Jọnụ 9 - Ika

Isi Nke Itenẹi Jizọsị A Zụọ Okẹnnyẹ Wẹ Mụ Ẹnya-ishi

¹ Ogẹn Jizọsị gi ghafekọ, ọ nọ hụn onyẹ ẹnya kpu ishi kete wẹ mụl'a.

² Ndị nsọnmazụụn a nọ jụ a, “Onyẹ-nkuzi, onyẹ mẹ njọ wẹ gi mụ okẹnnyẹni ẹnya-ishi, ịya ra ndị mụn'a?”

³ Jesu nọ sị, “Onwọnni; wẹ mụ a ẹnya-ishi kẹni Osolobuẹ ghọsị ikẹn ẹ imẹ ndụn a.

⁴ Ẹnyi sikọ d'a rụnrịrị ọrụn onyẹ zihẹni m ebe eki rị elu, makẹni uhinhin lala, ogẹn wẹ ghalẹni a s'ẹka a rụn ọrụn.

⁵ Hụnnị m rị imẹ ụwa, mmẹ wụ ukpẹ ụwa.”

⁶ O kugụ ihiẹnni, ọ nọ jụ ẹsọn ye ẹjan rị alị, kpụrụ ẹjan buche ẹnya-ishi hụ ẹnya.

⁷ Ọ nọ sị ẹnya-ishi hụ, “Jẹn mirin Silụam d'e fin ihun.” (Silụam wụ “Hụn wẹ zijẹn.”) O jẹn d'e fin ihun, ọ nọ leghama ụzọ lụaha.

⁸ Ndị nọchimẹn'ẹ lẹ ndị marịn n'o te a rịọ ụrịọ hụ a sị, “Ẹlẹ hụn a nọdị alị a rịọ ụrịọ wụ ọnwan?”

⁹ Ụfọdụ sị, “Ịya rọ.” Ndị ọzọ sị, “Mba, kanị o yi ẹ eyi.” Kanị ya nwẹn nọ sị, “Mmẹ rọ.”

¹⁰ Wẹ nọ jụ a, “Nanị ị dọn nwan leghama ụzọ?”

¹¹ Ọ sị, “Okẹnnyẹ hụ w'a kpọ Jizọsị kpụrụ ẹjan te m ẹnya, sị m, ‘Jẹn mirin Silụam d'e fin ihun.’ Ya m nọ jẹn d'e fin ihun; m rị nwan e legha ụzọ!”

¹² Wẹ sị a, “Ebe okẹnnyẹ hụ rị?” Ọ nọ sị, “Amarịn m.”

Ndị Itu-Farisi E Leban Nzụọrị Hụ Ẹnya

¹³ Ya wẹ nọ we onyẹ hụ ẹnya te kpu ishi jẹnni ndị Itu-Farisi.

¹⁴ (Ụhụọhịn hụ Jesu kpụrụ ẹjan shịapụ a ẹnya wụ Ụhụọhịn Ezumikẹn.)

¹⁵ Ya ndị Itu-Farisi nọ jụma a k'ọ dọn leghama ụzọ. Ọ nọ sị wẹ, “O kpụrụ ẹjan buche m ẹnya, e fin m ihun; m rị nwan e legha ụzọ.”

¹⁶ Ụfọdụ ndị Itu-Farisi nọ sị, “Ẹlẹ Osolobuẹ zi okẹnnyẹni makẹni ara dọnmẹ iwu Ezumikẹn.” Ndị ọzọ sị, “Nanị onyẹ-njọ dọn nwan a saẹka a rụn ọrụn-atụmẹnya ndịnị?” Wẹ nọ kebe.

¹⁷ Ya wẹ nọ sịzị hụn ahụn ẹnya te kpu ishi, “Kị yụ nwẹn ku banyen'ẹ, ebe o mẹ ni ya shịapụ ị ẹnya?” Ọ nọ sị, “Onyẹ-amụma rọ.”

¹⁸ Ndị Ju hụ ete kwerini nị ẹnya te kpu ẹ ishi d'e ru n'a kpọha wẹ ndị mụn'a.

¹⁹ Wẹ nọ jụma ndị mụn'a, “Ọnwan wụ nwa ụnụ hụn ụnụ sị nị ụnụ mụ a ẹnya-mpịn? Nanị k'o dọn nwan leghama ụzọ?”

²⁰ Ya ndị mụn'a nọ za, “Ihiẹn ẹnyi marịn wụ nị nwa ẹnyi rọ lẹ nị ẹnyi mụ a ẹnya-mpịn.

²¹ Ẹnyi amarịn k'o dọn nwan leghama ụzọ mọbụ onyẹ shịapụ a ẹnya. Jụn'a nwan n'o rugụọ ogo. Ya sikọ d'e ku ọnụ a.”

²² (Ndị mụn'a ku ẹrịra makẹlẹ egun ndị-ndu ndị Ju rị a tụ wẹ. Makẹni, ndị-ndu ndị Ju e kwerigbamaọlẹ nị onyẹ sị nị Jizọsị wụ Kraịstị, a chụpụ w'a imẹ ụlọ-ofufe.

²³ Ya haịn ndị mụn'a gi sị, “Jụn'a n'o rugụọ ogo.”)

²⁴ Ya wẹ nọ kpọ okẹnnyẹ hụ ẹnya te kpu ishi nke mgbe ẹbụọ, sị a, “Ku ezioku gi ye Osolobuẹ ọghọ! Ẹnyi a marịnghọ nị okẹnnyẹni wụ onyẹ-njọ.”

²⁵ Ọ nọ sị, “Omẹni onyẹ njọ rọ amarịn m. Ihiẹn ohu m marịn wụ nị ẹnya te kpu m ishi, kalẹ, e leghamagụọ m nwan ụzọ!”

²⁶ Ya wẹ nọ sị a, “K'o mẹ i? Nanị k'o dọn shịapụ ị ẹnya?”

²⁷ Ọ nọ sị wẹ, “A gwagụọ m ụnụ, ụnụ egini ẹ dọn. Kị ụnụ chọkọnị nị ụnụ nụzị a? Ra ụnụ chọkọ nị ụnụ wụrụ ndị nsọnmazụụn a?!”

²⁸ Ya wẹ nọ kpọma a iyi, a sị, “Ịyụ wụ onyẹ nsọnmazụụn a! Ndị nsọnmazụụn Mozizi kẹ ẹnyi wụ.

²⁹ Ẹnyi a marịnghọ nị Osolobuẹ gwa Mozizi oku, kanị o mẹ nke okẹnnyẹni, ẹnyi amarịndẹ ebe ọ gha bịa!”

³⁰ Okẹnnyẹ hụ nọ sị wẹ, “Okẹn ihiẹn! Ụnụ amarịn ebe ọ gha bịa bụ ọ shịapụ m ẹnya!!

³¹ Ẹnyi a marịnghọ nị Osolobuẹ ara gọn onyẹ-njọ ntịn, nị onyẹ e fen'ẹ lẹ onyẹ e mẹ uche ẹ k'o gọn ntịn.

³² Kete ụwa e bidọnlẹ, ẹnyi anụtuni nị wẹ shịapụ ẹnya onyẹ wẹ mụ ẹnya-ishi.

³³ Omẹni okẹnnyẹni ẹlẹ nke Osolobuẹ, o ke saẹka mẹ ihiẹn ọwụlẹ.”

³⁴ Wẹ nọ sị a, “Imẹ njọ kẹ wẹ nọchanrịn mụ ị; yụ k'a kuzimẹzi ẹnyi?!” Ya wẹ nọ chụpụ a imẹ ụlọ-ofufe.

Ẹnya-ishi Imẹ-mmọn

³⁵ Jizọsị nụ nị a chụpụgụọ w'a. Ọ hụn a, ọ nọ sị a, “Y'e kwerighọ nị Nwa nke Ịhịan?”

³⁶ Ọ nọ za, sị, “Onyẹ rọ Diọkpa? Gwa m, kẹni m hụn ụzọ kwerin'ẹ!”

³⁷ Jizọsị nọ sị a, “Y'a hụngụọ a: onyẹ yụ lẹ ya rị e ku oku rọ.”

³⁸ Ọ nọ sị, “Di-nwọnni-ẹnyi, e kwerighọ m.” Ọ nọ gbuni Jesu osekpu.

³⁹ Jesu nọ sị, “M bịa ụwanị d'a han eṅẹn, kẹni ndị ẹnya-ishi leghama ụzọ, ndị e legha ụzọ a wụrụ ẹnya-ishi.”

⁴⁰ Ndị Itu-Farisi nọkunmẹn'ẹ a nụ ihiẹnni o ku, wẹ nọ jụ a, sị, “Ẹnyi nwẹn wụzịdẹ ndị ẹnya-ishi ra?”

⁴¹ Jizọsị nọ za wẹ, “Omẹni ụnụ te wụ ndị ẹnya-ishi, ikpe njọ eke ma ụnụ; kalẹ, ebe ụnụ sị, ‘Ẹnyi hụ e legha ụzọ’, njọ ụnụ hụkwọ ebe ọ rị.”