Joshụa 11 - Ika

Isi Nke Mmanaị Ndị Izrẹlụ E Mẹri Ndị-nze Rị Ẹbamịn-ugu

¹ Mgbe Jabini wụ eze Hazọ gi nụ ihiẹnni, ọ nọ zi ozi jẹnni Jobabụ wụ eze Madọnụ, zizi wẹ jẹnni eze Shimrọnụ lẹ eze Ak'shafụ

² lẹ ndị nze rị ẹbamịn-ugu: kẹ ndị rịsọnmẹ elu ugu kẹ ndị rị nkọ Araba rị ẹbamịn ndịdan-mirin Ohimin Kinẹrẹti kẹ ndị rị ukun ugu ndị rị ẹbamịn ọdịdan-ẹnyanwụn kẹ ndị rị Nafọtụ-Dọ hụn rịzị ẹbamịn ọdịdan-ẹnyanwụn;

³ o zijẹnzini ndị Kenaanị rị ẹbamịn ọwụwa-ẹnyanwụn lẹ ọdịdan-ẹnyanwụn; ndị Amọ, ndị Hẹti, ndị Pẹrẹzi lẹ ndị Jebusu rị elu ugu lẹ ndị Hivu rị ukun Ugu Hẹmọnụ ẹgbẹrẹ alị Mizpa.

⁴ Wẹ nọ kịrị ndị-agha wẹ ile lẹ ẹshin lẹ ụgbọ-ẹshin agha bugbu enwẹn ẹ ọda pụha. Ndị-agha hụ e bukẹmẹkẹ ọda, wẹ nọkẹ ẹjan rị mkpẹnrẹn ohimin.

⁵ Ndị-nzeni ile nọ kịgbama ndị agha wẹ ile, jẹn d'a nọdị ẹhụ Mirin-Mẹrọm, nị wẹ hụn ụzọ lụsọn Izrẹlụ agha.

⁶ Osolobuẹ nọ sị Joshụa, “Atụlẹ egun wẹ, makẹni mgbeni ekile, m sikọ d'e bu wẹ ile che ụnụ ndị Izrẹlụ ẹka, ụnụ e gbu wẹ. Tụbepụchanrịn nị ẹshin wẹ akwanran rị wẹ azụụn mkpụkụ; kpọ nị ụgbọ-ẹshin wẹ ọkụn.”

⁷ Ya Joshụa lẹ ndị agha a ile nọ bịa ẹhụ Mirin-Mẹrọm d'e kunrun wẹ idẹnmizi, maye wẹ ọgụn.

⁸ Osolobuẹ nọ bu wẹ che ndị Izrẹlụ ẹka, mẹri. Ndị Izrẹlụ nọ mẹri wẹ, chụ wẹ d'e ru Sidọnụ-Kanị, d'e ru Misrẹfọtụ-Maim lẹ Ọdanmgbumgbu-Mizpa rị nkọ ọwụwa-ẹnyanwụn, e gbu wẹ, d'e runi onwọnni onyẹ họdụnị.

⁹ Joshụa nọ mẹ wẹ ihiẹn Osolobuẹ gwa a, ọ tụbepụchanrịn ẹshin wẹ akwanran rịsọnmẹ wẹ azụụn mkpụkụ, kpọ ụgbọ-ẹshin wẹ ọkụn.

¹⁰ Ogẹn ahụn kẹ Joshụa gi kin azụụn, mẹri alị Hazọ, gi ọpịa-agha gbu eze ẹ. (Alị ahụn wụ Hazọ te wụ onyẹ-isi imẹ alị-eze ndị ahụn kịgbamanị.)

¹¹ Wẹ nọ gi ọpịa-agha gbuchanrịn ndị rị imẹ ẹ, tikpọ wẹ ru alị; onwọnni ihiẹn e kwọnni wẹ gbuhọdụ; ya Joshụa nọ kpọ Hazọ ọkụn.

¹² Joshụa nọ weri ndị nze hụ lẹ obodo wẹ rị ichẹn-ichẹn, gi ọpịa-agha gbuchanrịn wẹ. O tikpọchanrịn wẹ kẹ Mozizi wụ odibo Osolobuẹ dọn gwa a.

¹³ Kanị, onwọnni hụn ndị Izrẹlụ kpọ ọkụn imẹ obodo ndị ahụn wẹ tụnye elu “ugu”, wezụka Hazọ — ịya sụọ kẹ Joshụa kpọ ọkụn.

¹⁴ Ndị Izrẹlụ nọ kwarịchanrịn ihiẹn ile w'a kwarị imẹ obodo ndịnị, lẹ anụ ile rị imẹ wẹ, kanị wẹ gi ọpịa-agha gbu ịhịan ile rị imẹ wẹ, gbuchanrịn wẹ ru alị, onwọnni ihiẹn e kwọnni họdụnị.

¹⁵ Ihiẹn Osolobuẹ gwa odibo ẹ wụ Mozizi kẹ Mozizi gwa Joshụa; ịya kẹ Joshụa mẹ; onwọnni hụn Joshụa mẹlẹni imẹ ihiẹn ile Osolobuẹ gwa Mozizi.

Alị Ile Joshụa Mẹri

¹⁶ Ya Joshụa nọ weri alị hụ ile: kẹ elu ugu kẹ Nẹgẹvụ ile kẹ ẹgbẹrẹ Goshẹni ile kẹ ukun ugu rịsọnmẹ nkọ ọdịdan ẹnyanwụn; kẹ Araba kẹ ugu ichẹn-ichẹn rị alị Izrẹlụ lẹ alị ndị rịsọnmẹ ukun ugu ndị ahụn:

¹⁷ gha Ugu-Halakị hụn rị ibẹka Sẹẹ d'e ru Baalụ-Gadị rị Ọdanmgbugbu Lẹbanọnụ, ukun Ugu-Hẹmọnụ. Ọ hụ a nwụndọn ndị-nze wẹ ile, e gbu, d'e ru n'o gbuchanrịn wẹ ile.

¹⁸ Joshụa lụbie ndị-nze hụ ọgụn.

¹⁹ Onwọnzini akpụ obodo ohu rịọ ndị Izrẹlụ nị wẹ wụrụ ohu, wezụka ndị Hivu bi Gibiọnụ; Izrẹlụ gi agha werichanrịn wẹ ile,

²⁰ makẹni Osolobuẹ kpọkin wẹ obi d'a lụsọn ndị Izrẹlụ agha, kẹn'o tikpọchanrịn wẹ, dọnrin ẹnya kpọnchanpụchanrịn wẹ, k'o dọn gwa Mozizi.

²¹ Ogẹn hụ kẹ Joshụa gi jẹn d'e gbupụ ndị Anakị, ndị adụn-aran, hụn bi elu òke: kẹ ndị rị Hibrọnụ kẹ ndị rị Debẹ lẹ Anabụ kẹ ndị rị elu òke Juda ile kẹ ndị rị elu òke ile rị Izrẹlụ ẹbamịn-ugu; Joshụa tikpọchanrịn wẹ lẹ obodo wẹ.

²² Onwọnni adụn-aran Anakị ọwụlẹ họdụ imẹ alị ndị Izrẹlụ; imẹ Gaza lẹ Gatị lẹ Ash'dọdụ hụn rịsọnmẹ alị ndị Filistia sụọ kẹ wẹ họdụ.

²³ Ẹrịra kẹ Joshụa dọn weri alị hụ ile, kẹ Osolobuẹ dọn gwa Mozizi; Joshụa nọ we ẹ ye ndị Izrẹlụ n'ọ wụrụ ukuu wẹ, kẹ ebọn-ebọn rịsọnmẹ. Ya alị nọ zu ikẹn agha.