Jọnụ Ibuzọ 4 - Ika

Isi Nke Ẹnọ Mmọn Osolobuẹ Lẹ Mmọn Eṅẹnrẹn-Kraịstị

¹ Ndị nke m, ẹlẹ mmọn ile gi ịhịan ku oku kẹ ụnụ k'e kweyeni, ka e lelegụ nị kẹ wẹ gha ẹka Osolobuẹ bịa nke-esi, makẹni, ndị amụma-ntụ bu ọda a pụhagụọ imẹ ụwa.

² Ọnwan kẹ ụnụ e gi marịn hụn wụ nke Osolobuẹ: hụn ọwụlẹ sị nị Jizọsị Kraịstị gi ẹhụ ịhịan bịa, ọhụn wụ nke Osolobuẹ,

³ kanị mmọn ọwụlẹ sị nị Jizọsị Kraịstị egini ẹhụ ịhịan bịa, ọhụn ẹlẹ nke Osolobuẹ. Ọhụn wụ mmọn Eṅẹnrẹn-Kraịstị hụn ụnụ nụ n'ọ lala alala: ọ rịgụọlẹ nwan imẹ ụwa.

⁴ Ụmụẹka, ụnụ wụ nke Osolobuẹ; ụnụ e mẹrigụọ wẹ, makẹni onyẹ rị imẹ ụnụ ka onyẹ rị imẹ ụwa.

⁵ Wẹ wụ nke ụwa. Makẹni wẹ wụ nke ụwa, w'e ku kẹ ndị ụwa, ụwa hụ e gọn wẹ ntịn.

⁶ Ẹnyi nwẹn wụ nke Osolobuẹ. Onyẹ marịn Osolobuẹ e gọn ẹnyi ntịn. Onyẹ wụlẹni nke Osolobuẹ ara gọn ẹnyi ntịn. Ọnwan kẹ ẹnyi gi a marịn mmọn hụn wụ ezigbo ẹ lẹ mmọn e dufieni.

Onyẹ Nwọn Osolobuẹ E Nwọnzi Ihiẹn-ọsụsụọ

⁷ Ezigbo umunẹ, nị ẹnyi e nwọn ni ihiẹn-ọsụsụọ ibe ẹnyi, makẹni ihiẹn-ọsụsụọ wụ nke Osolobuẹ. Onyẹ nwọn ihiẹn-ọsụsụọ, Osolobuẹ mụ a, ọ marịnghọ Osolobuẹ.

⁸ Onyẹ nwọnlẹni ihiẹn-ọsụsụọ amarịn Osolobuẹ, makẹni Osolobuẹ wụ ihiẹn-ọsụsụọ.

⁹ Osolobuẹ a ghọsịgụọ n'o nwọn ihiẹn-ọsụsụọ ẹnyi — ebe ọ nọ zihẹ akpụ Nwa a ohu imẹ ụwa, kẹni ẹnyi hụn ụzọ rị ndụn ghahan'a.

¹⁰ Ọnwan wụ ihiẹn-ọsụsụọ: ẹlẹni ẹnyi e nwọn ihiẹn-ọsụsụọ Osolobuẹ, kanị Osolobuẹ nọ nwọn ihiẹn-ọsụsụọ ẹnyi, gi ẹ zihẹ Nwa a n'ọ wụrụ ẹjan wẹ gi wepụ njọ ẹnyi.

¹¹ Ndị nke m, ebe o mẹ eziẹ nị Osolobuẹ nwọn ihiẹn-ọsụsụọ ẹnyi ẹnịna, ẹnyi nwẹn gi ibe ẹnyi ụgwọ ihiẹn-ọsụsụọ.

¹² Onwọntuni onyẹ gi ẹnya a hụn Osolobuẹ, kanị omẹni ẹnyi nwọn ihiẹn-ọsụsụọ ibe ẹnyi, ya wụ nị Osolobuẹ bi imẹ ẹnyi, ihiẹn-ọsụsụọ a zuzikwọ oke imẹ ẹnyi.

¹³ Ihiẹn ẹnyi gi marịn nị ẹnyi rị imẹ ẹ, ya nwẹn hụ imẹ ẹnyi, wụ n'o yegụọ ẹnyi Mmọn-nsọ a.

¹⁴ Ẹnyi a hụngụọ a, ku ẹ, nị Chuku-Nẹdi e zihẹgụọ Nwa a d'a wụ Onyẹ-nzụọpụha ụwa.

¹⁵ Ndị ile sị nị Jesu wụ Nwa Osolobuẹ kẹ Osolobuẹ bi imẹ wẹ, wẹ nwẹn bizikwọ imẹ Osolobuẹ.

¹⁶ Ẹnyi a marịnọlẹ nwan nị Osolobuẹ nwọn ihiẹn-ọsụsụọ ẹnyi, ẹnyi e giọl'a dọn. Osolobuẹ wụ ihiẹn-ọsụsụọ. Onyẹ hụn gi ihiẹn-ọsụsụọ e bi rị imẹ Osolobuẹ, Osolobuẹ lẹ enwẹn ẹ rị imẹ onyẹ hụ.

¹⁷ Ibi ẹrịra kẹ ihiẹn-ọsụsụọ e gi zu oke imẹ ndụn ẹnyi, kẹni obi ru ẹnyi alị Ụhụọhịn Okinkin-ikpe, makẹni ẹnyi hụ e bi kẹ ịya imẹ ụwanị.

¹⁸ Egun ara tụ onyẹ gi ihiẹn-ọsụsụọ e bi — ihiẹn-ọsụsụọ zu oke a chụpụ egun. Onyẹ rị a tụ egun gbakọnị afụnfụn; onyẹ rị a tụ egun enwọn ihiẹn-ọsụsụọ zu oke.

¹⁹ Ẹnyi rị nwan e nwọn ihiẹn-ọsụsụọ makẹni o buọlẹ ụzọ nwọn ihiẹn-ọsụsụọ ẹnyi.

²⁰ Omẹni ịhịan sị, “M nwọn ihiẹn-ọsụsụọ Osolobuẹ,” bụ ọ hụ e ze ize ibe ẹ, onyẹ-ntụ k'ọ wụ. Makẹni, omẹni ịhịan enwọnni ihiẹn-ọsụsụọ ibe ẹ hụn ọ rị e legha, ọ sakọ ẹka nwọn ihiẹn-ọsụsụọ Osolobuẹ o leghatulẹni.

²¹ Iwu o ye ẹnyi wụ ọnwan: onyẹ nwọn ihiẹn-ọsụsụọ Osolobuẹ, ya nwọnzikwọ ihiẹn-ọsụsụọ ibe ẹ.