Jọnụ Ibuzọ 5 - Ika

Isi Nke Isẹn Kẹ Ẹnyi Dọn E Mẹri Ụwa

¹ Onyẹ kweri nị Jisọzị wụ Kraịstị, hụnyẹ wụ nwa Osolobuẹ; onyẹ ọwụlẹ nwọn ihiẹn-ọsụsụọ nẹdi, nwọnzikwọ ihiẹn-ọsụsụọ onyẹ hụn ọ mụ.

² Ihiẹn ẹnyi gi a marịn nị ẹnyi nwọn ihiẹn-ọsụsụọ ụmụ Osolobuẹ wụ nị ẹnyi nwọn ihiẹn-ọsụsụọ Osolobuẹ, e mẹ ihiẹn o ku.

³ Kẹ ẹnyi dọn e nwọn ihiẹn-ọsụsụọ Osolobuẹ wụ nị ẹnyi rị e mẹ ihiẹn ọ sị ẹnyi mẹ — bụ ihiẹn ọ sị ẹnyi mẹ ẹlẹ ibu,

⁴ makẹni onyẹ ọwụlẹ Osolobuẹ mụ e mẹri ụwa. Ikẹn hụn ẹnyi gi e mẹri ụwa wụ okukwe ẹnyi.

⁵ Onyẹ a sa nwan ẹka e mẹri ụwa mmanị onyẹ hụn gi ẹ dọn nị Jesu wụ Nwa Osolobuẹ?

Ihiẹn Ghọsị Nị Jesu Wụ Nwa Osolobuẹ

⁶ Jizọs Kraịstịnị gi mirin lẹ ẹdeke ghọsị onyẹ ọ wụ. Ẹlẹ mirin sụọ, kanị mirin lẹ ẹdeke. Mmọn-nsọ lẹ enwẹn ẹ rị a shịa ẹrini, makẹni Mmọn-nsọ wụ Onyẹ ezioku.

⁷ Ya wụ nị wẹ rị ẹtọ rị a shịa ẹri [elu-igwee: Chuku-Nẹdi lẹ Oku Osolobuẹ lẹ Mmọn-nsọ, wẹ ẹtịtọ wụ ohu;

⁸ wẹ rịzịkwọ ẹtọ hụn a shịa ẹri elu-ụwa:] Mmọn-nsọ lẹ mirin ahụn lẹ ẹdeke ahụn. Wẹ ẹtịtọ rị e kuye ọnụ ohu.

⁹ Omẹni ẹnyi e gi ẹri ịhịan shịa e dọn, hụn Osolobuẹ shịa kadẹ ezioku a wụ. Osolobuẹ ahụn a shịagụọnị Nwa a ẹri.

¹⁰ Ya wụ, onyẹ hụn kwerini Nwa Osolobuẹ e gigụọ ẹrini dọn imẹ obi ẹ; kanị onyẹ hụn kwerilẹni a kpọgụọ Osolobuẹ onyẹ-ntụ, makẹni o gini ẹri Osolobuẹ shịanị Nwa a dọn.

¹¹ Ọnwan wụ ẹri hụ Osolobuẹ shịa: Osolobuẹ e yegụọ ẹnyi ndụn itẹbitẹ, imẹ Nwa a kẹ ndụn itẹbitẹ hụ rị.

¹² Onyẹ nwọn Nwa a hụ nwọn ndụn, kanị onyẹ hụn nwọnlẹni Nwa Osolobuẹ enwọn ndụn.

Ndụn Itẹbitẹ

¹³ M rị e deni ụnụ ndị kwerini ẹfan Nwa Osolobuẹ, kẹni ụnụ marịn nị ụnụ nwọn ndụn itẹbitẹ.

¹⁴ Ihiẹn ọzọ obi gi e ru ẹnyi alị ebe Osolobuẹ rị wụ ọnwan: nị omẹni ẹnyi rịọ a ihiẹn k'ọ dọn rị a obi, ọ nụ ekpere ẹnyi.

¹⁵ O mẹ nwan nị ẹnyi a marịnghọ nị ọ nụ ekpere ẹnyi a nụ, ya wụ ẹnyi a marịnzịghọ nị ẹnyi e nwọnhẹn ihiẹn ẹnyi rịọ a.

¹⁶ Onyẹ hụn nwẹnẹ ẹ k'ọ rị e mẹ njọ, njọ hụn ghalẹni ẹ buhẹ ọnwụn, ya mẹn'ẹ ekpere, Chuku k'e ye nwẹnẹ ẹ hụ ndụn — ọnwan wụ nke ndị hụn mẹ njọ ghalẹni e buhẹ ọnwụn. Njọ e buhẹ ọnwụn rị arị: asịnị m ụnụ mẹni onyẹ mẹ ọhụn ekpere.

¹⁷ Eje-omumẹ ile wụ njọ, kanị o nwọnghọ njọ ghalẹni e buhẹ ọnwụn.

¹⁸ Ẹnyi a marịnghọ nị onyẹ Osolobuẹ mụ ara mẹ njọ, makẹni Kraịstị, Onyẹ hụ Osolobuẹ mụ, e che ẹ nche, Eje-onyẹ hụ ara mẹtụ a ẹka.

¹⁹ Ẹnyi a marịnghọ nị ẹnyi wụ nke Osolobuẹ kanị ụwa ile rị okpuru Eje-onyẹ hụ.

²⁰ Ẹnyi a marịnghọ nị Nwa Osolobuẹ a bịagụọ, n'o yegụọ ẹnyi nghọta hụn ẹnyi e gi marịn onyẹ ahụn wụ Ezioku. Ẹnyi rị nwan imẹ onyẹ ahụn wụ Ezioku lẹ Nwa a wụ Jesu Kristi. Ịya wụ Osolobuẹ nke-esi lẹ ndụn-itẹbitẹ.

²¹ Ụmụẹka, gba nị nị mmọn ile wụlẹni Osolobuẹ ọsọ!