Joshụa 15 - Ika

Isi Nke Mmisẹn Alị Wẹ Keye Ebọn Juda

¹ Alị wẹ keye ebọn Juda ikp'ụlọ-ikp'ụlọ ru mkpẹnrẹn Ẹdọm, gha a pụ Atụ Zini hụn rị ẹbamịn ndịdan-mirin.

² Ẹbamịn ndịdan-mirin hụ bidọn ngugu-mirin rị ebe Ohimin Nnu jẹndemẹ ibẹka hụ,

³ ọ ghashi ẹbamịn ndịdan-mirin ugu Akrabim, ọ nọ pụha Zini, ghazị ẹbamịn ndịdan-mirin Kadẹshi-Bania, ghasọnmẹ Hẹzrọnụ d'a pụha Ada hụn rị elu ugu, ọ nọ gbegi shi Kar'ka.

⁴ Ọ nọ jẹnsọnmẹ d'e ru Az'mọnụ, pụha Iyi-udu-mirin Ijiptu; ọ nọ jẹndemẹ Ohimin Uku Mẹditerenia. Ọnwan wụ ebe alị wẹ gha ẹbamịn ndịdan-mirin.

⁵ Ẹbamịn ọwụwa-ẹnyanwụn, Ohimin Nnu k'ọ ghasọnmẹ d'e ru ebe Iyi-Jọdanị nọ kunrun Ohimin Nnu. Ẹbamịn-ugu, ebe Ohimin Nnu nọ gu ngugu, ẹhụ ebẹhụ Iyi-Jọdanị nọ kunrun Ohimin Nnu, kẹ ukuu Juda gha bidọn;

⁶ ọ nọ jẹnsọnmẹ d'e ru Bẹt-Họg'la, d'a pụ ẹbamịn-ugu Bẹt-Araba, gha a d'e ru Ọmụma Bohanị nwa Rubẹni.

⁷ Ọ nọ ghazị Ọdanmgbugbu Ekọ pụha Debẹ, gha ebahụn gbegi shi ẹbamịn-ugu, ghapụha Gil'galụ hụn rị nchetarị ihun ebe wẹ gha e fetu ugu Adumim, hụn rị nkọ ẹka-ekpẹn Ọdanmgbugbu Ekọ hụ; ọ nọ jẹnsọnmẹ d'e ru mirin ndị ahụn rị Ẹn-Shẹmẹshi, d'a pụha Ẹn-Rogẹlụ.

⁸ Ọ nọ ghashi Ọdanmgbugbu Bẹn-Hinọm, ẹbamịn ndịdan-mirin obodo ndị Jebusu (ya wụ Jerusalẹm), gha ebẹhụ pụha mkpọnụnụ ugu rị nfetu Ọdanmgbugbu Hinọm ebe Ọdanmgbugbu ndị Rẹfa ru nkọ ẹbamịn-ugu.

⁹ Alị wẹ ghazị mkpọnụnụ ugu hụ d'a pụha isi-mirin Nẹf'tụa, gha ebẹhụ pụha obodo ndị rị Ugu-Ẹfrọnụ; ọ nọ ghasọnmẹ nkpọtu shi Baala (ya wụ, Kiriatị-Jiarim);

¹⁰ ebahụn k'ọ gha gbegi, dọn ihun ẹbamịn ọdịdan-ẹnyanwụn, gha Baala pụha Ugu-Sẹẹ, ghafe shi nkpọtu Ugu-Jiarim (ya wụ, Kẹsalọnụ), gha a ẹbamịn-ugu, ghafe shi Bẹt-Shẹmẹshi, fetu pụha Timna.

¹¹ Ọ nọ ghashi ẹbamịn-ugu Ẹkrọnụ, gbegi shi Shikẹrọnụ, ghafe shi Ugu Baala, pụha Jab'nilu. Ohimin Uku Mẹditerenia k'o jẹndemẹ.

¹² Ẹbamịn ọdịdan-ẹnyanwụn, Ohimin-uku Mẹditerenia k'ọ ghasọnmẹ. Ọhụn wụ ebe alị ebọn Juda lẹ ikpụlọ ndị rịn'a rusọnmẹ.

Kalẹbụ E Gi Agha Weri Alị Wẹ Keye Ẹ (Eṅẹn 1.11-15)

¹³ Imẹ alị wẹ keye ndị Juda kẹ Joshụa gha ye Kalẹbụ nwa Jefunẹ Kiriatị-Aba hụn wụ Hibrọnụ. (Aba wụ nẹdi ndị adụn-aran Anakị). Ẹrịra kẹ Osolobuẹ gwa Joshụa mẹ ẹ.

¹⁴ Ya Kalẹbụ nọ gha imẹ Hibrọnụ chụpụ adụn-aran Anakị ẹtọ: Shẹshaị, Ahimanị lẹ Tal'maị, ndị ẹbozo Anakị.

¹⁵ Ọ nọ gha ebẹhụ jẹn d'a lụsọn ndị bi Debẹ ọgụn. (Ihiẹn w'a kpọ Debẹ mbụ wụ Kiriatị-Sẹfa).

¹⁶ Kalẹbụ sị, “Okẹnnyẹ hụn sikọ d'a lụsọn Kiriatị-Sẹfa ọgụn, mẹri ẹ, e we m nwa m wụ Ak'sa ye ẹ lụrụ.”

¹⁷ Ya Ot'niẹlụ nwa Kẹnazi nwẹnẹ Kalẹbụ nọ mẹri Debẹ; Kalẹbụ nọ we nwa a hụ wụ Ak'sa ye ẹ lụma.

¹⁸ O ru ụhụọhịn ohu, Ak'sa nọ bịa d'e kunrun di ẹ wụ Ot'niẹlụ, sị a rịọ nẹdi ẹ alị. Ogẹn Ak'sa gi hidan elu jaki ẹ, Kalẹbụ nẹdi ẹ nọ sị a, “Kị ị chọ nị m mẹni i?”

¹⁹ Ọ nọ sị nẹdi ẹ, “Baba, mẹni m ọhụnmanị. Ebe o mẹ ni y'e yegụọ m alị imẹ alị ọkpọ-nkụn Nẹgẹvụ, yezi m nwan isi-mirin ndị m'e wechen'ẹ.” Ya Kalẹbụ nọ ye ẹ isi-mirin ndị rị ibe elu ugu lẹ ndị rị ndịdan.

Obodo Ndị Rị Alị Juda

²⁰ Ọnwan wụ alị wẹ keye ebọn Juda lẹ ikpụlọ ndị rị Juda:

²¹ Obodo ndị wẹ keye ebọn Juda imẹ alị ọkpọ-nkụn Nẹgẹvụ ebe Juda ru ẹbamịn ndịdan-mirin, nkọ okẹn wẹ lẹ Ẹdọm, wụ ndịnị: Kabzilu, Ẹda lẹ Jaguru;

²² Kina, Dimona lẹ Adada;

²³ Kẹdẹshi, Hazọ lẹ Itnanị;

²⁴ Zifu, Tẹlẹm lẹ Bẹ-alọtụ;

²⁵ Hazọ-Hadata lẹ Kẹriọtụ-Hẹzrọnụ (hụn wụ Hazọ);

²⁶ Amam, Shẹma lẹ Molada;

²⁷ Haza-Gada, Hẹsh'mọnụ lẹ Bẹt-Pẹlẹtị;

²⁸ Haza-Shualụ, Biẹshẹba lẹ Biziọtịa;

²⁹ Baala, Iyim lẹ Ẹzẹm;

³⁰ Ẹl'toladị, Kẹsilu lẹ Homa;

³¹ Zik'lagị, Mad'mana lẹ Sansana;

³² Lẹbaọtụ, Shilihim, Aini lẹ Rimọnụ. Wẹ ile rị nkọnị rị itenẹi kwasị ọgụn; kẹ obodo uku kẹ ụmụ-alị wẹ.

³³ Ndịnị wụ obodo Juda rịsọnmẹ ẹbamịn ọdịdan-ẹnyanwụn, ukun ugu ndị rị ebẹhụ: Ẹsh'tawolu, Zora lẹ Ash'na;

³⁴ Zanụa, Ẹn-Ganim, Tapụa lẹ Ẹnam;

³⁵ Jamutu, Adulam, Sọkọ lẹ Azẹka;

³⁶ Shaaraim, Aditaịm lẹ Gẹdẹra mọbụ Gẹdẹrọtaim: wẹ ile rị obodo mmẹnọ lẹ ụmụ-alị wẹ.

³⁷ Obodo ndịnị rịzịkwọ alị wẹ keye ebọn Juda: Zẹnanị, Hadasha lẹ Mig'dalụ-Gadị;

³⁸ Dilianị, Mizpa lẹ Jok'tiẹlụ;

³⁹ Lakishi, Boz'katị lẹ Ẹglọnụ;

⁴⁰ Kabonu, Lamasị lẹ Kit'lishi;

⁴¹ Gẹdẹrọtụ, Bẹt-Dagọnụ, Naama lẹ Makẹda — obodo mmisin lẹ ụmụ-alị wẹ.

⁴² Obodo ndịnị rịzị nke ebọn Juda: Libna, Ẹta lẹ Ashanị;

⁴³ Ifta, Ash'na lẹ Nẹzibu;

⁴⁴ Kẹila, Akizibu lẹ Maresha: wẹ ile rị obodo itenẹi lẹ ụmụ-alị wẹ.

⁴⁵ Ndịnị rịzị Juda: Ẹkrọnụ lẹ ụmụ-alị lẹ alị-ọfịa a;

⁴⁶ ẹgbata Ẹkrọnụ lẹ Ohimin Mẹditerenia obodo ile nọkunmẹ Ash'dọdụ lẹ ụmụ-alị wẹ rịzị ukuu Juda;

⁴⁷ Ash'dọdụ lẹ enwẹn ẹ lẹ ụmụ-alị lẹ alị-ọfịa a hụzị a; lẹzi Gaza lẹ obodo ẹ ndị nta lẹ ụmụ-alị a — d'e rukwọrị Iyi udu-mirin Ijiptu lẹ mkpẹnrẹn Ohimin-uku Mẹditerenia.

⁴⁸ Obodo ndị rịsọnmẹ alị wẹ keye ebọn Juda alị ugu wụ: Shamiri, Jatiri lẹ Sọkọ;

⁴⁹ Dana lẹ Kiriatị-Sana (hụn wụ Debẹ);

⁵⁰ Anabụ, Esh'tẹmo lẹ Anim;

⁵¹ Goshẹni, Holọnụ lẹ Gilo: wẹ ile rị obodo mmanaị lẹ ụmụ alị wẹ.

⁵² Arabụ, Duma lẹ Ẹshanị;

⁵³ Janim, Bẹt-Tapụa lẹ Afẹka;

⁵⁴ Hum'ta, Kiriatị-Aba (hụn wụ Hibrọnụ) lẹ Zịọ — obodo itenẹi lẹ ụmụ-alị wẹ.

⁵⁵ Ndị ọzọ wụ: Mawọnụ, Kamẹlụ, Zifu lẹ Juta;

⁵⁶ Jezriẹlụ, Jok'diam, Zanụa;

⁵⁷ Kaịnị, Gibia lẹ Timna — obodo iri lẹ ụmụ-alị wẹ.

⁵⁸ Hahulu, Bẹt-Zuru lẹ Gẹdọ rịzị imẹ wẹ,

⁵⁹ lẹ Maaratị, Bẹt-Anọtụ lẹ Ẹl'tẹkọnụ — obodo isin lẹ ụmụ-alị wẹ.

⁶⁰ Kiriatị-Baalụ (hụn wụ Kiriatị-Jiarim) lẹ Raba — obodo ẹbụọ lẹ ụmụ-alị wẹ.

⁶¹ Ndị rị alị wẹ yesọnmẹ wẹ imẹ alị ọkpọ-nkụn wụ: Bẹt-Araba, Midini, Sẹkaka,

⁶² Nibshanị, Obodo-Nnu lẹ Ẹn-Gẹdi — obodo isin lẹ ụmụ-alị wẹ.

⁶³ Ndị Juda asanị ẹka chụpụ ndị Jebusu bi Jerusalẹm; ndị Jebusu bikwọ nwan ebahụn d'e ru tannị.