Jọnụ Ibuzọ 2 - Ika

Isi Nke Ẹbụọ Kraịstị Ya E Dọnmẹ Ẹnyi Ọchan

¹ Ụmụ m, m rị e deni ụnụ ihiẹn ndịnị amamgbe ụnụ gha e mẹ njọ. Kanị, omẹni ịhịan mẹ njọ, ẹnyi nwọn onyẹ a rịọdọnni ẹnyi Chuku-Nẹdi: Jesu Kristi hụn rị ọchan rọ.

² Ya lẹ enwẹn ẹ wụ ẹjan wẹ gi wepụ njọ ẹnyi; ẹlẹdẹ njọ ẹnyi sụọ, kanị njọ ụwa ile.

³ Ihiẹn ẹnyi gi a marịn nị ẹnyi a marịnghọ Osolobuẹ nke-esi wụ nị ẹnyi hụ e mẹ ihiẹn ọ gwa ẹnyi.

⁴ Onyẹ sị ọ marịnghọ Osolobuẹ bụ ara mẹ ihiẹn Osolobuẹ ku, hụnyẹ wụ onyẹ-ntụ, ezioku arị imẹ onyẹ hụ.

⁵ Kanị onyẹ hụn a gbaye oku Osolobuẹ, ịya nwọn ihiẹn-ọsụsụọ Osolobuẹ k'o furu. Ihiẹn ẹnyi gi a marịn nị ẹnyi rị imẹ ẹ wụ ọnwan:

⁶ onyẹ hụn sị n'ọ rị imẹ ẹ sikọ d'e birịrị k'o dọn bi.

Iwu Ọhụn

⁷ Ndị nke m, arị m e deni ụnụ iwu ọhụn; kama, iwu ohu ahụn wẹ ye ụnụ isi-ibuzọ rọ. Ozi hụ ụnụ nụ, ịya wụ iwu mbụ ahụn m rị e ku oku ẹ;

⁸ kanị iwu ọhụn rọzị: Iwu ọhụnnị wụ ezioku, ọ hụ imẹ Kraịstị, ọ hụzịkwọ imẹ ụnụ — makẹni ishi hụ a ghafe, ezigbo ukpẹ e nwunmẹgụọ.

⁹ Onyẹ ọwụlẹ sị n'ọ rị imẹ ukpẹ bụ ize ibe ẹ hụ e ze ẹ, echẹn kẹ onyẹ hụ rịkwọ imẹ ishi.

¹⁰ Onyẹ hụn nwọn ihiẹn-ọsụsụọ ibe ẹ hụkwọ imẹ ukpẹ, onwọnni ihiẹn rị imẹ ẹ w'a kpọgburu.

¹¹ Kanị, onyẹ hụn e ze ize ibe ẹ rị imẹ ishi; imẹ ishi k'ọ ghakọ, ọ marịn ebe o jẹnkọ makẹni ishi hụ a gbakingụọ a ẹnya.

¹² Ụmụẹka, m rị e deni ụnụ nị m gi gwa ụnụ nị Osolobuẹ e gigụọ ufiri ẹfan Jizọsị gbagharị ụnụ njọ.

¹³ Ndị nẹdi, m rị e deni ụnụ makẹni ụnụ a marịngụọ onyẹ hụ rị gha mbidọn lala. Ikoro, m rị e deni ụnụ makẹni ụnụ e mẹrigụọ Eje-onyẹ hụ.

¹⁴ Ụmụẹka, m deni ụnụ ihiẹnni makẹni ụnụ a marịngụọ Chuku-Nẹdi ẹnyi. Ndị nẹdi, m deni ụnụ ihiẹnni makẹni ụnụ a marịngụọ onyẹ hụ rị gha mbidọn lala. Ikoro, m deni ụnụ ihiẹnni makẹni ụnụ e zeghọ, makẹni oku Osolobuẹ rị imẹ ụnụ, makẹni ụnụ e mẹrigụọ Eje-onyẹ hụ.

Anịkwọlẹ Ni Ihiẹn-ụwa Sụọ Ụnụ!

¹⁵ Anịkwọlẹ ni ụwa mọbụ ihiẹn rị ụwa a sụọ ụnụ, makẹni ihiẹn Chuku-Nẹdi ẹnyi ara sụọ onyẹ ụwa a sụọ.

¹⁶ Makẹni, ihiẹn ile rị imẹ ụwa, kẹ ẹgụn ihiẹn-ụwa kẹ ihiẹn-ọlịlẹnya kẹ ịchọ ihiẹn-ụwa obi gi e ru ịhịan alị, onwọnni hụn gha ẹka Nẹdi ẹnyi bịa — wẹ ile wụ nke ụwa;

¹⁷ kanị ụwa lẹ ihiẹn-ọlịlẹnya ile rịn'a ghafekọ aghafekọ, kanị onyẹ hụn e mẹ uche Osolobuẹ k'a rị jẹnrin ejẹn.

Eṅẹnrẹn Kraịstị Ahụn W'a Kpọ Anti-Kraịstị

¹⁸ Ụmụ m, ogẹnni wụ ogẹn ikpanzụụn! Ụnụ a nụgụọ a nị onyẹ ahụn wụ Eṅẹnrẹn-Kraịstị (Anti-Kraịstị) lala. Ndị-iṅẹnrẹn Kraịstị bu ọda a pụhagụọ nwan. Ịya kẹ ẹnyi gi a marịn nị ogẹnni wụ ogẹn ikpanzụụn.

¹⁹ Ezioku rọ nị imẹ igunrun ẹnyi kẹ ndịnị gha pụ, kanị, ẹlẹ wẹ ndị nke ẹnyi. Makẹni, omẹni wẹ wụ ndị nke ẹnyi, nkẹ e sọn wẹ ẹnyi nọdị. Kanị, ọpụpụ wẹ pụ imẹ igunrun ẹnyi k'o gi wechanrịn ẹnya nị ẹlẹ wẹ ndị nke ẹnyi.

²⁰ Nke ụnụ, udẹn Mmọn-nsọ hụn Onyẹ hụ rị nsọ te ụnụ rị imẹ ndụn ụnụ, ụnụ a marịnghọ ihiẹn ile.

²¹ Ẹlẹ ni ụnụ amarịn ezioku haịn m gi e deni ụnụ, kanị, makẹni ụnụ a marịngụọ a — ụnụ a marịnghọ n'o nwọnni ntụ a gha imẹ ezioku a pụha.

²² Onyẹ wụ nwan onyẹ ntụ mmanị onyẹ sị nị Jizọsị ẹlẹ Kraịstị. Onyẹ nọ ẹrịra wụ eṅẹnrẹn Kraịstị; ara kwerini Chuku-Nẹdi lẹ Nwa a.

²³ Ẹghẹẹ! Makẹni onyẹ hụn jụ Nwa Chuku enwọn Chuku-Nẹdi imẹ ndụn a; onyẹ hụn kwerini Nwa Chuku e nwọnzighọ Chuku-Nẹdi.

²⁴ A nị nị ozi hụ ụnụ nụ isi-ibuzọ a rịsọnmẹ imẹ ndụn ụnụ. Omẹni ihiẹn ụnụ nụ isi-ibuzọ a rịsọnmẹ imẹ ndụn ụnụ, ụnụ sikọ d'a rịsọnmẹ imẹ Nwa Chuku lẹ imẹ Chuku-Nẹdi:

²⁵ o kweọlẹ ẹnyi nkwa ndụn itẹbitẹ.

²⁶ M rị e deni ụnụ ihiẹnni makẹ ndị ahụn rị a chọ nị wẹ dufie ụnụ.

²⁷ O mẹ nke ụnụ, udẹn Mmọn-nsọ a hụn rị imẹ ndụn ụnụ a kuzi ụnụ ihiẹn ile, ẹlẹzi hụn ụnụ e gi chọmazị onyẹ k'a kuzini ụnụ. Ihiẹn udẹn Mmọn-nsọ a kuzi ụnụ wụ ezioku — ntụ arị a. Mẹ ni nwan ihiẹn ọ kuzi ụnụ: nọdị nị imẹ Kraịstị.

²⁸ Ẹghẹẹ ụmụẹka, nọdị nị imẹ ẹ, kẹni obi ru ẹnyi ile alị ogẹn o gi bịa, amamgbe ifẹnrẹn e mẹ ẹnyi ihun ẹ Ụhụọhịn o k'a bịa.

Kẹ W'a Dọn A Marịn Ụmụ Osolobuẹ

²⁹ Omẹni ụnụ a marịnghọ n'ọ rị ọchan, gi n'ẹ marịn nị ịya mụ onyẹ ọwụlẹ e bi obibi rị ọchan.