Joshụa 10 - Ika

Isi Nke Iri Ẹnyanwụn E Wuzoni Joshụa Ụzọ Ohu

¹ Ogẹn Adoni-Zẹdẹki wụ eze Jerusalẹm gi nụ nị Joshụa e mẹrigụọ Aị, tikpọchanrịn a ru alị, mẹ Aị lẹ eze ẹ ihiẹn o mẹ Jẹriko lẹ eze ẹ, lẹni ndị Gibiọnụ e jẹngụọ d'a banyeni ndị Izrẹlụ mẹkẹ wẹ gha a lụsọn wẹ agha, nị wẹ lẹ ndị Izrẹlụ rị nwan,

² egun nọ tụma ya lẹ ndị nke ẹ ọda-ọda, makẹni Gibiọnụ te wụ obodo rị mkpa, nọkẹ obodo eze rị; ya shịakarị Aị, ikẹnnyẹ ẹ ile ma lụ agha ọhụnma.

³ Ya Adoni-Zẹdẹki wụ eze Jerusalẹm nọ rịọ Hoham wụ eze Hibrọnụ, Piram wụ eze Jamutu, Jafia wụ eze Lakishi lẹ Debẹ wụ eze Ẹglọnụ, sị,

⁴ “Bịa nị d'e yeni m ẹka lụsọn Gibiọnụ ọgụn, makẹni ọ jẹngụọ d'a bannị Joshụa lẹ ndị Izrẹlụ.”

⁵ Ya ndị-nze ndị Amọ isẹn ahụn wụ: eze Jerusalẹm, eze Hibrọnụ, eze Jamutu, eze Lakishi lẹ eze Ẹglọnụ nọ kịgbama. Wẹ lẹ ndị agha wẹ ile nọ jẹnmẹ, e tumẹgụ wẹ ọdụ agha wẹ, wẹ nọ lụsọn Gibiọnụ agha.

⁶ Ya ndị Gibiọnụ nọ zi ozi jẹnni Joshụa ebahụn Izrẹlụ ziẹntọ imẹ Gil'galụ, sị, “Dodo, alatọlẹ idibo i; bịa ozigbo d'a zụọpụha ẹnyi! Yeni ẹnyi ẹka, nị ndị-nze ndị Amọ ile bi elu òke a kịgbamagụọ bịa d'a maye ẹnyi ọgụn.”

⁷ Ya Joshụa nọ gha Gil'galụ buli, ịya lẹ ndị agha a ile, kẹ ndị odogun-agha ile.

⁸ Osolobuẹ nọ sị Joshụa, “Atụlẹ egun wẹ; e wegụọ m wẹ che i ẹka n'i mẹri wẹ; onwọnni onyẹ jẹnkọ d'a s'ẹka che i ọgụn imẹ wẹ ile.”

⁹ Makẹni Joshụa wẹ gi uhinhin ahụn ile jẹn gha Gil'galụ d'e ru ebahụn, ọ nọ kẹrẹn'a maye wẹ idẹnmizi.

¹⁰ Osolobuẹ nọ bu egun ndị Izrẹlụ che wẹ ẹnya, ndị Izrẹlụ nọ mẹri wẹ ezigbo mmẹri imẹ Gibiọnụ, chụ wẹ gha ụzọ Bẹt-Họrọnụ, gbusọnmẹ wẹ d'e ru Azẹka lẹ Makẹda.

¹¹ Hụn ahụn wẹ gbakọnị ndị Izrẹlụ, e ru wẹ ụzọ gha Bẹt-Họrọnụ shikọ Azẹka, Osolobuẹ nọ gha elu-igwere mama wẹ ẹregede ẹkwan-igwere, masọnmẹ wẹ ya d'e ru Azẹka. Ndị ẹkwan-igwere hụ gbu ka ọda karị ndị hụn ndị Izrẹlụ gi ọpịa-agha gbu.

¹² Ụhụọhịn hụ Osolobuẹ we ndị Amọ che ndị Izrẹlụ ẹka nị wẹ mẹri, Joshụa nọ idẹnya ndị Izrẹlụ gwa Osolobuẹ oku, sị, “Ẹnyanwụn, wuzo ụzọ ohu imẹ Gibiọnụ! Ifọn, wuzo Ọdanmgbugbu Aịjalọnụ.”

¹³ Ya kẹ ẹnyanwụn nọ wuzo, ifọn a kụsị, d'e ru ni Izrẹlụ e mẹrichanrịn ndị-iṅẹnrẹn wẹ ahụn. Ọ hụ ebe wẹ deye ẹ imẹ Ẹkụkwọ Jasha. Ẹnyanwụn e wuzo etintinnaị igwere, o bie ihiẹn nọ kẹ akp'ọhịn ohu gbegbegbe n'o d'a dan!

¹⁴ Onwọntuni ụhụọhịn nọ ẹrịra mbụ, mọbụ kete mgbẹhụ — ụhụọhịn ịhịan ku oku Osolobuẹ nọ mẹ ẹ. W'a rụ ụka a, Osolobuẹ lụnị Izrẹlụ ọgụn ahụn!

¹⁵ Ya Joshụa lẹ ndị Izrẹlụ ile ịya lẹ wẹ wị nọ kin azụụn shi ebahụn wẹ ziẹntọ imẹ Gil'galụ.

E Gbu Wẹ Ndị-nze Isẹn Hụ

¹⁶ Ogẹn agha Gibiọnụ hụ gi rị a lụ, ndị-nze isẹn ahụn gbapụ d'a warị imẹ okporo rị Makẹda.

¹⁷ A gwa wẹ Joshụa nị a hụngụọ wẹ ndị nze isẹn hụ ebe wẹ warị imẹ okporo rị Makẹda,

¹⁸ Joshụa nọ sị wẹ, “Gi ni ọmụma hi-ogbe nukin ọnụ okporo hụ, ụnụ e bu ikẹnnyẹ tọ ebẹhụ nị wẹ che ẹ nche.

¹⁹ K'e gbulẹ ni ogẹn! Chụrụ nị ndị iṅẹnrẹn ụnụ nị ụnụ gha ibe azụụn maye wẹ; anịlẹ ni wẹ ru obodo wẹ ndị ahụn, makẹni Osolobuẹ wụ Chuku ụnụ e wegụọ wẹ che ụnụ ẹka mẹri.”

²⁰ Ẹrịra kẹ Joshụa lẹ ndị Izrẹlụ dọn gbuchanrịn ndị iṅẹnrẹn wẹ hụ, gbu wẹ ru alị, nke wụnị e te gbuchanrịn wẹ wẹ, kanị ọ kẹrẹghọlẹ ni ndị bulẹni ọda gbaban obodo wẹ ndị nwọnsọnmẹ mgbọn, wanahịn.

²¹ Ndị agha Izrẹlụ ile nọ kinhẹn d'e kunrun Joshụa imẹ Makẹda ebe wẹ ziẹntọ ogẹn agha hụ; onwọnni ihiẹn mẹni wẹ. Onwọnzini onyẹ egun nị kuja oku ndị Izrẹlụ.

²² Ya Joshụa nọ sị, “Kpupụ nị okporo hụ, wepụhanị nị m ndị-nze isẹn hụ.”

²³ Ya wẹ nọ gha imẹ okporo hụ wepụhan'a ndị-nze isẹn ahụn: eze Jerusalẹm, eze Hibrọnụ, eze Jamutu, eze Lakishi lẹ eze Ẹglọnụ.

²⁴ E wepụhagụnị wẹ Joshụa ndị-nze hụ, Joshụa nọ kpọ ikẹnnyẹ Izrẹlụ ile, sị ndị ọkị-agha ile sọnhẹnn'ẹ, “Nọzụnhan nị; zọdọn ni ndị-nze ndịnị olu.” Ya wẹ nọ nọzụnhan, zọdọn wẹ olu.

²⁵ Joshụa nọ sị wẹ, “Atụlẹ ni egun; anịlẹ ni obi nahịn ụnụ; kakẹnmẹ ni; rikin ni obi; ẹnịna kẹ Osolobuẹ jẹnkọ d'e mẹ ndị iṅẹnrẹn ile ụnụ jẹnkọ d'a lụsọn ọgụn.”

²⁶ Joshụa nọ begbu ndị-nze hụ, kọnmẹ wẹ ye elu osisi isẹn, wẹ nọ kọnrin elu osisi ndị ahụn d'e ru ogẹn ẹnyasị.

²⁷ Anwụn a rọgụ, Joshụa nọ gwa wẹ d'e wetu wẹ, wẹ nọ wetu wẹ elu osisi ndị ahụn, tụ wẹ ye imẹ okporo hụ wẹ te warị, nu ẹregede ọmụma yesọnmẹ ọnụ okporo hụ gi nukin ẹ. Ọmụma ndị ahụn rịkwọ nwan ebẹhụ d'e ru tannị.

²⁸ Ụhụọhịn ohu hụ, Joshụa nọ werizikwọ Makẹda hụ wẹ rị. O gi ọpịa-agha sọn ndị obodo hụ lẹ eze ẹ, gbuchanrịn ndị ile rị imẹ ẹ, onwọnni onyẹ o dọnmẹ ndụn, o mẹ eze Makẹda ihiẹn o mẹ eze Jẹriko.

Joshụa E Mẹri Gha Gibiọnụ D'e Ru Kadẹshi-Bania

²⁹ Ya Joshụa lẹ ndị Izrẹlụ ile ya lẹ wẹ wị nọ gha Makẹda buli, shi Libna, lụsọn ẹ agha.

³⁰ Osolobuẹ nọ buzi obodo hụ lẹ eze ẹ che ẹka ndị Izrẹlụ. Joshụa nọ gi ọpịa-agha sọn obodo hụ lẹ onyẹ ọwụlẹ rị imẹ ẹ; onwọnni onyẹ o dọnmẹ ndụn ebẹhụ. Ọ nọzị mẹ eze ẹ ihiẹn o mẹ eze Jẹriko.

³¹ Joshụa lẹ ndị Izrẹlụ ile ịya lẹ wẹ wị nọ gha Libna buli, shi Lakishi; e kehunmẹ w'ẹ, lụsọn wẹ agha.

³² Osolobuẹ nọ bu Lakishi che Izrẹlụ ẹka. Hụn mẹ akp'ọhịn ẹbụọ, Joshụa nọ mẹri ẹ weri ẹ, gi ọpịa-agha sọn obodo hụ, gbuchanrịn ndị ile rị imẹ ẹ, k'o dọn mẹ Libna.

³³ Ogẹn hụ, Horam wụ eze Gẹza bịa d'e yeni Lakishi ẹka; Joshụa nọ mẹri ịya lẹ ndị agha a, gbu wẹ d'e runi onwọnni onyẹ họdụnị.

³⁴ Joshụa lẹ ndị Izrẹlụ ile nọ gha Lakishi buli, shi Ẹglọnụ; wẹ nọ weri ọnọdị agha, maye ẹ ọgụn;

³⁵ ụhụọhịn ohu hụ kẹ wẹ mẹri ẹ, weri ẹ, gi ọpịa-agha sọn ẹ, gbuchanrịn onyẹ ọwụlẹ rị imẹ ẹ, kẹ wẹ dọn mẹ Lakishi.

³⁶ Ya Joshụa lẹ ndị Izrẹlụ ile ya lẹ wẹ wị nọ gha Ẹglọnụ bulizi, shi Hibrọnụ, maye ẹ ọgụn.

³⁷ Wẹ nọ weri obodo hụ, gi ọpịa-agha sọn ẹ, ịya lẹ eze ẹ lẹ ụmụ-alị rịsọnmẹ okpuru ẹ lẹ ndị ile rị imẹ ẹ; onwọnni onyẹ wẹ gbuhọdụ. Ihiẹn o mẹ Ẹglọnụ k'o mẹ nwan Hibrọnụ, tikpọchanrịn kẹ obodo kẹ ndị ile rị imẹ ẹ.

³⁸ Ya Joshụa lẹ ndị Izrẹlụ ile ya lẹ wẹ wị nọ nwan kin azụụn, jẹn d'a maye Debẹ ọgụn.

³⁹ Wẹ nọ weri obodo hụ lẹ eze ẹ lẹ ụmụ-alị ndị rịsọnmẹ okpuru ẹ, gi ọpịa-agha sọn wẹ, gbuchanrịn ndị ile rị imẹ ẹ. Onwọnni onyẹ wẹ gbuhọdụ; ihiẹn hụ o mẹ Hibrọnụ, Libna lẹ eze Libna, k'o mẹ nwan Debẹ.

⁴⁰ Ẹrịra kẹ Joshụa dọn mẹri ndị ile rị ẹgbẹrẹ hụ, kẹ ndị rị elu ugu kẹ ndị rị ẹgbẹrẹ Nẹgẹvụ kẹ ndị rị alị-aradan kẹ ndị rị ukun ugu azụụn shi ọdịdan-ẹnyanwụn — uwẹ lẹ ndị nze wẹ ile. Onwọnni onyẹ o gbuhọdụ. O gbuchanrịn ihiẹn ile e kwọnni, nọkẹ kẹ Osolobuẹ wụ Chuku Izrẹlụ dọn gwa wẹ.

⁴¹ Joshụa nọ mẹrikwama wẹ, ghakwọrị Kadẹshi-Bania d'e ru Gaza, ghakwọrị ẹgbẹrẹ Goshẹni ile d'e ru Gibiọnụ.

⁴² Mgbe ohu ahụn Joshụa pụha d'a lụsọn wẹ agha k'o gi mẹrisọnmẹ ndị nze ndịnị ile lẹ alị wẹ, mẹrichanrịn wẹ, makẹni Osolobuẹ wụ Chuku Izrẹlụ lụnị Izrẹlụ ọgụn.

⁴³ Ya Joshụa lẹ ndị Izrẹlụ ile ya lẹ wẹ wị nọ kinhẹnzi ebẹhụ wẹ ziẹntọ imẹ Gil'galụ.