o ru; ọ sụọn'a ndị Kenaanị rịn'a ze eze, nwọn ụgbọ-ẹshin igwe, ụnụ k'a s'ẹka chụpụ wẹ.”