Joshụa 13 - Ika

Isi Nke Mmẹtọ Alị Joshụa Kelẹni Mẹri, Weri

¹ Ogẹn Joshụa gi kagụ ẹgẹdi ọhụnma-ọhụnma, Osolobuẹ nọ sị a, “Y'a kakpụkpọgụọ bụ alị họdụ wẹ k'e mẹri weri e hikẹmẹkẹ.

² Lee alị họdụnị: ẹgbẹrẹ ndị Filistia lẹ ndị Gẹshọ ile:

³ gha Iyi-Shihọ rị ẹbamịn ọwụwa-ẹnyanwụn Ijiptu d'e ru Ẹkrọnụ rị ẹbamịn-ugu. Wẹ ile kẹ w'a gụn e yeni ndị Kenaanị: ẹgbẹrẹ ndị-nze isẹn alị Filistia: kẹ Gaza kẹ Ash'dọdụ kẹ Ash'kẹlọnụ kẹ Gatị kẹ Ẹkrọnụ. Alị ndị Avụ rịzị imẹ ẹ;

⁴ ụfọdụ wụ ndị rị ẹbamịn ndịdan-mirin. “Ọzọ wụ alị ndị Kenaanị ile rị nkọ shi Ugu Hẹmọnụ: gha Ara ndị Sidọnụ d'e ru Afẹki, d'e ruzi ẹgbẹrẹ ndị Amọ —

⁵ alịnị kẹ ndị Gẹbalụ lẹ Lẹbanọnụ ile rị. Ebe o ru ẹbamịn ọwụwa-ẹnyanwụn wụ gha Baalụ-Gadị rị ukun Ugu Hẹmọnụ d'e ru Lebo-Hamatị.

⁶ M jẹnkọ d'a chụpụnị ndị Izrẹlụ ndị ile bi alị ugu nkọnị — gha Lẹbanọnụ d'e ru Misrẹfọtụ-Maim — ndị Sidọnụ ile. Ka kekwọnị ndị Izrẹlụ alị hụ n'ọ wụrụ ukuu wẹ, kẹ m dọn gwa ị.

⁷ Keni ebọn ndị ahụn họdụnị ya, ebọn itenẹi ahụn lẹ mgbube ebọn Manasẹ, n'ọ wụrụ ukuu wẹ.”

Alị Ebọn Rubẹni, Gadị Lẹ Mgbube Manasẹ

⁸ Azụụn hụn ẹbọ rị Manasẹ lẹ ebọn Rubẹni lẹ ebọn Gadị nwọnhẹn ukuu wẹ nfetu Jọdanị nọkẹ kẹ Mozizi wụ odibo Osolobuẹ dọn keye wẹ ya.

⁹ Alị wẹ gha Arụa hụn rị mkpẹnrẹn Ọdanmgbugbu Iyi-udu-mirin Anọnụ bidọn, alị rị etintinnaị Ọdanmgbugbu hụ rịchanrịn imẹ ẹ; ọ ghasọnmẹ alị-aradan rị Ugu Mẹdẹba d'e rukwọrị Dibọnụ;

¹⁰ obodo ile te wụ nke Sihọnụ eze Amọ hụn nọ Hẹsh'bọnụ kị rị imẹ ẹ, d'a pụ ebe alị ndị Amọnụ ru;

¹¹ ẹgbẹrẹ Gilẹdị lẹ nke ndị Gẹshọ lẹ ndị Maaka rịzị imẹ ẹ, ya lẹ Ugu Hẹmọnụ ile lẹ ẹgbẹrẹ Bashanị ile d'e ru Salẹka;

¹² ya wụ alị ile Ọgụ te kị ẹgbẹrẹ Bashanị. Ash'tarọtụ lẹ Ẹdrẹi kẹ Ọgụ nọsọnmẹ kị. Ọgụ te rị ndị họdụnị imẹ ndị adụn-aran Rẹfa. Ndịnị ile kẹ Mozizi mẹri, napụ wẹ alị.

¹³ Kanị, ndị Izrẹlụ achụpụnị ndị Gẹshọ lẹ ndị Maaka, wẹ bi imẹ igunrun ndị Izrẹlụ d'e rukwọ tannị.

¹⁴ Mozizi ekeyeni ndị Livaị alị. Makẹni ẹjan ndị Izrẹlụ gi ọkụn a chụnyeni Osolobuẹ wụ Chuku Izrẹlụ wụ ukuu wẹ k'o dọn gwa wẹ.

Alị Ebọn Rubẹni

¹⁵ Lee alị Mozizi keye ebọn Rubẹni lẹ ikpụlọ ndị rịn'a:

¹⁶ Alị wẹ gha Arụa hụn rị mkpẹnrẹn Ọdanmgbugbu Iyi udu-mirin wụ Anọnụ bidọn, ya lẹ alị hụn rị etintinnaị ọdanmgbugbu hụ; alị-aradan Mẹdẹba ile hụn rị elu ugu rị imẹ ẹ;

¹⁷ ịya lẹ Hẹsh'bọnụ lẹ obodo ẹ ile mẹ ẹkẹrẹ ya lẹ wẹ rị alị-aradan elu ugu: kẹ Dibọnụ kẹ Bamotu-Baalụ kẹ Bẹt-Baalụ-Miọnụ,

¹⁸ kẹ Jahazị kẹ Kẹdẹmọtụ kẹ Mẹfaatị

¹⁹ kẹ Kiriataim kẹ Sibma kẹ Zẹrẹti-Shaha hụn rị elu ugu imẹ ọdanmgbugbu hụ;

²⁰ kẹ Bẹt-Pioru kẹ nkpọtu Ugu Pisga kẹ Bẹt-Jẹshimọtụ.

²¹ Ya wụ, obodo ile rị alị-aradan hụ rị elu ugu lẹ alị ile te rị okpuru eze ndị Amọ wụ Sihọnụ, hụn nọ Hẹsh'bọnụ kị; Mozizi mẹri ẹ, ịya lẹ ndị-isi Midianị wụ Ẹvi, Rẹkẹm lẹ Zọ lẹ Họ lẹ Reba — ndịnị ile rị okpuru Sihọnụ a kị ndị nke wẹ; alị wẹ rị alị-eze ẹ.

²² Ndị Izrẹlụ e gbuzighọ Balaam nwa Bioru hụn a gba ẹfa — cheni ndị ọzọ wẹ gbu.

²³ Ebe alị ndị Rubẹni wụ Iyi-Jọdanị. Obodo ndị ahụn lẹ ụmụ-alị wẹ wụ ukuu wẹ keye ebọn Rubẹni lẹ ikpụlọ ndị rịn'a.

Alị Ebọn Gadị

²⁴ Lee alị Mozizi keye ebọn Gadị lẹ ikpụlọ ndị rịn'a:

²⁵ Ẹgbẹrẹ Jaza, obodo ile rị Gilẹdị lẹ ahanmahan alị ndị Amọnụ ile d'e rukwọrị Arụa rị ihun Raba rịchanrịn imẹ ẹ;

²⁶ gha Hẹsh'bọnụ d'e ru Ramatị-Mizpa lẹ Bẹtonim rịzị imẹ ẹ, gha Mahanaim d'e ru Debẹ;

²⁷ ndịnị rị ọdanmgbugbu rịzị alị wẹ keye Gadị: kẹ Bẹt-Haram kẹ Bẹt-Nimra kẹ Sukọtụ kẹ Zafọnụ, kẹ alị ndị họdụnị te rị alị-eze eze Hẹsh'bọnụ wụ Sihọnụ. Ẹbamịn ọwụwa-ẹnyanwụn Iyi Jọdanị kẹ wẹ rị, ghasọnmẹ mkpẹnrẹn ẹ d'e ru ebe Ohimin Kinẹrẹti ru.

²⁸ Obodo ndị ahụn lẹ ụmụ-alị wẹ wụ ukuu wẹ keye ebọn Gadị lẹ ikpụlọ ndị rịn'a.

Alị Wẹ Keye Mgbube Ebọn Manasẹ

²⁹ Lee alị Mozizi keye mgbube ebọn Manasẹ hụn rị ẹbamịn ọwụwa-ẹnyanwụn lẹ ikpụlọ ndị rịn'a — ya wụ azụụn ohu imẹ ẹbụọ rị ebọn Manasẹ:

³⁰ alị wẹ wụ gha Mahanaim d'e ru Bashanị ile, alị ile eze Bashanị wụ Ọgụ te kị lẹ obodo Jaịrị ọgụn-ẹtọ mẹsọnmẹ ẹkẹrẹ-ẹkẹrẹ hụn rị imẹ Bashanị;

³¹ wẹ kebe Gilẹdị ẹbụọ, azụụn ohu rịn'a lẹ Ash'tarọtụ lẹ Ẹdrẹi, obodo ẹbụọ Ọgụ nọ kị Bashanị, kẹ wẹ keye mgbube Manasẹ hụn wụchanrịn mgbube ụmụ Makiri nwa Manasẹ.

³² Ọhụn wụ alị Mozizi ke k'ọ rị alị-aradan Mụabụ, nfetu Iyi Jọdanị, ẹbamịn ọwụwa-ẹnyanwụn Jẹriko.

³³ Kanị, Mozizi ekeyeni ndị Livaị alị ọwụlẹ weri; Osolobuẹ wụ Chuku Izrẹlụ wụ ukuu wẹ, k'o dọn gwa wẹ.