Joshụa 1 - Ika

Isi Nke Ohu Ọrụn Osolobuẹ Ye Joshụa

¹ Ogẹn odibo Osolobuẹ wụ Mozizi gi nwụnhụngụ, Osolobuẹ nọ sị Joshụa nwa Nọnụ hụn e jẹnni Mozizi ozi,

² “Odibo m wụ Mozizi a nwụnhụngụọ. Kwademẹ ni nwan, yụ lẹ ndịnị ile, nị ụnụ d'e fetu Iyi-Jọdanị ban alị hụ m jẹnkọ nwan d'e ye wẹ wụ ndị Izrẹlụ.

³ E yeọlẹ m ụnụ ebe ọwụlẹ ụnụ jẹnkọ d'a zọye ụkụ, nọkẹ kẹ m dọn kwe Mozizi nkwa:

⁴ alị ụnụ k'a gha alị ọkpọ-nkụn rị ẹbamịn ndịdan-mirin d'e ru Lẹbanọnụ rị ẹbamịn-ugu; o k'e jẹnruzi Iyi-uku Yufretisi ẹbamịn ọwụwa-ẹnyanwụn, ya wụ nị alị Siria ile hụn ndị Hẹti bi sikọ d'a rị imẹ ẹ; ẹbamịn ndịdan ẹnyanwụn rịn'a sikọ d'e ru Ohimin-uku Mẹditerenia.

⁵ Onwọnni onyẹ sikọ d'a s'ẹka che i ọgụn y'e we nwụn. Kẹ m dọn nọyeni Mozizi kẹ m k'a dọn nọyeni i; alatọkọ m'ị, ajụtọkọ m'ị.

⁶ “Kakẹnmẹ; atụkwọlẹ egun; makẹni ịyụ jẹnkọ d'e du ndịnị d'e weri alị hụ m kun enwẹn m kwe ndị nẹdi wẹ kanị nkwa nị m k'e ye wẹ —

⁷ ka kakẹnmẹkwọ; atụlẹ egun kaka; dọnrin ẹnya sọn iwu ile odibo m wụ Mozizi ye i, aghakwọl'a pụ kụye ẹka-nni mọbụ ẹka-ekpẹn — kẹni ebe ọwụlẹ ị jẹn bọ ị.

⁸ Anịlẹ Ẹkụkwọ Iwuni gha ị ọnụ pụ; e ro ẹ, e gi ẹ a ta ẹtụ efinaị lẹ uhinhin, kẹn'i hụn ụzọ dọnrin ẹnya e mẹ ihiẹn ile wẹ deye imẹ ẹ. Ya kẹ y'a nọ gha ihun, ihiẹn i buche ẹka a bọ ị ọhụnma-ọhụnma.

⁹ Agwagụọnị m'ị? Kakẹnmẹ; rikin obi; atụkwọlẹ egun; anịlẹ ndụn gụ ị, makẹni Osolobuẹ wụ Chuku i k'a nọyen'i ebe ọwụlẹ i jẹnkọ.”

Joshụa A Kwademẹ Wẹ Nị Wẹ D'a Banye Alị Ahụn

¹⁰ Ya Joshụa nọ sị ndị-isi ndị Izrẹlụ,

¹¹ “D'e kunrun ni ịhịan ile ziẹntọ ebeni; sị nị wẹ, ‘Kwademẹ ni ihiẹn ụnụ k'e ri ụzọ, makẹni ụnụ jẹnkọ d'e fetu Iyini wụ Jọdanị nke akp'ọhịn ẹtọ tannị, banye d'e weri alị hụ Osolobuẹ wụ Chuku ụnụ ye ụnụ n'ọ wụrụ nke ụnụ.’ ”

¹² Ya kẹ Joshụa nọ sị ebọn ndị ahụn nwọnhẹngụ alị: ebọn Rubẹni lẹ ebọn Gadị lẹ mgbube ebọn Manasẹ,

¹³ “Nyanhan nị ihiẹn odibo Osolobuẹ wụ Mozizi gwa ụnụ ogẹn ahụn, nị Osolobuẹ wụ Chuku ụnụ rị nwan e ye ụnụ ebe ụnụ a nọ zu ikẹn; o yegụọ ụnụ alị nke ụnụ ebeni.

¹⁴ Inyẹnmẹ ụnụ lẹ ụmụ ụnụ lẹ anụmanụ ụnụ jẹnkọ d'a nọdị alịnị Mozizi ye ụnụ ẹbamịn ọwụwa-ẹnyanwụn Iyi-Jọdanị ebeni. Kanị, ndị agha ile rị imẹ igunrun ụnụ sikọ d'e kọnrinrịrị agha, buruni ndị Izrẹlụ ibe ụnụ họdụnị ụzọ fetu Iyini; ụnụ sikọ d'e yeni umunẹ ụnụ ẹka

¹⁵ d'e ru mgbe Osolobuẹ yegụzị wẹ nwẹn ezumikẹn kẹ ọ dọn ye ụnụ, e nwọnringụ wẹ alị hụ Osolobuẹ wụ Chuku ụnụ rị e ye wẹ. Wẹ werigụọ a kẹ ụnụ e kinhẹnzi ebeni d'e biri alịnị wụ nke ụnụ hụn odibo Osolobuẹ wụ Mozizi ye ụnụ ebeni ẹbamịn ọwụwa-ẹnyanwụn Iyi-Jọdanị, azụụnnị anwụn nọ a wa.”

¹⁶ Wẹ nọ sị Joshụa, “Ihiẹn ọwụlẹ ị sị ẹnyi mẹ, ẹnyi sikọ d'e mẹ ẹ; ebe ọwụlẹ i zi ẹnyi, ẹnyi jẹnkọ d'e jẹn.

¹⁷ Kẹ ẹnyi dọn humẹchanrịnnị Mozizi isi kẹ ẹnyi k'a dọn humẹni i isi. Osolobuẹ wụ Chuku i ya nọyen'i hụ k'o dọn nọyeni Mozizi.

¹⁸ Onyẹ ọwụlẹ pa oku i, mẹlẹni ihiẹn i ku — ihiẹn ọwụlẹ i ku, wẹ sikọ d'e gbu hụnyẹ. Ka kakẹnmẹ; rikin obi.”