Joshụa 14 - Ika

Isi Nke Mmẹnọ Alị Ebọn Itenẹi Lẹ Mkpikpi Họdụnị

¹ Ndịnị wụ alị wẹ keyesọnmẹ ndị Izrẹlụ n'ọ wụrụ ukuu wẹ kẹ wẹ banhangụ alị Kenaanị. Ẹliẹza Onyẹ nchụn-ẹjan lẹ Joshụa nwa Nọnụ lẹ ndị-ichẹn ebọn ndị rị Izrẹlụ keye wẹ ya.

² Utẹn-Osolobuẹ kẹ wẹ nyan gi keyesọnmẹ ebọn itenẹi lẹ mkpikpi hụ alị, makẹni ya kẹ Osolobuẹ gwa Mozizi.

³ Ebọn ẹbụọ lẹ mkpikpi e nwọnhẹngụọlẹ alị ẹka Mozizi nfetu Jọdanị nị wẹ d'a banhan alị Kenaanị. Onwọnni hụn Mozizi ye Livaị,

⁴ kama, ụmụ Josẹfụ ẹlẹ ebọn ohu sụọ, kanị ebọn ẹbụọ: Manasẹ lẹ Ifrem. Onwọnzini nwan alị wẹ keye ndị Livaị imẹ alị hụ wẹ banhan karị obodo ndị wẹ sikọ d'e bi lẹ alị wẹ ye wẹ makẹ anụ wẹ lẹ ihiẹn ndị ọzọ wẹ nwọn.

⁵ Ndị Izrẹlụ ke alị ahụn kẹ Osolobuẹ dọn gwa Mozizi.

Alị Wẹ Keye Kalẹbụ

⁶ Ndị ebọn Juda jẹn d'e kunrun Joshụa kẹ Izrẹlụ rị Gil'galụ. Kalẹbụ nwa Jefunẹ, onyẹ ẹbozo Kẹnizi, nọ sị a, “Y'a marịnghọ ihiẹn Osolobuẹ gwa Mozizi Onyẹ nke Osolobuẹ imẹ Kadẹshi-Bania banyeni mmẹ lẹ yụ.

⁷ M rị ahụa ọgụnnaị kẹ odibo Osolobuẹ wụ Mozizi gha Kadẹshi-Bania zi m d'e gi nzuzue lelehunmẹ alị hụ; m nọ wẹhẹn'ẹ ozi m wẹhẹn'ẹ makẹni m gi obi m kweri.

⁸ Kanị ibe m ndị mmẹ lẹ wẹ gba jẹn wẹhẹ ozi hụn obi gi dẹnhinchanrịn ndị nke ẹnyi, kanị m nọ kwọnkẹnmẹchanrịn nke Osolobuẹ wụ Chuku m.

⁹ Mozizi nọ gi ẹfan Osolobuẹ kwe m nkwa ụhụọhịn hụ, sị, ‘Alị ahụn ị zọye ụkụ jẹnkọ d'a wụ nke i, wụrụ nke ụmụ ị jẹnrin-ejẹn, makẹni i kwọnkẹnmẹchanrịn nke Osolobuẹ wụ Chuku m.’

¹⁰ “Lee ẹ nwan nị Osolobuẹ e dọnmẹgụọ m ndụn k'o dọn ku ọrọgbọ ahụa isẹn kwasị ọgụnnaịnị, kete mgbẹ hụ Osolobuẹ gwa Mozizi okuni, ogẹn hụ ẹnyi ndị Izrẹlụ gi rị ụzọ imẹ atụ; e lee m ebeni tannị, m rị nwan nwa ahụa isẹn kwasị ọgụn-ẹnọ!

¹¹ “M zekwọ nwan tannị kẹ m zehan ogẹn ahụn Mozizi gi zi m ozi hụ; kẹ m nwọnhan ndụn ogẹn ahụn kẹ m nwọnhan kikẹnni — kẹ hụn m'e gi jẹn agha kẹ hụn m'e gi jẹnhunmẹ.

¹² Ye m nwan alịnị rị elu ugu hụn Osolobuẹ kwe m nkwa ụhụọhịn ahụn. Y'a nụghọ a ụhụọhịn ahụn nị ndị adụn-aran Anakị rị ebẹhụ, uwẹ lẹ obodo uku, obodo uku wẹ tụnhunmẹ mgbọn; kanị, omẹni Osolobuẹ a nọyeghọnị m, m sikọ d'a chụpụ wẹ kẹ Osolobuẹ dọn ku.”

¹³ Ya Joshụa nọ gọzi Kalẹbụ nwa Jefunẹ, we Hibrọnụ ye ẹ n'ọ wụrụ ukuu ẹ.

¹⁴ Hibrọnụ nọ mẹ ukuu Kalẹbụ nwa Jefunẹ onyẹ Kẹnizi d'e ru tannị, makẹni o gi obi ẹ ile sọn Osolobuẹ wụ Chuku ndị Izrẹlụ.

¹⁵ (Kiriatị-Aba kẹ wẹ e te kpọ Hibrọnụ; Aba te kachanrịn ndị ọzọ ile imẹ ndị adụn-aran Anakị.) O mẹgụ, alị nọ zu ikẹn agha.